Varshik Sangeet Mala 2006 : Sartaaj Geet

Dukh phasaana nahin ki tujhse kahoon
Dil bhi maana nahin ki tujhse kahoon

Aaj tak apni bekali ka sabab
Khud bhi jana nahin ki tujhse kahoon

Ahmad Faraz

Ye dukh bhi ajeeb se cheez hai. Ek baar andar palne lage to jee ghut ta sa rehta hai. Iksha bhi nahin hoti ki kisi ko kahein . Par koyi bhi baandh kitna bhi ooncha kyun na ho ek din to bharega hi aur usse beh kar nikalne waali peeda doosron ko bhi dard mein dubaayegi hi. Meri is sangeet srinkhala ke shikhar par virajmaan is geet kuch aisa hi dard udelta hua dil mein naksh ho jata hai.

Aakhir Umraao Jaan ki Ameeran ne us baandh ke toot jane ke baad hi aisa kaha hoga..

agle janam mohe bitiya na keejo....

Us jamaane ki ameran ki zindagi se door bhi chitak jayein to aaj bhi samaaj ke ek varga , ladki ke roop mein janma lena ko ek abhishapta zindagi ki shuruaat hi maanta hai.

• Varna Punjab jaise samridha aur apekshakrit viksit pradesh mein bhroona hatyayein kyun kar hotin ?
• Dahej ke lobhi kyun kar apni nahin to kisi aur ki bitiya ko jalate?
  Shiksha ke mandir aur aashram mein bhi padhai ki aad mein bachchon ka yaun shoshan kyun hota ?
• Balaatkar ke doshi bhi seena taan kar bina kisi sharmindagi ke nyaayaalay mein kyun jate aur bedaag choot kar aate?

Roz roz aisa hote dekh bhi humara samaj chetna shunya sa kyun bana rehta hai. Sach to ye hai ki mastishk ke kisi kone mein humari soch nahin badli hai.

Jab bhi ye geet sunta hoon Richa Sharma ki aawaaz se nikalte shabdon ka dard dil mein jakar is kadar phail jata hai ki apne charon or ke tathakathit sabhya aur sikshit samaj mein ho rahi in ghatnaoon se nikalte ye sawal man mastishka mein saanp ke fan ki tarah dasne ko daudte hain.

Ye geet isiliye bhi mera pehle no. ka geet hai kyunki is geet ki peeda itni jeevant lagti hai ki dil mein ek jazba aur mazboot hota hai ki jo ho chukka use to nahin badal sakte par aane wale kal mein kuch to karein jisse kisi ki beti ko is geet ke dard se na guzarna pade.

Javed sahab ne is geet mein ek bitiya ke dard ko apni lekhni ke jaadu se is qadar ubhara hai ki ise sunne ke baad aankhein nam huye bina nahin reh paatin.Ritcha jee kee gehri aawaaz, awadhi jubaan par unki mazboot pakad aur parshva mein Anu Malik ka shaant behta sangeet Geet, sangeet aur gaayiki ke is behtareen sangam ko shayad hi koyi sangeetpremi sunne se vanchit rahna chahega

Ab jo kiye ho daata aisa na keejo
agle janam mohe bitiya na keejo.ऽऽऽऽ

Jo ab kiye ho daata, aisa na keejo
agle janam mohe bitiya na keejo...

Hamre sajanwa hamra dil aisa todin
Oo ghar basaain hamka rasta ma chhodin
jaise ki lalla koi, khilona jo paave
dui char din to khele, phir bhool jaave
ro bhi na paave aisi gudiya na kijo
agle janam mohe bitiya na keejo

jo ab kiye ho daata aisa na keejo
agle janam mohe bitiya na keejo

Aisi bidai bolo dekhi kahin hai
maiya na babul bhaiya, kauno nahin hai
ho..., aansu ke gehne hain, aur dukh ki hai doli
band kivadiya more ghar ki boli
is oor sapnon mein bhi aaya na keejo

agle janam mohe bitiya na keejo
jo ab kiye ho daata aisa na keejo
agle janam mohe bitiya na keejo
agle janam mohe bitiya na keejo


To suniye is geet ko aur izzazat deejiye mujhe. Asha hai pichle do mahine se chali aa rahi is sangeetmala ke kuch geeton ne aapke man ko bhi chhua hoga. Bahut bahut shuktiya un logon ka jo is shrinkhla ke dauraan yahan aate rahe aur apni raay se mujhe avgat karate rahe.

Is geet ki link meri Nov. mein likhi is post par aapko mil jayegi .

हिन्दी में इस पोस्ट को पढ़ने के लिए यहाँ क्लिक करें ।

Varshik Sangeetmala 2006 : RECAP

To bhai isse pehle ki Paaydaan no. 1 ke mere sartaaj geet ka khulasa karoon ek chota sa recap ho jaaye. Pichle saal ki apeksha ye saal pichle heroes Swanand Kirkire aur Sonu Nigam ke liye kuch pheeka raha. Wahin Gulzaar Omkara, Guru, Jaaneman ke geeton mein poori form mein dikhayi pade. Prasoon Joshi ne bhi Rang De Basanti aur Fanaa ke liye kuch achche geet likhe.

Shreya Ghoshal, Sunidhi Chauhan, Abhijit, KK jaise sthaapit gaayakon ke sath Shafqat Amanat Ali Khan, Atif Aslam, Amanat Ali Khan Chinmayi aur Zubeen Garg jaise navodit pratibhavaan gayak kandhe se kandha milate dikhe.

Meri samajh se Omkara is varsh ka sarvashreshtha album raha. Nischay hi iske sangeetkaar Vishal Bhardwaaj aur geetkaar Gulzaar badhai ke patra hain

To doston isse pehle ki main apni pasand ke sartaaj geet ke bare mein bataoon aap kuch guess nahin karenge. Kya Kaha mushkil hai. Chaliye kuch clue humde diye dete hain..

Clue no. 1 - Its not written by Gulzaar :)
Clue no. 2 - Its not very popular song .
Clue no. 3 - Is geet ko jisne gaya hai wo pehli baar is geetmala mein kadam rakhega apni aawaaz ke sath..

Clue No. 4 : Pahle to International Women's Day ke avsar par mere blog readers ko hardik shubhkaamnayein. Somehow is saal ka mera no. ek ka song is also related with issues concerning women in a way.

hmmm. getting more confused. :)
Khair aap apne guess ke sath mujhe is saal ka apna fav song bhi bataiye. mujhe apki pasand jaankar khushi hogi. Aur jab tak aap ye sab sochein ek baar phir se poori list padh lee jaaye.

1 . ?? U have to Guess :)??

2. Mere Man ye Bata De Tu.. from KANK

3. O Saathi Re from Omkara

4. Jaage Hain Der Tak from Guru

5. Tere Bin Main Yoon Kaise Jiya from Bas Ek Pal

6. Beedi Jalai Le Jigar Se Piya from Omkara

7. Ajnabi Shahar Hai from Jaaneman

8. Tere Bina Besuwadi Ratiyan from Guru

9 . Main Rahoon Na Rahoon from Lamhe

10. Lamha Lamha Doori Yoon Pighalti Hai from Gangster

11. Nainaa Thag Lenge from Omkara

12. Teri Deewaani by Kailash Kher

13. Roobaroo Roshani Hai from Rang De Basanti

14. Kya Batayein Ki Jaan Gayi Kaise from Koi Baat Chale

15.Ye Hausala Kaise Jhuke,Ye Aarzoo Kaise Ruke.. from DOR

16. Ye Saajish hai Boondon Kee...Dekho Naa from Fanaa

17. Subah Subah Ye Kya Hua...from I See You

18. Mohe Mohe Tu Rang De Basanti...from Rang De Basanti

19. Chand Sifarish Jo Karta Humari...from Fanaa

20. Bas Yahi Soch Kar Khamosh Main Reh Jaata Hoon..from Unns

21. Kya Mujhe Pyaar Hai ...from Wo Lamhe

22. Tere Pyaar Mein Aise Jiye Hum...from Bas Ek Pal

23. Chand Ho Tum Chaandni Se Bheega Jaye Man..from Aryan

24. Vaada Tainu Yaad Raakhiyo from Aap Ka Suroor

25. Aaj ki Raat, Hona hai Kya , Paana hai Kya, Khona hai Kya from DON

Varshik Sangeetmala - RUNNERS UP : Mere Man Ye Bata De Tu.....

Varsh 2007 ki meri is sangeetmaalaa mein Runners Up ka tamga mila hai Javed Akhtar ke likhe, Shankar Ehsaan Loy dwara sangeetbadha ke kiye is geet ko. Film Kabhie Alwida Na Kehna ke is geet ko gaaya hai Shafqat Amaanat Ali Khan ne.

Ye geet mujhe kyun itna priya hai uske bare mein yahan vistaar se pehle hi likh chuka hoon.

Javed Akhtar apni baat humesha seedhe saral andaaz mein karte hain. Aksar apne geeton mein vo jeevan ke un pehluon ko anaayaas hi choo dete hain jinhein kabhie na kabhie kisi na kisi roop mein hum sab ne mehsoos kiya hota hai. Is geetmala mein wo der se hi tashreef laaye hain is behtareen geet ke saath.. Par sawaal ye hai par kya pratham das geeton mein unki ye eklauti peshkash hogi, ye raaj to khair abhi raaj hi rehnein dein.

Varshik Geetmala Geet # 3 : O Saathi Re Din Doobe Naa...

Waqt aa gaya hai is countdown ke sheersh ke geeton mein se pehle geet ka raaj kholne ka. 5 October,2006 ki apni post pe main is geet par apni rai zahir kar hi chuka hoon. Us waqt maine likha tha...

".....Gulzaar ek aise geetkaar hain jinki kapnayein pahle to sunne mein azeeb lagti hain par aisa isliye hota hai ki unki soch ke istar tak utarne mein thoda waqt lagta hai. Par jab geet sunte sunte man us vichar mein doobne lagta hai to wahi ungadhi kalpnayein adbhut lagne lagti hain. Isiliye inke geet ke liye kuch aisa sangeet hona chahiye jo un bhavnaaon mein doobne ke liye sunne wale ki madad kar sake.

Gulzaar ke liye pahle ye kaam Pancham Da kiya karte the aur is film mein ye kaam yuva sangeetkaar Vishal Bhardwaj ne kiya hai jo gulzar sahab ke ek bade 'fan' hain.

Chalein thoda Gulzaar sahab ki baaton pe bhi to dhyaan dein jo unhone is geet mein kahi hain

Raatein kattee naa thin ya yoon kahein ki raton ko katne dena koyi chahta hi na tha. Par bhai premiyon ke liye ye koyi nayi baat to rahi nahin so ab unhone din ko apna nishana banaya hai. Aur kya khoob banaya hai ki mua sooraj bhi unki giraft mein aa gaya. Ab chinta kis baat kee jab suraj hee ashikanje mein ho. Ab unka hath apne hath mein lekar dhoop aur chaanv ke sath jitna marji katti -patti khelo kaun rokega bhala........"

Khair ye to the mere khayal, khud Gulzaar ne January 2007 mein diye apne interview mein is geet ke bare mein kaha.

". I think that Omkara as a score had a lot of variation and colours. In ‘O saathi re’ I have used some rare poetic imagery wherein I describe sunset by saying that the sky is slippery so that the sun is about to slide into the water, but that can be prevented using a net or by holding it on one’s back. "

Background singing kee baat karein to Shreya kee madhur aawaaz mein jo shokhi aur chanchalta hai vo is geet ke romantic mood ko aur effective banati hai. Wahin vishal ki thehri aawaaz geet ke bahaav ko ek isthirta deti hai. Kul milakar geet, sangeet aur gayan milkar man mein aise utarte hain ki is geet ke prabhav se ubarne ka man nahin hota

o saathi re din doobe na
aa chal din ko roke
dhoop ke peeche daude
chaanv chhuyein na
o saathi re

thaka thaka suraj jab nadi se hokar niklega
hari hari kaayi pe, paanv pada to phislega
tum rok ke rakhna, main jaal giraaun
tum peeth pe lena main haath lagaaun
din dube na ha...
teri meri atti patti
daat se kaati katti
re jaiiyo na
o pihoo re
o pihoo re na jaiyyo na

kabhi kabhi yun karna, main daantoon aur tum darna
ubal pade aankhon se, meethe paani ka jharna
hmm tere dohre badan mein, sil jaaungi re
jab karwat lega , chhil jaaungi re
sang le jaaunga
teri meri angni mangni
ang sang laagi sangni
sang le jaaun
o pihu re

o saathi re din dube na
aa chal din ko roke
dhup ke peeche daude
chaanv chhue na
o saathi re.....

Is geet ko aap yahan bhi sun sakte hain.

Geet # 4: Raat , Neend, Khwaab aur Gulzaar !

Agar aapki shikayat ye ho ki geetmala ki raftaar passenger ki mafik kyun ho gayi hai to uska jawab yahi hai ki pichle 12 dinon mein main sirf 3 din hi ghar par bita paya hoon aur aage bhi ye halaat zari rahenge :(. Is baar hum laute hain Kanpur ki nimmi nimmi thand ka maza lete huye. Neend, Khwaab aur raat ke bare mein agar main sochoon to abhi bhi mujhe safar mein apne dibbe ki thodi si khuli khidki se aati sard hawa ki yaad aati hain jisne humari kachchi neend mein jab tab sendh lagayi. Par Gulzar ki ratjaga karti aankhein to kuch aur phasana bayan karti hain.
Aakhir kaun hai in jaagti aankhon ka kusoorwaar.

Are wahi muye khwaab jo unki neend ke sath arse se kabaddi khelte aaye hain. Yaad hai aapko Ghar film ka Kishore Da ka gaya wo geet jisne hostel ke band kamre mein humari kitni hi raaton ki neend churayi thi.

Phr Wahi Raat Hai
Phir Wahee Raat hai khwabon ki
Raat bhar khwab mein dekha karenge tumhein.

Masoom se neend mein jab koi sapna chale
Humko bula lena tum palkon ke parde tale
Ye raat hai khwab ki, khwab ki raat hai.

Aur phir intezaar ki ghadiyan ginti us raat ki pukaar to kabhi mand hi nahin padi

Khwaab chun rahi hai raat, beqraar hai, tumhara intezaar hai

Ya Phir Jeeva mein Asha ji ke gaye is geet ko hi lein

roz roz Aankhon tale ek hi sapna Chale
raat bhar kaajal jale, Aankh mein jis tarah khwaab ka dia jale

Neend, khwaab aur raat Gulzaar ke priya vishay hain.Shayad ye unki apni zindagi mein bhi kuch khaas maayne rakhte hon. Yahi wazah hai kir inhein shabdon ke jaal mein goonth kar nikla unka har ek geet ek naye aayaam dete prateet hota hai..Chauthi paaydan ki ye nazm inhin shabdon ko jodti huyi dil ke behad kareeb se guzar jaati hai. Film Guru mein is nazm ki pehli 4 lines ka use hua hai kyunki wo kathanak pe ek dam durust baithta hai

Jaage Hain der tak Humin Kuch der sone Do
Thodi si raat aur hain subah to hone do
Aadhe adhure Khwaab Jo Poore Na Ho Sake
Ek Baar Phir se neend mein wo Khwaab Bone Do

Aur agar koyi khwaab dekhte dekhte aapki neend toot jaaye to bhi himmat na harein kyunki

Ek Khawab Toot Jaane Ka Ahsaas Hi to hai
thodi si raat aur Sahar paas hi to Hai

Guru ki is nazm ko aawaz dee hai K.S.Chitra aur A.R.Rahman ne. Waise rahmaan ne apni jagah kisi aur gayak ko mauqa diya hota to nateeja jyada behtar rahta.

Is nazm ko aap yahan bhi sun sakte hain.

Devnaagri mein padhne ke liye yahan click karein.

Geet # 5 : Tere Bin Main Yoon Kaise Jiya...

Pichle hafte office ka kaam se Bangalore aur phir uske aage jana pad gaya, so us wazah se ye geetmaala jahan ki tahan ruk gayi.

Khair isse pehle ki phir se nikalna pade 5 vein paaydan ka geet aapke samaksha prastut hai. Aur ye geet meri list mein yahan isliye hai kyunki iski shaandaar adaygi ne mujhe behad prabhavit kiya hai.

Yani Bas Ek Pal ke is song ke asli hero vo gayak hain jinhone school ke dinon mein apna khali samay ek umda fast bowler banne mein lagaya. Wo to college days mein jab doston ne inki aawaaz suni to zabardasti ek competition mein inka naam dalva diya. Aur uske baad to Rest is History. Kyunki uske baad college ki sari competition mein awwal aate rahe. Phir inka album Jal, Aadat albums bhi kaphi kaamyab hua.

Ab to aap sab samajh hi gaye honge ki yahan baat chal rahi hai Atif Aslam ki. Atif ki sabse khas baat ye lagti hai ki wo oonche sur bhi badi sahajta se laga lete hain. Sayeed Quadri ne virah ki jis bhavna ko lekar ye geet likha hai use Atif ne apni aawaj se aur ubhara hai. Is geet ke liye sangeet diya hai Mithoon ne.

tere bin main yoon kaise jiya
kaise jiya tere bin
tere bin main yun kaise jiya
kaise jiya tere bin
lekar yaad teri raatein meri kati
mujhse baaten teri karti hai chaandani
tanha hai tujh bin raatein meri
din mere din ke jaise nahin
tanha badan, tanha hai ruh, nam meri aankhen rahe
aaja mere ab rubaru
jeena nahi bin tere
tere bin main yun kaise jiya
kaise jiya tere bin


kabse aankhen meri raah mein tere bichhi
bhule se hi kabhi tu mil jaaye kahin
bhule na mujhse baatein teri
bheegi hai har pal aankhein meri
kyun saans loon kyun main jiyoon
jeena bura sa lage
kyun ho gaya tu bewafaaa mujhko bata de wajah
tere bin main yun kaise jiya
kaise jiya tere bin ...
tere bin main yun kaise jiya
kaise jiya tere bin ...

Is geet ko aap yahaan ya yahaan se sun le sakte hain.

Geet #6 ; Jab Jalti Hai 'Beedi' Gaanv ki Nautanki Mein...

Shahar ki chamak damak se door gaanv ki dupahri aur shamein apni ekroopta liye hoti hain. andhere ka aagman hua nahin ki ghar ke bahar ki saari gatividhiyaan thapp. Yani mahanagreey mahoul se ekdam ulat jahan andhere ke saath raat jawaan hoti hai. par manoranjan ki jaroorat kise nahin hoti. aur isi juroorat ko poora karne ke liye gaanvon mein saamaajik utsavon par naach aur nautanki karne ki parampara rahi hai.

Aisa hi mahoul diya Vishal Bhardwaj ne Gulzar ko apni film Omkara mein aur phir ganvayi mitti ki sugandh le kar jo geet nikla uska jaaykaa bharat ke aam jan maanas ki jihwa par bahut dinon tak chadha raha.

Vishal bhardwaj ne Omkara ke is geet ko apne sangeet se jo urja dee hai , use Sukhvinder Singh aur Sunidhi Chauhaan kee mast gaayiki ne aur ubhara hai. Haalanki is geet ke liye screen sangeet award mein shreshtha geetkaar chune jane se Gulzar bahut khush nahin the. kaaran ye nahin ki unhein apna ye geet pasand nahin balki ye ki unhein is geet ko rachne se jyada creative satisfaction is film ke baaki geeton ko likhne mein mila hai. isiliye jab Gulzar ki ye vaktavya maine kuch din pehle padha to mujhe behad khushi huyi kyunki isi vajah se maine is film ke ek aur geet ko oopar ki paaydaan ke liye surakshit rakha hai. :)

Par ye bhi sach hai ki jab mood dhamaal aur masti karne ka ho to ye geet ek jabardast utprerak ka kaam karta hai aur isi wazah se meri geetmaala mein ye yahan virazmaan hai. To doston chalein 6 th seedhi ke is geet ke sath thirakne

Naa ghilaaf,Naa lihaaf
Thandi hawa bhi khilaaf Sasuri
Itni sardi hai kisi ka lihaaf lei lay
Jaa padosi ke chulhe se aag lei lay
Jaa padosi ke chulhe se aag lei lay

Beedi jalai lay,Jigar se piya
Jigar maa badi aag hai

Dhuan naa nikaari o lab se piya
Ah haa,Dhuan naa nikaari o lab se piya
Je duniya badi ghaagh hai

Beedi jalai lay...i

Naa kasoor, Naa fatoor
Naa kasoor. Naa fatoor
Bina juram ke hujoor
Marr gayi, Ho marr gayi

Aise ek din dupahari bulai liyo re
Baandh ghunghroo kachehri lagai liyo re
Bulai liyo re,Bulai liyo re Dupahari
Lagai liyo re,Lagai liyo re Kachehri

Angethi jarayi le, Jigar se piya
Jigar maa badi aag hai
Beedi jalai lay

Na toh chakkuon ki dhaar
Na daraati na kataar
Na toh chakkuon ki dhaar
Na daraati na kataar
Aisa kaate ke daat ka nisaan chhod de
Je kataai to koi bhi kisaan chhod de
O aise jaalim ka chhod de makaan chod de
Re billo

na bulaya, na bataya
na bulaya,na bataya
maare neend se jagaya hai re
aisa chounkil haath mein naseeb aa gaya
woh elaichi khilai ke kareeb aa gaya

koyla jalai le,Jigar se piya
Jigar maa badi aag hai

Is geet ko aap yahan bhi sun sakte hain


Pichle saal isi jagah par tha Bunty aur Babli ka pyara sa nagma chup Chup ke chori pe Chori

देवनागरी में पढ़ने के लिए यहाँ क्लिक करें ।

Geet # 7 : Ajnabi Shahar Hai, Ajnabi Shaam Hai

Saatvein paaydaan ka geet mujhe kyun priya hai mujhe pata nahin. Par itna jaanta hoon ki jaise hi iska mukhda kaanon mein goonjta hai man doob sa jaata hai ek alag ahsaas se...jise shabdon mein badhna mere liye is waqt kathin ho raha hai.

Sonu Nigam ne badi khoobsurti se gaya hai is nagme ko. Khaaskar mukhde mein jab wo apni madhur taan oopar ki or kheenchte hain. Is geet ki dhun banayi hai Anu Malik ne jo pehli baar is geetmala mein shamil ho rahe hain. Geet ke beech mein unhone Europian dance tune ka bhi istemaal kiya hai.

Aur is tarah ki panktiyan to is countdown par chaye geetkaar ki to khasiyat hi hain

sardi lag rahi thi aapko, patli chaandni lapete the
aur shaal mein khwaab ke sulaya tha

To is gul ko gulshan karte Gulzaar ka film Jaan-e-Man ke liye likha geet kuch yoon hai.

Ajnabi shehar hai ajnabi shaam hai
zindagi ajnabi, kya tera naam hai?
ajeeb hai ye zindagi ye zindagi ajeeb hai

ye milti hai bicharti hai bicharke phir se milti hai
Ajnabi shehar hai ajnabi shaam hai ...

aap ke bagair bhi humein meethi lagein udasiyaan
kya ye aapkaa , aapkaa kamaal hai
shayed aapko khabar nahin
hil rahi hai paaon ki zameen
kya ye aapka, aapkaa kheyaal hai

ajnabi shehar mein zindagi milgayi
ajeeb hai ye zindagi ye zindagi ajeeb hai
mein samjha tha kareeb hai ye auron ka naseeb hai
Ajnabi shehar hai ajnabi shaam hai ...

baat hai ye ek raat ki
aap badalon pe lete the
hmm wo yaad hai aapne bulaya tha
sardi lag rahi thi aapko, patli chaandni lapete the
aur shaal mein khwaab ke sulaya tha
Ajnabi hee sahi saans mein sil gayi
ajeeb hai ye zindagi ye zindagi ajeeb hai
mere nahi ye zindagi rakeeb ka naseeb hai

Is geet ko aap yahan sun sakte hain.

देवनागरी में पढ़ने के लिए यहाँ क्लिक करें ।

Geet # 8 : Tere Bina Besuwadi Ratiyaa O Sajna..

beetee naa bitaayee rainaa, birahaa kee jaayee rainaa
bheegee huyee aakhiyon ne laakh bujhaayee rainaa ...
...chaand kee bindee waalee, bindee waalee ratiyaa.n
jaagee huyee aakhiyon mein raat naa aayee rainaa

Raat ka ye tanha safar Gulzar ke liye naya nahin. Parichay ke is geet ki tarah kayi baar in manobhavon ko ubhara hai unhone .
Ab waise bhi man ka meet hi sath na ho to sheetal, saloni, chaandni raat mein ishq ka tadka lagayega kaun? Phir to wo raat bhi pheeki pheeki besuwaadi hi hogi naa.

Isi mukhde ko sajaya hai apni dhun se sangeetkaar A.R.Rahmaan ne. Aur ise gaya A.R.Rahmaan ke sath ek yuva gayika Chinmayi Sripada ne. Chinmayi bahubhashavid hain, manovigyaan ki chatra hain, bachpan se shashtreya sangeet seekh rahi hain aur sabse khushi ki baat ye ki wo humari aur aapki terah ek blogger bhi hain. Dekhiye to khud kya kehti hain apne blog par Guru ke geeton ki unki adaaygi ke bare mein.

All I remember was Rahman Sir telling me to just let go and sing even if I think I am a fool. And though I was seriosuly inhibited, and will always remain,some light bulb might have gone off in my brain and in that momentary light,I should have forgotten about the "feeling foolish" bit. When I came out of the booth,the apprehensions were back with a bang. I couldnt recognise my voice for one.

Ye to huyi gaayika ki baat par is geet ka sabse sashakt pahlu iski dhun hai jo dheere dheere dilo dimag mein pravesh karti hai hai aur phir ek aisi jagah bana leti hai ki man se nikalti hi nahin. Dhun ke beech mein Rahman ne shashtreey sangeet aur bharteey vadya yantron ka behtareen istemaal kiya hai. Ek interview mein A.R.Rahman ne ye song Nusrat Fateh Ali Khan ko apni sridhanjali bataya hai. aise asha hai ki bhale inki raat kaate nahin kat rahi ho, aap chain ki bansi baja kar so rahe honge.

Dum dara dum dara mast mast
Dara dum dara dum dara mast mast
Dara dum dara dum dum
O humdum bin tere kya jeena

Tere bina besuwaadi besuwaadi ratiyaa o sajna
Ho, rookhi re o rookhi re
Kaatoo re kaate kate naa.

Na jaa; chaakri ke maare
Na jaa; souten pukaare,
Saawan aayega to puchega, Naa jaa rey

Pheeki Pheeki besuwaadi yeh ratiyaa.
Kaatore kaate na kate na
Ab tere bina sajna sajna ,Kaate kate na ......

Tere bina chand ka sona khota re
Peeli peeli dhool udaave jhoota re
Tere bina sona peetal
Tere sang keekar peepal
Aaja kate na ratiyaa
Tere bina beswaadi beswaadi ratiyaa o sajna .....

Is geet ko aap yahan bhi sun sakte hain.

Pichle saal 8 th paaydaan ka geet tha Hum Rahein Na Rahein Kal

देवनागरी में पढ़ने के लिए यहाँ क्लिक करें ।

Geet # 9 : Main Rahoon, Naa Rahoon, Meri Aawaaz...

Zindagi mein naam ki kya ahmiyat hai.
Shayad kuch bhi nahin..
Bas pukarne ka ek zariya
Naam badal jate hain
Chehre bhi waqt ke sath badal jate hain
Par dil se nikli huyi aawaz kya badal sakti hai
Nahin kabhi nahin
Kyunki wo to dil ka aaina hai aur aaine kabhi dhokha nahin dete

Film 'Kinara' mein yahi baat Gulzar keh gaye the

naam gum jaayegaa, cheharaa ye badal jaayegaa
meree aawaaj hee pahachaan hai, gar yaad rahe

Aur itne salon baad halke phulke andaaz mein Abhijeet apne Album Lamhe mein wahi baat keh rahe hain. Kanpur kr is gaayak ki is geetmala mein ye teesri aur aakhiri entry hai. Main nahin jaanta aapko ye geet kitna pasand aayega par mujhe is geet ke bol aur Abhijeet ki gayiki donon behad pasand hain
To pesh hai paydaan no. 9 ka ye geet. jis ke bol likhe Shaheen Iqbaal ne

main rahoon na rahoon meri aawaaz
main rahoon na rahoon meri aawaaz
tum goonjati har jagah har kadam paaoge
main miloon na miloon mere geeton ko tum
zindagi ki tarah har kadam paaoge ...

main tha jahaan hoon main waheen
beeta huan kal main nahin
main tha jahaan hoon main waheen
beeta huan kal main nahi
har mod pe har raah mein
har dard mein har aah mein
gungunaunga main muskuraaunga main
dil ki aabo hawa mein yaad aaunga main
yaad aaunga main
kuchh kahoon na kahoon mere geeton ko tum
roshani ki tarah har taraf paaoge

main aaj hoon, main kal bhi hoon
sadiyaan hoon main, main pal bhi hoon
main aaj hoon, main kal bhi hoon
sadiyaan hoon main, main pal bhi hoon
har rang mein, har roop mein
har chaanv mein, har dhoop mein
jhilmilaaunga main, jagmagaaunga main
mausamon ki adaa mein yaad aaunga main
yaad aaunga main

main dikhoon naa dikhoon
mere andaaz tum waqt hi ki tarah
har taraf paaoge
main rahoon na rahoon meri aawaaz tum
gunjati har jagah har kadam paaoge

Is geet ko aap yahan bhi sun sakte hain.

Pichle saal 9 vein seedhi par tha U Bomsi and Me ke liye Neeraj Sridhar ka gaya geet Kahan Ho Tum Mujhe Batao

देवनागरी में पढ़ने के लिए यहाँ क्लिक करें ।

Geet # 10 : Lamha Lamha Doori Yoon Pighalti Hai...

To doston aa gaye hum ek ek kadam badhate is varshik geetmala ke paaydaan no. 10 par.
Is geet ko is blog pe pehle bhi lyrics ke sath yahan pesh kiya tha. In 25 songs ki pherhist mein ye doosra aisa geet hai jiski dhun ko churane ka ilzaam sangeetkaar Pritam par hai. Iski dhun Pak singer Waris Beig ke 1998 mein released song Kal Shab Dekha Maine par aadharit hai.

Par phir bhi Nilesh Misra ka likha ye geet jab sunta hoon to man halka sa ho jata hai. Kuch to jadoo sa hai Abhijeet ki makhmali aawaaz aur iski dhun mein jo geet sunte sunte ise gungunaane ki iksha bhi hoti hai..

Gangster ke is geet ko aap yahan bhi sun sakte hain.

Aur dekhiye to pichle saal is paaydan pe kaun tha ?

Rabbi with Bulla ki Jana Main Kaun

देवनागरी में पढ़ने के लिए यहाँ क्लिक करें ।

Geet # 11 : Nainaa Thag lenge....

Is post ko likhte likhte khabar mili ki O.P.Nayyar sahab nahin rahe. Maine apne hindi blog par unki dhunon par bane geeton ki yaad taaza kar unhein apni or se shridhanjali dene ka prayaas kiya hai. agar 50-60 ke dashak mein Nayyar sahab ke sangeet mein aapko ruchi ho to is post ko yahan padh sakte hain.

Gyarahwein paaydaan par ek baar phir Gulzaar Sahab maujood hain ek salaah ka sath !
Salaah bhi kaisi ...un madhosh kar dene wali aankhon se bach kar rahne ki ..

Ab ye koyi aasaan baat hai kya?

Tamaam shayar to inke teekhe vaaron se khud bach nahin paye.(Uski kahani to vistaar se yahan likhi bhi thi.) Ab humein samjhaa rahe hain. Aapko to yaad hi hoga ki khud Gulzar sahab ne pichle saal Kazraari aankhon pe ek geet kya likh diya, janta un aankhon ke jalwon ko dekhne ke liye hi wo film dekh aayi. :p

Par aankhon thagti bhi hain is baat se inkaar bhi to nahin kiya ja sakta naa. Inke is roop ko Gulzar ne in jumlon mein is khoobsurati se pesh kiya hai...

jagte jaadu phukenge re neenden banjar kar denge... ya phir

nainon ki zubaan pe bharosa nahi aata
likhat padhat na raseed na khaata

....ki man wah wah kiye bina nahin rah pata

Is geet ki dhun banayi hai Vishal Bhardwaaj ne aur ise gaya hai mashhoor sufi gayak Nusrat Fateh Ali Khan ke bhateeje Rahat Fateh Ali Khan ne. Rahat meri in varshik geetmalaaon ke liye naye nahin. Chahe wo 2004 mein Paap mein unka gaya hua nagma Lagan Laagi Tum se Man ki Lagan ho ya phir 2005 mein Kalyug ke liye behad likpriya geet Jiya Dhadak Dhadak Jaye, wo humesha apni gaayaki se dil mein jagah bana hi lete hain.

nainon ki mat maaniyo re, nainon ki mat suniyo
nainon ki mat suniyo re
naina thag lenge , thag lenge naina thag lenge
jagte jaadu phukenge re jagte jagte jaadu
jagte jaadu phukenge re neenden banjar kar denge
naina thag lenge ,thag lenge, naina thag lenge

bhala manda dekhe na paraya na saga re
nainon ko toh dasne ka chaska laga re
bhala manda dekhe na paraya na saga re
nainon ko toh dasne ka chaska laga re
nainon ka zehar nasheela re ,nainon ka zehar nasheela
baadalon mein satrangiyan bonvein
bhor talak barsaavein
baadalon mein satrangiyan bonvein
naina baanvra kar denge
naina thag lenge thag lenge naina thag lenge

naina raat ko chalte chalte swargan mein le jaave
megh malhaar ke sapne dije hariyali dikhlave
nainon ki zubaan pe bharosa nahi aata
likhad parakh na rasid na khaata
nainon ki zubaan pe bharosa nahi aata
likhat padhat na raseed na khaata
saari baat hawayi re ,saari baat hawayi

bin baadal barsaaye saawan saawan bin barsaata
bin baadal barsaaye saawan naina baanwara kar denge
naina thag lenge thag lenge naina thag lenge

Omkara ke is geet ko aap yahan bhi sun sakte hain.

देवनागरी में पढ़ने के लिए यहाँ क्लिक करें ।

Geet # 12 : Kailash Kher's 'Teri Deewaani "

Merrut mein janme ,bade huye...phir nikal padee Delhi apne guru ki khoz mein
khoz chalti rahi, guru badalte rahe
15 guruon se shiksha le chuke to laga ki kyun na apna bhagya khwabon ke shahar mumbai mein jaakar aajmaaon.
Shuru shuru mein fakiri ki ye halat thi inki ki ratein Andheri station ka platform par kata karti thin.

Aur phir inhein mauqa mila uparwale ki khidmat karne ka ek geet ke jariye aur phir Allaah ke Is bande ki kismat aisi phiri kee.....
Aaj bhi fakra se batate hain ki station ka wo chaiwala inka bahut achcha mitra tha.

Aaj jab ve apni kaali Honda City se Andheri ke railway staion se guzarte hain, ooparwale ko ek baar dhanyawad juroor dete hain.
Jee haan, main Bharat mein sufi gayiki ke mashhoor sitare Kailash Kher ki baat hi kar raha hoon. A.R.Rahman ka Kailash ke bare mein kahna hai ki unke sangeet mein gaanvon ki mitti ki khushbu hai.

Is geetmaalaa ki 12 vien paaydan par hai unki album Kailasa se liya gaya unhin ka swarachit ye geet jiska har shabda pyar ke rang mein rama hua hai.


preet ki lat mohe aaisi laagi
ho gayi main matwaaree
bal bal jaaun apne piya ko
ke main jaaon vaari vaari
mohe sudh budh naa rahe tan man ki
yeh to jaane duniya saari
bebas aur laachaar phirun main
haari main dil haari haari main dil haari

tere naam se jee loon
tere naam se mar jaaon
teri jaan ke sadke mein kuchh aaisa kar jaaun
tune kya kar dala mar gayi main mit gayi main
ho ri haan ri ho gayi main
teri deewani deewani, teri deewani deewani


ishq junoon jab had se badh jaaye
hanste hanste aashiq sooli chadh jaaye
ishq ka jaadu sar chadhkar bole
khoob laga lo pehre raste rab khole
yahi ishq di marzi hai, yahi rab di marzi hai
tere bin jeena kaisa,a ---gardi hai
tune kya kar dala mar gayi main mit gayi main....deewani

kee main rang rangeelee deewani
kee main albeli main mastani
gaaun bajaaun sabko rijhaaun
kee main deen dharam se begaani
kee main deewani main deewani
tere naam se jee loon tere naam se marr jaaun
tere jaan ke sadle mein kuchh aaisa kar jaaun
tune kya kar dala marr gayi main mitt gayi main
ho ri ha ha ri ho gayi main,teri deewani deewani

Is album ke geet ko aap yahan bhi sun sakte hain

देवनागरी में पढ़ने के लिए यहाँ क्लिक करें ।

Geet # 13 : Roobaroo Roshani Hai...

Seeedhi badli to mood bhi badalte hain ek youthful, mast se song ke sath jise likha ad guru Prasoon Joshi ne aur gaya Naresh Iyer ne.

Ye is geetmaala mein Prasoon Joshi ki aakhiri upasthiti hai. Prasoon ki best creations abhi bhi main Phir Milenge mein unke likhe geeton ko hi maanta hoon.

Bada bahuaayaami vyaktitva hai Prasoon ka, Kehne ko MBA hain par ja pahunche ad industry mein. Coke jaise kayi charchit ads ke creative ideas unke hi dimaag ki upaj hain, apne ads ki jingle khud hi gaate hain aur usse bhi jee nahi bharta to poetry karne baith jate hain.

Aise srijak se salon saal humein kuch achche geet sunne ko milte rahenge aisa mere viswaas hai.

13 vein paaydaan ke is geet ko ek niraale andaaz mein gane wale Naresh ki kahani bhi kam dilchasp nahin.
Mumbai ke Naresh bhaag lene aaye the Channel V ke super singer show mein. Ab super singer pratiyogita se to pehle hi chhat gaye par A.R.Rahman ne jate jate unhein ek chance dene ka vaida kiya. Aur ye mauqa mila Rang De Basanti mein..baki is geet ne yuva man par kitni amitt chhaap chori wo to sarvavidit hai.

To aaiye sunein is taazgi se bhare geet ko jo shuru hota hai guitar ki pyari si bandish se aur jise sun kar shayad aap bhi mehsoos karein ki aap ke andar bhi kahin na kahin wo aag jal rahi hai jo bahar nikal jaye to kitnon ki zindagi, roshani se bhar sakti hai.

abhi abhi hua yaqeen
ki aag hai mujh mein kahin
huyi subaah main jal gaya
suraj ko main nigal gaya
roo-ba-roo roshani , roo-ba-roo roshani hai...

jo gumshuda sa, khwaab tha, vo mil gaya
vo khil gaya
vo loha tha pighal gaya
khichaa khichaa machal gaya
sitaar mein badal gaya
roo-ba-roo roshani , roo-ba-roo roshani hai...

[dhuaan chhataa khula gagan mera
nayi dagar naya safar mera
jo ban sake tu hamsafar mera
nazar mila zara...] (2)

aandhiyon se jaghad rahi hai lau meri
ab mashaalon si badh rahi hai lau meri
naamo nishaan rahe na rahe
ye kaaravaan rahe na rahe
ujaale main pee gaya
roshan huaa jee gaya
kyon sehte rahe....

roo-ba-roo roshani , roo-ba-roo roshani hai...
dhuaan chhataa khula gagan mera .....

roo-ba-roo roshani , roo-ba-roo roshani hai...

Is geet ko aap yahan bhi sun sakte hain

देवनागरी में पढ़ने के लिए यहाँ क्लिक करें ।

Geet # 15 : Ye Hausala Kaise Jhuke,Ye Aarzoo Kaise Ruke..

Insaan ki khwahishon ki koyi seema nahin
apne jeevan mein hum kitne sapne bunte hain..
aane waale kal se kitni aashayein rakhte hain...
aur unhein paane ki koshish bhi karte hain...
Par kayi baar koshishein nakaam hoti hain aur phir aata hai hataasha aur nirasha ka daur
Itihaas gavaah hai ki jo log in asaphaltaaon ko man se pare rakh phir se usi josh-o-kharosh ke sath apne lakshya ki oor chal padte hain, saphalta unhin ka kadam choomti hai.

15 vein paaydan ka ye geet insaan ki isi Never Say Die spirit ki yaad dilata hai. Ise behad khoobsurti se gaaya hai Shafqat Amaanat Ali Khan ne. Waise to Shafqat is geetmala mein ek baar aur hazir honge par jo log unhein nahin jaante unke liye itna bataana munasib hoga ki, ve Ustaad Amaanat Ali Khan ke suputra hain aur shaastreey sangeet ke Patiyala Gharane se talluk rakhte hain. Filhaal unki ginti Pakistan ke agrani gaayakon mein hoti hai.
Dor film ke is geet ko likha haii Janaab Meer Ali Hussain ne aur iski dhun banayi Salim aur Sulemaan Merchant ki jodi ne.

To meri salaah ye hai doston ki jab bhi mayoosi aapke dilon mein ghar banaane lage, is geet ko juroor sunein..aapke andar ki aawaaz aapko phir utsaahit karegi us muqaam tak pahuchne ki jiski iksha aapne man mein sanjoyi huyi hai

Ye hausla kaise jhuke,yeh aarzoo kaise ruke ?
manzil mushkil to kya, dhundhla saahil to kya,
tanha ye dil to kya Ho....

raah pe kante bikhre agar,
uspe to phir bhi chalna hi hai,
shaam chhupale suraj magar,
raat ko ek din dhalna hi hai,
rut ye tal jayegi,
himmat rang layegi,
subha phir aayegi Hoooo
Ye hausla kaise jhuke,yeh aarzoo kaise ruke ?

Hogi humein jo rehmat ada,
dhoop kategi saaye tale,
apni khuda se hai ye dua,
manzil lagale humko gale
zurrat sau baar rahe, ooncha ikraar rahe,
zinda har pyar rahe ho....
Ye hausla kaise jhuke,yeh aarzoo kaise ruke ?

Is geet ko aap yahan bhee sun sakte hain.

देवनागरी में पढ़ने के लिए यहाँ क्लिक करें ।

Geet # 16 : Ye Saajish hai Boondon Kee...Dekho Naa

To thoda saa roomaani hua jaye :) ?

Kam se kam is geet ko sunne ke baad kuch asar to hoga juroor agar wo bhi aas paas ho kahin :p

Pesh hai 16 vein paaydaan par ek behad hi romantic geet jise apni aawaaz se sanwaara Sonu Nigam aur Sunidhi Chouhan ne. Iski mohak dhun banayi Jatin Lalit ne. Fanaa ke is geet ko likha Prasoon Joshi ne . Lyrics ke hisaab se ye is film ka sabse pyara geet hai.

Barish ki girti boondein ke sath gar balkhati mast hawa ho, to dil mein sulagti aag ko bhadakne se bhala kaun rok sakta hai.

Baad mein bhale aap sara ilzaam us muyi besharm see hawa par lagayein ya aasmaan se lagataar risti us phuhaar par jiski sangat mein aapke humsafar ka roop kuch yoon nikhar aaya ki aapki khwahishein belagaam ho uthin.

Ab Sonu aur Sunidhi milkar to dikha hi rahe hain..aap bhi dekhiye naa

ye saajish hain boondon ki koi khwaahish hain chup chup si
ye saajish hain boondon ki koi khwaahish hain chup chup si
dekho na dekho na....., dekho na dekho na........
hawa kuchh haule-haule zubaan se kya kuchh bole
kyon doori hai ab darmiyaan
dekho na dekho na, dekho na dekho na

phir na hawayen hogi itani besharam
phir na dagmag- dagmag honge yeh kadam
haa... saawan yeh seedha nahi khufia bada
kuchh to baraste huye keh raha
samjho na samjho na...samjho na samjho na ..
hawa kuchh haule-haule zubaan se kya kuchh bole
kyon doori hai ab darmiyaan
dekho na dekho na....., dekho na dekho na ...

jugnu jaisee chahat dekho jale bujhe
meethi si mushkil hai koi kya kare
hmmm.... hothon ki arzi aaise thukraaon na
saanson ki marzi ko jhuthlaaon na
chhoo lo na chhoo lo na ....chhoo lo na chhoo lo..

hawa kuchh haule haule zubaan se kya kuchh bole
na doori hai ab darmiyaan
dekho na dekho na....

Is geet ko aap yahan bhi sun sakte hain.

देवनागरी में पढ़ने के लिए यहाँ क्लिक करें ।

Varshik Sangeetmala Geet No. 17 : Subah Subah Ye Kya Hua...

Kabhie pareshan to kabhie hairaan karti zindagi...
roz roz ki wahi bhag daud...
jee nahin karta aapka ki kabhie nikal padoon us anjaan raah ki or..
chintaon ki dilo dimaag se door jhatakte huye..
bas sath ho to sirf wo ithilati hawa aur muskurati fizaa..

Kya kaha ?

Office se chutti nahi milegi....

Aur mil bhi jaye to gharwali aur bachche bhi sath latak lenge.

ha ha ha ha..

Koi nahi jee iska bhi upaay hai humare paas. Bas jhat pat achche man se ye sfoortidayak geet sun leejiye, aap shartiya man ko taro taza aur halka mehsoos karenge.

Varshik sangeetmala ki 17 vein paaydaan ke is geet ko gaya hai ek navodit gayak ne. Inka talluk ek aise rajya se hai jis rajya ne Bhupen Hazarika jaisi aawaaz humari film Industry ko dee yani Assam se. Jee haan main baat kar raha hoon Zubeen Garg ki jinka Gangster ke liye gaya geet Ya Ali pehle hi behad lokpriya ho chuka hai.
Subah subah ye kya hua
na jaane kyun ab main hawaaon mein chal raha hoon
nayi subah nayi jagah
nayi tarah se nayi dishaaon mein chal raha hoon
nayi nayi hain meri nazar ya hain nazaarein naye
yaa dekhate khwab main chal raha hoon

Subah subah ye kya hua
na jaane kyon ab main hawaayon mein chal raha hoon
nayi subah nayi jagah
nayi nazar se naye nazaare main dekhata hoon
ye gungunaata hua sama, ye muskuraati fiza
jahaan ke saath main chal raha hoon

subah subah ye kya hua
na jaane kyon ab main hawaayon mein chal raha hoon

jo abhi hai usi ko jee lein, jo jiya wo ji liya
wo nasha pee liya
kal nasha hai ek naya jo, na kiya to kya jiya
har pal ko pee ke agar dil na bhar diya
subah subah ye kya hua
na jaane kyon ab main hawaayon mein chal raha hoon
nayi subah nayi hava
nayi tarah se nayi dishaayon mein chal raha hoon
mein chal raha hoon

Film I See You ke is geet ki karnapriya dhun banai hai Vishal Shekhar ki jodi ne aur bol likhe Vishal ne.


Song sunne ke liye yahan click karein.

देवनागरी में पढ़ने के लिए यहाँ क्लिक करें ।

Geet # 18 : Mohe Mohe Tu Rang De Basanti...

Bin rangon ke zindagi kitni saadi kitni manhoosiyat liye hogi .
Aisi zindagi ki kalpana karte huye bhi dar sa lagta hai, ek uljhan si hoti hai
Mujhe to lagta hai ki rang zindagi ke urjaa shrot hain
Humare manobhavon ko utprerit karne ki achook shakti hai inmein..

Ab is geet ko hi lein, yahan Prasoon Joshi ji ka tan-man basanti rang se tar ho gaya hai.
18 vein seedhi par khada, Rang De Basanti ka ye geet aapne sun liya to aapke basanti rang mein rangne ki guarantee meri.
A.R.Rahman ki sureeli dhun aur Daler Mehandi ki joshili aawaaz ka adbhut sangam hai ye nagma.
Prasoon Joshi ne 2004 mein apne kavyamay geeton se mera dil jeet liya tha. Is geet ke bol yani lyrics mein ek masti hai , umang hai jo dil ko chhoo jati hai

thodi si dhool meri dharti ki mere watan ki
thodi si Khushboo baurai si mast pavan ki
thodi si dhaunkne waali dhak-dhak dhak-dhak dhak-dhak saansein
jin mein ho junoon junoon vo boondein laal lahuu ki
yeh sab tuu mila mila le phir rang tuu khila khila le
aur mohe tu rang de basanti yaara mohe tu rang de basanti

sapne rang de, apne rang de
khushiyaan rang de, gam bhi rang de
naslein rang de, faslein rang de
rang de dhadkan, rang de sargam
aur mohe tu rang de basanti yaara mohe tu rang de basanti

dheemi aanch pe tuu zara ishq chadha
thode jharne laa, thodi nadi mila
thode saagar aa, thodi gaagar laa
thoda chhidak chhidak, thoda hila hila
phir ek rang tu khila khila
mohe mohe tu rang de basanti yaara, mohe tu rang de basanti

basti rang de, hasti rang de
hans hans rang de, nas nas rang de
bachpan rang de, joban rang de
ab der na kar sachmuch rang de
rang rez mere sab kuchh rang de
mohe mohe tu rang de basanti yaara, mohe tu rang de basanti

Is geet kee link tak pahunchne ke liye yahan click karein.

Devnaagri mein ye post yahan padhein.

Geet # 19 : Chand Sifarish Jo Karta Humari...

Office ke kaam kaaz se mujhe Banglore ke paas Bhadravati mein jana pada aur isi wazah se is geetmala par mujhe pichle chaar dinon se ek break lagana pada :(.

To aap sab taiyaar hain naa chalein seedhiyan chadhne :).
19 vein paaydaan par ke is geet mein to kayi khaas baat hain aur unmein se pehli khaas baat to ye ki iske geetkaar, sangeetkaar aur yahan tak ki gayak bhi pehli baar is geetmala mein pravesh kar rahe hain.

Jee haan, is geet ko likha Prasoon Joshi ne dhun banayi Jatin-Lalit ne aur gayak wo jinke main aaj sakshat darshan kar ke aa raha hoon yani Shaan. Jee haan, aaj Banglore se Kolkata ki flight par jab hum log Kolkata utre to dekha ki ye janab humare sath hi usi vimaan mein the.

Ab saamne na bhi sahi par TV ke parde par Sa Re Ga Ma mein aap sab in se roobaru ho hi chuke honge.

Waise 2000 ke unke hit album Tanha Dil ke baad se Shaan yani Shantanu Mukherjee ne peeche mud kar nahin dekha. Is geet ki lokpriyta mein Shaan ki surmayi aawaaz ka kaphi hath hai.

Aur gar aapne ye geet dhyaan se suna ho to iski ek aur khasiyat ki or juroor aapka dhyaan gaya hoga yaani geet ke beech taali yani clapping ka khoobsoorat istemaal. Waqai Jatin Lalit sahab iske liye badhai ke patra hain. Geet ke bol kuch yoon hain

shubhan allaah......................................................

chand sifarish jo karta hamari, deta wo tumko bata
sharm-o-haya ke parde gira ke, karni hai hamko khata
zid hai ab to hai khud ko mitana,hona hain tujhmein fanaa
chand sifarish jo karta hamari deta wo tumko bata
sharm-o-haya ke parde gira ke karni hai hamko khata

teri ada bhi hai jhonke wali , chhu ke gujar jaane de
teri lachak hai ke jaise daali dil mein utar jaane de
aaja baahon mein karke bahana, hona hain tujh mein fanaa
chand sifarish jo karta hamari, deta wo tumko bata ....

hain jo iraade bata doon tumko sharma hi jaaogi tum
dhadkanein jo suna doon tumko ghabraa hi jaaogi tum
hamko aata nahi hain chhupana hona hain tujhmein fanaa
chand sifarish jo karta hamari, deta wo tumko bata ....

Chalte chalte ek sawaal aap sab se..kya aapko pata hai ki is geet ki shuruaat mein jo Shubhan Allaah ki madhur taan sunayi deti hai wo kisne gayi hai ?

Geet Sunne aur is prashna ka jawab jaanne ke liye aap is link par jaa sakte hain.

Geet # 20 : Bas Yahi Soch Kar Khamosh Main Reh Jaata Hoon..

Upar ki seedhiyan chadhte chadhte hum aaj 20 vein paaydaan par pahunch gaye hain. Aur aaj yahan viraajmaan hain mere ek aur priya gayak Abhijeet sahab Unns ke is geet ke sath, kabhi kuch khamosh se, kabhi khud hi sawal karte huye aur phir khud hi unka jawab dete huye.

Ab ye saari symptoms to samajh hi aa gayi hongi aapko.:)

Matlab ye ki yahan maamla bilkul ektarpha hai. Ab kya karein ye janab bhi, humare hindustan mein adhiktar maamle hote hi aise hain. Waise humare Abhijeet ji khamosh to kam hi rahte hain. Haal philhaal mein ZEE TV ke Little Champs mein aap iska saboot dekh hi chuke hain . Isiliye jab itne pyar aur bholepan se unhone humein apni khamoshi ki daastaan sunane ki peshkash kee to humein laga chalo sun hi lete hain.

bas yahi soch ke khaamosh main reh jata hoon
ke kisi roz to is baare mein tum sochogi
main tumhein dekh ke kyon aise machal jata hoon
jagmaga uthti hai kyon meri nigaahen ekdum
main hamesha issi jaanib kyoon chala aata hoon
kuchh to kehna hai mujhe baat koi to hogi
mujhse tum khud hi ishaare se kabhi poochogi
bas yahi soch ke khaamosh main reh jaata hoon

bas yahi soch ke khaamosh main reh jaata hoon
ke agar hausala karke main tumhein keh bhi doon
to kahi toot na jaaye ye bharam darta hoon
jisne masoom banaya hai tumhare dil ko
jiske saye mein tumhein apana kaha karta hoon
yeh bharam gham ke dhuein mein na kahin kho jaaye
dil ke jajbon ki na tauheen kahin ho jaaye

bas yahi soch ke khaamosh main reh jaata hoon

yun agar sun bhi liya tumne meri baaton ko
thaam bhi logi chalo maana mere haathon ko
apani aankhon ke sitaaron se jagaogi mujhe
apani aagosh ki khushbu mein basaogi mujhe
aur jab tum meri pehchaan si ban jaaogi
jaan keh keh ke meri jaan si ban jaaogi
log aa jaayenge phir beech mein lekar rasmein
mujhse gumrah karenge tumhein karke bas mein
yeh bhi ho sakta hai duniya se tum takra jaao
yeh bhi ho sakta hai ruswaai se ghabra jaao
aur mumkin hai ke nazaron se gira do mujhko
tum hamesha ke liye dard bana do mujhko
bas yahi soch ke khaamosh main reh jaata hoon

Navodit sangeetkaar Sujeet Shetty aur geetkaar Shaheen Iqbal ki is seedhi sadhi par dil choo lene wali is peshkash ko aap yahan sun sakte hain.