Pahadon par kaun nahin jaata . Kabhie maidanon ki bheesan garmi se nizaat pane ke liye to kabhi barf ke girte phaahon ke beech apne dil ko thodi thandak pahuchane. Pahadon par guzari koyi subah ya khushnuma sa din to shayad hum sab ke khayalon mein ho. Par pahadon par guzari raat ka anand lena ho to Gulzaar ki is poori nazm ko padhein neeche di huyi link par
Aaj Bal Diwas hai to aaiye aaj aapko sunate hain Ibn e Insha ki ek mazedar kahani jiska naam to Kachhua aur Khargosh hai par jo bachpan mein suni isi naam ki kahani se sarvatha alag hai.. To aaiye aaj meri aawaz mein suniye ye kahani is link par
Adam Gondvi is no more. Suffering from Liver cirrhosis he died last week in a hospital in Lucknow. Adam always voiced his anger against rampant corruption in politics and helplessness of the poor people in our system. He was a person who loved villages and lived like a villager throughout his life.Two of his books Samay Se Muthbhed & Dharti ki Satah Par were quite popular.
Critics regarded him as the torchbearer of Hindi Ghazals after Dushyant Kumar. In fact Adam was more terse and specific in his attacks on the social injustice and rampant degradation of politics.
Today in his memory I want to share with you his famous poem regarding exploitation of dalits in a village dominated by upper caste in my voice. The poem starts with the line Main chamaron ki gali tak le chaloonga aapko .. The poem is a moving story in itself. The poem was based on a true incident in UP.
Adam Gondvi is no more but I hope his poetry will always propel us to fight against injustice in our present system in years to come.
Saiffudin Saif.... I didn't know much about the poet until I happened to listen to Garche sou baar gham e hijra se jaan gujri hai..phir bhi dil pe jo guzarni thi kahan guzri hai in the soothing voice of Runa Laila. As I started searching about Saif I found that he was a well known poet in Amritsar in pre partition era. After independence he moved to Pakistan and became part of film industry there. He wrote several memorable lyrics. If you are interested in reading more about Saif Click Here.
Some of his songs are even popular to this date. It is a well known fact that Saif was heart broken when his lady love left him to go to another city. In her memory Saif wrote jab tere shahar se guzarta hoon... Its a long nazm but when one goes through it, the reader gets the glimpses of emotional upheaval which the poet had gone through.. I have written the whole nazm here in Hindi.
If you are not familiar to the language , listen to my recitation of the nazm.
chaand ki 'tamanna' karne vaale shayaron ki kabhi kami nahin rahi. ab gulzar ki hi baat karen unake geet hon ya nazamen ghoom fir kar baat chaand par hi aa tikti hai। par har baar vo chaand ko ek alag hi andaaz bhinna bhinna roopakon men is khoobasoorati se hamare samaksh rakhte hain ki kuch doharaya hua sa nahin lagata. baat gar pakistani shayaron ki ho to chaand premi shayaron men ibne insha bhi aage khade dikhaai dete hain. chaand ibne insha ke priya pratikon men to tha hi unhonnen chaand ko kendrabindu men rakhakar kai nazamen kahin। masalan katik ka chaand, usi chaand ki khoj men, udas rat ke aangan men, us aangan ka chaand. par ibne insha ki chaand par kahi nazamon men mujhe chaand ke tamannaai padhna sabse zayada sukoon deta hai.
to chaliye aaj aapako roobaru karavate hain ibne insha ki is pyari nazam se pahle isake bhaavon se aur fir apani aavaaz se.....
shahar-e-dil ki galiyon men
shaam se bhatakte hain
chaand ke tamannaai
bekaraar saudaai
dilagudaaz tariki
jaangudaaz tanhaai
ruh-o-jaan ko dasati hai
ruh-o-jaan men basati hai
ye dil ek chalta firta shahar hi to hai jis ki galiyon men dil o jaan ko pighalane vala andhera hai. ur usamen pasari hai door door tak faili tanhaai jo us hansi chaand ki khoj men baavle hue dilon ko andar hi andar khaaye ja rahi hai.
shahar-e-dil ki galiyon men...
tak-e-shab ki belon par
shabanami sarishkon ki
bekaraar logon ne
beshumaar logon ne
yaadgaar chhodi hai
itani baat thodi hai ?
sadahazaar baaten thin
heel-e-shakebai
sooraton ki jaebai
kamaton ki ranaai
in syaah raton men
ek bhi n yad aai
ja-b-ja bhatakte hain
kis ki raah takte hain
chaand ke tamannaai
dil ki in vaadiyon ne vo vasant bhi dekha tha jab inhin galiyon se tarah tarah ke banaav shrringar ke saath vo khoobasoorat chehare gujra karte the. raat ki ugti belon par in hasi cheharon ki yaden os ki boonde ban kar aaj bhi ubhara karati hain। par vo din to kabke beet ge. aaj to is dil men ek ajeeb si veerani hai। par man hai ki bhatakna chahta hai is ummeed men shayad vo chaand fir dikhe...
ye nagar kabhi pahle
is qadar n veeran tha
kahane vaale kahate hain
kariya-e-nigaran tha
khaair apane jeene ka
ye bhi ek saamaan tha
aaj dil men veerani
abr ban ke ghir aai
aaj dil ko kya kahiye
baavafa n harajaai
fir bhi log deevaane
aa ge hain samajhane
apani vahshat-e dil ke
bun liye hain afsane
khushakhayal duniya ne
dil roopi ye nagar itana khali khali kabhi na tha. ye to ek pyara sa gaanv tha jisamen zaindagi hansi khushi basar ho rahi thi। aaj man roopi aakash men ek tarah ki shoonyata hai jise udaasi ke baadalon ne charon or se gher rakha hai। hridaya ke is khali ghade men na to pyar ki koi jyot jal rahi hai aur na hi bevafaai se upaji peeda. par logon ka kya hai vo to dil ke is mijaaz ko bhaanpe bina apani khamakhayali se kitani kahaniyan gadhte ja rahe hain।
garmiyan to jaati hain vo ruten bhi aati hain jab malool raton men doston ki baaton men ji n chain paayega aur oob jaayega aahaton se goonjegi shahar-e-dil ki pinhaai aur chaand raton men chaandani ke shaidaai har bahaane nikalenge aazmaane nikalenge aaraju ki giraai dhoondhane ko rusavaai sard sard raton ko zard chaand bakhshega behisaab tanhaai behijab tanhaai shahar-e-dil ki galiyon men... shaam se bhatakte hain chaand ke tamannaai
mausam beetate jaate hain। garmiyan sardiyon men tabdeel ho gayi hain। par raaten to vahi hain jinamen ab sannaton ki goonj hai। dil un gamageen raton men doston ki sohabat me bhi sukoon nahin paata। chaandani raton men chaand ki aas rakhne vaale ye ekaki man isi tanhaai men apane aap ko dubo lena chahate hain। apane jazabaaton ko fir se tatolna chahate hain। shayad sardiyon ka ye peela chaand unake man ki ye muraad poori kare। vaise bhi us chaand se tanaha bhala aur kaun hai?
Do saal pahle ibne insha ki rachanaaon kopadhte samay unki ye lanbi si kavita padhi thi. ek baar padhne ke baad kavita itani pasand aai thi ki kai kai baar padhi aur har baar antim panktiyon tak pahunchte pahunchte man men ek tees ubhar aati thi. kavita to sahej kar rakh li thi aur socha tha ki is saal bal divas ke avasar par aap tak ise jaroor pahunchaoonga par pichhale do hafton men ghar ke baahar rahane ki vajah se ye karya samay par sanbhav na ho saka.
pakistan ke is mashahoor shayar aur vyangyakaar ki nazamon aur kavitaon men ek aisi saadagi rahati hai jisake aakarshan men kya khaas, kya aam sabhi khinche chale aate hain. sher mohammad khan ke nam se ludhiyane men janme ibne insha ki ginti ese chuninda kaviyon men hoti hai jinhen hindi aur urdu donon bhashaon par samaan roop se maharat thi. isaliye kabhi kabhi unki rachanaaon ko kavita ya nazam ki paribhasha men baandhana mushkil ho jata hai.
ibne insha ne ye kavita sattar ke dashak men aae ithipoya ke akaal men peedit ek bachche ka chitra dekh kar likhi thi. bachche ki is avastha ne ibne insha ji ko itana vichalit kiya ki unhonne us bachche par itani lanbi kavita likh dali.
saat chhndon ki is kavita men ibne insha bachche ki badahali ka varnan karte hue badi khoobi se pathakon ke dilon ko jhakajhorte hue unka dhyaan vishva men faili aarthik asamaanta par dilaate hain aur fir ve ye sandesh bhi dena nahin bhoolte ki vibhinn mazahabon aur deshon ki seemaon men bante hone ke baavazaood ham sab usi aadam ki santaane hain jisase ye srishti shuru hui thi. lihaza duniya ka har bachcha hamara apana bachcha hai aur usaki jarooraton ko poora karne ka daayitva is vishb ki samast manav jaati par hai.
is kavita ko padhna apane aap men ek anubhooti hai. shayad ise padh sun kar aap bhi ibne insha ke khayalaton men apane aap ko doobata paayen
1. yah bachcha kaisa bachcha hai
yah bachcha kala-kala-sa yah kala-sa matiyala-sa yah bachcha bhookha bhookha-sa yah bachcha sookha sookha-sa yah bachcha kiska bachcha hai yah bachcha kaisa bachcha hai jo ret pe tanha baitha hai na isake pet men roti hai na isake tan par kapada hai na isake sar par topi hai na isake pair men joota hai na isake paas khilaunon men koi bhaalu hai koi ghoda hai na iska ji bahalane ko koi lori hai koi jhoola hai na isaki jeb men dhela hai na isake haath men paisa hai na isake ammi-abbu hain na isaki aapa-khaala hai yah saare jag men tanha hai yah bachcha kaisa bachcha hai
2.
yah sahara kaisa sahara hai na is sahara men baadal hai na is sahara men barakha hai na is sahara men baali hai na is sahara men khaosha (anaj ka guchha) hai na is sahara men sabza hai na is sahara men saya hai
yah sahara bhookh ka sahara hai yah sahara maut ka sahara hai
3.
yah bachcha kaise baitha hai yah bachcha kab se baitha hai yah bachcha kya kuch poochhata hai yah bachcha kya kuch kahata hai yah duniya kaisi duniya hai yah duniya kisaki duniya hai
4.
is duniya ke kuch tukadon men kahin fool khile kahin sabza hai kahin baadal ghir-ghir aate hain kahin chashma hai kahin dariya hai kahin oonche mahal atariya hain kahin mahafil hai, kahin mela hai kahin kapadon ke baazaar saje yah resham hai, yah diba hai kahin galle ke anbaar lage sab gehoon dhaan muhayya hai kahin daulat ke sandook bhare haan taamba, sona, roopa hai tum jo maango so haazir hai tum jo chaho so milta hai is bhookh ke dukh ki duniya men yah kaisa sukh ka sapana hai ? vo kis dharati ke tukade hain ? yah kis duniya ka hissa hai ?
5.
ham jis aadam ke bete hain yah us aadam ka beta hai yah aadam ek hi aadam hai vah gora hai ya kala hai yah dharati ek hi dharati hai yah duniya ek hi duniya hai sab ik data ke bande hain sab bandon ka ik data hai kuch poorab-pachchhim fark nahin is dharati par hak sabka hai
6.
yah tanha bachcha bechaara yah bachcha jo yahan baitha hai is bachche ki kahin bhookh mite {kya mushkil hai, ho sakta hai) is bachche ko kahin doodh mile (haan doodh yahan bahutera hai) is bachche ka koi tan dhaanke (kya kapadon ka yahan toda[abhav] hai ?) is bachche ko koi god men le (insan jo ab tak zinda hai) fir dekhiye kaisa bachcha hai yah kitana pyara bachcha hai
7.
is jag men sab kuch rab ka hai jo rab ka hai, vah sabka hai sab apane hain koi gaair nahin har cheez men sabka saajha hai jo badhataa hai, jo ugata hai vah dana hai, ya meva hai jo kapada hai, jo kambal hai jo chaandi hai, jo sona hai vah sara hai is bachche ka jo tera hai, jo mera hai
yah bachcha kiska bachcha hai ? yah bachcha sabka bachcha hai
Pichhali post men mainne Jagjit saahab ki gaai jis ghazal ka jikra kiya tha vo unake album 'Visions' se li gai thi. apane albumon ke nam Jagjit hamesha angreji men hi rakha karte the. 1976 se ye silasila chala to 1998 men javed akhtar ke saath kiye ge unake album 'silasila' pe jaakar ruka. isake baad unake albums ke nam urdu men hone lage. khaair main baat kar raha tha 1992 men aae unake album 'Visions' ki.
Tips dvara release kiye is dohare cassete album ko mainne kitani dafa suna hoga ye yaad nahin. yad rah gaie to isaki gazalen. solah ghazalon ke is guladaste ki shuruaat Jagjit saahab ne ki thi kaif bhopali ke kalam se. is ghazal ka sangeet sanyojan adbhut tha aur chhote bahar ki is behatareen ghazal ke aanand ko doona kar deta tha.
jhoom ke jab rindon ne pila di shekh ne chupke chupke dua di
ek kami thi taj mahal mein hamane teri tasveer laga di
aap ne jhootha vada kar ke aaj hamari umr badha di
teri gali men sazde kar ke hamane ibaadatagaah bana di
Jagjit ke is album ke pahle bhaag men jo gazalen chunin unamen se jyadatar sharab v saki se judin thin. unamen se agar nazar nazar se milakar... aur ye peenevaale..ko agar chhod diya jaaye to baki man men masti ka aisa khaumar jagati thin ki kya kahen. ab rustam sahagal 'vafa' ke likhe is matle par gaur karen
tere nisaar saakiya, jitani piyoon pilaye ja.... mast nazar ka vaasta, too mast mujhe banaye ja !
vafa e badanaseeb ko bakhsha hai toone dard jo hai koi isaki bhi dava itana zara bataaye ja
Bekhud Dehalavi ke in ashaaron ki bekhudi ke kya kahane !
nakah saki bahaar aane ke din hain jigar ke daag chhil jaane ke din hain
ada seekho ada aane ke din hain abhi to door, sharmaane ke din hain
aur fir rahi sahi kasar Aarzoo Lakhanavi saahab poori kar dete hain ye kah kar
kisane bheege hue baalon se ye jhatka pani, jhoom kar aai ghata, toot ke barasa pani
koi matavali ghata thi, ke javani ki umng, ji baha le gaya barasaat ka pahla pani
in ghazalon ke shabd vinyas men bhale koi anoothapan na ho par sahajta se kahi in pyari baaton ko jab Jagjit behatareen melody ke saath gaate hain to gunagunaaye bina raha bhi to nahin jata.
Par 'Visions' ke pahle hisse ki do gazale masti ke aalam se aapako nikalti hui vaastavik duniya men la patakti hain. kai baar kya aisa nahin hota ki sab kuch jaante boojhte ham un baaton ko doosaron ko samajhane lagate hain jinki vishvasaneeyata par hamen khud bhi sandeh rahata hai. isiliye to nida faazali saahab kahate hain
kabhi kabhi yoon bhi hamane apane ji ko bahalaya hai jin baaton ko khaud nahin samajhe auron ko samajhaya hai
hamse poochho ijazat vaalon ki ijazat ka haal kabhi hamane bhi is shahar men rah kar thoda nam kamaya hai vahin bekhud 'dehalavi' ka ye kalam bhi man ko chhoota nikalta hai... dard-e-dil men kami n ho jaaye dosti dushmani n ho jaaye
apani khu-e-vafa se darata hoon aashiki bandagi n ho jaaye
Waise bharatpur rajasthan se taalluk rakhne vaale bekhaud 'dehalavi' ka vaastavik nam saiyad vahiduddin ahamad tha. vo jaane maane shayar daag dehalavi ke priya shishya the. kahate hain daag saahab se jab poochha gaya ki unki shayari ka uttaradhikari kaun hoga to unhonne kaha tha 'bekhuden'. unka ishara apane shishyon bekhud 'dehalavi' aur bekhud 'badayunni' ki taraf tha. bekhud dehalavi saahab ke ghazal sangrah gufatar e bekhaud aur sahasavar e bekhaud ke nam se jaane jaate hain.
Agli post men aapako le chalenge is album ke doosare hisse ki taraf jo itana hi khoobasoorat hai... agar aapane ye album nahin suna to jaroor sunen.
Kal Jagjit Singh ki gaai ek ghazal ki talash men You Tube pe nikala tha ki bhatakte-bhatakte ye geet saamane aa gaya. ab ise sune ek arsa ho gaya tha. dobara suna to isaki girafat se nikalna mushkil tha. aajakal kitane geeton men ye madda hai ki vo paanch minat ke andar hi darshakon ko nayak nayika ke prem, bevafaai aur virah ki poori kahani kah jaayen. par agar geetakar koi aur nahin, Sahir Ludhyanavi jaisa sanjida shayar ho to unake liye ye zara bhi mushkil kaam nahin raha hoga.
Gumraah film ke yoon to saare geet hi charchit hue the, par redio par baki geeton ki tulna men Mahendra Kapoor ka gaya ye geet kam hi baja hai. sangeetakaar Ravi ke sangeet nirdeshan men Mahendra Kapoor ke gaaye geet hamesha se jyada lokapriya hue hain. geet ke aaranbh ka sangeet sanyojan ka andaza aap geet ke vidio se bhi laga sakte hain. vo yug tha pratyaksh yaanilive recording ka. ab kya kisi geet ki recording ke pahle vaailin, sitaar aur baansuri vaadakon ka samooh dikhta hai jaisa ki is geet ke vidiyo ke aaranbh men dikhaya gaya hai.
Mahendra Kapoor aur Sahir jaise kalakaron ke baare men to pahle bhi aapako batata raha hoon. par aaj kuch baaten is nagme ke sangeetakaar Ravi ke baare men. vaise is geet ke sangeetakaar Ravi yaani 'Ravi Shankar Sharma' aaj bhi hamare beech hain. Gumraah ke aalava chaundavin ka chaand, hamaraj, vakat, neelakamal jaisi filmon ka geet dene vaale Ravi ne 1970 ke baad se hindi filmon ke liye sangeet dena chhod diya. 1982 men ye silasila film 'nikaah' men unake dvara sangeet nirdeshit karne se toota.
Par isi dashak men unhonne ye nirnay liya ki vo sirf malayalam filmon ke liye baanbe Ravi ke naam se sangeet nirdeshit karenge. apani pratibha ke bal par Ravi malayalam filmon men diye apane sangeet se bhi chha ge. aaj bhi purane zamane ki tarah Ravi pahle geetakaron dvara likhe geeton ko sunkar hi usake anuroop sangeet dete hain. vidhivat sangeet ki shiksha na lete hue bhi Ravi ji ne apane liye jo mukaam banaya hai vo unake liye kya kisi bhi sangeetakaar ke liye garv ka vishaya ho sakta hai.
Filahaal to Mahendra Kapoor ke gaaye is geet ki roomaniyat men doobiye aur shabaasi deejie saahir,Ravi aur Kapoor saahab ki is tikadi ko jinake sammilit prayas se ye geet itana jaandaar ban pada hai. par usake pahle meri aavaaz men suniye is geet ke mukhade aur antre ki gunagunahat...
aap aaye to khayal e dile nashad aaya kitane bhoole hue jakhamon ka pata yaad aaya aap aaye to khayal-e-dil-e-nashad aaya kitane bhoole hue zakhmon ka pata yaad aaya
('dil- e- nashad' ka matalab hain dil ka dukhi, aprasann hona)
aap ke lab pe kabhi apana bhi nam aaya tha shokh nazaron-si muhabbat ka salam aaya tha umr bhar saath nibhane ka payam aaya tha aapako dekh ke vo ahade vafa yaad aaya kitane bhoole hue zakhmon ka pata yaad aaya
ruh men jal uthe bujhti hui yaadon ke deeye kaise deevaane the ham, aapako paane ke liye yoon to kuch kam nahin jo aapane aihasaan kiye par jo maange se na paaya vo sila yaad aaya kitane bhoole hue zakhmon ka pata yaad aaya
aaj vo baat nahin fir bhi koi baat to hai mere hisse men ye halki-si mulakaat to hai gair ka hoke bhi ye husn mere saath to hai haay kis waqt mujhe kab ka gila yaad aaya
Vo yug tha pratyaksh yaani laaiv rikarding ka. ab kya kisi geet ki rikarding ke pahle vaailin, sitaar aur baansuri vaadakon ka samooh dikhta hai jaisa ki is geet ke vidiyo ke aaranbh men dikhaya gaya hai.
Film Gumraah men ye geet filmaya gaya hai Sunil Dutt, Mala Sinha v Ashok kumar par. sSunil Dutt geet ko ga to rahe hain par Mala Sinha ne bhi geet ke bhaavon ko apani chehare ki bhaav bhangimaon se jis khoobasoorati se ubhara hai vo dekhte hi banta hai.
Bhojpuri men ghazalon ki kitab, sunane men kuch azaeeb lagata hai na ? Mujhe bhi laga tha jab do mahine pahle jab ek mitra ne mulaqat ke dauraan is pustak haath men pakadate hue kaha tha ki ise padhiyega jaroor aapako pasand aaegi. Waise to mitra ne kavitaon ki kai aur kitaben padhne ko di thin par jahan baki pustakon ke kuch pannon tak jaakar hi padhne ka utsah jata raha, vahin manoj bhavuk dvara likha ye bhojapuri sangrah 'Tasveer Zindagi ke' aisa man men rama ki isaki kai ghazalon ko baar baar padhna man ko behad sukoon de gaya.
34 varsheeya Manoj Bhavuk bhojapuri sahitya jagat men ek chiraparichit nam hain. Siwan, Bihar men janme aur renukoot men pale badhe manoj, bhojapuri bhasha, sahitya aur sanskriti ke prachaar prasaar men hamesha se sakriya rahe hain. ek aanchalik bhasha men ghazal kahana apane aap men ek ganbheer chunauti hai aur mujhe ye kahane men koi sandeh nahin ki manoj apane is prayas men poornatah safal rahe hain. shayad yahi vajah hai ki manoj ko is pustak ke liye varsh 2006 ka bharateeya bhasha parishad sammaan diya gaya aur vo bhi girija devi v gulzar saahab ki upasthiti men. kisi bhi navodit ghazalakaar ke liye ye param saubhaagya ki baat ho sakti hai.
manoj ki ghazalon men jahan bhavanaaon ki gaharaai hai vahi bhojapuri ke theth shabdon ke prayog se upaja madhurya bhi hai. manoj apani ghazalon men hamare aantarik manobhaavon, hamari achchhi v buri vritiyon ko badi sahajta se vyakt karte deekhte hain. misaal ke taur par unake in ashaaron ko dekhiye
agar jo pyar se mil ja t maando bhaat kha leele magar jo bhaav na hokhe, mithaai teet lagela
dukh men dhoondh l n raah bhavuk sukh ke jeeye ke darad jab raag ban ja la t jinagi geet lagela
zameer cheekh ke sau baar roke toke la tabo t man i behaya gunah kar jala
bahut ba log je maralo ke baad jeeyat ba bahut ba log je jiyate men yar, mar jala
apane is ghazal sangrah men manoj ne bharateeya gaanvon ki purani pahachaan khatm hone par kai jagah apane dil ke malal ko shabd diye hain
kahahin ke baate desh i gaanvan ke hऽ magar khojalo p gaanv na mili ab kavano bhaav men
lor ponchhat ba kehu kahan gaanv apano shahar ho gayil
badalav ke uthat ba aisan na tej aanhi kahavaan i god jata kuchhuo bujhat naikhe
par poori pustak men manoj apani ghazalon men sabse jyada hamari grameen v kasbai zindagi ki samasyaaon ki baat karte hain. bhookh, garibi, berojagari, bhrashtaachaar, samajik v aarthik vishamata in saari samasyaaon ko unki lekhani baar baar hamara dhyaan aakrisht karati hai. misaal ke taur par in ashaaron men unki lekhani ka kamaal dekhiye
pani ke baahar maut ba, pani ke bheetar jaal ba lachar machhali ka karo jab har kadam par kaal ba
samvedna ke laash p kursi ke god ba maaloom na, i log ka kise sahaat ba
eh kadar aaj berojagari bhayeel aadami aadami ke savari bhayeel
aam janta bagicha ke chirai niyan jahnvaan rakhavar hin ba shikari bhayeel
na rahit jhaanjhar madiya foos ke ghar men aait kaise ghaam poos ke
aaj u langado daroga ho gayil dekh lin sarkaar jaadu ghoos ke
roshni aaj le bhi na pahunchal jahan kehu uhanvo t diyari jarave kabo
sab banalke ke kismat banave ihan kehu bigaral ke kismat banave kabo
yoon to is poori kitab ke aise kai sher man men gahari chhaap chhodate hain par ek ghazal jo mujhe is poori pustak men sabse jyada romanchit kar gai, ko aapako sunane ka lobh sanvaran nahin kar pa raha hoon.
vaise gar sun na bhi paayen to in ashaaron par jaroor gaur faramaayen
deh ba makaan men ,drishti ba baagaan men hosh men rahe kahan, man to i navab h..
aadmi ke swapn ke khel kuch ajeeb ba ji gayill t zindagi, mar gayil to khwab h..
heen mat banal kara deen mat banal kara aadami ke janm tऽ khud ego khitab h..
vaah vaah kya baat kahi hai manoj ne!
agar aap ek ghazal premi hain aur bhojpuri bhasha ki jaanakari rakhte hai to maatra 75 rupaye ki pustak aapke liye hai. ise hind yugm ne utkrisht chhapaai ke saath baajaar men utara hai. is pustak ko kharidne ke liye aap sampadak@hindyugm.com par i mel kar sakte hain ya mobail par +91 9873734046 aur +91 9968755908 par sanpark kar sakte hain.
aur agar aap ab bhi aashvast na ho paayen ho is kitab ko kharidne ke baare men to intazaar kijie is pustak yatra ki doosari kisht ka jahan manoj bhavuk ki shayari ke kuch anya rangon se roobaru hone ka aapako mauka milega.
April ka mausam kabhi itani kadi dhoop ka talabadaar na tha. khaaskar us pradesh men jiska namakaran hi jangal aur jhadiyon ke nam par kiya gaya ho. pahle desh ka sarvadhik tapamaan dekhne ke liye rajasthan ke shaharon ke tapamaan par nazar daudani hoti thi par ab to itani mashakkat karne ki zara si bhi jaroorat nahin. bokaro dhanbad se lekar devghar aur jamshedpur tak poora jharakhand aprail ke mahine men hi 45 se 47 degreei ki chilachilati dhoop men jhulas raha hai.
Waise to kamobesh poore bharat ki yahi sthiti hogi par prakritik sanpada se paripoorit is pradesh ka ye haal chaunkaane vala jaroor hai. iska sidha-sidha arth yahi hai ki kahin na kahin ham sabhi apane aas paas ki prakriti ko nasht hote dekh ke bhi sanvedanaheen hue ja rahe hain.
Aarthik vikas ki is daud men kankreet ke jangalon ke bich vo purani aabo hava kahin kho si gai hai. kya ham bhool ge un pedon ko, jinki chhaanv ne har garmi men tapate sooraj ki in jhulasaati kiranon ka raasta roka. jinki vishalakaay moti shakhen bachapan men hamare jhoolon ka avalanb banin. jinake tanon par chadh utar kar hamane na jaane kitani mastiyan ki.
Ghar ke aangan ya ahate men palte badhate ye vriksh bhi hamare saath hi badhate ge aur saath hi unake seene men samaati gin ve aanandadayak smritiyan. bachapan beeta, thikaane badalte rahe aur vo ped.... vo to ab aas paas rahe hi nahin. so unase judi yaden to ksheen honi hi thin. par jab jab ham apane purane aashiyane men vapas laute, un ped paudhon ko dekh vo yaden is teevrata se vapas aa gayeen jese kabhi gai hi na hon. aakhir kyoon hua aisa !
Darasal hamen ehasaas ho na ho anajaane men hi ham apani aas-paas ki prakriti se ek rishta bana lete hain. ek aisa mazaboot rishta jisaki girahen katne se hamen vaisi hi peeda hoti hai jaise kisi insani rishte ke tootne par hoti hai.
Gulzar saahab ki likhi ek kavita yad aa rahi hai jo aise hi ek rishte ki kahani kahati hai. Gulzar ne jis khoobi se apane jindagi ke sabse haseen lamahon ko gali ke kinare khade us ped se joda hai, vo aap is kavita ko padh kar hi mahasoos kar sakte hain. is kavita ko bolte hue padhna ek poore anubhav se gujarne jaisa hai. to aaiye mere saath padhiye is kavita ko...
mod pe dekha hai vah boodha-sa ik ped kabhi? mera vaakif hai, bahut saalon se main use jaanta hoon
jab main chhota tha to ik aam udane ke liye parli deevar se kandhe par chadha tha usake jaane dukhati hui kis shakh se ja paanv laga dhaad se fenk diya tha mujhe neeche usane mainne khunnas men bahut fenke the patthar us par
meri shadi pe mujhe yaad hai shakhaen dekar meri vedi ka havan garm kiya tha usane aur jab haamila thi 'beeba' to dopahar men har din meri bivi ki taraf kairiyan fenki thin isi ne
waqt ke saath sabhi phool, sabhi patte ge tab bhi jal jata tha jab munne se kahati 'beeba' 'haan usi ped se aaya hai too, ped ka fal hai' ab bhi jal jata hoon, jab mod gujarte men kabhi khaanskar kahata hai, 'kyon sar ke sabhi bal gaye?'
subah se kaat rahe hain vo 'committee' vaale mod tak jaane ki himmat nahin hoti mujhko...
Kya aapako nahin lagata ki jis prakriti ke beech ham pale badhe hain, usake saath bane rishton ne hamare jeevan men jaise anamol pal diye hain vaisa hi kuch apane bachchon ko bhi ham uplabdh karaen?
Pichhale ek hafte se blogs ki duniya se door raha. Ssocha tha ki jane ke pahale Suresh Wadekar ki ye sarvapriy ghazal schedule kar aapke supurd karoonga par usake liye bhi waqt nahin mila. Khair ab apani yatra se laut aaya hoon to ye ghazal aapke samane hain. Ise likha tha Shaharyar yani Kunwar Akhalak Mohammad Khan sahab ne.
Yoon to Shaharyar ne chand filmon ke liye hi apani ghazalen likhi hain par ve ghazalen hindi film sangeet ke liye mil ka patthar sabit huee hain. Ab chahe aap Umrao Jaan ki baat karen ya Gaman ki. Ye baat gaur karane ki hai ki in donon filmon ke nirdeshak Muzaffar Ali the. Darasal Shaharyar AMU mein jab urdu vibhag mein padhate the tab Muzaffar Ali bhi vahin ke chhatr the aur Shaharyar sahab ke kavy sangrah se vo itne prabhavit huye ki unaki do ghazalon ko unhonne film Gaman mein le liya.
Unaki shayari ko vistar se padhne ka mauka to abhi tak nahin mila par unaki jitani bhi ghazalen suni hain unaki bhavanaon se khud ko jodane mein kabhi dikkat mahasoos nahin ki. Lekhak Mohan Encyclopedia of Indian Literature, Volume 5 mein Shaharyar sahab ki shayari ke bare mein likhate hain
Shaharyar ne apani shayari mein kabhi bhi sandesh dene ya nishkarsh nikalane ki paravah nahin ki. Wo to aaj ke aadami ke man mein chal rahe dvandon aur adhyatmik ulajhanon ko shabdon mein vyakt karte rahe. Unaki shayari ek aise aam aadami ki shayari hai jo beet rahe samay aur aane wali mrityu jaisi jivan ki kadavi sachchaiyon ke beech jhoolate rahane ke bavajood apani abhi ki zindagi ko khul kar jina chahata hai. Shaharyar aise hi vyakti ke gamon aur khushiyon ko apane ashaaaron mein sametate chalte hain.
Khud Vangamay patrika mein Dr. Zulfikar ko diye sakshatkar mein Shaharyar ka kahna tha ki
Meri soch yah hai ki sahitya ko apane daur se apane samaj se juda hona chahiye, Main sahitya ko matra man ki mauj nahin manata, main samajhata hoon jab tak doosare aadami ka dukh dard shamil na ho to vah aadami kyon padhega aapaki rachana ko. Zahir hai dukh dard aise hain ki vo comman hote hain. Jaise beyimani hai, jhooth hai, nainsafi hai, ye sab cheezein aisi hain ki inse har aadami prabhavit hota hai. Kuchh log kahate hain ki adab se kuchh nahin hota hai. main kahata hoon ki adab se kuchh n kuchh hota hai.
Ab 1979 mein pradarshit Gaman film ki isi ghazal par gaur karen mujhe nahin lagata ki hamamein se aisa koee hoga jisane in savalaton ko zindagi ke safar mein kabhi na kabhi apane dil se na poochha ho. Mujhe yoon to iss ghazal ke sare ashaaar pasand hain par dil hai to dhadakane ka bahana koee dhoondhe.. vala sher sunte hi man khud ba khud is geet ko gunagunate huye isamein doob jata hai.
Daraasal ek shayar ki safalata isi baat mein hai ki vo apane jariye kitane anajane dilon ki baaten kah jate hain.
seene mein jalan aankhon mein tufaan saa kyon hain ? is shahar mein har shaks pareshaan saa kyon hain ?
dil hai to, dhadakane kaa bahaanaa koee dhoondhe patthar kee tarah behis-o-bejaan saa kyon hain ?
tanahaee kee ye kaunasee, manzil hain rafeekon taa-hadd-ye-najar yek bayaabaan saa kyon hain ?
kyaa koee nayee baat najar aatee hain hum me aaeenaa humei dekh ke hai raan saa kyon hain ?
Oopar seJaydev ke karnapriy sukoon dene vala sangeet jisamein sitar , bansuri aur kaee any bharatiya vady yantron ka prayog man ko sohata hai. to lijiye suniye is geet ko Suresh Wadkar ki aawaz mein
Zindagi ke is safar men na jane kitane log hamare sanpark men aate hain. Par beete samay men jhank kar dekhane par kya aapako nahin lagata ki kuchh aise chehare rah gaye jinase apane rishton ko samay rahate ham vo roop nahin de paye jo dena chahate the.
Dil khushafahamiyan palata rahata hai ki kash kabhi unase ek mulakat aur to ho jisamen ham aise marasim bana sake jinhen paribhashit karane men hamare antaraman ko koee dikkat na ho. Par avval to aisi mulakaten ho nahin pati aur hoti bhi hain to mahaul aisa nahin ban pata ki rishton ke adhakhule siron ko fir se tatola ja sake.
Ye to huee vastavik zindagi ki baat par filmon men aisi mulakaten aksar ho jaya karati hain kyoonki unake bina kahani aage badati nahin. Isiliye to geeton ka ye aashavadi drshtikon hamare man ko sukoon deta hai. Sath hi unhen gunagunakar ham apane aap ko pahale se taro taja aur umangon se bhara mahasoos karte hain.
Aisa hi ek geet gaya tha Rafi sahab ne film Ye raat phir na aayegi ke liye aur kya kamal gaya tha. 1965 men aaee ye film apane geeton ke liye behad charchit rahi thi. Chahe Asha ji ka gaya 'yahi vo jagah hai... ho ya phir mahendra kapoor ka gaya mera pyar vo hai..... ho, O.P.Nayyar dvara sangeet nirdeshit is film ke sare geet laajavab the. aur is geet ka to Shamasul Hooda Bihari ne, mukhada hi bada zabaradast likha tha ...
fir miloge kabhi is bat ka vada kar lo hamase ek aur mulakat ka vada kar lo
Waise bihari sahab apane nam ke anuroop sachamuch Bihar ke hi the aur Patna ke pas sthit aara men unaka janm huaa tha. sangeetakar o pi naiyar ke karibiyon ka kahana hai ki O.P.Nayyar ne bihari ke mukhade ko aage badate huye pahala antara khud hi rach dala tha. Ye antara gunagunana mujhe behad pasand raha hai isaliye aaj ise yahan laga de raha hoon
Waise aap mujhe na jhelana chahen to rafi sahab ki gayiki ka aanand yahan le sakate hain. Is geet ka doosara antara aap is vidiyo men dekh sakate hain jise aasha ji ne gaya hai. ye geet parde par filmaya gaya tha Vishvajeet aur Sharmila Tagore ji par
phirmiloge kabhi is bat ka vada kar lo hamase ek aur mulakat ka vada kar lo
dil ki har baat adhoori hai adhoori hai abhi apani ik aur mulaqat zaroori hai abhi chand lamahon ke liye sath ka vada kar lo hamase ek aur mulaqat ka vada kar lo fir miloge kabhi .....
aap kyoon dil ka hasin raz mujhe dete hain kyoon naya nagma naya saaz mujhe dete hain main to hoon doobi huee pyar ki toofanon men aap sahil se hi aawaz mujhe dete hain kal bhi honge yahin jazbat ye vada kar lo hamase ek aur mulaqat ka vada kar lo
Veer ras ki kavitayen to bachpan se hi padate sunate aaye hain. Dinakar ya Subhadra Kumari Chauhan jaise kavi kavayitriyon ki rachanayen chhutapan se hi hamari shiraon men rakt pravah ko tej kar deti thin.
Par ye bataiye ki kitani ghazalon ko padane ke bad bhi vaise hi ahasasat se aap roobaru huye hain. nishchay hi apekshakrit ye sankhya kam rahi hogi. Ghazalein apne svabhav se hi komal bhavanaon ko samahit karati chalati hain par jaisa ham sabhi janate hain ki kaee ghazalakaron ne badalate waqt aur mahaul ke sath inamein alag alag rang bharne ki koshish ki hai. Faiz ki kaee nazmein isi shreni ki rahi hain par jab ghazalon ke bare men sochata hoon to mere zehan men dushyant kumar ji ki kaee ghazalein ek sath ubhar kar saamne aati hain.
Bharat men hindi ghazalon ke janak kahe jane vale Dushyant Kumar ki aisi hi ek ghazal aapke samane pesh kar raha hoon. Ye ghazal hamen utprerit karti hai is baat ke liye ki kisi bhi kaary ko poora karne ke liye, doosaron ki taraf aasha bhari nazaron se dekhane ke bajaye khud kuchh karane ki lalak honi chahiye. Dushyant ji ne is ghazal ke har sher men vibhinn roopakon ki madad se is baat ko purzor dhang se rakha hai.
Dushyant ji ko kabhi sunne ka avasar nahin mila is baat ka mujhe hamesha afsos raha hai. Iss mahan shayar ki likhi ye preranadayak panktiyan mere dil par kya asar dalti hain ise vyakt karane ka sabase achchha zariya yahi hai ki ise main padakar aap tak pahunchaoon. to ye raha mera prayas..
aaj sadakon par likhe hain sainkadon nare n dekh ghar andhera dekh tu, aakash ke tare n dekh.
ek dariya hai yahan par door tak faila huaa aaj apane baazuon ko dekh patavaren n dekh.
ab yaqinan thos hai dharti haqiqat ki tarah yah haqiqat dekh, lekin khauf ke mare n dekh.
ve sahare bhi nahin ab, jang ladni hai tujhe kat chuke jo hath, un hathon men talavaren n dekh.
dil ko bahala le, izazat hai, magar itana n ud roz sapne dekh, lekin is qadar pyare n dekh.
ye dhundhalaka hai nzjar ka, tu mahaz mayoos hai roganon ko dekh, deewaron men deewarein n dekh.
raakh, kitani raakh hai, charon taraf bikhari huee raakh men chingariyan hi dekh, angare n dekh.
Aasha hai ise sunane ke bad aisi hi kuchh bhavanaon ka sanchar aapke dil men bhi huaa hoga..
Pichhli post mein mainne jikr chheda tha ek aisi ghazal ka jise mere liye yadagar banane ka shrey Ghulam Ali se jyada Abhijeet Savant ko jata hai. Par aaj ki ye behad roomani ghazal, Ghulam Ali ki gaee meri pasandida ghazalon men se ek hai. Jab bhi ise sunta hoon mood men ranginiyat khud-b-khud sama jati hai.
Sabse pahle is ghazal ko sunane ka mauka 1996 men mila tha jab main Roorkee University ke chhatravas men raha karta tha. Shighra hi mainne ise ek blank cassette men ise record kar apne paas surakshit kar liya tha. Kuchh salon tak to ye ghazal baraha suni gaee aur fir sidi yug aate hi baki kaisaton ki tarah kahin kone men dubak gaee. Bad mein ek mitra ki sahayta se mujhe ye digital form mein mujhe mili.
To chalen ab is ghazal ke sunein Ghulam Ali ki aawaaz mein. Ghulam Ali sahab matle ki shuruaat kuchh yoon karate hain..
aye husn e lalafam zara aankh to mila khali pade hain jaam zara aankh to mila
Waise to sach bataoon janab to 'jaam' se apana rishta door-door tak ka nahin hai par agar chehre par pyari si lali liye koee sundari apane nayanon se nayan ladaye to kuchh madahoshi to dil par chhayegi na! Waise bhi shayar ki chale to aankhen ladana bhi bhakti ka ek roop ho jaye. ab yahi sher dekhiye...
kahte hain aankh aankh se milana hai bandagi duniya ke chhod kam zara aankh to mila
Bilkul ji ham to taiyar hain bas boss ko bagal ki cabin se hatava dijiye aur ek baala samane ki table par virajmaan karava dijiye fir dekhiye hamara bhakti bhav :)
kya vo na aaj aayenge taron ke sath sath tanahaiyon ki sham zara aankh to mila
Hmmm gar vo chand jaise honge to jaroor aayenge taron ke sath varna to aisi pariyon ke sath aksar unake amavasi mitr hi hote hain jo aashikon ko apani sham, gam aur tanahaee men bitane pe majaboor kar dete hain!
saaki mujhe bhi chahiye ik jam e aarzoo kitane lagenge dam zara aankh to mila
uff ye to julum hai bhaee aankhon par...aankhon se man ki aarzu to padane ki to baat suni thi par shayar sagar to aankhon se hi bhavanaon ka mol poochhana chahate hain !
hai rah e kahakashan men azal se khade huye sagar tere gulam zara aankh to mila
Bataiye Sagar sahab ne to zindagi bhar ki pratiksha kar li is aakash ganga ko niharate niharate aur vo hain ki itani gulami ke baad bhi nainon ka ikararnama nahin de rahin. Purane zamane ke logon ki baat hi alag thi. Ghazab ka dhairy tha logon ke pas aur aaj...!
Ghulam Ali apani gayiki aur bolon ki badaulat mahaul men roomaniyat to late hi hain, sath hi sangeet sanyojan bhi man ko aakarshit karta hai. Ghazal, table ki thap aur bansuri ki tan ke beech se nikalati huee nikharati chali jati hai is tarah ki man khud gunagunane ko karne lagta hai..
aaj Chathth Parva hai. in panktiyo ke likhe jaane tak shrrddhaalu Doobate sooraj ko arghy de chuke honge aur kal bhor me doosara arghy ugate sooraj ko diya jayegaa. chhaTh ka naam Bihar aur poorvee Uttar Pradesh ke sabase paavan parvo me shumaar hota hai. vishva mein jahaan kaheen bhee in pradesho ke log gaye hain vo apane saath isakee paramparao.n ko le kar gaye hain. chhaTh jis dhaarmik utsaah aur shrrddha se manaaya jaata hai isaka andaaja isee baat se laga sakate hain ki jab teen chauthaee pulisavaalo ke chhuTTee par rahate hue bhee bihar jaise raajy mein is dauraan aaparaadhik gatividhiyaa sabase kam ho jaatee hain.
ab chhaTh kee baat ho aur chhaTh ke geeto.n ka jikr na aaye ye kaise ho sakata hai. bachapan se mujhe in geeto.n kee lay ne khaasa prabhaavit kiya thaa. in geeto.n se juDee ek rochak baat ye hai ki ye ek hee lay mein gaye jaate hain aur saalo saal jab bhee ye din aata hai mujhe is lay mein chhaTh ke geeto.n ko gunagunaane me behad aanand aata hai. yoon to Sharada Sinha ne chhaTh ke tamaam geet ga kar kaafee prasiddhi praapt kee hai par aaj jis chhaTh geet kee mai charcha kar raha hoon use mainne TV par bhojapuree lok geeto.n kee gaayika Devi kee aavaaj me suna tha aur itane bhaavanaatmak andaaj me unhonne is geet ko gaaya tha ki meree aankhe bhar ayee thee.
isase pahale ki ye geet mai aapako sunaoo, isakee prShThabhoomi se avagat karaana aapako jarooree hogaa. chhaTh me surya kee araadhana ke liye jin falo.n ka prayog hota hai uname kela aur naariyal ka pramukh sthaan hai. naariyal aur kele kee pooree ghaud (guchchha) is parv me prayukt hote hain.
is geet me ek aise hee tote ka jikra hai jo kele ke aise hee ek guchchhe ke paas manDara raha hai. tote ko Daraaya jaata hai ki agar tum is par chonch maaroge to tumhaaree shikaayat bhagavaan surya se kar dee jaegee jo tumhe nahee maaf karenge. par fir bhee tota kele ko jooTha kar deta hai aur surya ke kop ka bhaagee banta hai. par usakee bhaarya suganee ab kya kare bechaaree? kaise sahe is viyog ko ? ab to na dev ya surya koee usakee sahaayata nahee kar sakate aakhir pooja kee pavitrata jo naShT kee hai usane.
ye geet thoDee bahut fer badal ke baad sabhee pramukh bhojapuree gaayako dvaara gaaya gaya hai. to pahale sune meree ise gunagunaane kee koshish
kerava je farela ghavad se oh par suga meDaraay
u je khabaree janibo adik (sooraj) se suga dele juThiyae
u je marabo re sugava dhanuk se suga gire murazaay
u je suganee je roe le viyog se aadit hoi na sahaay dev hoi na sahaay
ab 'Devi' ka gaaya hua ye geet to muze nahee mil saka par aap sab ke lie Anuraadha Podwaal ke svar me ye geet prastut hai
Kya aap apane kisi priy ke prati Possessive hain? vaise to ham sabhi hote hain kabhi chhoti si kisi vastu ke liye to kabhi apane kisi khas ke liye. par ye Possessiveness kuchh jyada ho jaye to vahi hal hota hai jo is shayar ka ho raha hai.... dil ki majabooriyon ko bhala kaun lagam de sakata hai.
Par aisa rog na hi lage to behatar varna 'Possessiveness' ka ye kida dukh bhi bahut deta hai.
is rachna ka ek hissa bahut pahale mujhe apani ek post par tippani ke roop men mila tha. jab poora pada to laga ki hai to sadi si nazm par dil ko chhooti huee isiliye ise aaj aap sab ke sath bant raha hoon
suno achchha nahin lagta ki koee doosara dekhe tumhari sharabati aankhen lab o rukhasar1 aur palaken siyah lanbi ghani julfen sarahe doosara koee mujhe achchha nahin lagta
suno achchha nahin lagta kare jab tajakira2 koee kare jab tabasara3 koee tumhari jat ko khoje tumhari bat ko soche mujhe achchha nahin lagta
suno achchha nahin lagta tumhari muskarahat par hajaron log marate hon tumhari ek aahat par hajaron dil dhadakate hon kisi ka tum pe yoon marana mujhe achchha nahin lagta
suno achchha nahin lagta hava gujare tumhen chhu kar na hoga jabt4 ye mujhase kare koee ye gustakhi tumhari julfen bikhar jayen tumhara lams5 pa jayen mujhe achchha nahin lagta
suno achchha nahin lagta ki tumako fool bhi dekhen tumhare pas se mahaken ya chanda ki gujarish ho ki apani roshani bakhshoon rukh e janan koee dekhe mujhe achchha nahin lagta
1. gala, 2. charcha, 3. vistar se ghatana ka vivaran dena, 4. bardasht, 5. sparsh
Is nazm ki bhavanaon ko apani aavaj men utarane ki koshish ki hai. padhte vakt do jagah bhoolen huee hain kyonki recording ke samay sahi bol mere paas nahin the baad men jab najm utarane baitha to dekha ki tajakara ki jagah tajakira aur tumhare lams pe jayen ki jagah arth ke hisab se tumhara lams pa jayen hona chahiye. aasha hai aap ise najaraandaj kar denge.
"..............is prakar ham dekhate hain ki doosare mahayuddh ke bad naee pidhi ke jo shayar badi teji se ubhare aur jinhonne urdu ki ‘roti-bisoorati’ shayari ke sir men antim kil thonkane, vishv ki pratyek vastu ko samajik prshthabhoomi men dekhane aur urdu shayari ki naee dagar ko adhik-se-adhik safa, sundara, prakashaman banane men badh-chadhakar hissa liya, unamen ‘Qateela’ shifaee ka vishesh sthan hai. balki sangeetadharmi chhandon ke chunava, chust sammishran aur gunagunate shabdon ke prayog ke karan use shayaron ke dal mein se turant pahachana ja sakata hai.
samaya, anubhav aur sahity ki pragatishil dhara se sambandhit hone ke bad jis parinam par vah pahuncha, usaki aaj ki shayari usi ki pratik hai. usaki aaj ki shayari samay ke saj par ek surila rag hai- vah raga, jisamein prem-pida, vanchana ki kasak aur kranti ki pukara, sabhi kuchh vidyaman hai. usaki aaj ki shayari samaja, dharm aur rajy ke sunahale kalashon par manaviy-bandhutv ke gayak ka vyangy hai......."
Prakash Pandit dvara Qateel shifaee ke liye kahe gaye ye shabd sahi mayene mein unaki shayari ko saragarbhit karate hain. mohabbaton ke is shayar ne apane lekhan mein prem ke aalava bhi any vishayon ka samavesh kiya. misal ke taur par unaki is ghazal par gaur karen..
raqs1 karne ka mila hukm jo darayaon mein ham ne khush ho ke bhanvar bandh liye panvon mein 1. nrty
dekhiye kya khoob vyangy kiya hai Qateel ne...
un ko bhi hai kisi bhige huye manjar ki talash boond tak bo na sake jo kabhi saharaon mein
ai mere ham-safaron tum bhi thake-hare ho dhoop ki tum to milavat na karo chhanv mein pakistan mein nirantar badalati rajanitik satta parivartan par vyangy karate huye is ghazal ke agale sher mein vo kahate hain ...
jo bhi aata hai batata hai naya koee ilaj bant na jaye tera bimar masihaon mein
ab agala jo sher hai vo aap tabhi samajh payenge jab aapako islam dharm se judi is katha ke bare mein aapako pata ho. mujhe ye janakari ek pustak se mili use jyon ka tyon aap tak pahuncha raha hoon. to janab yoosuf hajarat yakoob ke putr the jo param sundar the aur jinhen unake bhaiyon ne eershyavash bech diya tha. aage chal kar in par mishr ki rani julaikha aasakt ho gaeen thin aur ve mishr ke raja ban gaye. unaki aur julaikha ki kahani ko aam jindagi mein manhagaee ki samasya ke sath kis tarah piroya hai Qateel ne ye dekhen aap is sher mein...
hausala kisamein hai yusuf ki kharidari ka ab to manhagaee ke charche hai julaikhaon mein
aur jab tivi chainal se lekar patr patrikayen sab aapake bhagy ki khushahali bayan kar rahi hon aur aapake din nagavar gujar rahe hon to ye sher kya aap nahin kahana chahenge..
jis barahaman ne kaha hai ke ye sal achchha hai us ko dafnao mere hath ki rekhaon mein
vo khuda hai kisi toote huye dil mein hoga masjidon mein use dhoondho n kalisaon mein
bharat aur pak ke logon ke bich mein divar khadi karane vale shasak varg ke bare mein vo kahate hain...
ham ko aapas mein muhabbat nahin karane dete ik yahi aib hai is shahar ke danaon mein
aur fir vapas apane rang mein lautate huye ye yad dilana bhi nahin bhoolate :)..
mujhase karate hain "Qateela" is liye kuchh log hasad kyon mere sher hain makabool hasinaon mein
kyoon na is behatarin ghazal ko khud Qateel ki aavaj men suna jaye...
11 th July 2001 ko Qateel is duniya se kooch kar gaye. apane 81varshon ke is jivan ke safar men unake karib bis kavy sangrah chhape aur karib 2500 geet hindi aur pakistani filmon ka hissa bane. mohabbat ke ehasas ko purajor dhang se apane kavy men dhalane vale is shayar ko ham sab kabhi nahin bhula payenge. khud Qateel ne kaha tha..
‘Qateela’ apani jaban kabu men rakhana sukhan se aadami pahachana jaye
aaj is shrrnkhala ke samapan par Qateel shifaee ki ek geetanuma ghazal yad aa rahi hai jise gunagunana mujhe behad pasand hai. daraasal jindagi men pahali bar intaranet ka prayog mainne isi ghazal ko khojane ke liye kiya tha. isaka matala behad khoobasoorat hai
pyar tumhara bhool to jaoon, lekin pyar tumhara hai ye ik mitha jahar sahi, ye jahar bhi aaj gavara hai
yoon to is ghazal ko talat ajij sahab ne gaya hai par aaj isake kuchh ashaaaron ko jheliye meri aavaj men :) !
aasha hai Qateel shifaee ke bare men panch kishton ki ye peshakash aapako pasand aaee hogi...
