Pancham & Asha were terrific combination in the 70's. They have given many soulful nos. to the music lovers in this era. In 1974 late film star Shammi Kapoor for the first time directed a movie called Manoranjan. Shammi who was initially susceptible about Pancham's talent, had become a great fan of his music after tremendous success of Teesri Manzil. So Pancham became his automatic choice for music director in his film.
Unfortunately Manorajan didn't perform well at the box office as expected. Its music also crashed at that point of time. But people still remember two of its song very fondly. One of them was a fun filled song Goya ki chunanche and the second one was quite romantic and sensuous number Chori Chori Solah Singar Karoongi ..
Asha's rendition of the song coupled with melodious tune of Pancham makes this song delightfully hummable.Asha bagged the Filmfare nomination for the song. The song was picturised on ohh so beautiful Zeenat Amaan...
Zindagi ke is safar men na jane kitane log hamare sanpark men aate hain. Par beete samay men jhank kar dekhane par kya aapako nahin lagata ki kuchh aise chehare rah gaye jinase apane rishton ko samay rahate ham vo roop nahin de paye jo dena chahate the.
Dil khushafahamiyan palata rahata hai ki kash kabhi unase ek mulakat aur to ho jisamen ham aise marasim bana sake jinhen paribhashit karane men hamare antaraman ko koee dikkat na ho. Par avval to aisi mulakaten ho nahin pati aur hoti bhi hain to mahaul aisa nahin ban pata ki rishton ke adhakhule siron ko fir se tatola ja sake.
Ye to huee vastavik zindagi ki baat par filmon men aisi mulakaten aksar ho jaya karati hain kyoonki unake bina kahani aage badati nahin. Isiliye to geeton ka ye aashavadi drshtikon hamare man ko sukoon deta hai. Sath hi unhen gunagunakar ham apane aap ko pahale se taro taja aur umangon se bhara mahasoos karte hain.
Aisa hi ek geet gaya tha Rafi sahab ne film Ye raat phir na aayegi ke liye aur kya kamal gaya tha. 1965 men aaee ye film apane geeton ke liye behad charchit rahi thi. Chahe Asha ji ka gaya 'yahi vo jagah hai... ho ya phir mahendra kapoor ka gaya mera pyar vo hai..... ho, O.P.Nayyar dvara sangeet nirdeshit is film ke sare geet laajavab the. aur is geet ka to Shamasul Hooda Bihari ne, mukhada hi bada zabaradast likha tha ...
fir miloge kabhi is bat ka vada kar lo hamase ek aur mulakat ka vada kar lo
Waise bihari sahab apane nam ke anuroop sachamuch Bihar ke hi the aur Patna ke pas sthit aara men unaka janm huaa tha. sangeetakar o pi naiyar ke karibiyon ka kahana hai ki O.P.Nayyar ne bihari ke mukhade ko aage badate huye pahala antara khud hi rach dala tha. Ye antara gunagunana mujhe behad pasand raha hai isaliye aaj ise yahan laga de raha hoon
Waise aap mujhe na jhelana chahen to rafi sahab ki gayiki ka aanand yahan le sakate hain. Is geet ka doosara antara aap is vidiyo men dekh sakate hain jise aasha ji ne gaya hai. ye geet parde par filmaya gaya tha Vishvajeet aur Sharmila Tagore ji par
phirmiloge kabhi is bat ka vada kar lo hamase ek aur mulakat ka vada kar lo
dil ki har baat adhoori hai adhoori hai abhi apani ik aur mulaqat zaroori hai abhi chand lamahon ke liye sath ka vada kar lo hamase ek aur mulaqat ka vada kar lo fir miloge kabhi .....
aap kyoon dil ka hasin raz mujhe dete hain kyoon naya nagma naya saaz mujhe dete hain main to hoon doobi huee pyar ki toofanon men aap sahil se hi aawaz mujhe dete hain kal bhi honge yahin jazbat ye vada kar lo hamase ek aur mulaqat ka vada kar lo
To aaj hai bachchon ka din yani baal divas ! to kyoon na is din bachpan ki kuchh baton ko sajha kiya jaye ek behad dilaazeez geet ke sath. Samay ke sath kitana badal gaya hai tab aur aaj ka bachpan. Tab bhi mastiyan aur shaitaniyan hoti thin aur aaj bhi. fark aaya hai inake taur tarikon men, tab ke aur aaj ke mahaul men.
Bachpan ki smrtiyon par najar daudaoon to bahut sari baten anayas hi man men aati hain. Pedon par rassi laga kar jhoola jhoolana, imali ke ped ki darate darate chadaee karana, tokari ko tirachha kar rassi ke sahare chidiya ko pakadane ki koshish karana, harane ya khel men na shamil kiye jane par tesuye bahana, man ka na hone par bar bar ghar chhodane ki dhamaki de dalana aur aisi hi na jane kitani aur baten. par aaj bat un khelon ki jinhen khelate huye bachpan ka ek bada hissa bita.
Bachpan men pahala khel jo hamanen sikha tha vo tha Budhiya Kabaddi. agar aap is khel se vakif na hon to ye batana jaroori hoga ki is khel men apani sans bina tode bari bari se vipakshi dal ke khiladiyon ko daudana aur inhen chhu kar vapas aana hota tha. Aisa isaliye kiya jata tha taki ek gol rekha ke andar khadi apane dal ki budiya ko bhagane ka rasta mil jaye. Kabaddi ke is parivartit roop men gol rekha ke andar khade khiladi ko budiya kyoon kaha jata tha ye abhi bhi meri samajh ke bahar hai.
Zahir hai jitani lambi saans hogi utane hi adhik khiladiyon ko daudakar aap budiya ka kam aasan kar sakate the. ab ek sans ko lene ke liye kaee tarike the. sabase prachalit hota tha
shail tieeeeeeeeeeeeeeeeeeeeeeeeeeeeeeeeeeeeeeeeeeee............. ya fir
kabaddi ke bad baddi bad baddi bad baddi......
Par in donon tarikon men sans men her fer yani cheating karane ki gunjaish kafi kam hoti thi to ham log inaka istemal kam hi karate the. sabase majedar rahata
shail dalle chhu dalle chhoo dalle chhoo dalle chhoo...
bolana kyoonki ye itani dhimi gati se bola jata ki sans le lene ka pata hi n chalata. Agar vipakshi khiladi shikayat karte to ham apane doosare sahare Prakash Lal ki sharan men chale jate. Ab ye n poochhiyega ki ye Prakash Lal kaun tha kyoonki ham to use jane bagair hi usaka marsiya padh dete the yani
shail kabaddi aas lal mar gaya prakash lal mera kurta lal lal lal lal...
Budiya kabaddi ka shumar to ab luptapray khelon men kar lena chahiye. par gilli danda, rassi aur lattoo, kanchoin, pitto, konon ki adala badali aur rumal le kar bhagane vale khel to kasbon aur ganvon men jaroor khele jate honge. aaj to bajar men har aayu varg ke liye tarah tarah ke aakarshak khel hain khasakar tab jab aapaki jeb men inake liye paryapt paise hon. vaise bhi aaj ke bachchon ke hatha, mobile aur computer ke keybord men game khelne ko itane siddhast ho jate hain ki unhen gilli aur dande ko pakadane ki jaroorat hi kya hai. par jo bachche in suvidhaon se abhi bhi door hain unake liye to ye khel aaj bhi mauj masti ki tarang jaroor late honge.
To aaiye aaj aapako vo geet sunaoon jo mujhe apane bachpan ki inhin yadon ke bahut kareeb le jata hai. Sujata film ke is geet ke bol likhe the Mazrooh Sultanpuri ne aur sangeetabaddh kiya tha Sachin Dev Burman sahab ne. Geeta Dutt aur Asha ji ne jo chuninda yugal geet gaye hain unamen se ye ek tha. gayiki, sangeet aur bol teenon ke lihaz se ye geet mujhe pasand hain ..
bachpan ke din bachpan ke din bachpan ke din bhi kya din the hay hay bachpan ke din bhi kya din the udate phirte titali ban ke bachpan....
vahan firate the ham phoolon men pade yahan dhoondhate sab hamen chhote bade thak jate the ham kaliyan chunte bachpan ke din bhi kya din the udate phirte titali ban ke bachpan.....
kabhi roye to aap hi hans diye ham chhoti chhoti khushi chhote chhote vo gham hay re hay hay hay hay re hay kabhi roye to aap hi hans diye ham chhoti chhoti khushi chhote chhote vo gham hay kya din the vo bhi kya din the
bachpan ke din bhi kya din the udate phirte titali ban ke bachpan ...
Pyar bhi ek azeeib si fitrat hai. Pahle to kisi ka dil jeetane ke liye mashakkat keejiye . Aur agar vo mil gaya to bhi chain kahan hai janaab ! Use khone ka dar bhi to sath sath chala aata hai. Aur to aur paristhitiyan badalti rahein to bhi hamare sathi ki hamase ummid rahti hai ki pyar ki tapish bani rahe. Aur gar aap sathi ke khayalaton ki sudh lene se chooke to fir ye ulahana milate der nahin ki tumhen ham se vo pahali si mohabbat bhi nahin !
Par ye bhi hai ki bina shikave, shikayaton aur manuharon jaise tonic ke prem ka rang fika rah jata hai. Isaliye rishton ki khamoshi bhi man mein shaq aur bechaini paida kar deti hai . Aisi hi kuchh shikayaten liye ek pyara sa nagma aaya tha 1966 mein pradarshit film 'neend hamari khvab tumhare' mein. Roomaniyat mein doobe is geet ko likha tha Rajendra Krishna sahab ne aur is geet ki dhun banaee thi Madan Mohan ne. Geetakar Rajendra ke bolon mein vo kashish thi ki kitne bhi naraaz hamarahi ki muskan ko vapas lauta laye. Bas jaroorat thi ek madhur dhun aur madhury bhari aavaj ki. aur is jaroorat ko bhali bhanti poora kiya Madan Mohan aur Asha Bhosle ki jodi ne..
Ye geet vaise geeton mein shumar hota hai jo bina kisi vadya yantr ke bhi sune jayein to bhi dil ko chhoote se jate hain..To agar aap bhi shikayati mood mein hain to bas apane meet ke paas jakar yahi geet gunguna dijiye na..
koee shikva bhi nahin, koee shikayat bhi nahin aur tumhen ham se vo pahli si mohabbat bhi nahin koee shikva bhi nahin....
ye khamoshi, ye nigahon mein udasi kyoon hai? pa ke sab kuchh bhi mohabbat abhi pyasi kyoon hai? raj- e- dil ham bhi sunen itani inayat bhi nahin aur tumhen ham se vo pahli si mohabbat bhi nahin koee shikva bhi nahin....
pyar ke vade vafa hone ke din aaye hain ye na samajhao khafa hone ke din aaye hain rooth jaoge to kuchh door qayamat bhi nahin aur tumhen ham se vo pahli si mohabbat bhi nahin koee shikva bhi nahin....
ham vahi apni vafa apani mohabbat hai vahi tum jahan baith gaye apni to jannat hai vahi aur duniya mein kisi chij ki chahat bhi nahin aur tumhen ham se vo pahli si mohabbat bhi nahin koee shikva bhi nahin....
Navaratr shuru ho gaye hain aur kal Eid sollaas manaee ja chuki hai. Parv tyoharon ke is masti bhare daur mein blog par bhi masti ka rang chadana lazimi hai na. Aaj jo mood man mein tari hai uska poora shrey jata hai Mathura ke gyarah varshiy balak Hemant Brijvasi ko. Hafte bhar se hemant ki aavaj kanon mein goonj rahi hai. 11 September ki us yadagar rat ko Zee TV Little Champs par khud Asha taee padhari thin. Poore karyakram mein ladakiyon ko Asha ji aur ladakon ko Pancham ke gane gane the. Ab pancham ki bhari aavaj aur unaki urjatmak shaili ko das barah saal ke bachchon dvara nibha pana tedhi kheer tha. Phir bhi sab pratibhagiyon ne achchha prayas kiya, par Zamane Ko Dikhana Hai film mein pancham dvara gaye geet dil lena khel hai diladar ka, bhoole se naam na lo pyar ka... ki hemant dvara prastuti itani damdaar thi ki Asha taee tak ko kahana pad gaya ki "aapane to burman sahab se bhi behatar tarike se is geet ko nibhaya".
Poore karyakram mein ek aur baat kamal ki thi aur vo thi gayakon ko jabaradast support deta huaa manabhavan orchestra. Waise bhi Zee TV ke sangeet karyakramon mein kayee salon se manje huye saazkaron ko bajate dekhata raha hoon aur Pancham ki dhunon mein to inki vishesh bhoomika hamesha hi raha karati thi. Pancham ke sangeetabaddh geeton ka parshv sangeet unki anoothi shaili ki gavahi deta hai. Darasal tarah tarah ki aawazon ko paramparik aur gair paramparik vady yantron se nikalane mein Rahul Dev Burman ka koee sani nahin tha.
To lautein apne is surile balak ki oor. Hemant ki damdaar prastuti yaadgaar tab ban gaee jab usane geet ke bad Asha ji ko Bulleshah ke likhe soofiyat mein range punjabi lokageet ka vo tukada sunaya.
charkha de mitta diyan dooriyan........... ho..main kati javaan teri hor piya dooriyan gad sakhri ra gad sakhri ra ... gada.. sakh...rira.. gad sakhri ra varan diye kudiye........... main paiya aur sipahayiye
Sach maniye Hemant ne un chand panktiyon mein li gaee harkaton ne aisa sama bandha ki hajaron darshakon ke sath-sath Asha ji ki bhi aankhen gili ho gaeen aur ve kah uthin
Hemant agar sabase badi kala koee mani jati hai to vo kala hai sangeet kala. Sangeet kala bhagavan ke nazdeek hoti hai. aur tumhara jo gana hai vo bhagavan ke bahut nazdeek hai.
Nau saal ki aayu se apae pita aur guru Hukumchand Brijvasi se sangeet sikhna shuru karane vale Hemant ko shastriy aur soofiyana nagme gane mein maharat hasil hai. Matr do sal sangeet ki shiksha lene ke baad ye balak geeton mein apani aur se jodi huee vividhataon ka is tarah samavesh karata hai manon geet se khel raha hai. Hemant ki aawaaz aur uchcharan ek shishe ki tarah saaf aur spasht hai par uske sath dikkat yahi hai ki vo apni shaili ke geeton se alag tarike ke geeton mein vo kamal nahin dikhala pata. Par shayad aaj ke yug mein iski jaroorat bhi nahin hai. Har gane ke pahale apani jihva ko banke bihari lal ki jayakar se pavitra karane vala ye balak Nusarat aur Asha ji ko apana aadarsh manta hai. Geet sangeet ke aalava cricket bhi khelata hai aur mauka mile to Shahrukh aur Karena ki filmein dekhana bhi pasand karta hai.
To agar aapane us din is prasaran ka aanand nahin liya to ab le lijiye..
Waise is soofi lokageet ko poora sunne ki ichchha aap ke man mein bhi ho rahi hogi. Is lokgeet ko sabase pahale lokapriy banaya tha soofi ke badashah Nusrat Fateh Ali Khan sahab ne aur fir is geet ko naee bulandiyon par le gaye the jalandhar ke punjabi puttar Saleem Shahajada. Badashah aur shahajade dvara is lokageet ki prastuti ko aap tak pahunchane ki shighr hi koshish karoonga.
Pichhle hafte yani 18 August ko Gulzar sahab ka 73 van janmdin tha. Waise to Gulzar ki baatein 'Ek Shaam Mere Naam' par hoti hi rahti hain aur is baat ka praman hai ki ye un se judi is blog ki 25 th post hai. Mere hindi film sangeet ke prati aaranbhik jhukav mein is shakhs ka mahti yogdaan raha hai. College jeevan ke kitne hi rangeen aur ekaaki lamhe unke geeton ke sath kate hain. Aisa hi ek lamha tha aaj se kareeb bees varsh poorv ka jise aaj is avasar par aap sab se bantane ki ikchha ho rahi hai.
Baat 1990 ki hai. Hamein engg. college mein gaye huye 6 mahine beet chuke the yani yoon kahen ki shuruaati do teen mahinon vali ragging ka phase samapt prayah ho gaya tha. Ghar se nikalane ke bad ki pahali pahal aajadi ka asali svad chakhane ka yahi samay tha. yani ab ham aaram se kanlej hanstal se ranchi ke firayalal ke chakkar laga pa rahe the. fursat ke lamahon mein padaee ke aalava naee naee balaon ki vishishtataon ki charcha mein bhi khoob aanand aane laga tha. ऍse mein pata chala ki march ke mahine mein mesara ka salana mahotsav jise vahan beetotsav (Bitotsav) kaha jata hai aaranbh hone vala hai.
Ab apan in karyakramon mein hissa-vissa to nahin liya karte the par sare karyakramon ko dekhne ki ikchha jaroor hoti thi. Aur sabae adhik intazar rahta tha is utsav ki samapti par hone vale sangeet mahotsav ka jis mein poore archestra ke sath pashchaty aur hindi donon tarah ke sangeet ka karykram huaa karta tha. March mahine ki vo raat mujhe kabhi nahin bhoolti. Bahut sare geet gaye ja chuke the par vo lutf abhi tak nahin aaya tha jiski apeksha liye ham khule aakash ke neeche maidan mein do ghante se baithe the. Tabhi hamare senior batch ki do chhatraon ke naam stage par udghoshit kiye gaye. Ham sab ne socha koee yugal geet hoga. Aur fir shuru huaa aasha taee ka gaya vo geet jiske prabhav se main varshon mukt nahin ho paya.
Vo geet tha Gulzar ka likha huaa aur pancham ka sangeet baddh katra katra milti hai, katra katra jine do... Bhavna Bhandari aur B. Sujata ki jodi ne Asha taee ke is ekal geet ko mil kar itani khoobsoorti se nibhaya ki ham raat bhar pagalon ki tarah is geet ko gunagunate rahe.
Agle din chhutti thi par is geet ko fir se sunne ki ichchha itni balvati thi ki nashta karane ke theek baad agali bas se Ranchi is film ki casette kharidane ke liye nikal pade. Ab casette to din tak hostal mein aa gaee par agali samasya thi ki ise bajaya kaise jaye kyoonki mere pas us waqt koee taperecorder to tha nahin. Lihaza baari baari se padosiyon ke daravaje thak thakaye gaye taki ek adad teparikardar udhari par manga ja sake. tisare ya chauthe daravaje par hamari iltija rang laee aur char ghante ke liye hamein taperecorde mil gaya.Phir to ye geet ghanton rewind kar kar ke bajaya gaya. Gulzar ke prati mera anurag aise kaee anubhavon ki badaulat mere dil mein satat palata badhta raha hai. Khair baat ho rahi thi qatra qatra ki...
Darasal geet ko itna khoobsoorat banane mein Gulzar, Pancham aur Aasha ji ki tikadi ka barabar ka hath hai. Kya dhun banaee thi pancham da ne aur apani pyari chahakti chhanachhanati aavaj mein kitani khoobsoorti se nibhaya tha Asha ji ne. Pancham to sangeet mein nit naye prayog karne mein mahir rahe hain. Is geet mein Pancham ne Asha ji ki aavaj ka istemal multi track recording mein is tarah kiya hai ki poore geet mein do aashayen ek sath sunaee deti hai.
To aaiye Gulzar ke likhe shabdon ko mahasoos kijiye Pancham ki adbhut svaralahariyon aur Asha ji ki bahati aavaj mein ...
qatra qatra milti hai qatra qatra jine do zindagi hai, zindagi hai bahne do, bahne do pyasi hoon main, pyasi rahne do rahne do ...
kal bhi to kuchh aisa hi huaa tha neend mein thi tumne jab chhuaa tha girte girte bahon mein bachi main sapane pe panv pad gaya tha sapnon mein rahne do pyasi hoon main pyasi rahne do
tum ne to aakash bichhaya mere nange pairo.n mein zamin hai pa ke bhi tumhari aarazu hai ho.. shayad aisi zindagi hasin hai aarazu mein bahne do pyasi hoon main ,pyasi rahne do rahane do, na ...
qatra qatra milti hai....
halke halke kohare ke dhuyein mein shayad aasaman tak aa gayi hoon teri do nigahon ke sahare dekho to kahan tak aa gayi hoon kohare mein bahne do pyasi hoon main, pyasi rahane do rahne do, na ...
qatra qatra milati hai.....
Gulzar ka likha geet to aapane sun liya par unaki likhi najmon ya gajalon ko aapane nahin suna to fir Gulzar ke shabd chitron mein doobane ka mauka to kho diya aapane. isaliye chalate chalate unase judi meri tin pasandida kadiyan bhi padate sunate jaiye. main janata hoon ki agar aapane inhen pahale nahin suna to bar bar jaroor sunana chahenge...
Gulzar sahab ke janmadin par meri yahi kamana hai ki ve isi tarah apane kalam ki vilakshanata se mamooli shabdon mein bhavon ke jaduee rang bharate rahein aur hamein yoon hi apani rachanaon se achanbhita, mudit aur nishabd karate rahen...aameen
Gulshan Bawra nahin rahe..pichhale saptahant TV par ye khabar suni to sattar aur assi ke dashak mein unke rache vo rasile-surile geet ekadam se ghoom gaye jinhen sunkar hamari peedhi pali aur badi huee hai. Aaj ki ye pravishti Gulshan Mehta ki zindagi ke safar mein jhankne ka ek prayas hai jinke bavare mastamaula vyaktitv ne apni kalam ke jariye karodon bharatiyon ko unke geeton ko gunagunane par majaboor kar diya.
Lahore se kareeb 30 km door Shekhpura namak qasbe mein janme is balak ne bachapan mein hi vibhajan ke dauran relgadi se bharat aate waqt apne pita ko talavar se katate aur maan ko sir par goli lagte dekha tha. Bhaee ke sath bhagkar ye Jaipur aa gaye jahan bahan ne inki paravarish ki. Par gaur karne ki baat ye hai ki is bhayavah trasadi ki yantrana ko jhelane vale Gulshan Bawra ne ise apani zindagi apane vyaktitv aur apane likhe geeton par kabhi havi nahin hone diya. Baad mein bhaee ko dilli mein naukari milane ki wajah se vo dilli chale gaye. 1955 mein railway mein clerk ki naukari milne par ye munbai aa gaye.
Likhne ka shauq Gulshan Bawra ko bachpan se tha. Bachpan mein maan ke sath bhajan mandali mein shirqat karne ki wajah se bhajan likhne se unke lekhan ka safar shuru huaa jo college ke dinon mein aate aate aashanuroop roomani kavitaon mein badal gaya. Isliye Mumbai mein naukari karte waqt fursat milte hi unhonne sangeetakar jodi Kalyan ji Anand ji ke daftar ke chakkar lagane nahin chhode. Gulshan Mehta ko pahli safalta isi jodi ke sangeet nirdeshan mein Ravindra Dave ki film Satta Bazar (1957) mein mili jab unka likha geet .....
tumhen yad hoga kabhi ham mile the,mohabbaat ki rahon mein mil kar chale the bhula do mohabbaat mein ham tum mile the, sapna hi samjho ki mil kar chale the
...(jise hemant da aur lata ji ne apana svar diya tha) behad lokapriy huaa tha. is film ke vitrak Shantibhaee Patel ne jab 20 saal se kam umr vale is navodit geetakar ko bhadakile rang ke kapadon mein dekha to unhein vishvas nahin huaa ki ye ladka aise gambhir geet ki rachna kar sakta hai . tabhi se unhonne Gulshan Mehta ka namakaran Gulshan Bawra kar diya. Aagami kuchh saal Gulshan ji ke liye mashakkat vale rahe aur in salon mein ve kaee filmon mein abhinay kar apna gujara chalate rahe. Waise unke jis geet ne poore bharat me unke naam ka sikka jama diya uske liye sara shrey unki goods clerk ki naukari ko dena uchit jan padta hai.
Darasal railway ke maa avahak vibhag mein Gulshan Bawra aksar punjab se aaee gehoon se ladi boriyan dekha karte the aur vahi unake man mein in panktiyon ka sanchar kar gaee
mere desh ki dharti,mere desh ki dharti sona ugle ugle hire moti, mere desh ki dharti..
Jab unhonne apane mitr Manoj Kumar ko ye panktiyan sunaeen to usi samay manoj ne ise apani film upakar ke liye chun liya. Ye geet unhen 1967 ke sarvashreshth geet ka filmfare puraskar dila gaya.
Waise sahi mayene mein upkar ke is geet ne Gulshan Bawra ko bharat ki janata se jod diya. Sattar ki shuruaat mein sabse pahale 1974 mein film hath ki safaee mein lata ji dvara gaye unake geet tu kya jane bewfa.. aur vada karale sajana... behad lokapriy rahe. Phir 1975 mein aaee film zanzeer mein unke geeton divane hain divanon ko na ghar chahiye... aur yari hai eeman mera yar meri zindagi.... ne poore desh mein dhoom macha di. in donon hi filmon ka sangeet Kalyan ji Anand ji ne diya tha.
Phr aaya Gulshan Bawra aur Pancham ki geet sangeetakar jodi ka daur. daraasal Gulshan Bawra ke geeton se mera pratham parichay sattar ke uttarardh mein huaa jab geet sangeet sunae ki ruchi man mein jagrat ho chuki thi. Is dauran is jodi ki jo bhi safal filmein aaeen vo sabhi mainne cinema ke parde par dekhin. Lazimi hai ki is daur mein unake likhe geet meri juban par sabase jyada rahte hain.
Sabse pahale zikra karna chahoonga 1975 mein aaee film khel khel ka jiske takareeban sare geet mujhe behad priy the. Bachapan mein jab antyakshari khela karte to pahali bar kisi ka 'h' aaya nahin ki vo shuru ho jata tha
aur mamala yahin khatm nahin hota tha . mukhade ke baad sare bade chhote bachche mil kar antara jaroor gate the
baste-baste bas jayegi is dil ki basti tab hi jivan mein aayegi pyar bhari masti baste-baste bas jayegi is dil ki basti hay tab hi jivan mein aayegi pyar bhari masti hamari dastan kahega ye jahan ,ho hamari dastan kahega ye jahan hamne tumako dekha tumane hamako dekha aise ..
. aur isi film ka vo geet use kaun bhool sakata hai bhala
khullam-khulla pyar karenge ham donon is duniya se nahin darenge ham donon pyar ham karate hain chori nahin mil gaye dil zora-zori nahin ham vo karenge dil jo kare hamako zamane se kya
Tab tak pyar vyar ka matalab bhi thik pata nahin hota tha. Ab ise gulshan ji ke bavare shabdon ka kamal kahein ya asha kishor ki zabardast jugalbandi, is geet ko gane mein itani khushi milti thi ki aaj bhi ise gunagunate waqt aisa lagta hai ki mainne apni zindagi ke das pandrah varsh ghata liye hon.
Saal beette gaye Gulshan ek ke bad ek hit geet dekar hamein kabhi muskurane,kabhi hullad machane aur kabhi sanzeeda hone ka mauka dete gaye.1978 mein aaee film kasme vade ka ye geet ho
aati rahenge baharen jati rahengi baharen dil ki najar se duniya ko dekho ,duniya sada hi hasin hai
ya 1979 mein aaee film jhootha kahin ka ye geet
jivan ke har mod para,mil jayenge hamasafar jo door tak sath de,dhoondhe usi ko nazar
ya fir mein satte par satta (1982) ka shirshak geet
dukki pe dukki ho ,ya satte pe satta gaur se dekha jaye, to bas hai patte pe patta, koee farak nahin albaatta..
ye sare geet hamne us zamane mein behisab gunagunaye. assi ke dashak mein bhi
Sanam teri kasam kitne bhi tu kar le sitam,hans hans ke sahenge ham ye pyar na hoga kam, sanam teri kasam Jawani tu rutha to main ro doongi sanam , aa ja meri bahon mein aa ...
aur Agar tum na hote ke liye unake likhe geet behad charchit huye . is film ke shirshak geet ke antare ko dekhiye
hamein aur jine ki chahat na hoti agar tum na hote hamein jo tumhara sahara na milta,bhanvar mein hi rahte kinara na milta kinare pe bhi to lahar aa duboti, agar tum na hote...
Gulshan Bawra ki khasiyat thi ki vo apne geeton mein bina jyada lachchhedar kavyatmak bhasha ka prayog kiye huye apani baaton ko shrotaon tak sahajta se pahunchana janate the. Wo kaha karte the ki geet vyakaran ki ashuddhiyon aur vaicharik gadabadiyon se pare hone chahiye. Ek sakshatkar mein unhonne aavara film mein shailendra ke likhe lokapriy geet ke bare mein kaha tha ki
aavara hoon aavara hoon ya gardish mein hoon aasman ka tara hoon ki jagah aavara hoon aavara hoon main gardish mein bhi aasman ka tara hoon
likhna jyada behatar hota kyoonki gardish shabd jivan mein aaye sangharsh ya uthalputhal ka prateek hai aur is avastha ko taron se jodana prakrtik satya ke vipareet hai. Sirf geet ke meter ko durust rakhane ke liye prakrtik aur sansarik tathyon se chhed chhad nahin karani chahiye.
Apne chalis sal ke lanbe sangeet ke safar mein Gulshan Bawra ne matr 250 geet likhe jisamein 150 pancham aur karib 70 kalyan ji anand ji dvara sangeet nirdeshit filmon ke liye likhe gaye. gulshan ji ka kahna tha ki
Zindagi mein jyada kaam karane ya kaam pane ke liye zaddozahad karne ki unaki pravriti nahin rahi. isaka ek karan hai ki meri koee santan nahin hai. main tab ek film ke liye 90000 rupaye parishramik leta tha jab mumbai mein ek ghar ki kimat 65000 rupaye huaa karati thi. na mainne apane parishramik se kabhi samajhauta kiya, na apane kam ki gunavatta se...
Aaj jabki Gulshan Bawra hamare beech nahin hai mujhe khel khel mein likha ye geet baraha yad aa raha hai jisemein unhonne likha tha
sapana mera toot gaya are vo na raha kuchh na raha roti hueen yaden milin bas aur mujhe kuchh na mila
Ye geet mujhe aasha ji aur pancham ka gaya sabse behatareen yugal geet lagta hai. is geet ke sath hi chhod raha hoon aapako Gulshan Bawra ji ki in yadon ko aatmasat karane ke liye.... .
Gulzar, Pancham aur Kishor ki tikadi ne sattar ke dashak men to kayee bemisal nagme diye jo bhulaye nahin bhoolate. Par aaj mujhe yad aa rahi hai 1975 men pradarshit film khushaboo ki jisamen o majhi re jaise.... Kishor ke sadabahar nagme to the hi par Asha ji ke gaye kuchh nagme bhi behad lokapriy huye the. Aaj isi film ke un do geeton ki baat jisamen Gulzar aur pancham ke aalava, jadoogari thi Asha ji ki behatarin gayiki ki.
Pahala geet tha bechara dil kya kare... jise sunne aur gungunane bhar se hi man masti ki ek naee tarang men doob jata hai. Iss geet ki prakrti hindi film jagat men in arthon men bhinn hai ki yahan apane dil ki bat nayika khud nahin kah rahi hai balki uske man ke halaton ko usaki mitr apana svar de rahi hai. Waise jivan men ye to aap sab ne mahasoos kiya hoga ki jab hamare man men chalati bhavanaon ko hamara karibi mitr padh leta hai to hamen man hi man khushi hi hoti hai. Isaliye geet men is khushi ki tarang sarvatr vyapt hai.
Is geet ka filmankan charitra abhinetri Farida Zalal par huaa tha. Nayika thin Hema Malini aur nayak the Jitendra jinhonne is film mein ganv ke Doctor ki bhoomika ada ki thi. agar film na bhi dekhi ho to geet k bolon se aap kafi kuchh samajh gaye honge.
Waise Gulzar ne Pancham ke ek album men geeton ka jikr kiya to ye bhi baat baanti ki Asha ji behad safaeepasand hain. Aur jab bhi vo samane dikhti Pancham ye kahna nahin chookte ki lo ab ye mujhase kam karayengi. Pancham ne to aasha ki is safaee pasandi ko dhyan men rakhakar unhen janmadin ke avasar par chandi ke warq men lapet kar ek jhadu bhi diya tha aur javab men Asha ji ke hothon par yahi geet tha
bechara dil kya kare, savan jale bhado jale do pal ki rah nahin, ik pal ruke ik pal chale
ganv ganv men, ghoome re jogi, rogi change kare, mere hi man ka, taap na jane, hath na dhare bechara dil kya kare, savan jale bhado jale..
tere vaste, lakhon raste, tu jahan bhi chale, mere liye hain, teri hi rahen, tu jo sath le bechara dil kya kare, savan jale bhado jale..
Isi film ke liye Gulzar sahab ne ek aur behatarin geet racha tha jo ki pahale geet ki tarah hi mujhe behad priy hai.
Ab aap hi bhala bataiye yauvan ki dahaleez par kadam rakhti kis ladki ko dulhan banne ki ikchchha nahin hoti? Aur sajana sanvarna to unake svabhavik charitr ka aham hissa hai. Par is umang ke sath ek tarah ki bechaini bhi to rahati hai. Ek anajan se ghar men jane ka dar aur naye jivanasathi ke bare men uthti tarah tarah ki hajaron kalpanayen ! In bhavanaon ko Gulzar ne bade hi pyare andaj men sameta hai is geet men. Aur Asha ji ki mithi aavaj men is geet ko sunane ka apna alag hi aanand hai.
ghar jayegi tar jayegi ho doliyan chad jayegi ho.... mehendi lagayake re kajal sajayake re dulhaniya mar jayegi ho..dulhaniya mar jayegi
dhire dhire le ke chalana aangan se nikalana koee dekhe na dulhan ko gali men ho ankhiyan jhukaye huye ghunghata giraye huye mukhada chhupaye huye chali main jayegi ghar jayegi tar jayegi ho ghar jayegi ...
mehandi mehandi kheli thi main teri hi saheli thi main toone to kusum ko chuna tha ho toone mera nam kabhi aankhon se bulaya nahin mainne jane kaise suna tha jayegi ghar jayegi la la la ho ghar jayegi ...
Kuchh dinon pahale sangeetakar Roshan aur Sahir ki jodi dvara rachit dil jo na kah saka ke bare men bate hueen thin. aaj se char din bad yani 14 July ko sangeetakar Roshan ka janm din hai to menne socha ki kyoon na Sahir ke bolon par unake sangeetabaddh is shastriy nagme ko aapake samane prastut kar unaki yad dilaee jaye. Lata ji ke sath to Roshan sahab ne to kaee adbhut geet diye hain par aaj ka ye geet lata ji ka nahin balki Asha Bhonsle aur Usha Mangeshkar ka gaya yugal geet hai.
Agar hindi filmon men shastriy yugal geeton ki baat karein to unamen 1964 men aaee film Chitralekha ke is geet ka jikr nahin hona aashchary ki bat hogi. ye geet rag kalavati par aadharit hai jo ki madhyaratri ke poorv gaya jane vala rag hai. khair main to mangeshkar bahanon ki is shastriy jugalabandi ko kisi bhi vakt sunata hoon, man mudit ho jaya karta hai. sangeetakar raushan ki khasiyat yahi thi ko vo apani dhunon men lok sangeet aur shastriy sangeet ke beech aisa samanjasy sthapit karte the ki hrday unki jadoogari par vah vah kar uthe. bemisal gayiki aur sangeet ke aalava ek aur baat is geet ko anokha banati hain vo hain isake bola..
Sahir ek maqbool shayar to the hi filmon ke liye unaki likhi huee ghazalen bhi utani hi mashahoor hueen. par vahi shakhs shuddh hindi men bhi usi mahiri ke sath geet rachana kar sakta hai ye baat is geet ke shabdon par gaur karane se pata chal jati hai.
Chaliye ab is geet ka mood tatolate hain. savan ka mahina praranbh ho chuka hai. aise men agar piya ji paradesh men hon aur lautane ka nam nahin le rahe aur oopar se barish ki ye halki halki fuharen tan man men aur aag laga den to jiyara to tarasega hi !
to aaiye sunte hain aasha aur usha ji ki is adbhut jugalabandi ko
kahe tarasaye jiyara kahe tarasaye jiyara, jiyara... yavan ritu sajan jake n aa...ye.. kahe tarasaye jiyara, kahe tarasaye jiyara..
nit nit jage na nit nit ja.. jage na, nit nit ja.. jage na, nit nit jage na soya singa...r, soya singa.......r jhanan jhan jhanana, nit na bula..ye kahe jiyara tarasaye kahe tarasaye jiyara, kahe tarasaye jiyara..
nit nit aaye na nit nit aa.. aaye na, nit nit aa.. aaye na, nit nit aaye na tan pe nikha...ra, tan pe nikha......r pavan man suman nit na khila..ye kahe jiyara tarasaye kahe tarasaye jiyara, kahe tarasaye jiyara
nit nit barase na nit nit bara. barase na, nit nit bara.. barase na nit nit barase na ras ki fuhara, ras ki fuha...r sapan ban gagana, nit na luta..ye kahe jiyara tarasaye kahe tarasaye jiyara, kahe tarasaye jiyara jiyara...
Aur chitrlekha film ke is geet ko dekhana chahate hon to yahan dekh sakate hain
Agar aap se main ye poochhoon ki guzre zamane jab cinema ke parde ka rang shvet shyam huaa karata tha to abhinay aur khoobasoorati donon ke lihaz se aapaki pasandida abhinetri kaun thi to aap mein se shayad jyadatar logon ka javab madhubala hi ho. par jab main apani aankhe band kar smrti patal par jor deta hoon to in donon kasautiyon par man mein bas ek hi adakara ki chhavi ubharati hai..sahab bivi aur ghulam, kagaz ke phool, khamoshi aur Teesari Kasam vali pyari Wahida Rahman ji. yoon to Wahida ji ne rangin filmon mein bhi kaam kiya par shvet shyam rangon mein bhinn bhinn filmon mein nibhaye gaye kiradaron aur un par filmaye gaye geeton ko main hamesha apane zehan ke karib pata hoon
aisa hi ek geet tha 1966 mein geetakar shailendra dvara banaee gayee film Teesari Kasam ka. sath ke dashak mein bani ye film renu ki dil chhooti patkatha, nayak nayika ke zabaradast abhinay aur apne svarnim geeton ki wajah se meri sabase priy filmon mein ek rahi hai. yoon to Teesari Kasam ke tamam geet avval darze ke hain par unmein se teen mujhe khas taur par pasand hain.
aaj jis geet ko aap ke samane prastut kar raha hoon use gaya tha aasha bhosale ne...pata nahin is geet ke mukhde mein kya khas baat hai ki bas use sunte hi man chuhal aur masti ke mood mein aa jata hai. geetakar shailendra ne gramin prshthabhoomi mein bani, is film ke bol bhi nautanki ke mahaul mein dhyan rakh kar likhe hain.to aaiye sunen sangeetakar jodi shankar jayakishan dvara sangeetabaddh is geet ko
haye ghazab kahin tara toota loota re loota mere saiyan ne loota pahala tara atariya pe toota danto tale mainne daba agoontha loota re loota savariyan ne loota haye ghazab kahin tara toota
haye ghazab kahin tara toota doosara tara bajariya mein toota dekha hai sabane mera daman chhoota loota re loota sipahiya ne loota haye ghazab kahin tara toota
teesra tara fulabagiya mein toota foolon se poochhe koee, hai kaun jhootha loota re loota darogava ne loota haye ghazab kahin tara toota
us zamane mein gramin sanskrti mein manoranjan ke ekamatra madhyam ke roop mein nautanki ka kya yogadan tha ye baat is geet ko dekh kar hi aap mahasoos kar sakate hain. nachavali ke thumake kahin foolon ki khushabu se bhinge bhavanatmak prem ko jagrit kar rahe hain to kahin rupaye ke dambh mein doobi havas ko.
Teesari Kasam ke apne anya pasandida geeton ko aap tak pahunchane ka kram aage bhi zari rahega..
Cinema dekhana mere liye kabhi lat nahin bana. shayad hi kabhi aisa huaa hai ki mainne koee film sho ke pahale hi din ja kar dhakka mukki karate huye dekh li ho. par isaka matalab ye bhi nahin ki movie haal mein jakar film dekhana achchha nahin lagata tha. bas dikkat mere sath yahi hai ki man layak film nahin rahane par mujhe tin ghante pikchar jhel pana asahy kary lagata hai. isiliye aajakal kafi tahakikat karake hi film dekhane jata hoon.
par bachapan ki bat doosari thi. daraasal hamare pitaji padaee likhaee ke sath parivar ke manoranjan ka bhi khasa khyal rakhate the. so unaki vajah se har hafte ya fir do hafton mein ek bara, do rikshon mein savar hokar hamara panch sadasyon ka kunaba patana ke vibhinn sinemahanlon mona, elifistana, ashoka, apsara aur vaishali aadi ka chakkar laga leta tha. ye silasila tab tak chala jab tak papa ka tabadala patana se bahar nahin ho gaya. 1983 mein release huee rajesh khanna ki avatar sare parivar ke sath dekhi gaee meri aakhiri film thi.
yek bar dasavin mein ladakon ne skool mein free period ka fayada uthakar film dekhane ki sochi. yojana ye thi ki free period ke samay film dekh li jaye aur film ki samapti tak ghar par hajiri bhi de di jaye. ab film bhi kaun si ? Brook Shield ki Blue Lagoon:) . man hi man dar rahe the ki sahi nahin kar rahe hain. par sathiyon ke josh dilane par skool se bahar nikal aaye, par ayen vakt par mukhy shahar ki or jane vali bas ke panyadan par pair rakhakar vapas khinch liya. dost bas se pukarate rahe par main anamane man se vapas laut aaya.
usake bad film dekhana ek tarah se band hi ho gaya. 89 mein enggg mein dakhila huaa to pahali bar ghar se nikale. pahale semaetar ki shuruaat mein kanlej kainpas se bahar jana to doora, raiging ke dar se ham hanstal ke bahar nikalana bhi khatare se khali nahin samajhate the. jate bhi to kaise, praya aisi kahaniyan sunane ko milati ki log gaye the film dekhane par siniyars ne firayalal chauk par jabaradasti ka trafik inspektar bana diya. yani khud ka manoranjan karane ke bajaye doosaron ki hansi ka patr ban gaye.
khair, ek mahine ke bad jab ragging ka daur kam ho gaya to ham doston ne milakar ek film dekhane ka karyakram banaya. pahali bar akele kisi film dekhane ke aalava ye mauka chhaः sal ke antaral ke bad sinema hanl mein jane ka tha. seniors se bachne ke liye student bas ki jagah staaf bus li aur chal diye ranchi ke ratan talkies ki or.
vo film thi vidhu vinod chopada ki parinda. itane salon bad bade parde par film dekhana bada romanchak anubhav raha. nana patekar ka kasa huaa abhinay aur madhuri dikshit ki masoomiyat bhari khoobasoorati bahut dinon tak smrti patal par ankit rahi. aur sath mein chhaya raha is film mein aasha aur suresh wadkar ke svaron mein gaya huaa ye yugal geet
pyar ke mod pe chhodoge jo bahein meri tumako dhoondhegi jamane mein nigahen meri
gane ki jan aasha taee ka gaya ye mukhada hi tha jisake bol aur dhun sahaj hi man ko aakarshit kar leti thi.
ye vo samay tha jab film jagat ne hi R.D. Burman ko ek chuka huaa sangeetakar man liya gaya tha. par is film ka sangeet kafi saraha gaya aur is geet ke aalava tumase milake aisa laga tumase milake..bhi kafi pasand kiya gaya. parinda ke geeton ko likha tha Khursheed Hallauri ne. to aaiye sunen parinda film ka ye yugal geet...
8 September Asha tayee ki 75 vin salagirah thi. kuchh dinon pahale unhen 'sa re ga ma' ke manch par gaate suna tha. abhi bhi vo khanaka, vo madhury jas ka tas bana lagata hai. aaj is khushi ke avasar par geet aur gajalon ka ye guladasta aapake liye pesh-ye-khidamat hai. jivan ke har rang ko apani gayiki main samahit karane vali is mahan gayika ki aavaj main aaj suniye piya ko sanbodhit karaata ek pyara sa gita, ek udasi bhari najm aur faij ki likhi ek dilakash gajal .
sabase pahale bat is najm ki jo mainne sabase pahale 1985 ke aas pas suni thi. abhi jo thodi bahut urdu samajh main aati hai, us vakt vo bhi samajh nahin aati thi. par jane kya tha is najm main, ki mukhada sunate hi isaki udasi dil main tair jati thi. mere khyal se ye sara karishma tha aasha taee ki bhavapoorn aavaj ka, jisaki vajah se bhasha ki samajh na hote huye bhi isaki bhavanaon ka sanpreshan hrday tak sahajata se ho jata tha.
to aaiye pahale sunen Meraj-e-Ghazal se li gaee salim gilani sahab ki likhi ye najm
raat jo toone deep bujhaye mere the... mere the.... ashk jo sare dil main chhupaye mere the... mere the....
kaife baharan, mahare nigaran, lutf e junoon mausam e gul ke mahake saye mere the... mere the....
mere the vo, khab jo toone chhin liye git jo hothon par murajhaye mere the... mere the....
aanchal aanchala, gesu gesoo, chaman chaman sari khushabu mere saye mere the... mere the....
sahil sahil laharen jinako dhoondhati hain maji ke vo mahake saye mere the... mere the....
ghulam ali ke sath aasha ji ka ye album mujhe do any prastutiyon ke liye bhi priy tha. ek to shabih abbas ka likha, bada pyara sa muskuraata gudagudata ye nagma . dekhiye aasha ji apani ithalati aavaj main kis tarah apane sajan ke liye prem ke kaside pad rahi hain
salona sa sajan hai aur main hoon jiya main ik agan hai aur main hoon
tumhare roop ki chhaya main sajan badi thandi jalan hai or main hoon
churaye chain raaton ko jagaye piya ka ye chalan hai aur main hoon
piya ke samane ghoonghat utha de badi chanchal pavan hai aur main hoon
rachega jab mere hathon main mainhadi usi din ki lagan hai aur main hoon
aur aaj ki is mahafil ka samapan karaate hain isi album ki is behad mashahoor ghazal se, jise likha tha faiz ahmad faiz ne
Hindi sahitya ke itihaas mein ek yug ‘chhayavada’ ke naam se jana jata hai, jisake char bade maharathi the - Prasad, Nirala, Pant aur Mahadevi. satavin se lekar dasavin tak main in chhayavadi kaviyon ki kavitaon se bilkul ghabara jaya karata tha. shikshak chahe kitana bhi samajha lein, in kaviyon ki likhi panktiyon ki saprasang vyakhya karane aur bhavarth likhane mein hamare pasine chhoot jate the.Jayshankar Prasad ki pahali kavita jo dhyan mein aati hai vo thi beeti vibhavari jaag ri.... jo kuchh yoon shuru hoti thi
shikshak bade manoyog se ratri ke beet jane aur subah hone par nayika ke jagane ke aagrah ko tamam roopakon se vishleshit karate huye samajhate, par man ye manane ko taiyar na hota ki samany si baat raat ke jane aur pratahkal ki bela ke aane ke liye itna kuchh ghuma fira kar likhane ki jaroorat hai. vaise bhi ghar par subah na uth pane ke liye pitaji ki roz ki ulahana sunane ke baad kavi ke vicharon se man ka kahan samy sthapit ho pata ? vakt beeta, samajh badali. aur aaj jab is kavita ko kisi ke mukh se sunta hoon to khud man gunaguna uthta hai
khag kul-kul sa bol raha, kisalay ka anchal dol raha, lo yah latika bhi bhar laee, madhu mukul naval ras gagari. adharon mein raag amand piye, alakon mein malayaj band kiye tu ab tak soyee hai aali, aankhon mein bhare vihag ri. beeti vibhavari jag ri!
Aisi mohak panktiyan likhane vale Jayshankar prasad ji ki prshthabhoomi kya rahi ye janane ko aapaka man bhi utsuk hoga. jayshankar ji ke kavy sankalan par ek kitab sahity akadami ne chhapi thi. usake prakkathan mein vikhyat sahity samikshak Vishnu Prabhakar ji ne likha hai
"..........Jayshankar ji ka janm mat shulk dashami sanvat 1946 (san 1889) ke din kashi ke ek sampann aur yashasvi gharane mein huaa tha. jab pita ka dehavasan huaa, us samay prasad ki avastha keval gyarah varsh ki thi. kuchh hi varshon ke bhitar bade bhaee bhi paralok sidhar gaye aur solah varshiy kavi par samasyaon ka pahad aa toota. aarthik drshti se poori tarah jarjar ho chuki ek sanskari kul parivar ke lupt gaurav ke punaruddhar ki chunauti to munh baye samane khadi hi thi, jis parivar par antahin mukadamebaji, bhari karj ka bojha, svarthi aur akaranadrohi svajana, tathakathit shubhachintakon ki khokhali sahanubhooti ka vyangya...sabakuchh viparit hi viparit tha. koee aur hota to apani sari pratibha ko lekar is bojh ke niche chakanachoor ho gaya hota. kintu is pratikool paristhiti se joojhate huye prasad ji ne n keval kuchh varshon ke bhitar apane kutumb ki aarthik avastha srdrdh kar li, balki apani bauddhik-manasik sampatti ko bhi is vatyachakr se akshat ubar liya.
svayam jayashankar ji ne likha hai ye manasik viplav prabho, jo ho rahe din rat hain kuvichar kuron ke kathin kaise kutil aaghat hain he nath mere sarathi ban jav manas-yuddh mein fir to thaharane se bachenge ek bhi n viruddh mein.
yahi huaa bhi. jis gahare manovijnyan yatharthavad ki ninv par prasad ke jeevan krtitv ki poori imarat khadi hai, vah unaki vyaktigat jivani ki bhi buniyad hai. ghar-parivar vyavasthit kar lene ke bad hamare kavi ne apane antarjivan ki vyavastha bhi utani hi drdhata se samhali aur apani rachanatmak pratibha ke nirantar aur achook vikas kram se unhonne sahity jagat ko vismay mein dal diya.
dhire-dhire, lagabhag naamaloom dhang se unaki rachanayen sahity jagat mein gahare bhidati gaeen aur kya kavita, kya kahani, kya nataka, kya-chintan har kshetr mein khamir ki tarah roopantarit siddh hoti chali gaee. kisi ne unake bare mein likha hai ki prasad ka jo aantarit vyaktitv tha, vah lilapurush krshn ke darshan se prerana pata tha, aur unaka jo samajik vyaktitv tha, vah maryada purushottam ram ko apana aadarsh manata tha. nishchit hi prasad ji ke kavy ke pichhe jo jivan aur vyaktitv hai, usamein dhairy aur nissangata ki vipul kshamata rahi honi chahiye.
prasad ka vaishishty karuna aur anand ke atirikt jin do tatvon se prerit hai, ve hai unaka itihas-bodh aur aatm-bodha. pahali drshti mein paraspar virodhi lagate huye bhi ye donon chijen unake krtitv mein itane avichchhedy roop mein judi huee hain ki lagata hai, donon ka vikas do lagatar pas aati huee aur ant mein ek bindu par mil jane vali rekhaon ki tarah huaa. yah bindu nishchay hi ‘kamayani’ hai............."
usi 'kamayani' se liye gaye is ansh ko aasha ji ne behad surile andaj mein gaya hai. sangeet jayadev ka hai. . ye geet aasha jayadev ke elabam An Unforgettable Treat se liya gaya hai jo saregama par upalabdh hai. isi album mein mahadevi ji ka likha kaise unako paoon aali bhi hai .
mere khyal se kisi hindi kavi ki kavita ko itane adbhut roop mein kabhi svarabaddh nahin kiya gaya hai. bas lagata yahi hai ki prasad ke shabdon mein aasha jayadev ki jodi ne pran foonk diye hon. aasha hai aap ko bhi is madhur geet ko sunane mein utana hi aanand aayega jitana mujhe aata raha hai...
tumul kolahal kalah mein main hraday ki bat re man
vikal hokar nity chanchal, khojati jab nind ke pal, chetana thak-si rahi tab, main malay ki baat re man
chir-vishad-vilin man ki, is vyatha ke timir-van ki main usha-si jyoti-rekha, kusum-vikasit prat re man
jahan maru-jvala dhadhakati, chataki kan ko tarasati, unhin jivan-ghatiyon ki, main saras barasat re man
pavan ki prachir mein ruk jala jivan ji raha jhuk, is jhulasate vishv-din ki main kusum-ritu-rat re man
chir nirasha niradhar se, pratichchhayit ashru-sar mein, madhup-mukhar marand-mukulit, main sajal jalajat re man"
