Geet # 24 : Vaada Tainu Yaad Raakhiyo...

Isse pehle ki 24 no. ke is geet ke bare mein kuch kahoon ye saaf kehna chahoonga ki Himesh Reshamiya as a music composer to mujhe achche lagte hain par unka nasal tone liye huye gayaki ka tareeka aur geeton se uthta juroorat se jyada shor mujhe kabhie pasand nahin aaya. Par aaj desh mein unki lokpriyta ka aalam ye hai ki shadi-vivah ki shayad hi koi party ho jismein unke gane na bajte hon. Isi wazah ye hai ki aisi jaghon par geet ki lay par logon ka dhyaan jyada rahta hai, aakhir shabdon ke peeche kaun mathapachchi kare.

Par Himesh ka gaya is geet ka sangeet behad madhur hai. Harmonium, Bansuri aur Guitar ka antare ke beech beech mein behtareen use kiya hai unhone. Saadgi bhare shabdon mein geet ka mukhda aur uski sureeli dhun der tak zehan se bahar nahin jati aur man gunguna uthta hai...

vaada tainu yaad rakhiyo
door jaiyyo jaiyyo na jaiyyo jaiyyo na jaiyyo jaiyyo na door
tere bin dil nahi laage
toote na vafaa ke dhaage
mainu nai jhooth boliya
door jaiyyo jaiyyo na jaiyyo jaiyyo na jaiyyo jaiyyo na door ...


'Aap Ka Suroor' se liye is geet ko aap yahan sun sakte hain.

Geet # 25 : Aaj ki Raat, Hona hai Kya , Paana hai Kya, Khona hai Kya

31 December ki raat beet chuki hai. Patakhon ka shor abhi bhi thama nahin hai. Aise jashna ke mahoul mein shuruaat ek aise geet se jise gaya Alisha Chinoy, Mahalaxmi Iyer aur Sonu Nigam ne. Dhun banayi Shankar -Ehsaan- Loy ki tikdi ne aur bol likhe Javed Akhtar sahab ne..

Haan ji sahi pehchana aapne ye geet hai film DON ka jise mauj masti ke mahoul mein agar sunein to pair khud ba khud thirakne lagenge. Waise 25 wi paaydan ke liye is geet ka muqabla tha Bhagambhag ke do geeton se. Unmein se ek to tha Signaaaaal aur Doosra Ek crore mein bana uska title song . Aaj kal chuttiyon mein main aur mera 5 saal ke beta use hi high volume pe baja kar dance karte hain ;)

Par DON ko hata pana mushkil tha . Afterall this was one of the best new song which they have added in the new DON. To naye sal ki aane wali shaam mein mast ho jaiye ye sochte huye ki aaj ki raat na sahi par is poore pichle saal mein humne kya khoya aur kya paya.


Shaam hai, jam hai aur hai nasha
Tann bhi, mann bhi hai, pighla hua
Chhaaee hai rangeeniyan
Phir bhi hai betaabiyan

Kyon dhadakta hai dil
Kyon ye kehta hai dil
Deewanon ko ab tak nahin hai ye pata

Aaj ki raat, hona hai kya
Paana hai kya, khona hai kya

Do ghadi mein hi yahan jaane kya hoga
Jo humesha tha mera, phir mera hoga
Kaun kiske dil mein hai faisla hoga
Faisla hai yahi…jeet hogi meri
Deewanon ko ab tak nahin hai ye pata

Aaj ki raat, hona hai kya
Paana hai kya, khona hai kya

Aao main tumse kahoon baat chupke se
Rang badalegi pal mein raat chupke se
Tumko le jaaoonga phir saath chupke se

Jaaoge tum kahan
Dekho mein hoon yahan

Deewanon ko ab tak nahin hai ye pata

Aaj ki raat, hona hai kya
Paana hai kya, khona hai kya

Click here to listen this song.

Varshik Sangeetmala : 2006

Ek Shaam Mere Naam par aane wale doston. Saal ka ant aa pahuncha hai aur main taiyar hoon 2006 ki Varshik Sangeetmala yani Annual Musical Countdown ko lekar. Pichle do salon yani 2004 aur 2005 se ye countdown is blog ka ek aham hissa rahi hai. Pichle saal aur usse pehle is silsile ka hum sab ne mil kar lutf uthaya tha. Asha hai is saal bhi ye silsila aapke liye mazedaar hoga.

Waise bhi blogging ke safar ki shuruaat se hee geet sangeet mere blog ka aham hissa rahe hain. Achcha geeton ko sunna, , unhein dil se mehsoos karna , unhein gungunana aur phir doston ke sang baatna mujhe humesha se sabse adhik khushi dete rahe hain.


Geeton ke maamle mein is saal ki shuruaat kuch khas achchi nahin thi par saal khatma hote kuch behtareen geet sunne ko mile. 2004 mein maine Khul ke Muskura De Tu ko apna priya geet chuna tha jabki 2005 mein mere dil ne ye jagah Ratiya Andhiyari Ratiya ko dee thi. Aur 2006 mein....are ye abhi kaise bata doon.

Ye jaanne ke liye aap sabko meri pasand ke in 25 behtareen geeton ke is safar pe chalna padegaa.

To kahiye taiyaar hain naa ?