Panchan aur unki 'Mada'l tarang...

'

Pancham da ek aise sangeetakaar the jo sangeet sanyojan men nit naye prayog kiya karte the. vaise to pancham, kishor aur gulazaar ki tikadi ke jaane kitane hi geet sattar ke dashak ke mere sarvapriya geeton men rahe hain par unake kuch geet aise hain jo unamen prayukt dhunon aur taalon ki vajah se yaadon se kabhi door nahin hote. aaj 1978 men bani film 'ghar' ka aisa hi geet yad aa raha hai jiska mukhada aur saath men bajte 'madal' ki anoothi tal aur usake saath spainish gitar ka adbhut sanyojan geet ko ek alag hi pahachaan deta tha. ye geet tha svar kokila lata mangeshkar ka gaya nagma tere bina jiya jaaye na.... to isase pahle ki main aap ko ye bataoon ki pancham da ne is geet men naya kya kiya tha, ye jaan lena jaroori hoga ki aakhir madal vaadya yantra hai kya?

madal bharat ke anya paaranparik tal vaadyon ki tarah hi dikhta hai par hai ye nepal ki bhoomi men panapa vaadya yantra, jiska vahan ke pahadi log lok geeton men prayog karte the. bharat ke uttar poorvi ilakon aur uttar bangal men bhi iska prayog hota raha. dholak aur pakhavaj ki tarah hi madal ko donon taraf se bajaya jata hai par inki tulna men madal chhota aur halka hota hai. isake bade vaale chhor se neeche ke sur nikalte hain jabaki chhote vaale chhor se oopar ke.

pancham ko is nepaali vaadya yantra se parichit karane ka shreya nepal ke madal vaadak ranjeet gazmer ko jata hai jinhen pancham 'kaanchabhai' bhi kahate the. pancham da ko is vaadya yantra se kitana lagaav tha ye isi baat se spasht hai ki unhonne kaanchabhai ko apani aarkestra ka sthayi sadasya bana diya tha.

vividh bharti par pancham ki sangeet yatra vaale karyakram men aasha v gulazaar ji se is geet men kiye ge apane prayog ke baare men baat karte hue pancham ne kaha tha..

ye badi majedaar cheez hai. jis sur men gane ki pankti khatm hoti ho, usi sur men... usi sur ka tabla baje. jaise hamare yahan tabla tarang hai to ham logon ne koshish ki ki use madal tarang men bajaya jaaye...

yaani jis tarah tabla tarang men ek saath kai tabalon ko alag alag suron men laga kar ek saath bajaya jata hai vaisa hi yahan madal ke saath kiya gaya. madal tarang ko dekhna chahate hon to yahan dekh sakte hain.

pancham ne is geet ke aaranbhik tees sekend men jo gitar ki dhun pesh ki hai use jab bhi main sunta hoon ise baar baar sunane ka dil karta hai aur fir geet ke pachasaven sekend ke baad se pancham ki madal par ki gai kalakari (jiska oopar jikra kiya gaya) sunane ko milti hai aur man pancham ko unki bemisaal pratibha ke liye dad diye bina nahin maanta. geet sunane ke baad bhi geet ka mukhada aur pancham ki dhun ghanton dilo dimaag par apana asar banaaye rakhati hai. oopar ki rikarding men aapane lata ke saath kishor ko bhi ek alag tarike se gaate suna. aaiye ab sunte hain lata ji dvara gaya ye nagma.

tere bina jiya jaaye na

bin tere tere bin saajana

saans men saans aae na

tere bina ...

jab bhi khayalon men too aae

mere badan se khushabu aae

mahake badan men raha n jaaye

raha jaaye na, tere bina ...

reshami raaten roz

n hongi

ye saugaaten roz n hongi

zaindagi tujh bin ras n aae

ras aae na, tere bina ...

chalte chalte pancham aur unake madal prem se juda ek aur kissa batata chaloon. 1974 men ek film aai thi 'ajnabi'. pancham ko usake geet record karne the. par hua yoon ki theek usi waqt film jagat men saajakaron ki hadatal ho gai. intaralyoods men sangeet sanyojan men aarkestra ka hona tab ek aam baat thi. ab gana to rikard hona tha to kiya kya jaaye. par pancham to aakhir pancham the. unhonne ek raasta dhoondh nikaala. pancham ne geet ke antre men bajte madal ke ridam yaani tal ko intaralyoods men bhi barakaraar rakha aur saath men jod di tren ki aavaaz aur gana ho gaya supar hit. aap samajh rahe hain na kis geet ki baat ho rahi hai? ji haan ye geet tha lata v kishor ki yugal aavaaz men gaya nagma ham donon do premi duniya chhod chale...

---

Click Here to read this post in Hindi devnagari script.

Click Here to post your reactions on this article. You can post your comment in English or Romanised Hindi/Urdu also .

---

Jo laharon se aage nazar dekh paati to tum jaan lete main kya sochta hoon... Poems used in film 'Udaan'

Kya aapako vigat varshon men koi hindi film yad aati hai jisamen hindi kavitaon ka vyapak prayog hua ho. nahin na ! haan ye jaroor hai ki hindi film sangeet men ruchi rakhne vaalon ko gulzar, javed akhtar, prasoon joshi, swanand kirkire, irshad kamil aur amitabh bhattacharya sareekhe geetakaron ki vajah se kavyatmak geet aaj bhi bich bich men sunane ko mil jaate hain. aksar aisa na hone ka thikara filmavaale aaj ki peedhi par madh dete hain jo unake khayal se hip hop ke aalava kuch sunana hi nahin chahati. darasal ye tark dete hue ve apani is kamajaori ko chhupa jaate hain ki aaj ki tamaam filmon ki patakatha v kiradaron ka charitra chitran itana dheela hota hai ki manav man ki sookshm bhavanao ko ubhaarne vaale geeton ki gunjaish hi nahin rah jaati.

main to yahi kahoonga ki jab jab kisi nirdeshak ne aisi chunauti hamare geetakaron ke samaksh rakhi hai vo is chunauti ko poora karne men safal rahe hain. pichhale saal julaai men pradarshit udan ek aisi hi film thi jahan ye avasar lekhak v geetakaron ko mila. film ka kishor kiradaar 'rohan' ek lekhak banana chahta hai par usake pita poori koshish karte hain ki putra aise vaahiyat khyal ko apane dimaag se nikaal kar injiniyaring jaise pratishthit kairiyar men apana dam kham lagaaye. yuva nirdeshak vikramaditya motavaane ne 'rohan' ke man ki haalat ko vyakt karne ke liye jin kavitaon ko pasand kiya vo film ke saath saath usi yuva varg dvara khoob sarahi gayeen jinhen aaj kavitaon se door bataya jata raha hai.

agar aapane ye film dekhi hai to in kavitaon ko bhi suna hoga. par kya aap jaante hain ki film men prayukt kavitaon ko likhne vala kavi kaun tha? ye kavitaayen likhi thin satyanshu singh v kumar devanshu ne. satyanshu sinh ek lekhak aur kavi to hain hi, vishva v bharateeya sinema par unki paini nazar rahati hai. filmon se apane prem ko vo apane blog cinema hamesha ke liye hai (Cinema is forever)! par vyakt karte rahate hain. satyanshu ke baare men ek dilachasp baat ye bhi hai ki inhonne 2003 menAFMC pune men dakhila liya. par 2008 men MBBS kipadhai poori karne ke baad unhen laga ki doctari ke bajaaye lekhan hi jyada santosh de sakta hai aur vo is men apana kairiyar banane mumbai aa gaye.

vaise satyanshu jab nirdeshak vikramaditya motavane ke paas ge to unhonne udan sheershak se apani ek kavita sunaai. kavita to khoobasoorat thi par patakatha men usaka judaav sanbhav na ho paane ke kaaran vo film ka hissa nahin ban paai. poori kavita to aap unki is blog post par padh sakte hain par is kavita ka ek chhand jo mujhe behad priya hai yahan aapke saath saajha karana chahta hoon.

os chhidakti hui bhor ko palakon se dhnk kar dekha hai,

din ke saundhe sooraj ko in haathon men rakh kar dekha hai,

shaam huyi to lal-lal kisse jo vahan bikhar jaate hain,

gayi shaam apani ‘udan’ men mainne vo chakh kar dekha hai.

hai na lajavab panktiyan!

aksar maan baap kishoron par apani pasand napasand thop dete hain. unhen lagata hai ki duniya zahaan ka sara anubhav unhen apani zaindagi se mil chuka hai. isaliye apani soch se itar vo kuch sunana samajhana nahin chahate, khaaskar tab, jab aisa koi vichaar unhen apane bachchon dvara sunane ko milta hai. aise haalat kishoron ki manahsthiti par kya asar daalte hain ye satyanshu ne rohan ke kiradaar ke madhyam se bakhoobi kahalaya hai.

jo laharon se aage nazar dekh paati to tum jaan lete main kya sochta hoon

vo aavaaz tumako bhi jo bhed jaati to tum jaan lete main kya sochta hoon

jid ka tumhaare jo parda sarakta to khidakiyon se aage bhi tum dekh paate

aankhon se aadaton ki jo palaken hatate to tum jaan lete main kya sochta hoon

meri tarah khud par hota zara bharosa to kuch door tum bhi saath-saath aate

rang meri aankhon ka baantate zara sa to kuch door tum bhi saath-saath aate

nasha aasamaan ka jo choomata tumhen bhi, hasaraten tumhari naya janm paatin

khud doosare janam men meri udaan chhoone kuch door tum bhi saath-saath aate

satyanshu ki kavita yuvaaon men itani lokapriya hui kyoonki usaki bhavanaayen kahin na kahin unake dil ke taron ko chhoo kar nikalti thin. is kavita ka ek aur hissa bhi hai jo film men nahin tha

meethi-si dhun vo tumhen kyoon bulati nahin paas apane, pada sochta hoon;

thaam haath laharen kahan le chalengi - ret par tumhaare khada sochta hoon;

khol khidakiyan jab dhoop gudagudaaye, kyoon nind men pade ho, kya khwab ki kami hai?

akhabaar aur bed-ti ke paar bhi hai duniya - main roz in saveron men gada sochta hoon.

to chaliye sunte hain 'rohan' ki aavaaz men udan film ki ye kavitaayen...

aaj ki hindi kavita ki praasangikta par samay samay par vazib prashn uthate rahe hain. is yug ki kavita ka shilp vistrit hua hai, kavitaon men vyakt vichaaron ki gahanta badhi hai. par saath hi saath usaki klishtata aur rasaheenta ne use aam janon se bahut door sirf sahityakaar mandali ki shobha maatra bana diya hai. udan ki in kavitaon ki lokapriyata ne fir ye spasht kar diya hai ki agar kavitaayen pathakon ke sarokaron se judi hon aur sahaj bhasha men kahi gai hon to unhen padhne vaalon ki kami nahin rahegi.

chalte chalte pesh hain udan film ki ye kavita jo man men ek nai aasha ka sanchaar karati chalti hai...

chhoti-chhoti chhitaraai yaden bichhi hui hain lamhon ki lon par

nange pair unapar chalte-chalte itani door aa ge

ki ab bhool ge hain...joote kahan utare the

edi komal thi, jab aae the thodi si naazuk hai abhi bhi

aur naazuk hi rahegi in khatti‍-meethi yaadon ki shararat

jab tak inhen gudagudati rahe

sach, bhool ge hain  joote kahan utare the

par lagata hai, ab unki zarurat nahin......

is chitthe par prastut meri pasandida kavitaon ko padhne ke liye yahan click karein.

---

Click Here to read this post in Hindi devnagari script.

Click Here to post your reactions on this article. You can post your comment in English or Romanised Hindi/Urdu also .

---

When Shabana Azmi met Faiz for the first time...!

Bachapan se bade hote hote aisi kai shakhasiyat hamare jeevan men aati hain, jinase ham khasa prabhavit rahate hain। unase milne ki, dekhne ki aur do baate karne ki hasarat man men paale rahate hain। par jab kisi sukhad sanyog se hamari ye manokamna poori ho jaati hai to apane us prerna srot ke saamane apane aap ko niahshabd paate hain। par aisa sirf mere aapke jaise aam logon ke saath  hi hota hai aisa bhi nahin hai। bade bade celebrity bhi jab apane pasandida vyaktitva ke paas apane aap ko paate hain to unki haalat bhi kuch vaisi hi ho jaati hai।

ek aisa hi kissa yad aata hai jo jaani mani abhinetri shabana azmi ne ek baar apane sakshatkar men apane priya shayar faiz ahmad 'faiz' ki yad men sunaya tha। jaisa ki aapako maaloom hoga ki ye saal faaiz ki janmashati varsh bhi hai to mainne socha kyoon na us rochak kisse ko aap sab se saajha kiya jaaye। shabaana ji ke liye faaiz, sheksapiyar, kits aur gaalib jaise ustad kaviyon shayaron se bhi jyada pasandida shayar rahe hain। ab unhin ki jubani suniye ki jab faaij se unki pratyaksh mulakaat hui to usaka unake dil o dimaag par kya asar pada...

"ek baar aisa hua tha ki mascow film festival ke dauraan mujhe pata chala ki faiz saahab bhi vahin hain to main bahut khushi se gai unase milne ke liye। to fir unhonne kaha ki beta tum shaam ko aao mujhase milne to main fir gai unake kamare men। to unhonne kaha ki kuch sher ho ge hain lo padho bilkul ne hain। menne zara sa khisiyate hue, sar khujate hue kaha ...

faiz chacha main urdu nahin padh sakti। vo ekadam se aagababoola ho ge aur kahane lage...

kya matalab hai tumhara ? namakool hain tumhaare maan baap ...

(yaad rahe ki shabana azmi maqbool aur azaeem shayar kaifi azmi ki beti hain aur faaiz unake mata pita ke achchhe mitron men se the। aisi ulahana aatmeeya mitron ko hi di ja sakti hai )

mainne safaai dete hue kaha ki aisa nahin hai। magar main shayari khoob achchhi tarah samajh sakti hoon। aap ki bahut badi prashansak hoon aur main urdu samajhti hoon। sirf likh padh nahin sakti। aap ki poori shayari mujhe munhajaubani yad hai। jaise ki.. jaise ki.. aur us vakat mujhe kuch bhi yad nahin aa raha tha। mainne kaha jaise ki

"dekh ki dil ki jaan se uthata hai

ye dhuaan sa kahan se uthata hai...."

to unhonne ek kash lete hue kaha. ki bhai ....vo to meer ka kalam hai...

mainne kaha ki nahin nahin mera matalab vo thodi tha matalab...

"baat karni kabhi mujhe mushkil kabhi aisi  to na thi.."

to fir unhonne apani sigaret rakhi aur kaan khujate hue kaha ki dekhiye Meer ki had tak to theek tha par Bahadur Shah Zafar ko main shayar nahin maanta...

itana sunana tha ki mera chehara sharm se lal ho gaya aur kisi tarah munh chhupaate hue  main kamare se nikal gai। mainne socha ye sachamuch samajhenge ki mujhe kuch nahin aata aur main baahar gai aur unki tamaam shayari mujhe pat pat pat pat pat yad aa gai। par us vakat main itana ghabada gai thi ki mujhe kuch yad nahin aaya। faaij chacha se mulakaat ka ye ek aisa vaakaya hai jo main jindagi bhar nahin bhooloongi।"

vaise kya aapako pata hai ki shabaana ek kushal abhinetri ke saath saath ek achchhi gaayika hain? suniye unki aavaaz faaiz ki ye mashahoor nazam jo hamesha se logon ki aavaaz ko hukmaranon tak pahunchaane ke liye prerit karati rahi hai। kuch varshon pahle mainne is nazam ko teena sani ki aavaaz men aap tak pahunchaya tha

bol ki lab aajad hain tere

bol, jabaan ab tak teri hai

tera sutavan* jism he tera

bol ki jan ab tak teri hai

* tana hua

dekh ki aahanagar* ki dukan men

tund** hain shole, surkh hai aahan^

khulne lage kufalon ke dahaane^^

faila har janjeer ka daman

*lohaar, ** tej, ^loha, ^^taalon ke munh

bol, ye thoda vakt bahut hai

jismon jabaan ki maut se pahle

bol ki sach jinda hai ab tak

bol ki jo kahana hai kah le

---

Click Here to read this post in Hindi devnagari script.

Click Here to post your reactions on this article. You can post your comment in English or Romanised Hindi/Urdu also .

---