1983 me West Indies ke khilaaf maatr 183 run banaane ke baad ham sab bachche apane paDosee ke shvet shyaam TV ko chhoD niraash man se shaam ko apane apane ghar lauT aaye the. saaTh ovaro me us vakt kee vishv vijeta Teem West Indies ye run sankhya nahee paar kar payegee, aisa mainne sapane me bhee nahee socha tha aur us raat bhare man se so gaye the. Par agalee subah ka akhabaar kuchh aur hee kahaanee kah raha thaa. us maich ko live naa dekh paane ka dukh kayee varSho.n tak saalata raha .Iseeliye, 24 saalo.n baad vishv cup ke kisee final ko TV par live dekhane ka visheSh romaanch to tha hee, par saath hee ye bhee lag raha tha ki is baar bhaagy bhee hamaaree Team ke saath hai. sach poochhe to kal ke final se kahee jyaada Australia aur Pakistan ke saath is pratiyogita mein pahale huye match ka mainne jam ke aanand uThaaya thaa. kal to shuru se hee ek ajeeb kism ke tanaav ne man mein ghar kar liya thaa. khel kee oonch-neech ke saath tanaav to ghaTata baDhata gaya par Bhajjee kee gedoin par Misaba ul haq ne jis tarah chhakke lagaye aur hamaare bhajjee jis tarah chhakke lagane ke baad bhee yorkar length kee gend ko fenkane ka asafal prayaas karate rahe , ye tanaav apanee paraakaaShTha par pahunch gayaa.
antim ovar ke fenke jaane ke samay jab ham sab ka gala sookh raha tha to bhala Jogindar Sharma kee kya bisaat?bhaee jee ne pahalee baar me wicket se ek haath ke bajaye chaar haath baahar kee gend Daalee to bas shuShk man se yahee nikala
"sahee ja rahe ho beTa.."
kaptaan saahab agalee gend par na jaane kya kah aaye ki sharma jee ne ek aisa haee fulltoss fenka jise dekhate hee kaleja munh ko aa gayaa. fir bhee haq ke balle se jab shoT nikala to muze aisa laga kee ye to long off par hee aa raha hai.
Par vo naamuraad, aakhirakaar chhakka nikalaa.
ab chaar gendo mein 6 run....
ant to aa hee gaya tha. prashn sirf ye tha ki vo kitanee jaldee ya kitanee der se aata hai.
muze yakee hai ki meree kya, mere saare deshavaasiyo ke chehare ke manobhaav in haalaato mein aise vyakti ke hee rahe honge jisaka sab kuchh luT chuka ho.
teesaree gend par misba ka baik skoop muze to seema ke baahar jaata dikha kyoonki do second tak shreesant kahee bhee frame mein najar nahee aa rahe the. idhar shreesant ne catch liya aur udhar hamaare bejaar paDe dil me umango kee murazaee kopale ekadam se fooT paDee.
ye asalee maayane me Teem inDia kee jeet thee. is pooree pratiyogita me kisee na kisee match me khelane vaale har khilaaDee ne jeet me apana yogadaan diyaa. ye jeet chhoTe-chhoTe shaharo se aane vaale khilaaDiyo ke lie preraNa punj ka kaam karegee isame koee shak nahee. Chaahe vo Kerala jaise cricket mein kamajor raajya ke Shreesanth ho ya Hariyana ke Jogindar Sharma, raajaneeti ka gaDh rahee Rai Bareli ke Rudr Prataap Singh ho ya Baroda ke Pathaan bandhu.....in khilaaDiyo ne ye dikha diya hai ki chhoTe-chhoTe shaharo me rahane vaale bhee baDe sapane dekh sakate hain ..unhein saakaar kar sakate hain. ab hamaare shahar ranchi se taalluk rakhane vaale bhaarateey Teem ke kaptaan Mahendra Singh Dhaunee (jo dhoni ke naam se jyaada mashahoor hai) kee hee baat kare.
Dhoni khud ek nimn madhyam varg parivaar se aate hain. We hamaaree ghar ke bagal kee colony Shyamli me rahate hain. jab ve DAV Shyamli mein the to pahale football ke khel mein bataur golakeepar hua karate the. school ke prashikShak ne unhe golakeeper se school kee Teem ka wicketkeeper bana diyaa. sheeghr hee wicketkeeper ke saath saath lambe chhakke maarane vaale khilaaDee ke roop mein vo Jharkhand mein jaane jaane lage. Ranji Trophy mein ek doosare darje kee Teem Bihar ka pratinidhitv karane ke baavajood unhonne desh ke lie khelane kee aasha nahee chhoDee. aur mauka milate hee itane kam samay mein dekhie, vo khud aur pooree Team ko kis mukaam tak le gaye hain. Ranchi mein teen dino se lagaataar baarish ho rahee hai. par jeet kee khabar milate hee, baarish me bhee kal raat se dhoni ke ghar ke baahar bhaaree bheeD juTee huee hai. jashn abhee tak thama nahee hai...aur isakee punaraavriti desh ke har kasbe, har graam aur shahar me ho rahee hogee. apane shahar ke is supoot ke netritva mein Team ke saare khilaaDiyo ne jis ekajuTata ke saath sangharSh karate hue vijay praapt kee aur deshavaasiyo.n ko khushiyo.n ke ye haseen pal diye vo poora desh hamesha yaad rakhegaa.
pichhale kuchh mahine khel ke lie achchhe ja rahe hain. pahale hockey ka Asia Cup, fir footbaal ka Nehru Cup aur ab 20-20 World Cup kee jeet 'Chak de india' ka sahee samaa baandhatee najar aa rahee hai.
