Chip Chip Ashru Bahaane Waalon ..

Zindagi mein choti badi mayoosi to aati jaati rehti hain. Unhein kitne dinon koyi apne pe haawi hone deta rahe. Neeraj ki ye kavita un logon pe ek teekhaa kataaksh hai jo sapnon ke tootne,kisi ke juda hone ka maatam is terah manaate hain jaise uske aalawa unki zindagi ke koyi maayne hi na hon.

Ye kavita humein prerit karti hai gham ke andheron se bahar nikalne ki ....
Aur is kathor yathaarth ko samajhne kee, ki sangi-sathi, sapne sab choot bhi jayein to ye jeewan phir bhi chalta rehta hai bina ruke bina thame… to kyun na hum bikhre huye tinkon ko jodein aur chal parein jeevan roopi parv ka harsh aur ullaas se swagat karne! ....

Chip Chip ashru bahaane waalon (ashru-tears)
Moti vyarth lutane waalon ! (vyarth –without any purpose)
Kuch sapnon ke mar jane se jeevan nahin mara karta hai

Sapnaa kya hai ? Nayan sez par,
Soya hua aankh ka paani
Aur tootna hai uska jyon
Jage kachchi neend jawani
Geelee umar banaane walon! Doobe bina nahaane waalon
Kuch pani ke bah jane se saawan nahin mara karta hai

Mala bikhar gayi to kya hai
Khud hi hal ho gayi samasyaa (samasya-problem)
Aansoo gar neelaam huye to
Samjho poori huyi tapasyaa
Roothe divas manaane walon! Phati kameez silaane waalon! (divas-day)
Kuch deepon ke bujh jaane se aangan nahin mara karta hai

Khota kuch bhi nahin yahan par
Kewal zild badaltee pothee (pothee –book)
Jaise raat utaar chandani
Pehne subah dhoop ki dhoti
Vastra badal kar aane waalon ! Chaal badalkar jaane waalon! (vastra –cloth)
Chand Khilounon ke khone se bachpan nahin maraa karta hai

Laakhon baar gagriyaan phooteen
Shikan na aayi panghat par
Lakhon baar kishtiyaan doobeen
Chahal-pehal wo hi hai tat par (tat-beach)
Tam ki umra badhaane waalon! Lau ki aayu ghatane waalon ! (tam-darkness)
Laakh kare patjhad koshish par upvan nahin maraa kartaa hai (upvan-garden)

Loot liya maali ne upvan
Luti na lekin gandh phool ki
Toofaanon tak ne cheda par
Khidki band na huyi dhool kee
Nafrat gale lagaane waalon! Sab par dhool udaane waalon
Kuch mukhdon ki naaraazee se darpan nahin maraa karta hai

Chip Chip ashru bahaane waalon (ashru-tears)
Moti vyarth lutane waalon ! (vyarth –without any purpose)
Kuch sapnon ke mar jane se jeevan nahin mara karta hai

Gopal Das 'Neeraj'

हिन्दी में पदने के लिये यहाँ क्लिक करें

Aadhunik Hindi Kavita : Kyun hai Bhooli Bisri ?

हिन्दी में पदने के लिये यहाँ क्लिक करें

Agar hasya kaviyon ki baat chor dein to aadhunik hindi kavita ke is yug mein ek aadh hi aise kavi hain jinhein sunne mein aseem anand ki anubhuti hoti ho. Kyun hai aisi halat is yug ki kavita kee.Is durdasha ka ek karan to ye raha ki aaj ke kaviyon ne kavita ke naye swaroop mein sirf vicharon ko ahmiyat dee aur lay ko tukbandi ka naam de ke uski sarvatha upeksha kee.

Mera ye maanna hai ki agar bhavna mein kavita ke pran baste hain to uski lay mein uska shareer. Shabdon ko lay ki veni se gutha jaye to uske bhaav sangeet ki ek lahar paida kar aatma tak pahunchte hain. Aatma kitni pavitra kyun na ho shareer ke bina uska shilp adhoora hai.

Isliye agar aap se koi ye kahe ki koi hindi kavita sunao to yakeenan aap aaj ki patra patrikaon mein chapne wali nahin balki school mein padhi gayi koi kavita hi sunayenge. Kyunki us samay ki kavita dil mein basti thi aur aaj ki matra kaghaz ke pannon tak.

Isiliye to aaj bhi agar Kabeer aur Raheem ke dohon mein aap jeevan ki sahi disha khoj pate hon.
Aaj bhi agarDinkar aur Subhadra Kumari Chauhan ki kritiyan yaad karte hi aapke khoon mein ek garmi si aa jati ho.
Mahadevi Verma aur Jayshankar Prasad ki bhav pravanta dekh ke aaj bhi aapki aakhein nam ho jati hon
Maithili Sharan Gupt ki Yasodhra aur Bachchan ki Madhushala ka pratibimb aaj bhi aapki yaadon mein vidyamaan ho

To aage ki posts mein main aapke vicharon ki bhagidaari chahoonga kyunki mere is blog ka agla mahina jismein ye apni varshganth poori kar raha hai usi purani Hindi Kavita ko samarpit hai.….

Shuruaat karoonga main Gopal Das Neeraj se jo aaj ke yug se talluk rakhne ke baad bhi us purani kavya shailee ka nirvahan karte aaye hain. Kavita likhne ke sath sath use laybadh tareeke se gane mein Neeraj ka koi sani nahin hai. Is mayne mein keh sakte hai ki unhone Bachchan ki virasat ko aage badhaya hai…

To be continued……….

Raat Bhar Bujhte Huye Rishte Ko Taapa Humne...

Insaani rishton ka kya hai..
Bade naajuk se hote hain ye..
Inki girahein kholna bada kathin hai..
Jitna kholo utna hi ulajhti jati hain..
Aur kisi rishte ko yun hi khatam kar dena bhi itna aasan nahin..
Kitnee yadein dafan karni padti hain uske sath..

Maazi ke wo anmol pal, un sath bitay lamhon ki ankahi si tapish ....

shayad aisa hi kuch mehsoos kar rahe hain Gulzar apni is behad khoobsurat nazm mein.

Iski har ek pankti dil ko chooti si nikalti hai.
Ek bahut hi samvedansheel (sensitive) nazm jise padhte waqt shayad aap bhi apne dil mein kuch pighalta mehsoos karein


Raat bhar sard hawa chalti rahi
Raat bhar hamne alaav taapa
Maine maazi se kai khushk see shaakhien kaati
Tumne bhi gujre hue lamhon ke patte tode
Meine jebon se nikali sabhi sukhi nazmein
Tumne bhi haathon se murjhaaye hue khat khole
Apnee in aankhon se meine kai maanze tode
Aur haathon se kai baasi lakeeren phenki
Tumne palkon pe nami sookh gayee thee, so gira di

Raat bhar jo bhi mila ugte badan par humko
Kaat ke daal diya jalte alaawon main use
Raat bhar phoonkon se har lau ko jagaye rakha
Aur do jismon ke indhan ko jalaye rakha
Raat bhar bujhte hue rishte ko taapa humne

Alaav a nazm from Gulzar

Click here to read this post in Hindi (Devnagari) script. You can also listen this nazm in Gulzar's own voice there.

Mushkil Hai Apna Mel Priye...

Holi ka hud-dang to khatma ho gaya par abhi bhi haathon se rang poori terah nahin utra. Waise ye holi kuch khushiyan layi to kuch udaasi bhi de gayi. Par Holi to aisa parv hai jispe udasi ka rang kabhi nahin chadta so aaj ki meri ye post aapke hothon pe kuch muskurahat bikhere meri yahi koshish hogi. Holi mauj, masti, umang, ullaas. haas parihaas ka pratik hai. Aur mujhe bachpan se aaj tak Holi ke sath sath ek aisi baat ka intezaar rahta hai jo aksar aise hi maukon pe hoti hai. Jee haan main Hasya Kavi Sammelan ki baat kar raha hoon. Kaka Hathrasi, Hullad Muradabadi,Shail Chaturvedi, Om Prakash Aditya, Surendra Sharma, Ashok Chakradhar, Pradeep Choubey ki rachnaoon ne varshon se holi ke rang ko hansi ki phuljhariyon se aur saras banaya hai.

Aaj naujawan kavi Sunil Jogi ki hasya kavita aapke samne prastut kar raha hoon jo maine pichle saal padhi thi. mujhe aasha hai ki aap bhi iska utna hi anand uthayenge jitna maine uthaya tha :)

mushkil hai apna mel priye, ye pyar nahin hai khel priye, (my love)
tum MA 1st division ho, main hua matric phel priye,
mushkil hai apna mel priye, ye pyar nahin hai khel priye, (union)
tum fauji afsar ki beti, main to kisaan ka beta hoon,
tum rabadi kheer malai ho, main to sattu sapreta hoon,
tum AC ghar mein rahti ho, main ped ke neeche leta hoon,
tum nai maruti lagti ho, main scooter lambreta hoon,
is kadar agar hum chup-chup kar aapas me prem badhayenge,
to ek roz tere daddy Amrish Puri ban jaaenge, (alas he is no more!)
sab haddi pasli tod mujhe bhijwaa denge vo jail priye,

mushkil hai apna mel priye, ye pyar nahin hai khel priye,

tum arab desh kee ghodi ho, main hoon gadahe ki naal priye,
tum deewali ka bonus ho, main bhookho ki hadtaal priye,(strike)
tum heere jadi tashtari ho, main almunium ka thaal priye,
tum chicken-soop biryani ho, main kankad waali daal priye,
tum hiran-chaokadi bharti ho, main hoon kachue ki chaal priye, (flight of dear)
tum chandan-wan ki lakdi ho, main hoon babool ki chaal priye,
main pake aam sa latka hoon, mat maaro mujhe gulel priye,

mushkil hai apna mel priye, ye pyar nahin hai khel priye,

main shani-dev jaisa kuroop, tum komal kanchan kaya ho, (ugly)
main tan-se man-se Kanshi Ram, tum maha chanchala maya ho, (naughty)
tum nirmal paawan ganga ho, main jalta hua patanga hoon,(pure)
tum raaj ghaat ka shanti march, main hindu-muslim danga hoon,
tum ho poonam ka taajmahal, main kaali gufa ajanta ki,
tum ho vardaan vidhata ka, main galti hoon bhagvanta ki,(wish of god)
tum jet vimaan ki shobha ho, main bus ki thelam-thel priye, (aeroplane)

mushkil hai apna mel priye, ye pyar nahin hai khel priye,

tum nai videshi mixi ho, main patthar ka silbatta hoon,
tum AK-saintalis jaisi, main to ik desi katta hoon,
tum chatur Rabadi Devi si, main bhola-bhala Lalu hoon,
tum mukt sherni jangal ki, main chidiyaghar ka bhaalu hoon, (free)
tum vyast Sonia Gandhi si, main V.P.Singh sa khali hoon, (busy)
tum hansi Madhuri Dixit ki, main policeman ki gaali hoon,
kal jel agar ho jaaye to dilwa dena tum bail priye,

mushkil hai apna mel priye, ye pyar nahin hai khel priye,

main dhabe ke dhaanche jaisa, tum paanch sitara hotel ho, (structure)
main mahue ka desi tharra, tum red-label ki botal ho,
tum chitra-haar ka madhur geet, main krishi-darshan ki jhaadi hoon, (sweet)
tum vishva-sundari si kamaal, main teliya chaap kabadi hoon,
tum sony ka mobile ho, main telephone waala hoon chonga,
tum machli maansarovar ki, main saagar tat ka hoon ghongha, (shore)
dus manzil se gir jaaooga, mat aage mujhe dhakel priye,

mushkil hai apna mel priye, ye pyar nahin hai khel priye,

tum satta ki maharani ho, main vipaksha ki lachari hoon, (in power/opposition)
tum ho mamta-Jailalita si, main kwara Atal-Bihari hoon,
tum Tendulkar ka shatak priye, main follow on ki paari hoon, (century)
tum getz, matiz, corolla ho main Leyland ki lorry hoon,
mujhko refree hi rehne do, mat khelo mujhse khel priye,
mushkil hai apna mel priye, ye pyar nahin hai khel priye,
main soch raha ki rahe hain kabse, shrota mujhko jhel priye, (listeners)

mushkil hai apna mel priye, ye pyar nahin hai khel priye

Holi Ke Rang Phoolon ke Sang

Phagun ka mahina aa hi gaya rang aur gulaal ka tyohaar le ke. Jaisa ki amoomanaise waqt hota hai baazar mein khasi chahal pahal hai. Upar se mausam itna khushgavar ki bahar nikalte hi tabiyat khush ho jaye.To is Sunday maine socha kyun na Ranchi ke is pyare mausam ke kuch rang holi ke is mauqe pe aap sab ke sath share karoon.

Blogosphere ke mere sare sathiyon ko Holi ki Hardik Shubhkaamnayein. Asha hai ye Holi aap sab ke jeewan mein khusiyon ke naye naye rang bikhere.

Na Mohabbat Na Dosti Ke Liye...

Zindagi ki is raah pe hum sab chal rahe hain, na jaane kab se ..
kabhi bhagte huye to kabhie halke halke kadam bharte huye...
Bachpan, school , college ke muqamon ko paar kate huye..
Is safar mein kitnon se nata juda, kitne dost mile, kitne sangi sathi bane
Aaj jab unhin pagdandiyon ko palat ke dekhta hoon to lagta hai are kitte log to is rah-e-safar mein kab sath chod gaye ye pata hi nahin chala…
Kabhi is bhag daud mein uthti dhool ke gubaar ne bane banaye rishton ko malin kar diya to kabhi ye bhi hua ki zindagi ki badalti rahon aur tasweeron ne un rishton ke auchitya pe hi sawaliya nishan laga diye.

Par yaadein to badastoor rehti hain, vivash karti hain humein apne ateet mein jhankne ke liye..
Hum to peeche mud ke dekh sakte hain , ruk sakte hain ..
par kya un khoye logon se phir judne ke liye kya ye waqt humein izazat deta hai.
shayad nahin , waqt ne peche mudna nahin seekha
Waqt to chalta rehta hai aur chaahte na chaahte humein iske sath liye gaye apne nirnayon ko dhona padta hai. Kabhi garv se to kabhi glani se!

Aisi hi bhawnayein liye Jagjit Singh ki gayi ye behtareen ghazal pesh-e-khidmat hai. zindagi ke kitne hi ekaaki chanon mein ye mera sahara bani hai aur isliye mujhe behad priya hai.

naa mohabbat naa dostii ke liye
waqt ruktaa nahii.n kisii ke liye

dil ko apane sazaa na de yuu.N hii
is zamaane kii beruKhii ke liye

kal javaanii ka hashr kyaa hogaa
soch le aaj do gha.Dii ke liye

har ko_ii pyaar Dhuu.NDhataa hai yahaa.N
apanii tanhaa sii zindagii ke liye

waqt ke saath saath chaltaa rahe
yahii behatar hai aadamii ke liye

Click Here to listen this Ghazal.

Shaadi...Joote...aur......Part-II

Raat ke do baj rahe the...
Hotel ki lobby sunsaan thi. Main apne kamre mein thodi rest lene aaya tha. Joote aalmari ke andar double bed cover ke neeche surakshit rakhe the. Lete lete neend na aaye jaye ye soch ke sis ke kamre mein gup marne pahuncha aur idhar udhar ki gup chalne lagi. Mujhe kya pata tha us gehre andhere mein khoji tolee us lobby ke har ek khule room ki taalashi le rahi thi.
10-15 min ki gup shup ke baad jyon hi bahar nikla dekha wahi donon balak mere room se kuch nikalte huye teji se bhag rahe hain.
Poora maazra samajhne mein mujhe der nahin lagi.Man hi man khud ko kosa ki yaar manish ek lock maar dete to aisi naubat to nahin aati naa. Bachpan mein Papa se suni huyi kahawat ek dum se yaad aa gayi
Ab pachtawat hot kya, jab chidiya chug gayi khet :)
Yani jab chidiyon ne khet ke sare dane chug hi liye to ab pachtaane se kya phaida.

Par Chaanakya ki bhoomi ki kuch laaz to rakhni hi thi. Mujhe laga ki ab seedhi ungli se ghee nahin nikalne wala to Kautilya ki kutil neeti se hi ab kaam lena hoga.
Tezi se bachchon ko pakda aur lagbhag daante huye kaha
Are itti raat gaye tum log hotel mein kisi ke room mein chori karne ghuse the?
Bachchon ke chehre ka rang syaah pad gaya!
Itte gambhir aarop ki kalpana bhi nahin ki thi unhone. Waise bhi unhein ye pata nahin tha ki jis room mein unhone entry lee thi wo room kiska tha.
Bholepan se unmein se ek ne kaha ki uncle hum to ye new game khel rahe the! Aur dekhiye humne kuch churaya nahin bus ye dulhe ke joote liye the.
Utne hi gusse mein maine wo joote wapas liye aur kaha wo sab main nahin janta . Game ho ya kuch aur. Itti raat gaye is terah kisi ke room mein ghusne se log to tumhein chor hi kahenge.
Bechare asmanjas ki isthiti mein mera munh taakte rahe aur phir sar jhukaye neeche mandap ki or chal diye. Neeche ja ke jab unhone ye kissa kaha hoga to unhein phir dose mila hoga. kyunki raat ke 3 baje phir aaye mere kamre mein aur kaha ki uncle hum is game ke rules nahin jante the isliye aapne humein fool banaya hai . Ab to joote de deejiye. Maine badi mushkil se hansi rok kar kaha ki ab room ki taalashi le lo agar mil jayein to wo tumhare honge. Wo samajh gaye ki jooton ki position shift ho gayi hai. Is baar wo shadi ke bartanon ke andar daal diye gaye the aur pehre pe zabardast log the. So joote nahin milne the so nahin mile.

Aage ka morcha saaliyon ne sambhala haan final negotiation mein mujhe bhi bula liya taaki pressure built up rahe. Jaise wahan pahuncha peeche se aawaz aayi lo aa gaye Choron ke Sardaar aur hansi ki lehar hall mein daud padi..
dulhe ko kitne ka choona laga ye batane ki juroorat nahin kyunki usmein koi bargaining nahin ki gayi aur neg ka len den hansi khushi nibat gaya.

Shaadi ... Joote...aur Choron Ka Sardaar ! Part - I

Shadiyon ke is mausam mein pichle mahine main kuch dinon ke liye Kanpur gaya tha. Shadi meri cousin sis ki thi. Haldi…. Mehndi….Shadi ke geet…..Donon khemon mein hone wali sangeetmay nonk jhonk…..sabka khasa anand uthaya maine. Par sabse maza aaya Jooton ki Chori mein.
North Indian shadi mein ye rasma aam hai. Hota ye hai ki vadhu paksha yani ladki walon ko dulhe ke joote churane hote hain aur ye joote neg ki moti rakam wasool karne ke baad hi Dulhe ko lautaye jate hain. Ab is chori ko rokne ke liye ladke wale bhi taiyar ho kar aate hain. Aksar iska jimma waise logon ko saunpa jata hai jinhein jooton ki security ka achcha khasa experience hasil ho. :)
Choonki neg (money to be given to as per final bargain :) lene ka haq hone wali saaliyon ka hai isiliye ladki walon ki side se unki team hi sabse jyada active rehti hai is kaam ko anzaam dene ke liye.

Shadi ka karyakram suru hua. Humare kheme ki ladkiyan jooton ko suru se track kar rahi thin. Shadi ki raat ko logon ko hotel ke diff rooms distribute karne ka jimma mere upar tha. So main usi mein busy tha. Neeche vivah mandap mein aaya to dekha ki gaana bajana suru ho chuka hai. Beech mein hi mujhe ye khabar dee gayi ki joote ki security ka jimma 10-12 saal ke do bachchon ke upar hai jo saanp ke phan ki terah joote ke upar pehra de rahe hain. :)

Sath mein ye request bhi ki bhaiya aap kuch help karein humari.

Maine kaha are ismein main kya help karoonga. Phir ek nazar un veer balakon pe padi to laga ki hmmmmm yahan kuch apni daal gal sakti hai.

Main phir alag thalag ho ke bahar hi ghoomne laga. Andar un pe jo attention rakhi ja rahi thi unse un rakshakon ko tension ho rahi thi. So wo bhi aaye un jooton ke liye safe place dhoondhne ke liye. Maine unse poocha ki bachchon kya kar rahe ho? Bade bholepan se wo bole ki hum jooton ko chipane ki jagah dhoondh rahe hain. Maine unki baton mein jyada dilchaspi nahin dikhai par ye dekh liya ki wo kidhar jaa rahe hain. Kuch der baad we donon mandap mein wapas aa baithe. Unke chehre ki hansi bata rahi thi ki unhone apna safe place dhoondh liya hai.

Par mujhe hotel ke us area ke chappe chappe ki jaankari thi. Aur usmein joota chipane ki jagahein behad limited thin. Unhein neeeche aaya dekh ke main tez kadmon se chal pada …apne muqam ki or. Aur kuch hi minutes mein humari toli mein khushi ki lehar daud padi kyunki Doolhe ke joote humare kabze mein the…

Kya humari ye khushi chanik (kuch samay ke liye) nahin thi?
Kya we joote humari custody mein der tak rakh paye….? .
Joote ke hath se nikalne ki aur use punah pane ki humari koshish ki dastaan agle hisse mein….