Sunday, February 28, 2010

Annual Musical Countdown 2009 - Song No. 10- Kaise Batayein Kyun Tujhko Chahein...?

Waqt a gaya hai vaarshik sangeetamala ki antim das sidhiyon ko chadhne ka. ye dason nagme sunane men bahut pyare hain. ye jaroor hai ki inamen se kuch ek khas mood men jyada bhale lag sakte hain. in das men se chhah geet aise hain jo aap sab ne pichhale saal khoob sune honge aur baki aise jinhen aapane kam ya bahut kam suna hoga.

to baat dasavin poyadaan ke geet ki jisane pichhale saal ke ant men aakar kuch hi samay men sabke dil men ghar kar liya. maze ki baat hai ki sangeetakar pritam ne is geet ko teen alag alag gaayakon se gavaya. ek men kailash kher the to doosre men soham chakravarti par sabse jyada sunane men aaya aatif asalam vala varsan. geet to aap pahachan hi ge honge isaliye ye kahane ki jaroorat ab nahi padegi ki tu jaane na...



saval ye hai ki aatif asalam (jo har saal bas ek ya do filmen karte hain) ke geet bharat men itne lokapriya kyoon ho jate hain jabaki gaayiki ke lihaz se hamare sare varishth gayak unase bees hi hain?

iska uttar janane ke lie kisi sangeetapremi ko jyada mashakkat karne ki jaroorat nahin padegi. darasal aatif asalam aur kai anya pakistani gaayakon ki lokapriyata ki mukhya vajah unki aavaaz ka yahan ke gaayakon ki apeksha 'alag' tarah ka hona hai. isi tonal kvaliti ke chalte unki aavaaz ka asar sunane vale par sheeghr hota hai. vaise kya aapako pata hai ki aatif asalam bachapan men ek gayak ki jagah imaraan khan jaisa tej gendabaaj banana chahate the. vo kissa mainne aapke sath baanta tha vaarshik sangeetamala 2006 ke dauraan jab aatif pahali bar meri kisi sangeetamala ka hissa bane the.

baharahaal ajab prem ki gajab kahani ki chaupat kahani ko agar kisi ne sanbhala to vo tha iska karnapriya sangeet. is geet men aatif asalam ka asar to apani jagah hai hi par geet ki shuruaat ka koras bhi man ko mohta hai. vaise irashad kamil ne bhi is geet ke madhyam se kuch aise prashn uthaaye hai jo har kishor aur yuva insan ki zindagi men kabhi na kabhi umadate ghumadate hain hi.

yaani vahi chir shashvat prashn ki koi achanak hi itana achha hamen kyoon lagne lagata hai? aur jab vo lagne hi lagata hai to chahakar bhi ham apani baat ko us tak pahunchaane men itana asahaay sa kyoon mahasoos karte hain? aur fir man hi man usase saval karte hen aur fir apne hi man se udhar ka javab bhi pa jate hain. kabhi ye kalpanik javab hothon par anayas hi muskurahat le aate hain to kabhi dher sara gam! aur fir apani manasik sthiti ko apne tak seemit rakhakar ham ye bhi kahane se nahin chookte ki tu jaane na....

to aaiye ek bar fir sab mil jul kar gunagunaayen is behad romantic geet ko


kaise bataayen
kyoon tujhako chaahen
yara bata n paen
baaten dilon ki
dekho jo baki
aake tujhe samajhaen
tu jaane na ...tu jaane na

mil ke bhi, ham n mile
tumse n jaane kyoon, meelon ke
hain faasle tumse n jaane kyoon
anajaane hain silasile
tumse n jaane kyoon, sapane hain
palakon tale tumse n jaane kyoon

kaise batayen
kyoon tujhako chaahen
yara bata n payen
baaten dilon ki
dekho jo baki
aake tujhe samajhaen
tu jaane na tu jaane na

a .......
nigahon men dekho
meri jo hai bas gaya
vo hai milta tumse hu-b-hu
o ho o
jaane teri aankhen thi
ya baaten thi vajah
hue tum jo dil ki aaraju
tum pas ho ke bhi
tum aas ho ke bhi
ehasaas ho ke bhi
apne nahin, aise hain
hamako gile
tumse n jaane kyoon, meelon ke
hain faasle tumse n jaane kyoon oon oon oon ...
tu jaane na tu jaane na....

u ... jaane na jaane na jaane na
ha a a... tu jaane na
khyalon men lakhon baaten,
yoon to kah gaya
bola kuch n tere samane
o o ... hue n begane bhi
tum ho ke aur ke
dekho tum n mere hi bane
afsos hota hai, dil bhi ye rota hai
sapane sanjota hai, pagla hua, soche ye
ham the mile tumse n jaane kyoon
meelon ke, hain faasle tumse n jaane kyoon
anajaane, hain silasile
tumse n jaane kyoon, sapane hain
palakon tale tumse n jaane kyoon
ho o o o ...

kaise batayen
kyoon tujhako chaahen
yara bata n paen
baaten dilon ki
dekho jo baki
aake tujhe samajhayen
tu jaane na tu jaane na....


to chaliye mangalavar ko aapase fir milenge is geetamala ke agale geet se jise shayad aapane pahle na suna ho. bhala bhutaha filmon ke giton par koi dhyaan deta hai kya? :)

Click Here to read this post in Hindi devnagari script.

Click Here to post your comment on this post. You can post your comment in English or Romanised Hindi also .


Saturday, February 27, 2010

Annual Musical Countdown 2009 : Song no. 11 : Bawali si preet mori ab chain kaise pave...

Vaarshik sangeetamala ki gyarahavin paaydaan ka geet ek aisa geet he jisase shayad aap abhi tak anajaan hon. vaise to ye geet jis film se hai uska vibhinn chainalon par kafi pramoshan kiya gaya tha. par pramoshan ke dauraan is geet ke bajaaye anya giton ko jyada tarajih di gi. is geet ki gaayika ka filmon ke lie gaya ye sirf teesara geet hai. par inki gaayiki ka kamaal dekhiye ki pichhale saal apne pahle geet ke lie inhen filmafeyar evard ke lie namit kar diya gaya.

Aap bhi soch rahe honge ki ye banda paheliyan hi bujhata rahega ya gaayika ka nam bhi batayega. to chaliye aapki utsukta bhi shant kie dete hain. ye gaayika hain shruti pathak jinka faishan film ke lie gaya geet mar javaan... behad lokapriya hua tha aur pichhale saal meri sangeetamala ki 16 vin poyadaan par baja bhi tha. par us post men shrriti ke bare men aapase jyada baaten nahin ho paai thin.


27 varsheeya Shruti Pathak gujarat se talluk rakhati hain. sangeet ki prarambhik shiksha shruti ne apne guru divakar thakur ji se Ahemdabad men li. snatak ki padhai poori karne ke bad vo munbai a gin. filahaal vo suneel guragavakar se sangeet ki shiksha le rahi hain. yoon to shruti ka nam faishan film ke sangeet rilij hone ke bad chamka par unhen gane ka pahla mauka le ke pahla pahla pyar... ke rimiks varsan (elabam - bebi dol) ko gane men mila tha. agla mauka milne men shruti ko 3 saal lag ge aur isake lie navodit sangeetakar amit trivedi se unki jaan pahachan kam aai jinhonne film Dev D men unhen gane ka mauka diya.

Aapko jaankar aashcharya hoga ki shruti gane ke sath sath geet likhne ka shauk bhi rakhati hain. dev di ke geet paayaliya .... ko gane ke sath use apani kalam se sanvarne ka kam bhi unhonne kiya. shruti sonu nigam ki jabaradast prashansak hain aur roz kam se kam do ghante ka samay riyaz men deti hain.

Aakhir kya khas hai shruti ki aavaaz men.. kuch aisa ki aap us aavaaz ki gaharaiyon men doobate chale jaen. aisi aavaaz roomaniyat bhare nagmon ko aapki samvedanaaon ke kafi kareeb le jaane ki kshamata rakhati hai. isiliye faishan ke bas film kurbaan men jab sangeetakar saleem sulemaan ke samane ek shadi shuda jode ke bich pranay drishya ki paristhiti aai to ek bar fir unhonne shruti pathak ko hi chuna. aur shrriti ne geetakar prasoon joshi ke shabdon men nihit bhavanaaon ko bakhoobi apani aavaaz ke saanche men dhal kar shrotaon tak pahuncha diya.

To aaiye sunen kurbaan film ka ye geet.

o rasiya...rasiya..

bavali si preet mori
ab chaine kaise pave
a ja rasiya mohe
ang laga le

ang laga le..ang laga le

gesuon si kali ratiyan
adharon pe kaanpe batiyan
saanvali si saanse mori
araj sunaven
aake mori shvet preet pe
rng saja de

bavali si preet mori ....

aur haan agar pahle antre ke bad ki aavaaz aapako alag tarah ki lage to bata doon ki geet ke bich ki ye panktiyan karina kapoor ne padhi hain.

tan ek, jaan ek
apna khoon jahan ek
aise lipate ruh se ruh
ki ho jaaye iman ek...




aasha hai shruti ki is khas aavaaz ka faayda sangeetakar aage bhi uthate rahenge jisase ham jaise sangeetapramiyon ko unki aavaaz ke anya aayamon ka bhi pata chal sake.


Click Here to read this post in Hindi devnagari script.

Click Here to post your comment on this post. You can post your comment in English or Romanised Hindi also .


Tuesday, February 23, 2010

Annual Musical Countdown 2009 - Song No. 12- Sapnon se bhare naina..na neend hai na chaina

12vin position ka geet ek aisa geet hai jo ki rag bhairavi par aadhaarit hai. is geet ko likha javed akhtar saahab ne, isaki dhun banaai sangeetakaar tikadi shankar ehasaan loy ne aur ise apani aavaaz se sanvara shankar mahadevan ne. film ka nam to aap pahachaan hi ge honge. ji haan ye film thi joya akhtar dvara nirdeshit 'lak baai chaans'. isi film ka shekhar ki aavaaz men gaya geet sangeetamala ki 22 vin position par pahle hi baj chuka hai.

vaise nirdeshika zoya akhtar ka kahana tha ki gar unka bas chalta to is film ke saare geet shankar mahadevan se hi gava leti. vahin gayak shankar mahadevan kahate hain ki kuch geet aise hote hain jinhen man men baithane men vakat lagata hai. pashchimi vaadya yantron drams, bes ke baikagraund aur rag bhairavi men thumari stail gaayiki ke smamishran se bana geet isi shreni men aata hai. is geet ke jin hisson men shastriyata ka put adhik hai vo man ko gahara sukoon dete hain. javed saahab ne aise roopako ka istemaal kiya jo geet ki shastriyata se mel khaaye.



film udyog men jab bhi koi kalakar kadam rakhta hai to sabse pahle use kaam paane ke liye vibhinn stoodio men aadishan dena padta hai. pahali baar kaimare ke saamane ki ghabarahat, thukaraaye jaane ke dar se lekar safal hone ki aasha in sabhi mishrit bhavanaaon se har abhineta ko gujarana padta hai.

par javed akhtar safal hone ki is sarvavyapi chaah aur use paane ke liye apane sabhi moolyon ko daanv par lagane ki pravriti par chot karte hue behad vazib parantu kathin prashn karte hain. javed saahab ham sab ke samaane ye saval karte hain ki

sirf apana lakshya poora karne se sukh ki anubhooti to aati hai par kya dil men chain aa jata hai?

sukh hamare se baahar hain ya isaki talash dil ke andar karni chaahiye ?

hamane apane jeevan men sukh ke maapadand bana rakhe hain vo kya man ko sukoon dene vaale hote hain?


to aaiye sunen is geet men shankar mahadevan ki lajavab gaayiki ko..

bagiya-bagiya baalak bhaage,titali fir bhi haath na laage!
is pagale ko kaun bataye,
dhoondh raha hai jo too jag main,koi jo paaye to man men hi paaye!
sapanon se bhare naina, to nind hai n chaina!

aisi dagar koi agar jo apanaaye,
har raah ke vo ant pe rasta hi paaye!
dhoop ka rasta jo pair jalae,
mod to aae chhaanv na aae,
rahi jo chalta hai chalta hi jaaye,
koi nahi hai jo kahin use samajhaaye!

sapanon se bhare naina,
to nind hai na chaina!
naina re naina re......

door hi se sagar jise har koi maane,
pani hai vo ya ret hai ye kaun jaane,
jaise ke din se rain alag hai,
sukh hai alag aur chain alag hai,
par jo ye dekhe vo nain alag hai,
chain to hai apana sukh hain paraaye!

sapanon se bhare naina,
to nind hai n chaina.....


par na to aadami safal hone ki ichha chhod sakta hai na ise paane ke liye hone vali jaddozahad se door rah sakta hai. safal hone ki chaah hi to shayad jindagi ka tonic hai jo hamen visham paristhiyon men bhi joojhne ke liye prerit karta rahata hai. is geet ki shooting ke dauraan apani kismat aazmaane aae ek kalakar dvara kaha gaya ye sher sab kuch kah jata hai...

ki dil me chubh jaayenge jab apani jubaan kholenge
ham bhi shahar men kaanton ki dukan kholenge
aur shor karte rahe galiyon men hajaron sooraj
dhoop nikalegi to ham bhi apana makan kholenge


Click Here to read this post in Hindi devnagari script.


Click Here to post your comment on this post. You can post your comment in English or Romanised Hindi also .


Sunday, February 21, 2010

Annual Musical Countdown 2009 - Song No. 13- Ye Dooriyan..in raahon ki dooriyan

Vaarshik sangeetamala ka safar taya karte karte ham a pahunche hain thik isake beecho beech. yaani 12 poyadanon ka safar poora karake geetamala ki 13 vin position tak. abhi bhi sabse oopar ki 12 seedhiyon ki chadhai baki hai. aaj ki position par ka geet ek aisa geet hai jise is saal kafi lokapriyata mili. mohit chauhaan ki gaayiki ka andaz , pritam ka karnapriya sangeet aur irashad kamil ke bolon ki roomaniyat ne logon ke hriday ko is geet se jod diya.

darasal shayad hi ham men se koi ho jisane apne ajizon se door rahane ki vyatha na jheli ho. isaliye insani rishton men dooriyon ki baat karta ye geet jald hi sabke jehan men sama gaya. jab lav aaj kal ka sangeet racha ja raha tha to sabse pahle isi geet par kam shuru hua. nirdeshak imtiyaz ali ise mohit chauhaan se hi gavana chahate the. shayad mohit ka unki film jab vi met men gaya gana na hai kuch khona na pana hi hai.. unako behad prabhavit kar gaya tha. sangeetakar pritam ko mohit ko traik karne men do mahine ka vakat jaroor laga par mohit nirdeshak aur sangeetakar ke vishwas par bilkul khare utre.



vaise kya aapako pata hai ki himachal ke rahane vale mohit chauhaan ne kabhi bhi sangeet ki vidhivat shiksha nahin li. bilasapur ,mandi aur nahan ke colejon se vicharte hue unhonne apani parasnatak ki upadhi dharmashala se li. sangeet jagat ki surkhiyon men vo tab aae jab bataur mukhya gayak unake kam ko baind silk root ke elabam boonden men saraha gaya. vaise is chitthe par unake bare men charcha unake gaaye geeton gunacha ab koi mere nam kar diya aur na hai kuch khona na pana hi hai ki vajah se pahle bhi ho chuki hain.

vaise shiksha ki drishti se geet ke geetakar irashad kamil bhi peechhe nahin hain. hindi men doctaret ki upadhi se vibhooshit irashad, imtiyaz ali aur pritam ke sath pahle bhi kam kar chuke hain. unase sakshatkar men jab poochha gaya ki geetakar ke lihaz se sabse kathinaai bhari baat vo kise mante hain to unka javab tha

mere lie sabse kathin kisi roomani geet ko rachna hai. aisa isaliye ki is vishaya par itana zayada aur itani gaharaayee se likha ja chuka hai ki lagata hai ki kuch kahane ko bacha hi nahin hai. mainne to apani dikshanri se dil,dhadakan, zigar, ikaraar, intazaar in sabhi shabdon ko hata rakha hai. agar apani pasand ki baat karoon to mujhe soofiyat aur akelepan ka put lie roomani geeton ko likhna jyada santosh deta hai.

irashad ki yahi soch mohit dvara is geet ki adaegi men dikhaai deti hai. jindagi ke akelapan men purani smritiyon ke saaye man men jo tees ubharte hain ye geet usi ki ek abhivyakti hai. to aaiye sunen film love aaj kal ka ye nagma

ye dooriyan, ye dooriyan,ye dooriyan

in rahon ki dooriyan
nigahon ki dooriyan
ham rahon ki dooriyan
fana ho sabhi dooriyan

kyoon koi pas hai
door hai kyoon koi
jaane n koi yahan pe
a raha pas ya door main ja raha
janoon n main hoon kahan pe

ye dooriyan....fana ho sabhi dooriyan

ye dooriyan, ye dooriyan

kabhi hua ye bhi,
khali rahon pe bhi
tu tha mere sath
kabhi tujhe mil ke
lauta mera dil yah
khali khali hath
yah bhi hua kabhi
jaise hua abhi
tujhako sabhi men pa liya
tera mujhe kar jati hai dooriyan
sataati hain dooriyan
tarasati hain dooriyan
fana ho sabhi dooriyan

kaha bhi n mainne
nahin jeena mainne
tu jo n mila
tujhe bhoole se bhi
bola n main ye bhi
chahoon faasla, bas faasla rahe
ban ke kasak jo kahe
ho aur chahat ye zavan
teri meri mit jani hai dooriyan
begani hai dooriyan
hat jani hain dooriyan
fana ho sabhi dooriyan

kyoon koi pas hai
door hai kyoon koi
jaane n koi yahan pe
a raha pas ya door main ja raha
janoon n main hoon kahan pe

ye dooriyan....fana ho sabhi dooriyan
ye dooriyan, ye dooriyan, ye dooriyan






Click Here to read this post in Hindi devnagari script.

Click Here to post your comment on this post. You can post your comment in English or Romanised Hindi also .


Friday, February 19, 2010

Annual Musical Countdown 2009 - Song No. 14- Khwab Na Sage,Zindagi Thage..

Vaarshik sangeetamala 2009 men aaj baari hai 14 vin position par ke geet ki. ye ek aisa geet hai jo hafte dar hafte mere man men ghar banata ja raha hai aur meri aaranbhik soch se chhah poyadanon ki chhalaang laga kar ye aa pahuncha hai is position par. pahali baar jab ise suna tha to laga tha ki ek baind ko pramot karne ki paristhiti ke anuroop hi is geet ka mukhade aur saath ka dhoom dhadaka racha gaya hai. par fir bhi kuch baat thi is nagme men ki mainne ise baad men sunane ke liye sahej kar rakh liya.



Darasal paashchaatya sangeet aayojan ke aavaran men aam sa lagne vala geet khaas tab ho jata hai jab geet ke pahle 75 second beet chuke hote hain. usake baad aa zamane aa.. ke saath geet ki laya yoon badalti hai ki man jhoom uthata hai aur gayak ke saath sur men sur milane ko udyat ho jata hai.

Prasoon joshi ne yahan ek baar fir apani kalam ki jaadagoori ka behatareen namoona pesh kiya hai. vaise to geet ki paristhiti videshi zameen par apane mukaam ki talash kar rahe baind ke jazabe ko dikhane ki hai par prasoon ne geet ke madhyam se visthapit jindagiyon men rang bharne ki safal koshish ki hai. . prasoon ke is saal ke likhe geeton men ye geet mujhe bolon ke hisab se sabse behatareen laga. prasoon apane is geet ke baare men kahate hain

Khanabadosh jipsy ko kahate hain, banjare ko kahate hain, jiska bana banaya thikana nahin hai vo ham jaisa nahin hai jo jahan chal pada vahi ghar hai jahan bistra beechha liya vahin usaka bed room hai. ye sirf salman aur ajay ka gana nahin hai ye un sab logon ka geet hai jo pravasi hain jo videshon men ya desh ke alag alag shaharon men jaakar kuch karne ki koshish kar rahe hain. unki soch hai ki ham to apani jadon se kat kar nikal chuke hain aur ab to saari duniya hi hamara ghar hai. ye geet sirf apravasi bharatiyon ki nahin balki un sabhi logon ki baat karta hai jo apana apana gaanv apana kasba chhodakar desh ke vibhinn shaharon men ja base hain. vo sab log jo kafile men hain, jo ek safar men hain, jinake andar ek junoon hai, ek talash hai jinake paas, jinki aankhon men ek ne kal ka sapana hai ye un sab ka gana hai.


Shankar ahasaan loy ke sangeet se saja ye nagma vestarn beets aur chutaki ke adbhut mishran se shuru hota hai. sangeetakaar jodi chahati to ye geet khud shankar mahadevan se gava sakti thi. par ye inka badappan hai ki is geet ko gane ke liye navodit gayak mohan ko chuna gaya. to chalen landan drims film ke is geet men gayak mohan ki gaayiki ka lutf uthane...


khanabadosh khanabadosh
firte hain ham khvaabon ke sang liye
landan dreams

hai hothon pe seeti, pairon men safar hai
hai door manjil, saath bas hunar hai
gunagunaayenge ham, chalte jaayenge ham
jab tak dekhe na, sune na
samajhe na , maane na, ye sara zahan

aa zamane aa, aa zamane aa,
aajamaane aa, aajamaane aa,
peshevar hava, peshevar hava,
mushkilen saja, ho o o ho
khavab na sage, khavab na sage,
zaindagi thage,zaindagi thage,

fir bhi jaane kyoon, fir bhi jaane kyoon,
ummeed jage ho o o ho
khanabadosh khanabadosh
firte hain ham khvaabon ke sang liye
landan dreams

ham to nadi tal ke,laharen uchhaal ke
rahate vahin jahan, bahate hain ham
dil ki surahi, sondhi sondhi gaharaai
jahan chhalke hain geet, jinhen kahate hain ham
aa zamane aa, aa zamane aa,
aajamaane aa.... ummeed jage

aasamaan se chhanti hai, aandhiyon se banti hai
thokaron men hain, apane to mastiyan
sagaron ke yar hain, jhoomne se pyar hai
dolte rahenge hain aavara kashtiyan
khanabadosh khanabadosh...





Click Here to read this post in Hindi devnagari script.

Click Here to post your comment on this post. You can post your comment in English or Romanised Hindi also .


Wednesday, February 17, 2010

Annual Musical Countdown 2009 - Song No. 15- Pankhon ko hawa zara si lagne do....

Film jagat men bahut se to nahin, par kuch patakatha lekhak jaroor hue hain jinhonne bataur geetakar bhi nam kamaya hai. gulazaar se to ham sab vaakif hain hi. javed saahab ne bhi saleem ke saath kai yaadgaar patakathaayen likhi par apane geetakar vaale rol men tabhi aae jab patakatha lekhan ka kaam unhonne chhod diya.

aaj ke sangeet paridrishya men ek aisa hi ek yuva geetakar hai jisane bataur patakatha lekhak bhi utna hi nam kamaya hai. chak de indiya jaisi patakatha se charchit hue jayadeep saahani ne tujhamen rab dikhta hai... jaise geet ki rachna bhi ki hai. aaj is saal vaarshik sangeetamala ki 15 vin position par pahali baar padarpit hue hain vo sangeetkaar saleem sulemaan ki jodi ke saath.
jayadeep dvara likhe is geet ke bolon men ek daarshanikta hai jo saleem sulemaan ke shaant bahate sangeet men ubhar kar saamane aati hai.



pankhon ko hava zara si lagne do
dil bole soya tha ab jagne do
dil dil men hai dil ki tamanna so
..chalo jara si tapane do
udane do ...udane do ...
hava zara si lagne do.... do
soya tha ab jagne do
pankhon ko hava zara si lagne do

vaise bhi ham sabhi udana hi to chahate hain ya ud nahin bhi paate to usaka swapn jaroor dekhte hain. chahe vo kamayabi ki udan ho ya sukhon ke lok men hamesha vicharne ki chaah. par jayadeep lakshya ki soch kar udan bharne ka sandesh is geet se nahin dete. vo ruk kar, sanbhal kar udan bharne ko to kahate hain par saath hi ye kahana bhi nahin bhoolte ki ek baar sahi udan bhar kar bhatakna bhi jaroori hai. sulajhaav bhari jindagi ki ummeed karne ke pahle bikharav ka saamna karne ki kshamata lana jaroori hai.

dhoop khili jism garam sa hai
sooraj yahin ye bharam sa hai
bikhari hui raahen hajaron suno
thamo koi fir bhatakne do
udane do ...udane do ...
hava zara si lagne do.... do
soya tha ab jagne do
pankhon ko hava zara si lagne do


dil ki patang chalo dikhati hai
dheel to do dekho kahan pe jaati hai
ulajhe nahin to kaise sulajhoge
bikhare nahin to kaise nikharoge
udane do .hauva....udane do
hava zara si lagne do.... do
soya tha ab jagne do
pankhon ko hava zara si lagne do

saleem sulemaan ne geetar ki madhur dhun ke saath geet ka aagaaz kiya hai. saleem marchent apani gaayiki se chak de indiya ,faishan, kurbaan aadi filmon men pahle hi prabhavit kar chuke hain. unake svar ki mulayamiyat geet ke mood ke saath khoob fabati hai.

to aaiye sunen saleem ka gaya film Rocket Singh... ka ye geet



Click Here to read this post in Hindi devnagari script.


Click Here to post your comment on this post. You can post your comment in English or Romanised Hindi also .


Tuesday, February 16, 2010

Annual Musical Countdown 2009 - Song No. 16- Umeed ab kahin koi dar kholti nahin...

Vaarshik sangeetamala 2009 ki 16 vin paayadaan svagat kar rahi hai pichhale saal ki ekmaatra filmi ghazal ka jo is saal ke mere pachchis manapasand geeton men apani jagah bana saki hai. nandita das dvara nirdeshit film firak ki is gajal ki rachna ki hai ek bar fir gulazaar sahab ne. gujarat ke dangon par bani is gambheer film ke geeton men jis samvedanasheelta ki jaroorat thi
use gulzar ne bakhoobi nibhaya hai.



ab aap hi bataiye dangon se hairaan pareshan aadami apana kasht lie prashasan ke pas jaaye aur agar use dutkar aur pratadana ke aalava kuch na mile to vo kya karega ? naummeed ho kar apana dard man men chhupaaye maun hi to rah jaaega na. gulazaar ne in bhavanaaon ko gajal ke matle men shabd dete hue likha aur kya lajavab likha....

ummeed ab kahin koi dar kholti nahin
jalne ke bad shama aur bolti nahin

charon or hinsa aur aagajani se pasare sannate ko gulazaar ne agale do ashaaron men sametne ki koshish ki hai

jo saans le rahi hai har taraf vo maut hai
jo chal rahi hai sine men vo jindagi nahin

har ek cheej jal rahi hai shahar men magar
andhera badh raha hai kahin raushni nahin

jalne ke bad shama aur bolti nahin
ummeed ab kahin koi dar kholti nahin...

ye ek aisi gajal hai jo film ki hi bhanti hamen ye sochne par majaboor karti hai ki insan jab haivaniyat ki chadar odh leta hai to ek jivant shahar ko lashon aur rakh ka dher bante der nahin lagti.

is gajal ka sangeet diya hai ek navodit sangeetakar jodi peeyoosh kanaujiya aur rajat dholakiya ne . ye vahi razat dholakiya hain jinhonne pancham ke intakaal ke bad 1942 a love story ka sangeet poorn kiya tha. ve dharavi, holi aur mirch masaala jaisi leek se hatkar banaai gi film ka sangeet bhi de chuke hain. haal filahaal men dilli 6 men rahman ke sath unka nam bhi sah sangeet nirdeshak ki haisiyat se tha. chahe mukhade ke pahle ki baat kare ya ashaaron ke beech ka filar har jagah gajal ka sangeet man men gahari udasi ka rng bharta nazar aata hai. rekha bharadvaj ek bar fir apani utkrisht gaayiki dvara gajal ke mizaj ko hoobahu pakadane men safal rahi hain.

to agar aapke pas kuch fursat ke lamahe hon to koshish kijie is gajal ki bhavanaaon men doobane ki...





Click Here to read this post in Hindi devnagari script.


Click Here to post your comment on this post. You can post your comment in English or Romanised Hindi also .


Friday, February 05, 2010

Annual Musical Countdown 2009 : Song no. 17 : Bhanwra bhanwra aaya Re...yani Jab gulzar karein AIDS ki baat !

Vaarshik sangeetamala 2009 ka ek mahine ka safar taya karte hue aaj ham a pahunche hain 17 vin poyadaan par. pichhali poyadaan par aapane dekha ki kis tarah peeyoosh mishra ne apne geet ko tatkaaleen rashtriya aur antararashtriya masalon ko janta ke samane pesh karne ka madhyam banaya tha. aaj ka ye yugal geet rajanitik nahin par ek samajik sandesh jaroor de raha hai aur vo bhi is andaz men jise sunane ka man bar bar karta hai.

Iss yugal geet ke sath pahali bar is geetamala men apani upasthiti darj kara rahe hain aaj ke yug ke do bemisaal gayak Sukhwindar Singh aur Kailash Kher. in donon maharathiyon ko ek sath sunana kisi bhi sangeetapremi ke lie sone par suhaga jaisi baat hoti hai. vaise to in gaayakon ki khasiyat rahi he ki aam se geet ko bhi apani adaegi se khas bana den par jab bol Gulzar ke hon aur dhun Vishal Bharadvaj ki to unka kam aur aasaan ho jata hai.


Kamine film ke is geet ne jitani chunauti gaayakon ke lie thi usase kahin jyada geetakar sangeetakar ki jodi ke lie. geet likhna tha ek aisi sthiti par jisamen nayak jo ek samajik karyakarta hai , ghoom ghoom kar red lait eriya men kandom ka vitaran kar raha hai aur sath hi logon ko eds ke khatre ke bare men bata raha hai. kisi bhi geetakar ke lie is vishaya ko bina upadeshatmak hue kavita men baandhana ek tedhi kheer thi. Par Gulzar ne is kam ko bade salike se anjaam diya. vahin vishal ka sangeet sanyojan aur fatak shabd ka geet ki laya ke sath behatareen istemaal shrotaon ka dhyaan sahaj hi aakarshit kar leta hai.

to aaiye sunen kailash aur sukhavindar ki aavaaz men ye nagma

ki bhnvara bhnvara aaya re fatak fatak
gun gun karta aaya re
sun sun karta galiyon se
ab tak koi na bhaya re

sauda kare saheli ka
sar par tel chameli ka
kan men itar ka faha re
ki bhnvara bhnvara aaya re fatak fatak.. ..

ginti na karana isaki yaron men
aavara ghoome galiyaaron men
ye chipaku hamesha sataayega
ye jaaega fir laut aaega
khoon ke maile katre hain
jaan ke sare khatre ...
ki aaya rat ka jaya re..fatak ...

jitana bhi jhooth bole thoda hai
kidon ki basti ka makauda hai
ye raton ka bichchhu hai kaatega
ye zaharila hai zahar chatega
daravaje men kunde do
dafa karo ye gunde ye shaitan ka saya re fatak fatak..

ye ishk nahin aasaan, aji AIDS ka khatra hai
patavar pahan jana ye aag ka dariya hai

ye naiya doobe na ye bhnvara kate na
ye naiya doobe na ye bhnvara kate na ...







Click Here to read this post in Hindi devnagari script.

Click Here to post your comment on this post. You can post your comment in English or Romanised Hindi also .


Tuesday, February 02, 2010

Annual Musical Countdown 2009: Song no. 18 : Piyush Mishra takes on Uncle Sam..

Vaarshik sangeetamala ki 18 vin paydaan par ka geet thoda alag hat kar hai. Aaj jis tarah yuva nirdeshak nai-nai theemon par filmen bana rahe hain usi tarah kuch sangeetakaar bhi leek se alag hatkar chalne ko taiyaar hain. vaise jab film ka geet aur sangeetakaar ek hi shakhas ho aur nirdeshak ko usaki kaabiliyat par poora vishvaas ho to ne prayog karne ka saahas aur badh jata hai. Iss liye to Piyush Mishra ko jab nirdeshak anuraag kashyap ne 'Gulaal' film ka geet sangeet rachane ki kamaan saunpi to ishk aur husn se labarez filmi muzaron ki jagah ek polatikal muzara (Political Mujra) hi likh diya.

Piyush ne apane likhe is geet men desh aur vishva se jude kuch masalon par apane shabd baanon se karare vyangya kase hain.

chahe vo aatankavaad ke nam par america ki irak aur afaganistan men ghusapaith ho..

ya fir desh men sheetal peya ke baazaar men adhik sendh lagane vaale lok lubhavan vigyapan hon..

ya sabako apane vichaar rakhne ki aazadi dene ke lokatantra ki buniyadi usool par aae din lagne vaale pratibandhon dvara ki ja rahi aadharbhoot chot ho..

ya fir uchch varg men angrejidaan sanskriti ka andhanukaran karne ki hod ho..


Iss geet men Piyoosh sab par safalta poorvak nishana saadhate nazar aae hain. to kya fitar चढ़ा rangamanch se saalon saal jude is geetakar ke man men. antarajaal par saleema poonavala ko diye ge sakshatkar men is geet ke baare men baat karte hue Piyooshkahate hain...

Film jagat men koi jaldi kuch naya karana nahin chahta. sabhi istemaal kiye hue safal faarmoolon ka doharav karne ko aatur hain. mainne 'ranaji' isaliye likha kyonki main ek 'Political Mujra' likhna chahta tha. fir anya geeton ki apeksha film ki paristhiti ke hisab se is geet men kuch naya karne ka avasar jyada tha. vaise bhi jo kuch hamare agal bagal ho raha hai, jo bhi ghatanaayen ghat rahi hain kya ye jaroori nahin ki unhen sunane vaalon tak geet ke madhyam se pahunchaya jaaye. main chahta tha ki jab aane vali pedhiyan is geet ko sune to unhen aaj ki vaastavikta ko jaanane ka mauka mile.



Ye to hui is geet ke peechhe upaje vichaaron ki baat. Piyoosh ne is muzare men rajasthani lok sangeet ka jo rang bhara hai vo rekha bharadvaj ki aavaaz men aur nikhar ke saamane aaya hai. tal vaadyon ki adbhut jugalabandi ke saath jab rekha ji ka aalaap ubharta hai jo sahaj hi shrota ko geet ke mood se ekakar kar deta hai. gaayiki ke lihaaz se ye saal rekha ji ke liye behatareen saalon men se ek raha hai. unki gaayiki ke baare men baate aage bhi hongi filahaal to is geet ka aanand lijie


ranaji mhaare, gusse men aae, aiso bal khaaye, agiya barasaaye, ghabaraaye mhaaro chain
jaise door des ke,
jaise door des ke, tavar men ghus jaaye re eroplen
ranaji mhaare ...

ranaji mhaare, eso gurraaye, eso tharraaye, bhar aaye mhaare nain
jaise sare aam hi,
jaise sare aam irak men jaake jam ge ankal saim
ranaji mhaare...

ranaji mhari saas nanad ke taane, ranaji mhaare jeth sasur ki bani
ranaji thape bhoot paret ki chhaya, ranaji thape il bil jin ka saya
sajani ko diyar bole, tharre ko beeyar bole, maange hai inglis boli, maange hai inglis choli
maange hai inglis jayapur, inglis beekaner
jaise bisaleri ki ,
jaise bisaleri ki botal pi ke ban ge inglis main
ranaji mhaare...

ranaji mhari sautan ko ghar le aaye
poochhe to bole frend hamari hai haaye
ranaji ne thnda chakku yoon khola
bole ki haaye thnda maane koka kola
ranaji bole moron ki basti men hai shor rani
kyon ki ye dil maange mor, mor rani, mor rani, mor rani ..
mhari to bich bajariya, haaye badanami ho gayi
mhari to lal chunariya, saram se dhaani ho gayi
mhaaro to dhak dhak hove, jo jo beete rain
jaise har ik baat pe ...
jaise har ik baat pe dimokrisi men lagne lag gayo bain ...

jaise door des ke, tavar men ghoos jaaye re eroplen
jaise sare aam irak men jaake jam ge ankal saim
jaise bina baat afaganistan ka
jaise bina baat afaganistan ka baj gaya bhaiya baind

jaise door des ke, tavar men ghus jaaye re eroplen
ranaji mhaare ...
(English word are written not as per their spellings but as pronounced in song)




Click Here to read this post in Hindi devnagari script.

Click Here to post your comment on this post. You can post your comment in English or Romanised Hindi also .



Monday, February 01, 2010

Annual Musical Countdown 2009 : Song no. 19 : Man Ko Ati bhave ...Prasoon ka likha ye geet

To ho jaiye thirakne ko taiyar kyoonki a raha hai vaarshik sangeetamala ki 19 vin poyadaan par ek aisa geet jo na keval aapako jhoomne par vivash karega balki sath hi hindi ke us roop ki bhi aapako yad dila de jaaega jise aaj ke hinglish mahaul men lagabhag aap bhool chuke hain.

London Dreams ke is romaantic geet men parasthiti ye hai ki nayak masti men bhavavihril ho uthe hain aur apne prem ke is junoon ko shabdon men vyakt karana chahate hain. jab film ke nirdeshak geetakar prasoon joshi ke pas is paristhiti ko le kar ge to prasoon ko geet ke swaroop ko dhaalne men teen char dinon ka vakat laga. prasoon ko laga ki hindi ke aalava brij bhasha ke lahaze ko bhi geet men aatmasat kiya jaaye. zahir si baat hai ki prasoon yah dikhana chahate the ki jab bhi ham bhavatirek men hote hain to kuch vaise shabdon ka istemaal jaroor karte hain jo ki hamari aanchalik bhasha se jude hon.


Par aanchalik shabdon ka sahara prasoon ne mukhyatah mukhade men liya hai. geet ke pahle antre se hi vo vishuddh hindi shabdon ka prayog karte hain. darasal ye geet is baat ko samane lata hai ki aaj ke hindi geetakaron ne kis tarah apne aap ko unhin rate rataye chand jumalon men sankuchit kar liya hai. aaj ki khichadi bhashaai sanskriti se judate yuva varg ke lie prasoon ka ye prayog vakai kabil-e-tarif hai. yuva varg men is geet ki lokapriyata is baat ko saabit karti hai ki agar salike se tatsam shabdon ka prayog kiya jaaye to uska bhi ek alag aanand hota hai. apne is geet ke bare men banaaye ge video men prasoon kahate hain...

Iss geet ko rachte samay mere man men Salman Khan ka vo roop aaya jise main pasand karta hoon. geet ki bhavanaaon men prem ka junoon unhin ko dhyaan men rakh kar aaya hai. is geet men hindi ke aise shabdon ka hujaoom hai jo ki aapako aanandit kar dega. mainne koshish ki hai ki is geet men vaise shabdon ka prayog karoon jo khadi boli ya sanskrit se aae hain. ye vaise shabd hain jinhen logon ne saalon saal nahin suna hoga ya unhen apani school ki hindi pustakon men padha hoga.

Shankar ahasan loy ki tikadi dvara sangeetabaddh London Dreams ke is geet ki prakriti is elabam ke anya geet jo ki conasart ke mahaul men gaaye se sarvatha bhinn hai. is geet ko gane men jis masti aur jis pagalapan ki jaroorat thi use shankar mahadevan ne bakhoobi poora kiya hai. to geet ka ple batan dabane ke pahle zara khade ho jaiye aur geet ke anuroop shareer men aisi loch paida kijie ki dharati kanpit ho uthe..

man ko ati bhave saiyan kare tata thaiya,
man gaaye re haaye re haaye re haaye re haaye re
ham priyatam hriday basaiyan pagal ho giyan
man gaaye re haaye re haaye re haaye re haaye re
jo mari nain kankariya to chhalaki prem gagariya
aur bheegi sari nagariya, sab nritya kare sng sng
tore baan lage nas nas men, nahin pran more ab bas men
man dooba prem ke ras men, hua prem magan kan kan
ho bebe bebe saunpa tujhako tan man

man ko ati bhave saiyan kare tata thaiya,
man gaaye re haaye re

kya uthal puthal bavara sa pal, saanson pe saragam ka tyohaar hai
banake main pavan choom loon gagan, ho rituon pe ab mera adhikar hai
sanket kiya priyatam ne aadesh diya dhadakan ne
sab var diya fir hamane, hua safal safal jeevan
adharon se vo muskaai kaya se vo sakuchai
fir thoda nikat vo aai tha kaisa adbhut kshan
o bebe bebe main hoon sanpoorn magan
man ko ati bhave.... haaye re...

ho pushp a ge, khilakhila ge utsav manata hai sara chaman
chandrama jhuka soorya bhi ruka, dishaen mujhe kar rahi hain naman
toone jo thami baiyan sabane li meri balaiyan
sudh budh meri kho giyan hua rom rom upavan
jab bich fasal laharaayee, dharati ne li angadai
aur milan badariya chhaai, kasake barasa savan
o bebe bebe sab hua tere karan
man ko ati bhave.... haaye re...


London Dreams ka ye geet film men Salman aur Asin par filmaya gaya hai.





Click Here to read this post in Hindi devnagari script.

Click Here to post your comment on this post. You can post your comment in English or Romanised Hindi also .