In memory of Mahendra Kapoor : Mera Pyar Wo Hai Ke Mar Kar Bhi...

Mahendra Kapoor pichhale hafte is duniya se rukhasat kar gaye. Abhi kuchh din pahale hi Maharashtra sarakar ne unhein is saal ka lata mangeshkar puraskar dene ki ghoshna ki thi. parshv gayan to unhonne chhod hi rakha tha par sattar se oopar hone ke bavajood abhi bhi vo sangeetik gatividhiyon se alag nahin huye the. bharat ke bahar unake concert har sal huaa karate the aur abhi haal mein ye bhi pada tha ki gayan ki sabhi vidhaon mein apani pratibha dikhane ke bad vo ek soofi album ki taiyari mein jute the.

Mahendra Kapoor ke mashahoor geeton se ham sab vakif hain. Manoj Kumar aur B.R.Chopda ke banner tale bani filmon ke adhikatar geet unhonne hi gaye. deshabhakti geeton ka khayal aate hi aaj bhi janata ko pahale unhin ka chehara zehan mein aata hai par mainne to any koti ke geeton mein bhi kapoor sahab ki gayiki ko behatarin paya hai. aaj main jo geet aapake samane pesh kar raha hoon vo mujhe behad pasand raha hai. jab bhi ise gunagunata hoon, man poori tarah isake bhavon mein doob jata hai.

O Pi Naiyar ke sangeet nirdeshan mein 'ye raat fir na aayegi' film ke is geet ko likha tha shamasul hooda 'bihari' yani S.H.Bihari sahab ne. ab unka jikr aaya hai to ye batana munasib hoga ki apne naam ke anuroop bihari sahab bihar ke ek nagar ara ke nivasi the. yoon to unhonne jyada filmon ke liye geet nahin likhe par jinake liye bhi likha kamal likha. prem ki bhavanaon ko vyakt karane ka unka tarika hi alahada tha. kya aapako nahin lagata ki prem ko shiddat se mahasoos karane vala hi ye likh sakata hai
khuda bhi agar tumase aa ke mile to
tumhari qasam hai mera dil jalega

isi film ke liye aasha ji ka amar geet yahi vo jagah hai bhi bihari sahab ki lekhani ki upaj tha.
bihari ke is is geet ko mahendra ji ne is bhav pravanata se gaya hai ki ye geet aapake mood ko sanjida karane ki takat rakhata hai... to aaiye sunen ye geet

mera pyar vo hai ke, mar kar bhi tum ko
juda apani bahon se hone n dega
mili mujhako jannat to jannat ke badle
khuda se meri jaan tumhein maang lega
mera pyar vo hai ........

zamana to karavat badalata rahega
naye zindagi ke tarane banenge
mitegi n lekin muhabbat hamari
mitane ke sau sau bahane banenge
haqiqat hamesha haqiqat rahegi
kabhi bhi n isaka fasana banega
mera pyar vo hai ... ...

tumhen chhin le meri bahon se koyee
mera pyar yoon besahara nahin hai
tumhara badan chandani aake chhu le
mere dil ko ye bhi gavara nahin hai
khuda bhi agar tumase aa ke mile to
tumhari qasam hai mera dil jalega
mera pyar vo hai ke ... .....

mahendra kapoor ne us kal khand mein apani upasthiti darj karaee jab rafi, kishor aur mukesh jaise mahan gayak apani choti par the. ye bhi ek karan raha ki jis shoharat aur samman ke vo hakadar the vo poori tarah unhen nahin mil paya. is bat ka mugalata kapoor sahab ko bhi raha. ek patrika ko diye apane sakshatkar mein ek bar unhonne badi vinamrata se poochha tha
".....mere bare mein itna kam likha jata hai. mujhe samajh nahi aata kyoon ? kya mainne koee ghalti ki hai? ....."

mahendra kapoor to nahin rahe par unake gaye geet aane vali pidiyon ke dilon ko bhi jitate rahenge aisi aasha hai.


Click Here to read this post in Hindi (Devnagari) script.

Do u like this song Click Here to Post your opinion about this song.

A touching poem on Gandhiji by Kailash Gautam : Sarr footat hau, gala katat hau, lahu bahat hau, ganhi ji

Aaj Gandhi Jayanti to hai hi sath sath eid aur Shastri ji ke janmadin ka khushanuma mauka bhi hai.

Aaj is pavitr din akhabar uthata hoon aur Agaratala mein bam kand se ghayal mahila aur orissa ke Kandhamal men jale huye gharon ki tasaviren dekhta hoon to Kailash Gautam ki ye kavita yaad aa jati hai.

sir footat hau, gala katat hau, lahu bahat hau, ganhi ji
des bantat hau, jaise hardi dhan bantat hau, ganhi ji

Isliye ye samay vichar karane ka hai, ki ham itane asahishnu, itane jallad , itane sanvedanashoony kyoon hote ja rahe hain? kaise ham samajh lete hain ki aisi jaleel harakaton ko karne se hamara bhagavana, hamara paravaradigar hamari peeth thonkega?

Desh ke in halaton men Kailash ji ki ye kavita kitani sarthak hai ye ise padh kar aap mahasoos kar sakate hain.

sir footat hau, gala katat hau, lahu bahat hau, ganhi ji
des bantat hau, jaise haradi dhan bantat hau, ganhi ji
ber bisavatai raroova chiraee roj rarat hau, ganhi ji
tohare ghar ke rama i malik sabai kahat hau, ganhi ji

hinsa raahjani hau bapoo, hau gundaee, dakaiti, hauvai
desi khali bam banook hau, kapada ghadi bilaiti, hauvai
chhuaachhoot hau, oonch nich hau, jat-paant panchaiti hauvai
bhay bhatiya, bhool bhulaiya, bhashan bhid bhandaiti hauvai

ka batalaee kahai sunai me saram lagat hau, ganhi ji
kehuk nanhi chitt thekane baram lagat hau, ganhi ji
aisan taru chatakal abaki garam lagat hau, ganhi ji
gabhin ho ki thanth marakahin bharam lagat hau, ganhi ji

je alalai beiman ihan oo dakarai kiriya khala
lamba tika, madhuri bani, panch banaval jala
cham sohari, kam sarauta, petaipet ghotala
yekko karam n chhootal lekina, chauchak kanthi mala

nona lagat bhit hau sagaron girat parat hau ganhi ji
had paral hau anganai angana, mar tarat hau ganhi ji
jhagara k' jar anakhun khojai jahan lahat hau ganhi ji
khasam mar ke dhoom dham se gaya karat hau ganhi ji

uhai amiri uhai garibi uhai jamana abbau hau
kabbau gayal n jaee jad se rog purana abbau hau
doosar ke kabja men aapan pani dana abbau hau
jahan khajana rahal hamesa uhai khajana abbau hau

katha kirtan bahara, bhitar juaa chalat hau, ganhi ji
mal galat hau duee nanbar ka, dal galat hau, ganhi ji
chal galata, chaupal galata, har fal galat hau, ganhi ji
tal galata, hadatal galata, padatal galat hau, ganhi ji

ghoos pairavi jor sifarish jhooth nakal makkari vale
dekhatai dekhat char din mein bhailain mahal atari vale
inake aage bhakuaa jaise farasa aur kudari vale
dehalain khoon pasina dehalain tabbau bahin matari vale

toharai nam bikat ho sagaro maans bikat hau ganhi ji
tali peet rahal hau duniya khoob hansat hau ganhi ji
kehu kan bharat hau kehu moong darat hau ganhi ji
kahaee ke hau sor dhovail pap farat hau ganhi ji

janata bade jayanti babu neta bade nisana hauvai
pichhala sal havala vala agila sal bahana hauvai
aajadi ke mane khali rajaghat tak jana hauvai
sal bhare men ek ber bas raghupati raghav gana hauvai

aisan chadhal bhavani sire na utarat hau ganhi ji
aag lagat hau, dhuvan uthat hau, naak bajat hau ganhi ji
kariya achchhar bhanis barabar bed (ved) likhat hau ganhi ji
yek samay k' bagad billa aaj bhagat hau ganhi ji

Click Here to Read this Bhojpuri poem in Devnagari (Hindi) script.

Do you like this poem. Click Here to give your valued opinion.

Chal Mere Sath hi Chal aye meri Jaan-E-Ghazal.. A sweet Ghazal by Hussain Brothers

Shastriya sangeet mein jugalabandi ka apna hi maza hota hai. vaisa hi kuchh ahasas tab hota hai jab hussain bandhu ek sath milkar ghazal ke taar chhedate hain. ji han main ustad ahmad husain aur mohammad husain ki baat kar raha hoon. husain bandhuon ko sangit ka fan virasat me hi mila tha. inake pita ustad afzal husain jayapuri khud ek charchit thumari aur ghazal gayak rah chuke hain.

husain bandhuon ki gayiki se pahla parichay assi ke dashak me Music India nam ki company ki cassette ke tahat huaa tha. par inaki jyadatar ghazalon ko sunana aur pasand karana samabhav huaa vividh bharati ke karyakram rang tarang ki vajah se. jane kya mohabbat thi vividh bharati valon ki inase ki har doosare din inaki ghazalen sunane ko mil hi jaya karati thin. ek ghazal jo bar-bar baja karati thi aur jo mujhe un dinon poori yad ho gayee thi, vo thi

do javan dilon ka gham dooriyan samajhati hain
kaun yaad karata hai hichakiyan samajhati hai...

jisane kar liya dil me pahli bar ghar 'danish'
usako meri aankhon ki putaliyan samajhti hain

par jis ghazal ki bat aaj main kar raha hoon usaki tasir hi dil par kuchh alag si hoti hai. ye un ghazalon me se hai jo jindagi ke har padav par mere sath rahi hai ek hausala deti huee si. jab bhi man pareshan ho aur apana lakshy dhundhala sa ho to ye ghazal rasta dikhalati si mahasoos huee. 'rag yaman' par aadharit is ghazal ko likha tha, husain bandhuo ke chahete, mashahoor gitakar Hasrat Jaipuri sahab ne.

to aaiye sunate hain husain bandhuon ki dilakash aavaj me ye ghazal




chal mere sath hi chal ai meri jan-ye-ghazal
in samajon ke banaye huye bandhan se nikala, chal

ham vahan jayen jahan pyar pe pahare n lagen
dil ki daulat pe jahan koee lutere n lagen
kab hai badala ye jamana, tu jamane ko badala, chal

pyar sachcha ho to rahen bhi nikal aati hain
bijaliyan arsh se khud rasta dikhalati hain
tu bhi bijali ki tarah gam ke andheron se nikala, chal

apane milane pe jahan koee bhi ungali n uthe
apani chahat pe jahan koee bhi dushman n hanse
chhed de pyar se tu saj-ye-mohabbat pe ghazala, chal

pichhe mat dekh n shamil ho gunahagaron mein
samane dekh ki manjil hai teri taron me in
bat banati hai agar dil me irade hon atala, chal


Click Here to read this post in Hindi (Devnagari) script.

Do u like this ghazal Click Here to Post your opinion about this ghazal.