Saturday, July 26, 2008

Main hoon unake sath, khadi jo seedhi rakhte apni reedh : Bachchan Recites 'Bachchan'

Harivansharay Bachchan ki kavitayen chhutapan se hi man ko lubhati rahi hain. daraasal bhavon ke sath unaki kavita mein jo shabdon ka pravah rahata hai vo mere man ko hamesha se behad romanchit karata hai. unaki kavita ko bar-bar bol kar duharane mein jis asim aanand ki anubhooti hoti thi, usaki kami is yug ki adhikansh kavitaon mein hamesha khatakati hai. khair , isase pahale aapake samane bachchan ji ki is kavita ko pesh karoon kya ye aap nahin janana chahenge ki bachchan ji ne apani pahali kavita kab likhi aur kavita likhane ka shauk unamein kaise panapa?

kayasth pathashala mein bachchan ji ne apani pahali poori hindi kavita likhi, kisi adhyapak ke vidaabhinandan par jab ve satavin mein the. apani aatmakatha mein bachchan ne likha hai


".....school mein shikshak jab nibandh likhate tab kahate, ant mein koee doha likh dena chahiye. vishay se sambandh doha yaad na hone par main svayan koee rachakar laga deta tha. inhin dohon se mere kavy ka udagam huaa. 'bharat bharati' se gupt ji ki padyavali, 'sarasvati' ke prshthon se pant ji ki kavita aur 'matavala' ke ankon se nirala ji ke mukt chhandon se mera parichay ho chuka tha. navin, dasavin kaksha mein to mainne kavitaon se ek poori kapi bhar dali. par meri ye kavitayen itani niji thin ki jab mere ek sathi ne chori se unhen dekh liya to mainne gusse mein poori kanpi tukade tukade karake fenk di. mere ghar se khet tak kanpi ke tukade gali mein fail gaye the, isaka chitr meri aankhon ke samane ab bhi jyon ka tyon hai. kavitayen mainne aage bhi bilkul apani aur niji banakar rakhin aur mere kaee sathi unake sath tak jhank karane ka prayatn karate rahe......"

vakt ke pahiye ki chal dekhiye....yek balak jo apane sahapathiyon mein apani kavitayen dikhate hichakata tha, ne ऍsi krtiyon ki rachana ki jise sare bharat ki hindi premi janata poore prem se ras le lekar padati rahi.

bachchan ki ye kavita har us svabhimani manushy ke dil ki bat kahati hai jisane apane usoolon ke sath samajhauta karana nahin sikha. unake suputr amitabh bachchan ne elabam bachchan risaits bachchan (Bachchan Recites Bachchan) mein bade manoyog se is kavita ko pada hai. to aaiye sunen amit ji ki aavaj mein harivansh ray bachchan ji ki ye kavita....







main hoon unake satha,khadi jo sidhi rakhate apani reedh

kabhi nahi jo taj sakate hain, apana nyayochit adhikar
kabhi nahi jo sah sakate hain, shish navakar atyachar
yek akele hon, ya unake sath khadi ho bhari bhid
main hoon unake satha, khadi jo sidhi rakhate apani reedh

nirbhay hokar ghoshit karate, jo apane udagar vichar
jinaki jihva par hota hai, unake antar ka angar
nahin jinhen, chup kar sakati hai, aatataiyon ki shamashir
main hoon unake satha, khadi jo sidhi rakhate apani reedh

nahin jhuka karate jo duniya se karane ko samajhauta
oonche se oonche sapano ko dete rahate jo nyota
door dekhati jinaki paini aankha, bhavishyat ka tam chir
main hoon unake satha, khadi jo sidhi rakhate apani reedh

jo apane kandhon se parvat se bad takkar lete hain
path ki badhaon ko jinake panv chunauti dete hain
jinako bandh nahi sakati hai lohe ki bedi janjir
main hoon unake sath, khadi jo seedhi rakhte apni reedh

jo chalate hain apane chhappar ke oopar looka dhar kar
har jit ka sauda karate jo pranon ki baji par
kood udadhi mein nahi palat kar jo fir taka karate tir
main hoon unake satha, khadi jo sidhi rakhate apani reedh

jinako yah avakash nahi hai, dekhen kab tare anukool
jinako yah paravah nahin hai kab tak bhadra, kab dikshool
jinake hathon ki chabuk se chalati hen unaki takadir
main hoon unake satha, khadi jo sidhi rakhate apani reedh

tum ho kauna, kaho jo mujhase sahi galat path lo to jan
soch soch kara, poochh poochh kar bolo, kab chalata toofan
satpath vah hai, jisapar apani chhati tane jate vir
main hoon unake satha, khadi jo sidhi rakhate apani reedh


bachchan ki ye kavita sarvakalik hai. aaj jab hamare samaj , hamari rajaniti mein naitik moolyon ke hras ki prakriya nirantar jari hai, jaroorat hai hamare netaon, prashasakon mein apane aatm samman ko jagane ki, sahi aur galat ke bich pahachan karane ki. agar ve is marg par chalen to desh ki sanpoorn janata khud b khud unake pichhe khadi ho jayegi.

is chitthe par harivansh ray 'bachchan' se judi kuchh any pravishtiyan

Kya aapko ye kavita achchi lagi? Click Here to post your opinion

Tuesday, July 22, 2008

Aatif Saeed ki Khoobsurat Nazm : tumhen mausam bulate hain....

Pichhale saal august mahine mein mainne ek nazm post ki thi jisaka shirshak tha ajab pagal si ladaki hai..... use kisane likha ye us waqt nahin pata tha. aaj mai jab is nazm ko pad raha tha to pata chala ki isake lekhak vahin hain jinhonne ajab pagal si ladaki hai.... likhi thi. ji han, in donon nazmon ko likha hai pakistan ke naujavan shayar Aatif Saeed sahab ne. Aatif Saeed ka apana yek jal prshth bhi hai jisaka labh aap tabhi utha sakate hain jab aap urdu lipi ke janakar hon.

aaj unaki jo najm aap ke sath bant raha hoon vo yakin hai ki aapake liye naee hogi. aaj antarajal par jab bhatak raha tha to roman mein ye mujhe likhi mili. ye najm unhonne apani naee kitab 'tumhen mausam bulate hain' ke unvan mein likhi hai. najm pyar ke hasas jajbaton se labarej hai. apane prem aur mausam ki badalati ruton ko aapas mein behad behatarin tarike se guntha hai shayar ne. vishvas nahin hota to khud hi padakar dekhiye na..

mere andar bahut din se
ki jaise jang jari hai
ajab beikhtiyari hai

main na chahoon magar fir bhi, tumhari soch rahati hai
har ik mausam ki dastak se tumhara aks banata hai
kabhi barish tumhare shabanami lahaje mein dhalati hai

kabhi sharma ke ye raten
tumhare sard hothon ka dahakata lams lagati hain

kabhi patajhada...
tumhare panvon se raunde huye patton ki aavajen sunata hai

kabhi mausam gulabon ka
tumhari muskurahat ke sare manjar jagata hai
mujhe behad satata hai

kabhi palaken tumhari dhoop ode jism o jan par sham karati hain
kabhi aankhen, mere likhe huye misaron ko apane nam karati hain

main khush hoon ya udasi ke kisi mausam se lipata hoon
koee mahafil ho tanahaee mein ya mahafil mein tanaha hoon
ya apani hi lagaee aag mein bujh-bujh kar jalata hoon


mujhe mahasoos hota hai
mere andar bahut din se
ki jaise jang jari hai
ajab beikhtiyari hai

aur is beikhtiyari mein
mere jajbe, mere alafaj mujh se rooth jate hain
main kuchh bhi kah nahin sakata, main kuchh bhi likh nahin sakata
udasi odh leta hoon
aur in lamahon ki muththi mein
tumhari yad ke juganu kahin jab jagamagate hain
ye bite vakt ke saye
meri bekhvab aankhon mein, kaee dipak jalate hain
mujhe mahasoos hota hai
mujhe tum ko batana hai
ki rut badale to panchhi bhi gharon ko laut aate hain
suno janan chale aao tumhen mausam bulate hain....


agar aapako ye najm pasand aaee to yakinan aap inhen bhi padana pasand karenge...

Do you like this nazm. Click Here to give your opinion.

Saturday, July 19, 2008

Folk Songs of Uttar Pradesh : Listen to the songs of Sawan.. Nanhi nanhi Bundiya Re

'Ek sham mere naam' par pichhale hafte aapane bhojpuri, asami aur bengali lokageeton ko suna. aaj bari hai uttar pradesh ki. yoon to main shuru se bihar aur jharakhand mein raha hoon, par shadi vivahon mein jab jab apane dadihal 'baliya' aur nanihal 'kanapur' mein jana huaa to us vakt poorvanchal aur sentral yoopi ke kaee lokageet sunane ko mile.

uttarapradesh ke lok geeton ka apana hi ek itihas hai. shayad hi aisa koee avasar ya vishay ho jis par is pradesh mein lokageet na gaye jate ho. chahe vo bachche ka janm ho ya premiyon ka bichhudana, shadi ho ya bidaee, naee ritu ka svagat ho ya khet mein hal jotane ka samay sabhi avasaron ke liye geet mukarrar hain aur inaka namakaran bhi alag alag hai, jaise sohara, byaha, banna banni, kohabara, bidaee, ritu geeta, savana, chaiti aadi.

uttarapradesh ke lok geeton ke bare mein apani kitab 'Folk Songs of Uttar Pradesh' mein lekhika nisha sahay likhati hain....
"...rajy ke lokageeton ko mukhyatah teen shreni mein banta ja sakata hai
  • ritu vishesh ke aane par gaye jane vale geet
  • kisi khas avasar par gaye jane vale geet
  • aur kabhi kabhi gaye jane vale geet

kuchh geet keval mahilaon dvara gaye jate hain to kuchh keval mardon dvara. isi tarah kuchh geet sirf samooh mein gaye jate hain jab ki kuchh solo. samooh gan mein ridam par jyada jor hota hai jise lane ke liye aksar chimata aur majira jaise vady yantron ka prayog kiya jata hai. isake aalava in geeton mein bansuri, shankha, rababa, ekatara, sarangi or dholak ka istemal bhi hota hai. vaise to ye geet jyadatar lok dhunon par hi rachit hote hain par kaee bar inaki gayiki bahut kuchh shastriy ragon jaise piloo, bahara, durga aur khamaj se milati julati hai......."

aashadh khatm hone vala hai aur savan aane vala hai to kyoon na aaj sune jayen ve lokageet jo aksar savan ke mahine mein gaye jate hain.

prastut geet mein prasang ye hai ki nayika ko savan ki mast bayaren apane pihar mein jane ko aatur kar rahi hain. vo apani man ko sandesha bhijavati hai ki koee aa ke use pihar le jaye par man pita ki badati umr aur bhaee ke chhote hone ki bat kah kar usaki bat tal jati hai. nayika sasural mein kis tarah apana savan manati hai ye bat aage kahi jati hai.

amma mere baba ko bhejo ri
ki savan aaya ki savan aaya ki savan aaya

are beti tera, are beti tera, are beti tera,
beti tera baba to boodha ri
ki savan aaya ki savan aaya ki savan aaya

amma mere bhaiya ko bhejo ri
are beti tera, are beti tera, are beti tera,
beti tera bhaiya to bala ri
ki savan aaya ki savan aaya ki savan aaya
amma mere bhaiya ko bhejo ri
*************************************
nanhi nanhi bundiya re, savan ka mera jhoolana,
hari hari meinhadi re ,savan ka mera jhoolana
hari hari chunari re ,savan ka mera jhoolana

par in geeton ke manovijnyan mein jhanken to ye pate hain ki ghar se door par vahan ki yadon ke karib ek navavivahita ko apani khushiyon aur gam ko vyakt karane ke liye savan ke ye geet hi madhyam ban pate the. meri jab in geeton ke bare mein apni ek mitra se baat huee to unhonne bataya ki

"unaki man ki shadi july 1953 me huee thi aur vo batati hain ki ve un dinon yahi geet ga ke bahut roti thi...! aur shayad unhone bhi ye geet apani man se hi suna hoga, kahane ka aashay ye hai ki badi purani dharohare hain ye kahi ham apane aage badane ki hod me inhen kho n de...! .."
is geet ke aage ki panktiyan kanchan ki mataji ne apani smrti ke aadhar par bheja hai.

ek sukh dekha maine maeeya ke raj mein,
sakhiyon ke sang apane, gudiyon ka mera khelana
ek sukh dekha maine bhabhi ke raj mein,
god mein bhatija re, galiyon ka mera ghoomana
ek dukh dekha maine sasu ke raj mein,
aadhi aadhi ratiyan re chakki ka mera pisana
ek dukh dekha maine jithani ke raj mein,
aadhi aadhi ratiyan re choolhe ka mera foonkana

is geet ko gaya hai lakhanaoo ki gayika malini avasthi ne. malini ji ne junoon kuchh kar dikhane ka karyakram mein mein uttarapradesh ke har tarah ke lokageeton ko apani aavaj di hai. kalpana ki tarah vo bhi ek behad pratibhashali kalakar hain. to aaiye dekhen unaki gayiki ke jalave..







Do you like this folk song? Click Here to Post your opinion

Saturday, July 12, 2008

He Dola he Dola.. Bengali folk song sung in Hindi by Kalpana

Click Here to read this Post in Hindi (devnagari) script.

Pichhali do poston main aapane lok geeton main antaranihit masti aur masoomiyat ke rangon se sarabor paya. par aaj jo lok geet main aapake samane laya hoon vo apane sath majadoor kaharon ka dard samete huye hai. junoon kuchh kar dikhane main ab tak gaye lokageeton main mujhe ye sarvashreshth prastuti lagi.

is lokgeet main sandarbh aaj ka nahin hai. ab to na ve raja maharaja rahe , na doli palaki ka zamana raha. par kaharon ki jis badahal avastha ka jikr is lokageet main huaa hai usase aaj ke shramikon ki halat chahe vo eent bhatte main jhonke huye hon, ya aalishan attalikayen banane main, kataee bhinn nahin hai. amir aur garib ke bich ki khaee dinon din badati hi gaee hai. aur aaj bhi asangathit kshetr main shram ka dohan nirbadh jari hai.

yahi karan hai ki ek bar sunne main hi ye geet sidha dil ko chhoota hai. vaise bhi gayika kalpana jab haiyya na haiyya na haiyya na haiyya ki tan chhedati hain to aisa pratit hota hai ki palaki ke hichakole se kaharon ke kandhon par badata ghatata bhar unaki svaralahari main ekakar ho gaya ho. kalpana ki aavaj agar main ek dard bhi hai aur ek dhanatmak urja bhi jo aapako jhakajhore huye bina nahin rah pati

to aaiye sune sabase pahale kalpana ki aavaj main ye marmasparshi geet..



he dola he dola, he dola, he dola
he aaghe baghe raston se kandhe liye jate hain raja maharajaon ka dola,
he dola, he dola, he dola
he deha jalaike, pasina bahaike daudate hain dola
he dola, he dola, he dola

he haiyya na haiyya na haiyya na haiyya
he haiyya na haiyya na haiyya na haiyya
palaki se laharata, galon ko sahalata
resham ka halka pila sa
kiranon ki jhilamil main
barama ke makhamal main
aasan viraja ho raja

kaisan gujara ek sal gujara
dekha nahin tan pe dhaga
nange hain panv par dhoop aur chhanv par
daudate hain dola, he dola he dola he dola
sadiyon se ghoomate hain
palaki hilode pe hai
deh mera gira o gira o gira
jago jago dekho kabhi more dhan vale raja
kaudiyon ke dam koee mara he mara

chotiyan pahad ki, samane hain apane
panv mila lo kaharon...
kandhe se jo fisala h niche ja girega
h rajaon ka aasan nyara
niche jo girega dola
he raja maharajao ka dola
he dola he dola he dola he dola......




moolaroop se ye kahar geet bangali main hai jise sarvapratham asam ke jane mane gayak aur sangeetakar bhupen hazarika ne apane elabam 'aami ek jajabor ' (main ek yayavar) main gaya tha. ye geet hindi main usaka anuvad matr hai. shayad isaliye kalpana ne ise geet ke ant main bangali geet ke hisse ko bhi apani aavaj di hai taki is geet ki janmabhoomi ka andaja lag jaye. bhoopen da ka ye elabam aap yahan se kharid sakate hain. par abhi suniye is geet ko diya unaka nirmala, bahta svar



aaj jab naee pidi hamari mitti se upaje lokageeton se katati ja rahi hai, 'junoon kuchh kar dikhane ka' lokageeton ko ek manch dene ka prayas atyant sarahaniy hai aur sath hi kalpana aur malini jaise pratibhashali kalakaron ke gayan ko bhi badava dene ki utani hi jaroorat hai taki lokasangeet ka pravaha, har sangeetapremi jan ke man main ho.

Click Here to Post your comments.

Wednesday, July 09, 2008

Assamese, Jharkhandi Folk together with Bichua by Kalpana..

Click Here to read this post in Hindi (Devnagari) script

Masti ka rang aaj bhi hai par aaj ke is geet mein parivesh hai asam aur uttar poorv ka par sath hi is geet ke tar jharakhandi geeton kee shaili se bhi milate hain. . agar alag-alag kshetron mein gae jane vale lokageeton ko ek hi geet mein piro kar sunaya jae to vo chhaunk apana ek alag aanand deti hai aur aaj ke is geet mein kuchh aisi hi bat hai. jaisa ki mainne aapako bataya tha ki kalpana moolatah asam kee hain aur apani juban mein gana bhi behad pasand karati hain. to taiyar hain na asam ke baganon se uthate is bihoo geet ko sunane ke lie aap. bihoo geet vasant ke aagaman aur asami nav varsh ke svagat ke upalakshy mein gae jate hain. is bihoo geet mein sunen kalpana kee aavaz mein chameli kee kahani





aakham dekhar bakee sare soovali
jhoomor tomor nase karo dhe mali
he lakshmi na haee more nam chameli
virapur la beti mur nam chameli

chhoto chhoto chhokadi
bado bado tokari
naram sakach pata tole tok tok
javan boda rakhi de kare lak lak
chhoto chhoto pou khana kare dhak dhak
ki bhanti soe hamar saheli
man rakh mor nam chameli

he pakada aasile kunaba mulaka
esi aami bihoo gabo janoon


aur yahan se aage geet ne jo lay pakadi hai vo bahut kuchh jharakhand ke utsavon par gaye jane vale lok geeton kee tarah hai . yahan batana munasib hoga ki aise geeton ko gate waqt aadivasi balaen safed lal paad kee sadi pahan, ek doosare kee kamar mein hath dale badi khoobasoorati se aage pichhe kee or thirakati chalti hain. geet kee lay aesi hoti hai ki sunane vale ka man khud b khud jhoom jata hai jaisa ki kalpana ko sun kar yahan jhoom utha

he hahe ho sorim gayo maina tuma renoo pukhuri
tuma renoo pukhuri
par mainoo khori goi sala
he ghame ghoomam goye
maina tuma renoo harir
tuma renoo harir
makhi hainoo sooma dim lala

(shabdon ko choonki sun kar likha hai aur is bhasha kee samajh na ke barabar hai isalie oopar ke bolon mein galati hone kee poori gunjaish hai.)

yahan kalpana vapas aa jati hain is lokapriy lokageet par..

ho bichhuaa hae re
pipal chhaiyan baithi pal bhar
ho bhar ke gagariya
hae re hae re hae re
daiya ri daiya chadh gayo papi bichhuaa
hay hay re mar gaee koee utaro bichhuaa
dekho re papi bichhuaa

mantar jhootha aur baid bhi jhootha
piya ghar aa re , han re, han re, han re
dekho re dekho re kahan utar gayo bichhuaa
saiyan ko dekh kar jane kidhar gayo bichhuaa
dekho re papi bichhuaa

daiya...................... bichhuaa

Do you like Kalpana's song If yes do support her at Junoon Kuch Kar Dikhane Kaa





Tuesday, July 08, 2008

Hath mein meinhadi mang sindurava ..Listen to this Mast folk song in bhojpuri sung by Kalpana

Click Here to read this post in Hindi (Devnagari) script


Pichhali post mein punjabi virah geet sunte waqt mainne aapase vaada kiya tha ki apane is chitthe ke jariye ek nayee kalakar se aapako milavaunga. ye gayika hain Kalpana...

kalpana ne bhojpuri film jagat mein apani gayikee ke jarie ek alag pahachan chhodi hai aur aajakal hindi film jagat mein apana uchit mukam hasil karane ke lie sangharsharat hain. maze kee baat ye hai ki bihar aur poorvi uttar pradesh mein boli jane vali bhojpuri mein jab kalpana gati hain to koyee kah hi nahin sakata ki vo assam se talluk rakhati hain. pichhale do teen hafton se NDTV Imagine ke sho 'junoon kuchh kar dikhane ka' mein, main unhen lagatar sun raha hoon.

ve karyakram mein 'mati ke laal' samooh kee sadasya hain. ye samooh is karyakram mein desh ke vibhinn bhagon ke lokageeton ko pesh kar raha hai. kalpana kee gayikee kee sabase badi visheshata unakee lokageeton ke bhavon kee umda pakad hai. kis pankti ko uske bhav ke hisab se kitana khinchana hai, kahan ruk kar shrotaon ko sangeet kee taal se rijhana hai , kis shabd ko shararati lahze mein uchcharit karna hai ye agar gayak ya gayika samajh jaye to vo bhojapuri ka safal lok gayak avashy ban sakta hai. aur isake liye jaroori hai us sanskriti ko samajhana jahan se ye lokageet janme hain. kalpana na keval ek sangeet seekhi huee gayika hain par unakee gayikee se ye bhi saaf zahir hota hai ki vo bhojapuri lokageeton ke parivesh ko bhi achchhi tarah samajhati hain.

ab jo log bhojapuri bhasha se parichit na hon unake liye main is geet ke bhav ko bata deta hoon.

"nayika ke pati paradesh mein hain. piya bina usaka man lag hi nahin raha. unakee anupasthiti mein vo kabhi shrringar karti hai, varsha ritu mein papihe kee boli sun udvign ho jati hai to kabhi sas se jhagada kar baithati hai. kaee raten savere mein badal jati hain par man kee ulajhan hai ki sulajhane ka nam hi nahin leti. "

bhojpuri geeton mein sangeet kee bhi ek aham bhoomika hoti hai. haramoniyam, jhal, majeere aur dholak kee thap ke bina masti ka aalam aana mushkil hai. ab is geet ko sunie aur sangeet ke sath kalpana kee lajavab gayikee ka aanand lijeeye...

<bgsound src="kalpana-hathmemehndi-junoon.wma">

hath mein meinhadi mang sindurava
barbad kajarava ho gaile
bahare balam bina nind na aave
bahare balam bina nind na aave
ulajhan mein saverava ho gaile

bijuri chamake deva garje ghanaghor badarava ho gaile
papi papiha boliyan bole papi papiha boliyan bole
dil dhadke suverava ho gaile
bahare balam bin nind n aave
ulajhan mein suverava ho gaile
aa...................................

are pahile pahile jab ailin gavanava
sasoo se jhagada ho gaile
baken balam par...aha aha
banke balam paradesava virajen
ulajhan mein suverava ho gaile

hath mein meinhadi mang sindurava
barbad kajarava ho gaile


lokageeton kee masti kuchh aisi hoti hai ki ye bhasha aur sarahadon kee divar ko yoon tod deti hai jaise vahan koee adchan hi nahin thi. ab is vidio mein hi dekhie kalpana kee gayikee ka maza aam janata to le hi rahi hai, pados se aae soofi ke sultan rahat fateh ali khan bhi kitane aanandit hokar jhoom rahe hain.


Do you like Kalpana's song If yes do support her at Junoon Kuch Kar Dikhane Kaa

Friday, July 04, 2008

Ali Abbas in Junoon Kuch Kar Dikhane Ka : Kadi aa Mil Sanval Yaar Ve...

Click Here to read this post in Hindi (Devnagari) script.

geet shabdon se banate hain. geetakar ki bhavanaon ko sangeet aur aawaaz ke madhyam se sangeetakar aur gayak shrota ke dil mein utarate hain. par kayee baar mere sath aisa bhi huaa hai jab geet aur sangeet donon parshv mein chale gaye hon aur rah gaee ho to sirf ek aawaaz

dard mein doobati si aawaaz....
dil mein utarati si aawaaz.....
rongate khadi karati aawaaz...


pichhale dinon NDTV IMAGINE ke show 'junoon kuchh kar dikhane ka' mein mujhe kuchh asi hi ek aawaaz ko sunane ka mauka mila ...gayak the faisalabad , pakistan se aaye ali abbas . ali abbas is karyakram mein 'soofi ke sulatan' team ke sadasy hain. ali abbas ne sangeet ki talim najakat ali, hasan siddiki aur ijak kaisar se li hai. is karyakram mein gaye unake jis geet ki baat main kar raha hoon vo ek panjabi geet hai jise mool roop se pakistani gayak meekal hasan sahab ne apane album 'samapooran' mein gaya tha. mainne is geet ko sunane ke bad meekal hasan sahab ka gaya huaa version bhi suna par usamein vo bat nahin dikhi jo is yuva kalakar ki gayiki (aur vo bhi Live Performance) mein nazar aayee.

is geet par gaur karen to payenge ki ye prem mein vikal nayika ki apane door jate premi ko vapas bulane ki karun pukar hai. ali abbas ne jab is geet ko gaya to aisa laga ki ye sara dard main khud mahasoos kar pa raha hoon. mukhade mein sur ke utar chadav to is khoobasoorati se lagaye gaye hain ki ek bar sun kar hi man vah vah kar uthta hai



<bgsound src="aliabbas-kadiaamilsanwalyaar.wma">


sajan preet, laga ke..........
doo..r de..sh mat jaat
doo......r de.....sh mat jaat
baso hama..ri nagari..
mohe sundar mukh dikhalat
kadi aa mil sanval yar ve
o kadi aa mil sanval yar ve
mere roon roon chikh pukar ve..(2)
kadi aa......chikh pukar ve
kadi aa mil sanval yar ve...(2)

meri jindadi hoee udas ve
mera sanval aas na pas ve
meri jindadi hoee udas ve
mera sanval aas na pas ve
mujhe mile na char kahar ve
mujhe... mile na char kaha..r ve
kadi aa mil sanval yar ve...(2)

tujh harajaee ki bahon mein
aur pyar pareet* ki rahon mein (* preet)
tujh harajaee ki bahon mein
aur pyar pareet* ki rahon mein
main to baithi sab kuchh har ve...(2)
kadi aa mil sanval yar ve...(2)
mere roon roon** chikh pukar ve
(yahan 'roon roon', 'rom rom'ko kaha gaya hai)

is geet ko you tube par bhi dekha ja sakata hai



Do you like this song. Click Here to give your valued opinion.