Konark, Sunrise aur Khulne wala Tauliya :)

Agli subah ka sabse pehla karyakram tha, sea beach jakar sun rise dekhne ka aur phir agar pani jyada thanda na hua to nahane ka. Badi mushkil se 5.15 mein uth to gaye par jaise hi bahar nikalne ko huye to paya ki are hum to guesthouse mein qaid hain! Ab watchman ko pehle se to bataya bhi nahin tha wo us waqt gehri neend mein tha. Calling Bell ki karkash dhun jitni use suna sakte the sunayi. Par use na kuch hona tha na hua. Udhar door chitij pe suryoday ke pehle ki halki laali nazar aane lagi thi. So aur koi upaay na dekh hum mein se ek ne (hum teen the ek humare senior aur ek junior colleague) guesthouse ke first floor se neeche kood ke jane ka faisla kiya taki neeche ja ke tale ko khulwa sakein. Aap sab samajh hi gaye honge ki wo main nahin tha :).

Khair kisi terah hum log tez kadmon se beach ki or nikal pade. Sunrise ke kareeban 10-15 minute baad hi hum wahan pahunch paye. Wahan jakar dekha ki humne kuch khas miss nahin kiya hai . Kyunki surya devta udit to ho chuke the par badlon ki oot mein shayad humare hi aane ka intezaar ker rahe the. Humne thodi bahut pics leen aur phir hum sab chal pade samudra mein gote lagane. Pehle din ki apeksha aaj samudra poore josh mein the aur lahrein poori teji se sir ki uchai tak uchaal maar rahin thin.

Kuch der to main apne digicam ki rakhwali karta raha. Par phir apne sathiyon ki masti dekhi na gayi aur main bhi unke sath ho liya. Naha kar wapas aaya to dekha ki humare senior colleague apni jagah apne bachchon wala tauliya utha laye hain. Nazrein bachakar humne kisi terah kapde change kiye. Door nahate frens hulla karte rahe par unhein kya pata tha ki unmein se ek pe aage kya beetne wali hai.

Hua yoon ki jab sabnne kapde change kar liye to humare fren ko yaad aaya ki usne to apni pant bheenge kapdon ke upar hi pehan li hai. So hadbad mein usne wahi tauliya borrow kiya aur ek jhatke mein jaise hi pant nikali tauliya jawab de gaya. Ab humara to hanste hanste bura haal.tha. Raste bhar wo humein kosta gaya ki sir aisa tauliya lane se to achcha tha ki kuch na late.

Breakfast kar ke hum Konark ki or nikal parde. Raste ke donon or hare bhare pedon ki lambi katar thi. Khili dhoop, halki halki hawa kul milakar safar behad suhana tha! Kareeban 40 min ki journey ke baad hum Sun Temple Konark mein the.

Kareeban 1200 AD meing Ganga dynasty ke rulers ne ise banaya tha. Mughal Shashkon ke humle aur mausam ke thapadon ne is mandir ko bahut had tak chatigrasta kar diya hai phir bhi iska vastu shilpa aaj bhi dekhne yogya hai.
Mandir ko suraj ke rath ka aakar diya gaya hai kuch is terah se mano saat ghode 24 pahiyon par use swarg ki or le ja rahein hon. Rath (chariot) ke in pahiyon ko is terah position kiya gaya hai ki pahiyon pe girti suraj ki roshni ki chaya dekh ke aap aaram se apni ghadiyan mila sakein.

Konark se hote huye hum Bhuvneshwar ke white tiger reserve Nandan Kanan pahunche.Aur sham wahan bitane ke baad wapas laut aaye.

Agla din Itihaas ke pannon ko punah palatne ka tha… un jaghon se roobaru hone ka jinse meri matribhoomi ki aitihasik virasat judi huyi hai.

Be a Fan