Monday, December 27, 2010

Sugandha Mishra aur unka yaadgaar Punjabi Tappa !

sa re ga ma pa par ubharati pratibhaaon ke baare men baat karte hue pichhale hafte aapase baat hui sniti mishra ke baare men। par aaj ki ye pravishti hai sugandha mishra ke baare men। sniti ki tarah hi sugandha bhi shastriya sangeet ki ubharati hui gaayika hain। sa re ga ma pa ke is saal ke pratibhagiyon men sugandha hi ek aisi pratibhaagi hain jo yahan aane ke pahle hi tivi ke darshakon ke bich apani pahachaan bana chuki hain। par ye pahachaan unhen apani gaayiki ki vajah se nahin balki star van men aane vaale karyakram loftar chaileanj men mimikari karne ki vajah se mili hai।


bahumukhi pratibha ki dhani sugandha saal dar saal vibhinn yuva mahotsavon men shastriya gaayan men dher saare puraskar batorne ke saath saath vestarn solo shreni men bhi puraskrit ho chuki hain। par vo aaj meri is post ki kendra bindu men hain to apane lajavab shastriya gaayan ki vajah se।

pachchees varsheeya sugandha ke pita santosh mishra dooradarshan ke jaalndhar kendra men steshan doyarektar ke pad par karyarat hain। bahut chhoti umr se unhonne apane dada pandit shankar lal mishra se sangeet ki shiksha leni shuru ki। sugandha ka poora parivar sangeet se juda hai। chacha arun mishra sitaar vaadak hain। dada ji indaur ke ustad ameer khan ke shishya rahe hai। unhen sugandha ka mimakari karana aur paashchaatya sangeet men dakhal dena achchha nahin lagata। par sugandha shastriya sangeet ko apanaate hue in vidhaon men bhi apane hunar ko bikherte rahana chahati hain। aaj ke yuvaaon ki tarah sugandha ke liye bhi shoharat aur paise ki ahamiyat hai aur vo maatra shastriya sangeet ka daman pakad kar gumanami ki jindagi nahin jeena chahati। mere khyal se is tarah ki soch men koi buraai nahin basharte ye unki shastriya gaayan ki pratibha ko prabhavit nahin kare।

sugandha ki mimakari ke saath gane ki kai jhalaken main pahle bhi dekh chuka tha। par vo shastriya sangeet men itani praveen hai iska andaza mujhe pahali baar tab hua jab unhonne sa re ga ma ke aadishan men ek punjabi tappa ga kar sunaya। tapape ke bol the yar di mainoon talab...। tapape ke us tukade ko sun kar mujhe jis aanand ki anubhooti hui usaka varnan karana mushkil hai। bas itana hi kahoonga ki aaj bhi main us chhoti si rikarding ko baar baar baar rivaind kar sunta rahata hai aur man men ek gahan shanti ka ahasaas tari hota rahata hai।

vaise poore tapape ko gwaliyar gharane ke nami shastriya gayak lakshman krishnarav pandit ne gaya hai। shastriya sangeet ke sameekshak maante hain ki tappa gana kathin bhi hai aur drut gati se gane ke liye ismen kafi urja bhi lagani padati hai par sugandha ne jab ise sunaya to aisa laga ki unake liye to ye bada hi sahaj tha।



sa re ga ma men sugandha ka safar mishrit raha hai। unhonne poore karyakram men alag alag kalakaron ke gaaye geeton ko apani aavaaz di hai। kuch ko unhonne badi bakhoobi nibhaya to kuch men unka pradarshan khaas nahin raha। par jab jab unhonne shastriya sangeet par aadhaarit geeton ko chuna hai tab tab sunane vaalon ko unki sabse sashakt prastuti dekhne ko mili hai। misaal ke taur par dilli 6 ke geet bhor bhai tori baat takat piya jo rag gujari todi par aadhaarit hai ko sugandha ne badi mehanat se nibhaya। to aaiye ek baar fir sunen sugandha ko





sugandha mishra filahaal sa re ga ma pa ke antim paanch men hain। vo pratiyogita men ant tak rahengi ya nahin, ye to vakat hi batayega। haan itana to taya hai ki apani bahuaayami pratibha ko sanjote hue agar vo shastriya gaayiki men apani nishtha aur lagan ko banaaye rakhne men safal ho paati hain to avashya safalta ke us mukaam tak pahunchegi jisaki unako talash hai।