रविवार, जनवरी 10, 2010

Annual Musical Countdown 2009 : Song No. 24- Kahan se Aayi Ye Masakkali ?

Varshik sangeet mala ki 24 vin paayadaan par swagat kijie Mohit Chouhaan, A.R.Rahman aur Prasoon Joshi ki tikadi ka. Is tikadi ka hi kamaal hai ki Masakkali ke madhyam se inhonne kabootar jaise paalatu pakshi ki or ham sabka dhyaan fir se aakarshit kar diya.:)

Waise purani dilli ki chhaton par to nahin par kanpur ke apne nanihaal vale ghar men kabootaron ko paalne aur padosiyon ke kabootar ko apani mandali men tarah tarah ki aavaaze nikalkar aakarshit karne ke jugad ko kareeb se dekha hai. Itana hi nahin sham ke waqt unhin aavaajon ke sahaare jharokhon se masakakaliyon ko bhi nikalte dekh bachapan men main hairaan rah jata aur sochta kya ye gur mama hamen bhi sikhaayenge.

Aap bhi soch rahe honge ki geet ke bare men kuch baaten na kar ye main kya kabootaron ki kahani le kar baith gaya. Ab kya karen pahali bar jab TV ke parde par masakali ko saloni Sonam Kapoor ke oopar fudakte dekha to man kabootar kabootari ki jodi par atak gaya aur geet ke bol unke peechhe bhatak gaye. Geet sunte samay mujhe ye laga tha ki pahle antre men manamani manamani kahate kahate mohit ki aavaaz vaise hi atak gi hai jaise purane record players ki atakti thi.


Wo to bhala ho Colors vaalon ka jinhonne December ke mahine men jab ye film dikhaai to fir is geet ko gaur se sunane ka mauka mila. Ye bhi samajh aaya ki Prasoon kabootar ke sath kam aur nayika roopi kabootari se jyada baaten kar rahe hain is geet ke madhyam se. Prasoon ki visheshata hai ki unka hindi bhasha jyaan aaj ke geetakaron se kahin jyada samriddh hai. Isaliye vo jab pyare kintu sahaj hindi shabdon ka chayan apne geeton men karte hain to geet nikhar uthata hai. Par kahin kahin 'meter' se bahar jaane ki vajah se geet ko nibhane men jo kathinaai aai hai use Mohit Chouhaan ne chunauti ke roop men lekar ek behatareen prayas kiya hai.

Waise aap ye jaroor janane ko utsuk honge ki ye masakakali shabd aaya kahan se . Is geet ki utpatti ke bare men prasoon ne 'mid de' ko die apne ek sakshatkar men bataya tha

'Masakakali' shabd ka nirman to anayas hi ho gaya. Rahman apani ek dhun computer par baja rahe the ki unake munh se ye shabd nikala. Mainne poochha ye kya hai to vo muskura diye. Par vo shabd mere dimag men is tarah rach bas gaya ki mainne use apne geet men istemaal karne ki sochi aur isiliye kabootar ka nam bhi masakakali rakha gayae.

Aur to aur ek majedaar tathya ye bhi hai ki prasoon ke is geet ne 'laka' prajati ke kabootaron ke dam dilli ke bajaron men aath guna tak badha diye aur log videshi kabootaron se jyada ise hi lene ke peechhe pade rahe.

Mohit chahaun ki gaayiki aur Rahman ki dhun ki badaulat se ye geet ja pahuncha hai meri is geetamala ki 24 vin paayadaan par. to is geet ko suniye dekhiye kahin masakakali ki tarah aapaka man hiloren hiloren lete lete furr furr karne ke lie machal na uthe.




e masakakali masakakali, thoda matakakali matakakali
e masakali masa masa kali, thoda matakakali matakakali

zara pankh jhatak gayi dhool atak
aur lachak machak ke door bhatak
ud dagar dagar kasbe kooche nukkad basti
tadi se mud ada se ud
kar le poori dil ki tamanna, hava se jud ada se ud
purr bhurr bhurr furr, tu hai heera panna re
masakakali masakakali, thoda matakakali matakakali

ghar tera saloni, badal ki colony
dikha de thenga in sabako jo udana na jaane
udiyo na dariyo kar manamani manamani manamani
badhiyo na mudiyo kar nadani
ab than le , muskaan le, kah san nanananan hava
bas than le tu jaan le,kah san nanananan hava

e masakakali masakakali, thoda matakakali matakakali
e masakali masa masa kali, thoda matakakali matakakali

tujhe kya gam tera rishta, gagan ki baansuri se hai
pavan ki gufatagu se hai, sooraj ki roshni se hai
udiyo na dariyo kar manamani manamani manamani
badhiyo na mudiyo kar nadani

e masakali masakali, ud matakakali matakakali
e masakali masa masa kali, ud matakali matakali
ab than le , muskaan le, kah san nanananan hava
bas than le tu jaan le,kah san nanananan hava





Click Here to read this post in Hindi devnagari script.

Click Here to post your comment on this post. You can post your comment in English or Romanised Hindi also .