मंगलवार, जून 30, 2009

Now listen Dil jo na kah saka in Lata's sweet voice..

Pichchali post mein aapne suna is geet ko Mohammad Rafi ki aavaj mein. suron ki malika lata ji ne bhi is pyare se geet ko apana svar diya hai. jaisa ki mainne pahale kaha tha ki lata vale version ka mijaj kuchh doosara hai. rafi sahab ka gaya geet ek ooncha tempo liye huye tha vahin mina kumari par filmaya ye geet us shant nadi ki dhara ki tarah hai jiske har sire se sirf aur sirf roomaniyat hee tapakti hai.

Jahan rafi sahab ko vibhinn antaron mein geet ke badalate bhavon ke hisab se aavaj ka lahaja badalana tha vahin lata is geet mein apni mithi aavaj se prem mein aasakt nayika ke kathyon mein misari gholati nazar aati hain.

Waise antarjaal par is geet ke bare mein ye bahas aam hai ki geet ke in donon roopon mein kaun si prastuti jyada dharadar thi? do mahan gayakon ki aisi tulna mujhe to bemani lagti hai, khasakar tab jab donon geeton ki paristhitiyan film Bheegi Raat mein bilkul alahada thin. Haan, mujhe ye jaroor lagata hai ki rafi vale varsion ko safalata poorvak nibhane ke liye kisi bhi gayak ke liye chunautiyan kahi jyada thin.

Lata, Roshan ji ki bataur sangeetakar behad izzat karati thin . Aur yahi vajah hai ki pachas sath ke dashak mein bahu begam, chitralekha, mamta, tazmahal mein sangeetakar raushan ke liye gaye unake geet hindi parshv film gayan ki anamol dharohar ban gaye hain.
Waise ye geet bhi apne aap mein lajavab hai. geet ke shuruaati hisse mein lata ji ki humming ke beech chashani mein ghula huaa unaka svar ubharata hai to bas man mein sama bandh jata hai. vaise isake baad koee kasar bachati bhi hai to geetakar sahir ke kabhi narmi kabhi shokhi liye bol aapako roomani mahaul se nikalane ka mauka hi nahin dete. to suniye is geet ko



hmmm hmmm hmmm hmmm
dil jo naa kah sakaa
wohi raaz-e-dil kahne ki raat aayi
dil jo naa kah sakaa
wohi raaz-e-dil kahne ki raat aayi
dil jo naa kah sakaa

naghma sa koyi jaag uthaa badan me
jhankar ki si tharthari hai tan me
jhankar ki si tharthari hai tan me
ho pyaar ki inhi dhadakti
dhadakti fizaaon me
rahne ki raat aayi
dil jo na kah saka
wohi raaz-e-dil kahne ki raat aayi

ab tak dabee thi ek mauj-e-armaan
lab tak jo aayi ban gayee hai toofaan
lab tak jo aayi ban gayee hai toofaan
ho baat pyaar ki bahakti
bahakti nigaahon se kahne ki raat aayi
dil jo na kah saka ....

guzren na ye shab khol doon ye julfen
tumko chupaaloon moond ke ye palkein
tumko chupaaloon moond ke ye palkein
ho bekaraar si larajti
larajti si chaaon mein
rahne ki raat aayi
dil jo na kah saka .......

Aur Meenakumari par filmaye is geet ko yahan dekh sakte hain...





Click Here to read this post in Hindi devnagari script.

Click Here to post your comment on this post.

सोमवार, जून 29, 2009

Dil Jo Na Kah Saka Wahi Raaz..... A wonderful song from trio of Sahir ,Rafi & Raushan

Pichhale hafte TV ke channels badalate badalate ZEE TV ke little champs par ungaliyan rukin to ruki ki ruki rah gaeen. ek chhote balak ko rafi sahab ke is geet ka ek hissa gate suna to man khush ho gaya. bite dinon ke in anamol motiyon ko aaj ke bachchon ke mukh se sunna aseem santosh ki bhavana se man ko bhar deta hai. kaee dinon ke baad ye geet jab sunne ko mila to zehan se utarane ka naam hi nahin le raha. isaliye socha ki kyoon na is aanand ko aap sab ke sath banta jaye.

Jis geet ke bol, dhun aur gayiki tinon hi bemisal hon to aapako kahane ko to kuchh rah hi nahin jata, man bhavanaon ke aavesh se hiloren lene lagta hai aur geet khud ba khud hothon par chala aata hai ... to gunagunaiye na mere sath...



dil jo na kah saka
vahi raz-ye-dil kahane ki rat aaee
dil jo na kah saka....


Kya dhun banaee thi mukhade ki sangeetakar raushan ne ki aadami sahir ke shabdon ki ravani ke sath bahata hi chala jata hai. 1965 mein pradarshit film Bhingi Raat ka ye geet behad lokapriy huaa tha aur us saal ki binaka sangeetamala mein panchave sthan tak ja pahuncha tha. agar mukhade ke liye geetakar aur sangeetakar ki jadoogari ko dad dene ka ji chahata hai to vahin antare mein Mohammad Rafi sahab ki kalakari is geet ko unake gaye behatarin geeton mein se ek maanne par mazaboor kar deti hai.

Ye geet film mein Pradip Kumar, Ashok Kumar aur Mina Kumari par filmaya gaya hai.

Geetkar Sahir Ludhiyanavi ne premika ki bevafaee toote nayak (pradip kumar) ke dil mein uthate manobhavon ko geet ke alag alag antaron mein vyakt kiya hai. nayak ki dil ki pida kabhi tanz, kabhi uphaas to kabhi gahri nirasha ke svaron mein goonjti hai aur is goonj ko Mohammad Rafi apani aavaj mein is tarah utarate hain ki geet khatm hone tak nayak ka dard aapka ho jata hai

Geet ke bol kuch yoon the

dil jo naa kah sakaa
wohi raaz-e-dil kahne ki raat aayi
dil jo naa kah sakaa
wohi raaz-e-dil kahne ki raat aayi
dil jo naa kah sakaa

naghma sa koyi jaag utha badan me
jhankar ki si tharthari hai tan me
jhankar ki si tharthari hai tan me
ho mubarak tumhe kisi ki larajti si baahon mein
rahne ki raat aayi
dil jo na kah saka

taubaa ye kis ne anjuman sajaa ke
tukde kiye hain guncha-e-wafaa ke
tukde kiye hain guncha-e-wafaa ke
ho uchhaalo gulon ke tukde
ke rangeen fizaaon mein rahne ki raat aayi
dil jo naa kah sakaa

chaliye mubaarak jashn dosti kaa
daaman to thaamaa aap ne kisi kaa
daaman to thaamaa aap ne kisi kaa
ho hamen to khushi yahi hai
tumhen bhi kisi ko apnaa kahne ki raat aayi
dil jo naa kah sakaa

saagar uthaao dil kaa kis ko gham hai
aaj dil ki qeemat jaam se bhi kam hai
aaj dil ki qeemat jaam se bhi kam hai
ho piyo chaahe khoon-e-dil ho
ke peete pilaate hi rahne ki raat aayi
dil jo naa kah sakaa
wohi raaje dil kahne ki raat aayi
dil jo na kah saka

Pradip Kumar, Meena Kumari par filmaye Bheeg raat Film ke is geet ko dekhana chahen to yahan dekh sakate hain






शनिवार, जून 27, 2009

Aati jati har mohabbat hai chalo yoon hi sahi : Chandan Dass on future of Ghazals !

Chandan das par aadharit is shrrinkhala ka samapan aaj Nida Fazli ki is behatareen ghazal se. par jaisa ki pichhali post mein maine jikr kiya tha, aaj ye bhi janenge ki kya sochate hain Chandan Dass ghazal gayiki, isake shrotaon aur bhavishy mein isaki lokapriyata ke bare mein ? kuchh sal pahale angreji dainik tribune aur UNI ko unhonne alag alag sakshatkaron mein bataya tha ki

Chahe kitni tarah ka sangeet aaye ya jaye, ghazalon ke prashansak har kaal mein rahe hain aur aage bhi rahenge. han ye jaroor hai ki ghazal jaisi vidha har sangeet premi ko aakarshit nahin karti. har kaalkhand mein ghazal vaise hi logon dvara sarahi gayee hai jinhen uchch darje ki kavita ki samajh ho. ghazal sunane se thirakane ka man nahin hota ya jor se jhoomane ki ikchchha hoti hai ye to apne ashaaaron ki antaranihit bhavanaon se sidhe dil ke purjon ko jhinjhod deti hai. ab ghalib ki shayari ko hi lein, unki mrityu ki do shatabdiyon ke bad bhi usake asar ka mukabala kisi any lokapriy sangeet se nahin kiya ja sakta. isaka matalab ye bhi nahin ki sangeet ke any roopon disco, jazz, pop , rimixes ki jagah nahin. hai par donon ki prakrti mein koee samy nahin , donon ki duniya hi alag hai.

Ghazal mein shabdon ka bahut mahattv hai. vaise to ghazal gayak kaee bar janta ka dhyan rakhate huye aisi ghazalon ko chunte hain jo unaki aasani se samajh aa jaye. par is babat ek seema se jyada samajhauta karane vale gayak jyada dinon tak lokapriyata ka daman nahin chhu pate.

Ghazalon ko badava dene mein TV ke rol se chandan asantusht hain. vo kahte hain ki ".....ek zamane mein jab doordarshan tha to ghazalon aur mushayaron ke kaee karyakram huaa karte the par aaj jab TV ke parde par chainalon ki baadh aaee huee hai to sangeet ki any vidhaon ke samane sher o shayari aur kavita se jude karyakram kahin nazar hi nahin aate...."
Chandan ki bat wazib hai. yoon to sangeet channel ke nam par MTV, etc aur channell V jaise kaee channel hain par inamein se kisi ne bhi ghazalon ko kendrit kar dainik ya saptahik shrrnkhala nahin chalaee. aaj ke hit geeton ko to ye din mein bisiyon bar baja sakate hain par ek achchha ghazalon ka karyakram karane ke bare mein ye sochate tak nahin. vividh bharati ko chhod den to niji FM channels ki bhi kamobesh yahi halat hai. ye sthiti chintaniy hai aur ise sudharane ke liye aam shrotaon ko bhi ek dabav banana hoga nahin to aage ki pidiyan sangeet ki is anamol vidha ko sunane se vanchit rah jayengi.

Toh lautate hain aaj ki ghazal par jo mujhe teenon ghazalon mein sabase adhik priy hai. ye ghazal Chandan Dass ki ab tak pesh ki gaee ghazalon se bhinn ek doosare mijaj ki ghazal hai jiska har sher aapako kuchh sochane par majaboor kar deta hai. khasakar ek sher to aaj ke is social networking ke daur mein khas mayane rakhata hai. Facebook, Orkut mein saikadon ki sankhya mein ham dost bana lete hain par kya hamare pas unmein se sabhi to chhoden kuchh khas ke liye bhi paryapt waqt hota hai. isi liye mujhe nida fazli ka ye sher sabase jyada kachotata hai

maile ho jate hain rishte bhi libason ki tarah
dosti har din ki mehanat hai chalo yoon hi sahi

Chandan Dass ne jis sanyamit aur sadhi aavaj mein is ghazal ka nirvah kiya hai use aap unaki aavaj mein is ghazal ko sunakar hi mahasoos kar sakte hain.





aati jati har mohabbat hai chalo yoon hi sahi
jab talak hai khoobasoorat hai chalo yoon hi sahi

jaisi honi chahiye thi vaisi to duniya nahin
duniyadari bhi jaroorat hai chalo yoon hi sahi

maile ho jate hain rishte bhi libason ki tarah
dosti har din ki mehanat hai chalo yoon hi sahi

ham kahan ke devata hain, bevafa vo hain to kya
ghar mein koee ghar ki zeenat hai chalo yoon hi sahi


yoon to Chandan Dass ki ghazalon ki ferhist behad lambi hai par mainne abhi tak unke kayee albums ko nahin suna hai. is bar ki shrrnkhala to aaj yahin khatm kar raha hoon par fir kabhi unaki kuchh aur behatarin ghazalen hath lagengi to aapake sath unhen jaroor share karoonga.



बुधवार, जून 17, 2009

Jab meri haqiqat ja ja kar unako jo sunaee logon ne : Chandan Dass

Pichhli post men aapane suni Chandan Dass ki aavaj men janab Murad Lakhnavi ki ghazal. isase pahale is kram ko aage badate huye aaj ki ghazal ki charcha ki jaye kuchh baten chandan das ke bare men.

Aksar dekha gaya hai ki sangeet se jude fanakar ek sangitik virasat ke uttaradhikari hote hain par chandan das ko aisa saubhagy prapt nahin huaa. unhen to ghazal gayiki ke kshetr men aane ke liye kafi mashakkat karani padi.

Unake pita chahate the ki chandan unaka Murshidabad ka vyapar sanbhale. chandan is bat ke liye raji nahin huye aur gyarahavin kaksha ke bad vo apane chacha ke yahan patana aa gaye. 1976 men unhen dilli ke oberany hotal men kam karane ka mauka mila. dilli aane ke bad do sal bad unaki kismat tab khuli jab gane ke liye munbaee ki sangit kanpani ka nyota unhen mila. chandan ki khushakismati thi ki unaki pahali elabam men unaka parichay khud ghazal gayak talat ajij ne diya.

Apane inhin anubhavon ko dhyan men rakh kar chandan das ne ek sakshatkar men kaha tha ki ...."naye gayakon ko sangit ke kshetr men aur sanyam se apani disha tay karani chahiye. aaj ki pidi safalata ka svad jaldi chakhane ke liye sangit ki us vidha ko chun leti he jahan aasani se nam aur paisa kamaya ja sake. daraasal unhen nirantar riyaj karate huye ye tay karana chahiye ki ve apani kabiliyat ke bal par kis kshetr men apana mukam hasil kar sakate hain."

Chandan das ne gambhir aur halki fulki (jisamen geet ka mijaj jyada aur bolon ka vajan kam ho) donon tarah ki ghazale gaee hain. aaj ki ghazal kau main in donon shreniyon ke bich ki manata hoon. yani achchhe ashaaaron ke sath gaee ek aisi ghazal jise sunate hi man prafullit ho jata hai. daraasal jab ibrahim ashk jaisa manja huaa gitakar ghazal likhata hai to usaki geyata to achchhi hogi hi. is ghazal men chandan das ne sangit bhi lafjon ke utar chadav ke anuroop hi rakha hai jise ise sunane ka aanand bad jata hai. shayad hi koee ghazal premi ho jo ise sunakar sath hi sath ise gunagunane ka lobh sanvaran kar sake. to ye to rahi meri koshish kuchh pasandida ashaaar gunagunane ki




aur ab suniye chandan das ki mohak aavaj men ye ghazal




jab meri haqiqat ja ja kar unako jo sunaee logon ne
kuchh sach bhi kaha kuchh jhooth kaha kuchh bat banaee logon ne

dhaye hain hamesha julm o sitam duniya ne mohabbat valon par
do dil ko kabhi milane na diya divar uthaee logon ne

aankhon se na aansu ponchh sake, hothon pe khushi dekhi na gaee
aabad jo dekha ghar mera to aag lagaee logon ne

tanahaee ka sathi mil na saka rusavaee men shamil shahar huaa
pahale to mera dil tod diya fir eed manayi logon ne

is daur men jina mushkil hai ai ashk koee aasan nahin
har ek kadam par marane ki ab rasm chalaee logon ne

is shrrnkhala ki agali kadi men hogi nida fazli ki ek sanvedanashil ghazal aur sath men janenge ki chandan das kya sochate hain ghazal gayiki ke bhavishy ke bare men..



सोमवार, जून 15, 2009

Khelane ke vaste ab dil kisi ka chahiye... : Chandan Das

Pichhale mahine Ek Shaam Mere Naam par assi ke dashak men ghazalon ki duniya ke lokapriy gayakon aur gayikaon ki charcha chal rahi thi. is silasile men mainne aapko Peenaaz masani, Raj Kumar Rizvi , Rajendra Mehta aur Neena Mehta ki gaee apani kuchh pasandida ghazalon ko sunavaya tha. isi silasile ko aaj aage badate hain assi ke dashak ki ek aur surili aavaj se, jise aap aur ham Chandan Das ke nam se janate hain. Peenaz Masani ki tarah hi Chandan Dass ko sabase pahale dekhane aur sunane ka mauka mujhe doordarshan ki vajah se mila.Un dinon chandan aksar apane chiraparichit safed ya cream kurte men dooradarshan ke sugam sangeet ke karyakram men baraha nazar aate the.

Bharatiy ghazal gayiki men ghazalon ko geetanuma shaili men gane ki unaki shaili bilkul alag thi. apni ghazalon men sangeet to unhonne paranparagat hi istemal kiya par jyadatar aisi ghazalen chuni jise urdu ka vishesh jnyan na rakhane vala bhi samajh sakta tha. aur fir chandan ji ki janadar aawaz aur lafjon ka paina uchcharan, aam ke sath vishisht janon ko bhi apani pakad men le hi leta tha.



Chandan Dass ki ek khasiyat aur rahi vo ye ki unhonne apane samakalinon ki tarah, apne aap ko ek praroopit dhanche men nahin dhala. Samkaleenon se mera ishara Pankaj Udhas aur Anoop Jalota ki or hai . Pankaj ji ka dhyan aate hi sur ke sath sura yad aane lagati hai vahin Anoop jalota nam sunate hi man men ghungharu khanakne lagte hain. shayad yahi vajah rahi ki pachchis salon ke bad bhi chandan das ki gaee kaee ghazalen man ki tahon se nikal nikal kar juban par aati rahti hain.

Is shrrnkhala ke liye mainne jin ghazalon ko aapake samane prastut karane ki ichchha hai vo ve ghazalen hain jinhen nabbe ke dashak men mainne bahut suna aur gunagunaya hai. is kadi men aaj pesh hai Murad Lakhnavi ki ek ghazal jisaka matla mujhe is ghazal ki jan lagata hai.

khelane ke vaste ab dil kisi ka chahiye
umr aisi hai ki tumako ik khilauna chahiye


Waise aap ye bataiye kya aaj kal dil lagana aur todana ek khel ki tarah nahin ho gaya hai? aur to aur agar jeb bhari ho to prem ki lata jara jyada teji se falati foolati hai isaliye to makate men murad kahate hain

kal talak tha dil jaroori rah e ulafat men murad
aaj ke is daur men chandi au sona chahiye

to lijiye suniye chandan das ki dharadar aavaj men is ghazal ko



khelane ke vaste ab dil kisi ka chahiye
umr aisi hai ki tumko ik khilauna chahiye

mujh ko kahiye hath men menhdi lagana hai agar
khoone dil doon ya ki fir khoone tumanna chahiye

bazm mein aao kisi din kar ke tum solah singar
ik qayamat waqt se pahale bhi aana chahiye

tum kaho to mar bhi jaoon main magar ik shart hai
bas kafan ke vaste aanchal tumhara chahiye

kal talak tha dil jaroori rah e ulafat men murad
aaj ke is daur men chandi aur sona chahiye


ye ghazal chandan das ke album sitam ka hissa hai . Is shrrnkhala ki agali kadi men chandan das se judi kuchh aur baten hongi aur sath men hogi unaki ek aur pyari si ghazal



मंगलवार, जून 09, 2009

Sajan Re Jhoot Mat Bolo...Kya Shailendra waqai sachche insaan the ?

Teesri kasam ke geeton ki is shrinkhala men meri pasand ka teesra geet vo hai jo aksar pitaji ke mukh se bachapan men suna karta tha. mujhe yad he ki geet ke bol itane saral the ki badi aasani se pitaji se sun sun kar hi mukhada aur pahala antara yad ho gaya tha. us waqt to is geet se papa hamen jhooth na bolane ki shiksha diya karate the. aaj itane salon baad jab yahi geet fir se sunaee deta hai to do batein sidhe hrday men lagati hain. pahali to ye ki hindi filmon men philosophical geet aajakal naam matra hi sunne ko milate hain aur doosari ye ki geetakar Shailendra ne jis sahajata ke sath jivan ke saty ko apani panktiyon men chitrit kiya hai usaki misaal mil pana mushkil hai. ab in panktiyon hi ko dekhen

ladakapan khel men khoya,
javani nind bhar soya
budhapa dekh kar roya
budhapa dekh kar roya, vahi kissa purana hai


bade badejgyani mahatma jis baat ko bhakton ko pravachan, shiviron men samajhate rahe hain vo kitani saralata se Shailendra ne apane is geet ki chand panktiyon men samajha di. chaliye jara koshish karen ye janane ki Shailendra ke man men aisa behatarin geet kaise panapa hoga?



Shailendra ki us vakt ki manasik sthiti ke bare men unake mitr film patrakar Ramkrishna likhte hain

vo un dinon ke kisse sunata... jab Parel majadoor basti ke dhuyen aur silan se bhari gandi kothari men apne bal bachchon ko lekar vah aane vali zindagi ke sapane dekha karta tha aur in dinon ke kisse jab rimjhim jaise shanadar makan aur austin-cambdrige jaisi lambi gadi ka svami hone ke bavajood apane rite lamahon ki aag use sharab ki pyaliyon se bujhani padati.


Shailendra kaha karata...un dinon ki yad, ramakrishn, sach hi bhool nahin pata hoon main. manasik shanti ka sambandh, lagta hai, dhana daulat aur aisho aaram ke sath bilkul nahin hai, aisi baat n hoti to aaj mujhe vah sukoon, vah chain kyon nahin mil pata aakhir jo us halat men mujhe aasani se nasib tha-aaj, jab mere pas vah sab kuchh hai jisaki tamanna koee kar sakata hai-nam, ijjat paisa... yah sab kahate kahate Shailendra achanak hi badi ganbhirata ke sath chup ho jaya karta tha aur dekhane lagata tha meri aankhon ki ora, jaise usake savalon ka javab shayad vahan se use mil saken.


Wahin sattar ke dashak men vividh bharati se fauji bhaiyon ke liye prasarit jayamala karyakram men is geet ko sunane ke pahale men sangeetakar jodi shankar jayakishan vale shankar ne Shailendra ke bare men kaha tha

sachchi aur khari bat kahana aur sunna Shailendra ko achchha lagata tha. kaee bar geet ke bolon ko lekar ham khoob jhagadate the, lekin geet ki bat jahan khatm hoti, fir vohi ghi-shakkar.. Shailendra ek sidha sachcha aadami tha, jhooth se use nafarat thi kyoonki usaka vishvas tha, 'khuda ke pas jana hai'

ab Shailendra ke bare men shankar ne sahi kaha ye galat is par to par ham bad men charcha
karenge par pahale suniye ye geet..

Get this widget Track details eSnips Social DNA



sajan re jhooth mat bolo, khuda ke pas jana hai
n hathi hai na ghoda hai, vahan paidal hi jana hai

tumhare mahal chaubare, yahin rah jayenge sare
akad kis bat ki pyare
akad kis bat ki pyare, ye sar fir bhi jhukana hai
sajan re jhooth mat bolo, khuda ke pas jana hai

bhala kijai bhala hoga, bura kijai bura hoga
bahi likh likh ke kya hoga
bahi likh likh ke kya hoga, yahin sab kuchh chukana hai
sajan re jhooth mat bolo, khuda ke pas jana hai...

ladakapan khel men khoya,
javani nind bhar soya
budhapa dekh kar roya
budhapa dekh kar roya, vahi kissa purana hai

sajan re jhooth mat bolo, khuda ke pas jana hai
n hathi hai na ghoda hai, vahan paidal hi jana hai
sajan re jhooth mat bolo, khuda ke pas jana hai...




Aur isase pahale ki is shrrnkhala ka samapan karoon kuchh aur baten geetakar Shailendra ke bare men. Shailendra ki film Teesri kasam buri tarah flop huee aur logon ka manana hai ki vo is film ke asafal hone ka aaghat nahin sah paye the. par aapako ye bhi batana munasib rahega ki Shailendra sharab ke behad shaukin the aur is vajah se unaka svasth dinon din vaise bhi girata ja raha tha.

Net par vicharan karate huye mujhe unake mitr aur film patrakar rahe Ramkrishna ka aalekh mila jo Shailendra ke vyaktitv ki kaee kamiyon ko ujagar karata hai. misal ke taur par har rat sharab ke nashe men dhut rahna, apani aalochana ko bardasht na kar pana, apane svarth ke liye mitron men foot dalana aur yahan tak ki apane paksh men patr patrikaon men lekh chhapavane ke liye paise dena. agar aap geetakar Shailendra ke bare men ruchi rakhate hain to ye lekhamala 'gunahe belat 'avashy paden.

Ye kuchh aisi bate hain jo shayad pratispardhatmak film industry ke bahutere kalakaron men paee jati hon. par isase yah spasht hai ki bataur kalakar ham kya srjan karate hain aur vastavik jindagi men ham kaisa vyavahar karate hain isamen jaroori nahin ki samy rahe.





शुक्रवार, जून 05, 2009

Songs I love to sing : Sajanva Bairi ho gaye Hamaar :

Pichhali post mein mainne jikr kiya tha ki Teesari Kasam ke teen geet mujhe vishesh taur par priy hain. Aasha ji ke masti se bhare geet ke baad aaj baat karte hain is film mein Mukesh ke gaye huye mere do priy geeton mein se ek ki. Teesari Kasam mein baataur nayak Raj Kapoor ek alag se role mein the. Mainne doordarshan ki badaulat Raj Kapoor ki adhikansh filmein dekhi hain. Baataur abhineta ve mujhe ausat darje ke kalakar hi lagte rahe par Teesari Kasam mein gadivan ka unaka kiradar mujhe behad pyara laga tha aur jeebh kaatkar is film mein unake dvara bola jane vale issssss ........ ko to main aaj tak bhool nahin paya.




Raj Kapoor ne jahan gadivan ke kiradar Hiraman ko behatareen tarike se nibhaya vahin unaki aavaj kahe jane vale gayak Mukesh ne bhi un par filmaye geeton mein apani behatareen gayiki ki badaulat jaan foonk di. Unse jude ek lekh mein mainne pada tha ki Mukesh ne apane mitron ko khud hi baataya tha ki jab Shailendra ‘Teesari Kasam’ bana rahe the tab unhonne Raj Kapoo abhinit geeton ki aatma mein utarne ke liye Phanishvar Nath Renu ki kahani ‘Teesari Kasam urf mare gaye gulafaam’ ko kaee bar padha tha. Ye baat spasht karati hai ki us zamane ke gayak geet mein sahi prabhav paida karne ke liye kitni mehnat karte the.

Ab sajanava bairi ho gaye hamar ki hi baat karen. Shailendra ne is geet ki paripati lok geeton ke tane bane mein buni hai. Piya ke pardesh jane aur vahan ja kar apane prem ko bhool jane ki baat bahuture lokageeton ki mool bhavana rahi hai. Shailendra ke bol aur mukesh ki aavaj virahani ki pida ko is purajor tarike se hamare samane late hain ki sunane vale ki aankhen aadr huye bina nahin rah pateen. Aur shankar jayakishan ka sangeet dekhiye sirf utna bhar jitani ki jaroorat hai. Jab mukesh ga rahe hote hain to sirf aur sirf unaki aavaj kanon se takarati hai aur do antare ke beech diya gaya sangeet bolon ke prabhav ko gahara karate chalata hai.

Shayad isiliye ye geet mujhe is film ka sarvapriy geet lagta hai. to pahale suniye is geet ko gunagunane ka mera prayas..



sajanava bairi ho gaye hamaar
chithiya ho to har koee banche
bhag na banche koye
karamava bairi ho gaye hamaar

jaye base paradesh sajanava, sautan ke bharamaye
na sandesh na koee khabariya, rut aaye, rut jaye
doob gaye ham beech bhanvar mein
kar ke solah para, sajanava bairi ho gaye hamaar

sooni sez god mori sooni marm ma jane koye
chhatapat tadape preet bechari, mamata aansu roye
na koee is par hamara na koee us par
sajanava bairi ho gaye hamaar...

Toh aaiye sunein aur dekhein mukesh ke gaye is geet ko


Get this widget



Aur haan ek rochak tathy ye bhi hai ki jis gadi mein raj kapoor aur wahida ji par ye geet filmaya gaya vo gaadi renu ji ki khud ki thi aur vo aaj bhi unake bhanje ke paas yadagar svaroop surakshit hai.






गुरुवार, जून 04, 2009

Haay Ghazab Kahin Tara Toota...Teesari Kasam

Agar aap se main ye poochhoon ki guzre zamane jab cinema ke parde ka rang shvet shyam huaa karata tha to abhinay aur khoobasoorati donon ke lihaz se aapaki pasandida abhinetri kaun thi to aap mein se shayad jyadatar logon ka javab madhubala hi ho. par jab main apani aankhe band kar smrti patal par jor deta hoon to in donon kasautiyon par man mein bas ek hi adakara ki chhavi ubharati hai..sahab bivi aur ghulam, kagaz ke phool, khamoshi aur Teesari Kasam vali pyari Wahida Rahman ji. yoon to Wahida ji ne rangin filmon mein bhi kaam kiya par shvet shyam rangon mein bhinn bhinn filmon mein nibhaye gaye kiradaron aur un par filmaye gaye geeton ko main hamesha apane zehan ke karib pata hoon



aisa hi ek geet tha 1966 mein geetakar shailendra dvara banaee gayee film Teesari Kasam ka. sath ke dashak mein bani ye film renu ki dil chhooti patkatha, nayak nayika ke zabaradast abhinay aur apne svarnim geeton ki wajah se meri sabase priy filmon mein ek rahi hai. yoon to Teesari Kasam ke tamam geet avval darze ke hain par unmein se teen mujhe khas taur par pasand hain.

aaj jis geet ko aap ke samane prastut kar raha hoon use gaya tha aasha bhosale ne...pata nahin is geet ke mukhde mein kya khas baat hai ki bas use sunte hi man chuhal aur masti ke mood mein aa jata hai. geetakar shailendra ne gramin prshthabhoomi mein bani, is film ke bol bhi nautanki ke mahaul mein dhyan rakh kar likhe hain.to aaiye sunen sangeetakar jodi shankar jayakishan dvara sangeetabaddh is geet ko


haye ghazab kahin tara toota
loota re loota mere saiyan ne loota
pahala tara atariya pe toota
danto tale mainne daba agoontha
loota re loota savariyan ne loota
haye ghazab kahin tara toota

haye ghazab kahin tara toota
doosara tara bajariya mein toota
dekha hai sabane mera daman chhoota
loota re loota sipahiya ne loota
haye ghazab kahin tara toota

teesra tara fulabagiya mein toota
foolon se poochhe koee, hai kaun jhootha
loota re loota darogava ne loota
haye ghazab kahin tara toota


us zamane mein gramin sanskrti mein manoranjan ke ekamatra madhyam ke roop mein nautanki ka kya yogadan tha ye baat is geet ko dekh kar hi aap mahasoos kar sakate hain. nachavali ke thumake kahin foolon ki khushabu se bhinge bhavanatmak prem ko jagrit kar rahe hain to kahin rupaye ke dambh mein doobi havas ko.


Teesari Kasam ke apne anya pasandida geeton ko aap tak pahunchane ka kram aage bhi zari rahega..


Click Here to read this post in Hindi devnagari script.

Click Here to post your comment on this post.