Thursday, June 26, 2008

Zid na karo ab to ruko, ye raat nahin aayegi : Yesudas

Click here to read this post in Hindi (devnagari) script.

parason office ki ek party mein ye geet bahut dinon bad suna. hamare jin sahayogi ne is geet ko apani aavaj di vo aksar manna de ke geet hi gate hain. unake andaj se mujhe poora yakin ho gaya ki ye manna de ka hi gaya huaa hai. par ravivar ko jab googaladev ke darabar mein gaye to pata chala ki ye to lahu ke do rang film ka geet hai jo १९७९ mein rilij huee thi aur ise gaya tha yesoodas ji ne.

daraasal 1979 hi vo sal tha jab pitaji sare parivar ko rajashri prodakshan ki film 'savan ko aane do' dikhane le gaye the. aur tabhi mera pahala parichay yesoodas ki aavaj se huaa tha. us film ke do geet bal man mein chha se gaye the. ek tha chand jaise mukhade par bindiya sitara.... aur doosara tujhe geeton mein dhaloonga, savan ko aane do......... bad mein vividh bharaati ke jariye yesoodas ke baki geeton se bhi parichay hota raha. 68 varshiy Kattassery Joseph Yesudas keral ki un vibhootiyon me se hain jinhonne hindi film sangeet par apani amit chhap chhodi hai. 1973 mein padmashri aur 2002 mein padmabhooshan se sammanita, kanartak shastriy sangeet mein pravina, da. yesoodas ab tak vibhinn bhashaon mein 40000 ke karib geet ga chuke hain.

matrbhasha malayalam hone ke bavajood unaka hindi geeton mein shabdon ka uchcharan lajavab tha. ab is geet ko hi dekhen. is roomani geet ko jis bhav pravanata ke sath unhonne nibhaya hai use sunakar man bhi geet ke mood mein bah jata hai. kal se is geet ka kaee bar sun chuka hoon. sidhe sachche lafj aur usase badakar yesoodas ji ki adayegi aisi ki ise gunagunaye bina raha hi nahin jata..



is geet ko likha tha farookh kaisar sahab ne. farookh sahab mere pasandida geetakaron mein nahin rahe. par is geet ke aalava unake likhe geeton mein mujhe vo jab yad aaye bahut yad aaye .... behad pasand hai. yoon to bappi lahidi ko assi ke dashak mein hindi film sangeet ke giraate star ke liye mukhy roop se jimmevar manata hoon par aise kaee geet hain jahan unhonne apani kabiliyat ki pahachan di hai. ye geet vaise hi geeton mein se ek hai.

to aaiye ab sunate hain yesoodas ki aavaj mein ye khoobasooraat nagma



zid na karo ab to ruko
ye raat nahin aayegi
mana agar kahana mera tumako vafa aa jayegi...


sajada karoon, pooja karoon, tu hi bata kya karoon
lagata hai ye teri najar mera dharam le jayegi
zid na karo ab to ruko ........

rut bhi agana, tapata badana, badane lagi bekhudi
ab jo gaye, sari umar dil mein kasak rah jayegi
zid na karo ab to ruko... ....

panch sal pahale 'sa re ga ma ' ne yesoodas ke gaye behatarin geeton ka ek guladasta pesh kiya tha. agar aap chahen to ise yahan se kharid sakate hain.

vaise agar aap geet se jud gaye hain to lata ji ka gaya varsan bhi sunate jaiye.




zid na karo ab to ruko
ye raat nahin aayegi
mana agar kahana mera tumako vafa aa jayegi...

tanahaee hai aur tu bhi hai,chaha vahi mil gaya
lag ja gale, khushabu teri, tan man mera mahakayegi
zid na karo ab to ruko...

sajana mere, chunari jara mukh pe mere dal do
dekha agar khul ke toone tumako najar lag jayegi
zid na karo ab to ruko...

mujhe to yesoodas vala varsan jyada pasand aata hai. aapaka kya khayal hai ?

Do you like the song? Click Here to post your comments.

Wednesday, June 25, 2008

World Cup 1983: Hai us Raat Main Sone Kyun Chala Gaya

Click here to read this post in Hindi (devnagari) script.

Pachchis saal pahale ki baton ko yaad karana kathin hai , par is ghatana ko main kaise bhool sakata hoon. ji haan, main 1983 ke world cup ki baat kar raha hoon. bharat mein rangin TV to 1982 ke asiad ke samay aaya tha par 1983 mein huye Prudential World Cup Cricket ke sare matchon ka seedhe prasaran ki vyavastha yahan to kya England mein bhi nahin thi. yahi vajah hai ki us pratiyogita mein zimbabwe ke khilaf sankatamochak ki tarah utare kapiladev ke shanadar nabad 175 ranon ka video footage upalabdh hi nahin hai.

jaisa kal IBN 7 par team ke sadasya kah rahe the ki ham par us vakt jeetane ka koee dabav nahin tha. hota bhi kaise jis team ne usase pahale ke sare vishv kapon mein kul milakar ek match hi jeeta ho, usase jyada ummid bhi kya rakhi ja sakati thi? pratiyogita shuru hone vakt main apani nani ke ghar kanapur gaya huaa tha. bharat ke pahale match ke agale din jab dooradarshan samachar ne bharat ke apane pahale match mein hi West Indies ko patakhani dene ki khabar sunaee, mera dil balliyon uchhalane laga. apane parivar ke pratyek sadasya ko jab tak mainne ye khabar nahin sunaee dil ko chain nahin pada.

sunanevalon ne to khabar mein utani dilachaspi nahin dikhaee par mere dil mein apani team ke liye aasha ka dipak jal chuka tha. BBC world aur doordarshan se milti khabaren hi match ke natijon ko ham tak pahuncha pati thin. bharatiy team ko apane group mein vest indija, aastreliya aur jimbabave se do do match khelane the. bharat ne apane pahale tin mein do match jeet liye the par aastreliya se apane pahle match mein vo buri tarah har gaya tha.

chauthe match mein WI se harane ke bad bhi bharat pratiyogita mein pahale ki darj jeeton ki vajah se bana huaa tha. par 18th June 1983 mein zimbabwe ke sath khela match bharat ke liye pratiyogita ka tarning pavyaint tha. bharat pahale baiting karate huye 17 ranon par panch wicket kho chuka tha aur 78 tak pahunchate pahunchate ye sankhya sat tak pahunch gaee thi par kaptan kapil dev ne apane nabad 175 ranon jisamein solah chauke aur chhakkon chhakke shamil the scorer ko aath wicket par 260 tak pahuncha diya. bharat ne zimbabwe ko is match mein 31 ranon se hara diya tha. viparit paristhitiyon mein match ko jeetne ke bad mujhe vishvas ho gaya tha ki abaki apani team semi final mein to pahunch hi jayegi. aur huaa bhi vahi! agale league match mein Australia ko harakar bharat semi fainal mein pahunch chuka tha.

ab tak main vapas patna aa chuka tha aur semifinal mein jab bharat ne England ko haraya tab mainne usaka seedha prasaran BBC World se sunane ka poorn aanand prapt kiya tha. fanal ke do din pahale se hi hamare mohalle ke sare bachche match ke bare mein vistar se charcha karate rahate. dooradarshan ne final match ke sidhe prasaran ki vyavastha ki thi. school ki garmi ki chhuttiyan shayad chal hi rahin thi. ham das barah vachche padosi ke ghar mein shvet shyam TV ke samane match shuru hone ke pandrah minat pahale hi jamin par chadar bichhakar baith gaye the. par jab bharat bina poore sath ovar khele hi 183 ran banakar laut aaya, ham sare bachchon ke cheharon ki udasi dekhane layak thi. pahale to program rat bhar padosi ke ghar
dera jamaye rakhane ka tha. par bharatiy ballebajon ke is nirashajanak pradarshan ne mujhe apana vichar badalane par majaboor kar diya. man itana dukhi tha ki thoda bahut kha pi kar main jald hi sone chal gaya.

subah uth ke akhabar khola to jeet ka samachar dekh ke dang rah gaya. bhaga bhaga apane tivi vale doston ke ghar gaya ki bhaee ye sab huaa kaise? bad mein kaee bar un yadagar lamahon ki rediyo kameintri
sunin aur vidiyo futej bhi dekha par dil mein malal rah hi gaya ki main hai us rat kyoon soya...!


khelon mein kuchh khas na kar pane vale desh ke liye vo jeet ek bahut badi jeet thi. us jeet ne ekadivasiy kriket mein achchha karane ke liye aage ki bharatiy teamon ke liye ek sapana jagaya. aaj jab is bat ko pachis sal bitane vale hain , aaiye un lamahon ko ek bar fir se dekhen yu tyoob ke is video ke jariye..



sath hi un khiladiyon ko mera koti koti salam jinhonne vishv kap jeetakar ek misal aage ki pidiyon ke liye chhod di..

Click Here to post your comments.

Tuesday, June 17, 2008

Suman Kalyanpur 's Sharabi Sharabi Ye Sawan Ka Mausam Khuda Ki Qasam Khoobsurat na hota

Click Here to read this post in Hindi (Devnagari) script.

manasooni barish se poora bharat bheega huaa hai. jhulasati garmi ke baad barish ki fuharen kise achchhi nahin lagati. aaj bahar tap tap girati barakha ki boondon ne mujhe prerit kiya hai aapake sath ek pyare se manasooni geet ko bantane ke liye. yoon to barish se jude kaee anamol geet bharatiy film jagat hamein de chuka hai. niyamit pathakon ko yad hoga ki kishor kumar ke bare mein shrrnkhala likhate samay mainne manjil film ke liye yogesh gaud ka likha geet rimajhim gire savan sunaya tha. is geet ko gunagunana mujhe behad priy hai . par aaj ka ye geet kuchh alag sa hai, isamein shastriyata bhi hai aur lafjon ki ek nazaqat bhi. ye ek aisa geet hai jo varsha ritu ko prem ke rangon mein sarabor kar deta hai.

ji han main bat kar raha hoon 1967 mein aaee film noorajahan ke geet "sharabi sharabi ye savan ka mausam khuda ki qasam khoobasoorat n hota..." ki jise sangeetabaddh kiya tha rakesh roshan ke pita svargiy roshan ji ne, jise likha tha geetakar shakil badayunni sahab ne aur is geet ko gaya tha kokil kanthi suman kalyanapur ne....

majhe suman kalyanapur ki gayiki hamesha se achchhi lagati rahi hai. bachapan mein aksar jab kisi ke sangeet gyan ki pariksha leni hoti to suman ji ke gaye kisi geet ko ga kar samane vale se ye jaroor poochhate ki batao ise kisane gaya hai. aksar javab lata mangeshakar aata aur tab tak hamane apana point proof kar liya hota ki tumhen abhi to gayakon ki hi pahachan nahin hai to tumase sangeet ke bare mein kya bahas karani :).


lata se aavaj ki samyata ki vajah suman ji ko gane ke mauke kam mile par jitane bhi mile use unhonne poori tarah nibhaya. 'dil hi to hai', 'shagun' aur 'bat ek rat ki' jaisi filmon mein unake gaye kuchh geet mujhe behad pasand hain aur kabhi unhen bhi aap tak pahunchane ki koshish karoonga.


is geet ki ek khasiyat ye bhi hai ki ye rag gaud malhar par aadharit hai. rag malhar ke bare mein kaha jata hai ki jab is rag par aadharit koee geet poore sur tal aur bhav ke sath gaya jaye to devaraj indr ko barish karani hi padati hai. vaise bhi shakil ke likhe khoobasoorat bol barish ki boondon si shitalata dete hain. aap khud hi sun kar mahasoos karen na..






sharabi sharabi ye savan ka mausam
khuda ki qasam khoobasoorat n hota
agar isamein rang-ye-mohabbat n hota
sharabi sharabi ......................

suhani-suhani ye koyal ki kookein
uthati hain seene mein rah-rah ke hookein
chhalakti hai masti ghane badalon se
ulajhati hain nazarein hasin aanchalon se
ye puranoor manzar
ye puranoor manzar ye rangeen aalam
khuda ki qasam khoobasoorat n hota
agar isamein rang-e-mohabbat n hota
sharabi sharabi ......................

puranoor - prakashamaan

gulabi-gulabi ye foolon ke chehare
ye rimjhim ke moti ye boondon ke sehare
kuchh aisi bahar aa gayee hai chaman mein
ki dil kho gaya hai isi anjuman mein
ye mahaki nashili
ye mahaki nashili havaon ka paracham
khuda ki qasam khoobasoorat n hota
agar isamein rang-e-mohabbat n hota
sharabi sharabi ... ..................

anjuman - sabha majalis

ye mausam salona ajab gul khilaye
umangen ubhare ummiden jagaye
vo betabiyan dil se takara rahin hain
ke raton ki ninden udi ja rahin hain
ye sahar-e-javani
ye sahar-e-javani ye khvabon ka aalam
khuda ki qasam khoobasoorat n hota
agar isamein rang-e-mohabbat n hota
sharabi sharabi ....................

Sunday, June 08, 2008

Zara si aahat hoti hai to dil sochata hai ... a romantic melody from war movie 'Haqeeqat'

Zindagi mein koee jab itana karib ho jae ki aap us shakhs ke saye mein bhi usakee khushaboo mahasoos karane lagen.. door se aate usake padachapon ko sun kar aapake hriday kee dhadkan tivr gati se chalane lage, gahe-bagahe aapakee aankhon ke samane usi kee chhavi ubharane lage, tab samajh lijie ki aap bhagavan kee banaee sabase hasin niyamat 'prema' kee giraft mein hain.

Aisi hi bhavanaon ko lekar mashahoor shayar Kaifi Azmi ne 1964 mein film haqiqat mein ek pyara sa nagma likha tha. 'haqikata' bharat chin yuddh ke paripekshy mein chetan aanand dvara banaee gaee thi jo is tarah kee pahali film thi. yuddh kee asafalata se aahat bharatiy janamanas par is film ne ek maraham ka kam kiya tha. film to sarahi gaee hi isamein diya Madanmohan ka sangeet behad charchit raha.

vaise to sara geet hi prem ras se sarabor hai par geet ka mukhada dil mein aesi tasir chhodta hai jise lafjon se bayan kar pana mushkil hai.

zara si aahat hoti hai to dil sochata hai, kahin ye vo to nahin...

ise kitani hi dafa gunagunate rahen man nahin bharata...




do mahan kalakaron madanmohan aur lata kee jodi kee adbhut saugat hai ye geet..

to pahale sunie ye geet




zara si aahat hoti hai to dil sochata hai
kahin ye vo to nahin, kahin ye vo to nahin
zara si aahat hoti hai ...

chhup ke sine mein koee jaise sada deta hai
sham se pahale diya dil ka jala deta hai
hai usi kee ye sada, hai usi kee ye ada
kahin ye vo to nahin ...

shakl firati hai nigahon mein vo hi pyari si
meri nas-nas mein machalane lagi chingari si
chhoo gaee jism mera kisake daman kee hava
kahin ye vo to nahin ...



aasha hai is geet ko sun kar aapaka mood roomani ho gaya hoga. to kyoon na chalate chalate ek ghazal bhi padhata chaloon jisake bhav bahut kuchh is geet se milate julate hain... aur jab bhi ye geet sunata hoon ye ghazal khud b khud man ke jharokhon se nikal kar samane aa jati hai..

aahat si koee aae to lagata hai ki tum ho
saya koee laharae to lagata hai ki tum ho

jab shakh koee hath lagate hi chaman mein
sharamae, lachak jae to lagata hai ki tum ho

raste ke dhundhalake mein kisi mod pe kuchh door
ik lau si chamak jae to lagata hai ki tum ho

odhe hue taaron kee chamakati huee chadar
nadiya koee bal khae to lagata hai ki tum ho

jab raat gae koee kiran mere barabar
chup chap se so jae to lagata hai ki tum ho

(shayar - unknown)

to bataen kaisi lagi ye ghazal aur geet aapako ?

Tuesday, June 03, 2008

Mujhe raat din bas mujhe chahti ho... A soulful song sung by Sonu Nigam

Click Here to read this post in Hindi (Devnagari) Script.

1999 mein ek film aayee thi, naam tha Sangharsh ! akshay kumar, preeti zinta aur aashutosh rana jaise kalakaron se saji is film ki besirpair kahani ko darshakon ne ek sire se khariz kar diya tha. par geetakar samir aur sangeetakar jatin-lalit ki jodi ne apana kaam bakhoobi nibhate huye is film men karnapriy sangeet diya tha.

'pahali pahali baar valiye ..' aur 'naaraaz savera...' to charchit huye hi par mujhe jis geet ne sabase jyada aanandit kiya vo tha sonu nigam dvara gaya huaa solo geet jisaki roomaniyat mujhe ise sunate vakt hamesha hi gudaguda jati hai. isaliye ye sonu ke gaye romantik geeton men meri pahali pasand hai.

sonu nigam ki gayiki se to ham aap parichit hi hain. jis bhav pravanata ke sath is geet ko sonu ne apani aavaz di hai usaka javab nahin. pahale antare ke baad aap lata ji ka parshv se laharata svar sun sakate hain.

ye geet vaise geeton men hai jisaki lay pahali bar men hi dil par seedha asar karati hai. jab bhi main is geet ko gunagunata hoon, apane man ko halka aur khushamizaz pata hoon. to lijiye pahale jheliye karib do saal pahale ki is geet ke kuchh anshon ki meri recording...

<bgsound src="MRDP.wma">

mujhe raat din bas mujhe chahti ho
kaho na kaho mujhko sab kuchh pata hai
haan karoon kya mujhe tum batati nahin ho
chhupati ho mujhase ye tumhari khata hai
han mujhe raat din ...

meri bekarari ko had se badana
tumhein khoob aata hai batein banana
nigahein milake yoon mera chain lena
satake mohabbat mein yoon dard dena
mujhe dekha ke aise palaken jhukana
shararat nahin hai to fir aur kya hai
han mujhe rat din ...

tumhen neend aayegi ab na mere bin
mujhe hai yakeen aisa aayega ik din
khuli teri zulfon men soya rahoonga
tere hi khyalon men khoya rahoonga
kabhi gaur se meri aankhon mein dekho
meri jan tumhara hi chehra chhupa hai
han mujhe raat din ...


aur ab suniye sonu ki dilkash aavaz men ye nagma....



Do you like this song. Click here to tell me your opinion about this song?