Saturday, April 12, 2008

' Mujhe Chand Chahiye ' by Surendra Verma

pichhle kuchh salon se kaye bar ye prashn mujhse poochha jata raha ki kya aapane 'mujhe chand chahiye' padhi hai. jab mera javab nakaratmak hota to ise jald padhane ki salah di jati thi. internet par mainne bahut logon ko ise apani pasandida kitab ki soochi mein dekha tha aur man hi man ye heen granthi bhi vikasit ho chali thi ki shayad main hi ek rah gaya hoon is kitab ko naa padane vala. isaliye jab ye kitab nayee kharidi gaee pustakon ki soochi mein pustakalay mein dikhi to mainne ise lene mein jara bhi der nahin ki. par 1996 mein sahity akadami puraskar se puraskrt is kitab ke aavaran par urmila matondakar ka chitr dekh kar un sanisanikhej pocketbooks ki yaad aa gayee jo railway ki book stalls par dhadalle se bika karati hain. dilli ke radhakrshn prakashan ne is pustak se kafi paise banaye hain par 570 prshthon vali 195 rupaye ki is kitab mein kahin lekhak ke sanbandh mein do shabd likhane ki jaroorat nahin samajhi gaee.

khair chaliye kuchh batein kar lein is upanyas ke bare mein. surendra verma apani is kitab ki shuruvat prasiddh roman samrat Julious Ceaser yani Kaligula ki in panktiyon se karate hain

"...achanak mujh mein asanbhav ke liye aakanksha jagi. apna yah sansar kafi asahaneey hai, isliye mujhe chandrama, ya khushi chahiye-kuchh aisa, jo vastutatah pagalapan-sa jan pade. main asanbhav ka sandhan kar raha hoon...dekho, tark kahan le jata hai-shakti apani sarvochch seema tak, ichchhashakti apane antar chhor tak ! shakti tab tak sanpoorn nahin hoti, jab tak apani kali niyati ke samane aatmasamarpan n kar diya jaye. nahin, ab vapasi nahin ho sakati. mujhe aage badhate hi jana hai... .."

varma ji ne in panktiyon ka chunav shayad isaliye kiya ki pustak ke kendriy charitr Varsha Vashishth bhi kuchh aise hi jajbaton ko jivan path mein lekar aage hi badati gaee. par kaun thi ye varsha vashishtha? kaisa tha usaka parivarik parivesha. surendra verma apni pustak ki nayika ka parichay apane pathakon se kuchh is tarah karate hain..

".....kishanadas sharma primary school mein sanskrit ke adhyapak the. shahar ke purane, nimnamadhy vargiy ilaqe mein sankari, oobadakhabad galiyon aur badaboodar naliyon ke beech unaka pandrah rupaya mahina kiraye ka aadha kachcha, aadha pakka dumanjila makan tha. bada beta mahadev state roadways mein clerk tha. do sal pahale usaka tabadala pilibhit ho gaya tha. badi beti gayatri maan par gayi thi-gori, aakarshaka. padhaee ke naam se use rulayee aati thi, isaliye intermediate ke baad usane vivah ke shubh muhoort ki pratiksha kar ghar sanbhal liya. isase man ko bahut rahat mili, kyonki ‘zindagi bhar kolhu mein jute rahane ke baad ab bacha-khucha samay to sitaram-sumiran mein lage.’ sabase chhoti nau varsh ki gauri urf jhalli thi. usake oopar terah varsh ka kishor aur bichon-beech ki sanvali, lanbi-chharahari, badi-badi aankhon vali silbil urf yashoda sharma. ...."

ye upanyas shahajahanpur ki ek aam nimnamadhy vargiy kishori silbil ke apane chhote shahar ke dakiyanoosi parivesh se nikal dilli ke rangamanch aur fir munbaee ke cine jagat mein ek kabil aur sthapit abhinetri banane ki sangharsh gatha hai.

silbil ke charitr ke kaee aayam hain. silbil apane jivan ki niyati se dukhi hai. apane parivesh se nikalane ki chhatapatahat hai usamein. nahin to vo gharavalon se bina poochhe apana nam yashoda sharma se varsha vashishth kyoon karavati? apani shikshika ki madad se rangamanch se judane vali silabila, apane pahale manchan mein safalata ka svad chakh ise hi apani mukti ka marg man leti hai aur apani sari shakti apani abhinay kala ko aur paripakv aur parimarjit karane mein laga deti hai.

jivan ke naye anubhavon se gujarane mein varsha vashishth ko koee hichakichahat nahin, chahe vo usake bachapan aur kishoravastha ke parivesh aur moolyon se kitana alag kyoon na ho. balki inaka aanand lene ki ek utkantha hai usamein. par usake vyaktitv ki visheshata hi yahi hai ki ye anubhav use apane antim lakshy se kabhi nahin diga pate.

apane kendriy charitr ke madhyam se is upanyas mein surendra verma ne samaj, rangamanch aur cine jagat se jude vibhinn pahaluon ko chhoone ki koshish ki hai. par jab vo rangamach se judi barikiyon ko vishleshit karate hain to unaki lekhani sabase sashakt jaan padati hai. shayad ye isaliye bhi hai ki rangamanch unaka karyakshetra raha hai. surendra verma ne rangamanch ke jis paridrshy ko ubhara hai vo aaj bhi bahut kuchh waisa hi hai. kitane hi naujavan aur navayuvatiyan desh ke kone kone se rashtriy naty vidyalay mein aate hain to is josh aur samarpan ke sath ki kala ke is madhyam mein apani chuni huee vidha mein ve ek alag pahachan bana saken aur jisase unaka jivan bhar ka ek atoot rishta bana rahe. par ye samarpan dhire-dhire tab ghatata chala jata hai jab vo is kroor saty se mukhatib hote hain ki is kshetr mein ki gayee athak mehanat ek kalatmak santosh to de pati hai par vo jivakoparjan ke liye paryapt nahin hoti. aur is saty ne kalatmak rangamanch ko cine jagat aur niji chainalon ke dharavahikon mein jane ka jariya bhar bana diya hai.

cine aur dharavahik jagat ki farmoolapriyata sachche aur manje kalakaron ko kis tarah samajhauton ka gulam bana deti hai is bat ko bhi lekhak ne kathanak ke madhyam se ukera hai.

surendra verma ki lekhan shaili mein hasya ke put jyada nahin hai jo kabhi kabhi upanyas ke kuchh anshon ko bojhil kar dete hain. . kuchh had tak to isake liye kathanak jimmevar hai. par kuchh hisson mein unaki lekhani ganbhir ghatanakram mein halke fulake lamahe de jati hai. ab yahin dekhiye silbil aur usake ghar ke tote anushtup ke sanbandhon ko surendra verma kis roop mein pesh karate hain

silbil ke sath anushtup ka sanbandh vaisa hi tha, jaise baghin ka hirani se hota hai. jaise hi silbil samane aati, anushtup ki tokataki shuru ho jati, ‘‘silbil dhire bolo,’’ ‘‘silabila, tulasi mein pani nahin diya ?’’ ‘silabila, der laga di. ’’

silbil ki pahali rananiti anushtup ko apani or fodane ki bani. usane mitha gripewater pilaya, sardi se pinjra dhoop mein rakha, mishri ki dali khilayi. par jab is par bhi anushtup ne apane chhand ka mool-bhav nahin chhoda, to usane gobarabhari hari mirch pinjre ki katori mein rakh di. is par anushtup ne ‘silbil kapati hai’(usaka shabd-chayan ritikal ke nikat padata tha aur jivan-drshti bhakti kal ke !) ki rat laga kar man ki dant ki bhoomika bana di.

surendra verma ne itane mote upanyas ki rochakata ko banaye rakhane ki poori koshish ki hai aur wo safal bhi hue hain, par kayee bar natako se sanbadhit shabdavali se unaka atishay prem khatakata hai. jab jab kahani dilachasp mod leti hai vo apane patron ke vartalap ke pahale 'natakiy samakshata' shabd ko doharana nahin bhoolate jo bar bar padane mein bada ajeeb sa lagta hai

ye to nahin kahoonga ki ye kitab meri sabase pasandida kitabon ki ferahist men aa gaee hai par fir bhi isake lagabhag 600 prshthon se gujarana kul milakar ek achchha anubhav tha