Monday, March 31, 2008

Runa Laila : Tumhein Ho na Ho Mujhko To Itna Yakeen Hai..


Baat sattar ke dashak ke uttarardh ki hai jab garmi ki tapati dupahari men hamara parivar do rikshon men savar hokar patna ke 'vaishali cinema haal' me Amol Palekar aur Zarina Bahav ki film 'Gharonda' dekhane gaya tha. sabhi ko film bahut pasand aaee thi. bhala kaun sa madhyamavargiy parivar ek bade makan ka sapana nahin dekhata . isaliye jab film mein in sapanon ko banate banate tootata dikhaya gaya to vo thes kalakaron ke madhyam se sahaj hi ham darshakon ke dil men utar hi gayee thi. us waqt jo geet cinema hall ke bahar tak hamare sath aaya vo tha do divane shahar mein...raat ko aur dopahar men ik aabodana dhoondhate hain.. gayak ne 'aabodana' ki jagah makan kyon nahin kaha, ye prashn bahut dinon tak balaman ko mathata raha tha. ab aabodana ka rahasy :) to bahut baad mein jakar udaghatit huaa.

Din beetate gaye aur jab college ke sanay geet sunane ki naee-naee lat lagi to cassetts ki niyamit kharidadari shuru huee. pahali bar tabhi dhyan gaya ki are is gharaunda ke kuchh geet to Gulzar ne likhe hain aur ye bhi pata chala ki 1977 mein do divane shahar mein.... ke liye Gulzar filmfarwr award se sammanit huye the. sare geet bar bar sune gaye aur is bar jo geet dil men baith sa gaya vo Roona laila ji ka gaya ye geet tha. Is nazm yani 'tumhen ho na ho....' ko Naqsh Lyallpuri ne likha tha. kya kamal ke lafj diye the naksh sahab ne.

dil aur dimag ki kashamakash ko bilkul sidhe bolon se man men utar diya tha unhonne.. ....ab dimag apane aham ka shikar hokar lakh mana karata rahe ki vo prem se koson door hai par bechain dil ki harakaten khud ba khud gavahi de jati hain.

is geet ko sangeetabaddh kiya tha jaydev ne. gaur karen ki is geet men dhun ke roop men seeti ka kitana sundar istemal huaa hai. is geet ki bhavanayen, geet men aate thaharavon aur fir anayas badhati tivrata se aur mukhar ho kar samane aati hai. jahan thaharav dil men aate prashnon ko rekhankit karate hain vahin gati dil men prem ke umadate pravah ka pratik ban jati hai. is geet ko film men ek bar poore aur doosari bar aanshik roop men istemal kiya gaya hai. to pahale suniye poora geet






tumhen ho na ho, mujhko to, itana yakin hai
mujhe pyara, tum se, nahin hai, nahin hai

mujhe pyara, tum se, nahin hai, nahin hai
magar mainne ye raj ab tak na jana
ki kyoon, pyari lagati hain, baten tumharin
main kyoon tumase milane ka dhoodhoon bahana
kabhi mainne chaha, tumhein chhu ke dekhoon
kabhi mainne chaha tumhein paas lana
magar fir bhi...
magar fir bhi is bat ka to yakin hai.
mujhe pyara, tum se, nahin hai, nahin hai


fir bhi jo tum.. doora.. rahate ho.. mujhse
to rahate hain dil pe udasi ke saye
koyee, khwab oonche, makanon se jhanke
koyee khwab baitha rahe sar jhukaye
kabhi dil ki rahon.. men faile andhera..
kabhi door tak roshani muskuraye
magar fir bhi...
magar fir bhi is bat ka to yakin hai.
mujhe pyar tum se nahin hai, nahin hai

tumhen ho na ho mujhko to itana yakin hai
mujhe pyar tum se nahin hai, nahin hai
tumhen ho na ho mujhko to itana yakin hai

jaisa mainne pichhali post men bhi kaha ki roona laila ka hindi filmon men gaya ye mera sabase priy geet hai. roona ji ki aavaj geet ke utar chadav ko badi khoobasoorati se prakat karati chalati hai. jab nayak sapanon ke tootane se upaji kheej se modi ko safalata (kahani ka ek patra) ko sidi banane ki baat karata hai to nayika ko lagane lagata hai ki mainne sacha,aise shakhs se prem nahin kiya tha aur geet ke doosare roop men yahin bhavana ubharati hai. roona ji ki aavaj ki gaharaee yahan aankhon ko nam kar deti hai.




What do you think about this song. Click Here to post your comments.

Friday, March 28, 2008

Runa Laila : Dil ki Halat ko Koyee Kya Jane..

Click Here to read this post in Hindi (Devnagari) script.

To aaj baat Runa Laila ji ki kyonki aaj inaki hi ek gair filmi udas najm aapako sunava raha hoon jo mainne nabbe ke dashak men suni thi. aapako to pata hi hoga ki runa laila bangaladesh se hain. behad chhoti umr se unhonne Ustad Habibiddin Khan se shastriy sangeet ki shiksha leni shuru ki. matr 6 saal ki aayu men unhonne bataur gayak apana janata ke samane pahala karyakram diya.

12sal ki umr men unake geet pakistani film 'Jugnoo' men shamil huye. par ye mauka bhi unhen achanak hath laga. gane ke liye chunav unaki badi bahan dina ka huaa tha par jis din unhen gana tha unaka gala kharab ho gaya aur runa ko unaki jagah gane ko kaha gaya. nanhi runa ko us vakt tanapoora bhi pakadane nahin aata tha so tirachha na rakh kar sidha rakh kar runa ne ek 'khayal' gaya jo logon ko behad pasand aaya. usake bad to unaka career graph oopar hi chalata gaya.

runa bangaladesh, pakistan aur bharat men saman roop se lokapriy hueen. khasakar 'dama dam mast kalandar' ki lokapriyata ke bad runa laila hindustan ke kone kone men jani jane lagin thi. panch hajar se adhik geet gane valin runa, 17 bhashaon ka jnyan rakhati hain. kayee hindi filmon men apani aavaj de chuki hain jinamen gharonda film ke liye gaye unake geet to mujhe behad priy hain. aaj bhi runa vishv ke kone kone men apane stage show karati rahati hain.

mujhe runa ji ki aavaj hamesha se pasand hai. aur jab jab dil men mayoosi aur bechaini ka put jyada ho jata hai to unaki is najm ko sunana achchha lagata hai.

ye kaisa ai nikharate badalon tum par shabab aaya
koee eeman kho baitha, koee eeman le aaya
farishton ki ibadat se batao dushmani kyon hai
kisi ke vaste koee tadap kar jan de aaya

dil ki halat ko koee kya jane
dil ki halat ko koee kya jane
ya to ham jane ya khuda jane

subah ke sath hain hasin kiranen
rat saj jaye chand taron se
subah ke sath hain hasin kiranen
rat saj jaye chand taron se
yek ham hain ki kya mukaddar hai
koee rishta nahin baharon se
kash de den haye ~ ~ ~
kash de den sukoon virane
dil ki halat ko koee kya jane
ya to ham jane ya khuda jane

kya sitam hai ki motiya boonden
kachche jakhmon ko gudagudati hain
in ghataon ka kya kare koee
jo sada khoon hi rulati hain
ab kahan jayen haye ~ ~ ~
ab kahan jayen dil ko bahalane

dil ki halat ko koee kya jane
ya to ham jane ya khuda jane




Is najm ko sangeetabaddh kiya tha mashahoor sangeetakar svargeey O.P. Naiyar ne aur ise likha tha Noor Devasi sahab ne. ye najm album 'Loves of Runa Laila' men hai jise aap yahan se kharid sakate hain.

Tuesday, March 25, 2008

aaiye suniyein dastaan ek sathi blogger se mulaqat ki..

Click Here to Read this post in Hindi (devnagari) script.


Pichle do hafton se is muye Typhoid ke bukhar ne apni giraft mein jakad rakha hai. Is wajah se blogging pe viraam lag gaya hai. to aaiye aaj jikra apni ek co blooger se mulaqat ka

Jee haan aaj aapako milavate hain hamari sathi mahila chitthakar Kanchan Singh Chauhan se jinse 29 Feb ko meri mulakat lakhanaoo men huee thi. kanchan chauhan se pahala sanpark aarakut ke gopal das niraj samooh par huaa tha.vahan se main unaki profail par gaya tha to ye panktiyan padakar mantramugdh ho gaya tha

nitya samay ki aag men jalna,
nitya siddh sachcha hona hai,
maan ne diya nam jab kanchan,
mujhako aur khara hona hai


mujhe jivan men aksar aise log achchhe lage hain jinamen apane hunar ke prati aatmavishvas ho aur apane ichchhit lakshy ki prapti ke liye dhairy aur parishram se parahej na ho. aisa isaliye bhi hai ki aise logon ki sangat aapako bhi utprerit karati hai apani karmathata banaye rakhane ki. aur in panktiyon ke pichhe mujhe aise hi insan ki halki chhaya jaroor dikhi.

unaki chitthe ki profile par aaj jo tasavir hai ,vahi us vakt orkut par thi par ye bat mainne kabhi gaur nahin ki ki chitr men vo wheel chair par baithin hain. jab mujhe ye bat kanchan se pata chali ki vo bachapan se polio ki samasya se peedit hain to main stabdh rah gaya.

ye kanchan ki jivatata ka hi kamal hai ki bina wheel chair ke ye ladaki school aur college ki sidhiyan ghisat ghisat kar chadati rahi, girati rahi, dabati rahi fir bhi apani hatasha par kabu pakar in visham paristhitiyon ko kabhi padaee ke bich nahin aane diya.

kanchan ke pita ki khvahish thi ki bitiya college mein angreji vishay jaroor chune. pita to nahin rahe par unaki ichchha ko poorn karane ke liye kanchan ne pahale angreji men parasnatak kiya aur fir apani ichchha ke vishay hindi men bhi. kanchan, filahal ek sarakari mahakame men hindi anuvadak ke pad par karyarat hain. par krtidev men anekon pandulipiyon ko likhane ke bad bhi ye is bat se anibhijny thin ki unicode bhi koee chij hoti hai. inhen mainne paricharcha men jane ki salah di ki vahan bahut sare log aapako unicode men type karane ke aujar aur gur sikha denge.
par unaki unicode sikhane ki lagan aur unaki kavitaon ki gunavatta ko dekhane ke bad mainne man hi man nishchay kiya ki kanchan ki pratibha ko sahi roop men jyada logon tak ek chitthe ke madhyam se pahunchaya ja sakata hai. kanchan paricharcha mein to niyamit roop se kavita likhati rahin par apna chittha banane ki jab bhi bat hoti unaki svasth samasyayen aade aa jatin. khair , vo asvasthata ke daur se bahar nikalin aur fir hriday gavaksh astitv men aaya. itane kam samay men bhi chitthakaron aur pathakon ka jo prem unhen mila hai vo unaki lekhan pratibha ka praman hai.


Aise mein Lucknow ek shadi men jane ka karyakram bana to mainne kanchan ko apane karyakram ki soochana di. jab mainne ye paya ki inake ghar se mere rahane ke sthan ki doori 20 kmi hai to mainne kaha ki aapako vahan tak pahunchane ya mujhe liva lane men samasya aayegi. ab bolane men kanchan kam ustad nahin hai, turant kah baithin

"..aap chinta kyon karate hain? aapako bas nirdisht sthan tak pahunchana hai, vahan se aapako uthava liya jayega...."

khaira, mujhe steshan tak pahunchane ko kaha gaya. nirdharit samay par pahunch gaye. agala aadesh aaya ki ab rani kalar ki kamij pahane yuvak aapako steshan par risiv karega. jab bis pachis minat gujar gaye to mainne chahalakadami karani shuru kar di. isi bich do tin rani kalar kamij vale najar bhi aaye jinake aamane samane se main do tin bar aasha bhari nigahon se gujara par kisi ne dhyan nahin diya. jab pratiksha karate karate 40-45 minute gujar gaye to khabar aaee ki kinhin aparihary karanon se aapako lane vale doot ko badal diya gaya hai.

thodi hi der bad avadhesh mere samane the. ve mujhe lakhanaoo ka darshan karate huye gantavy sthan par le gaye. hamalog pahale pahunch gaye the isaliye avadhesh se unake kairiyar sanbadhit batachit huee. fir kanchan aaeen apane bhanje viju ke satha. agale do ghante khalis gapashap men bite. kanchan vyaktigat roop se mujhe milanasar aur hansamukh (isaka praman aap inake chitron ko dekh kar kar sakate hain)insan lagin. parivar ke sare bade chhoton ki vo chaheti rahi hain. bade chhoton men neh bantana inhen bakhoobi aata hai. is bat se inaki likhi ye kavita yad aati hai..

tum apani paribhasha de lo, vo apani paribhasha den len,
mere liye neh ka matalab keval neh huaa karata hai.

vahi neh jo ganga jal sa sare kalush mita jata hai,
vahi neh jo aata hai to sare dvesh mita jata hai.

vahi neh jo dena jane lena kahan use bhata hai,
vahi neh jo bina sikhaye khud hi tyag sikha jata hai.

vahi neh jo bin dastak ke chupake se man men aata hai,
vahi neh jo sadharan nar men devatv jaga jata hai
.

par balakon ne ye bhi bataya ki ghar men inaki nirankush satta chalati hai:). jid par aa jayein to bat vat karana band kar den tab inhen manane ke kaee purane nuskhe apanane padate hain, jisamen aksar kamayabi mil hi jati hai.

kanchan sanyukt parivar men pali badi hain aur samaj men nari ke kiradar ki unaki ek soch hai jinake kuchh binduon par meri unase kaee bar bahas ho chuki hai. vahi charcha yahan bhi khinch gaee ki kya ladake aur ladakiyon ke lalan-palan men ham aaj bhi kya ek mapadand ko apanate hain? sabane apane apane anubhav bante. fir viju ne bataya ki use Jodha Akbar men kya achchha laga. sahity aur sangit men kanchan ki khasi abhiruchi rahi hai aur mainne socha tha kuchh unaki pasandida kitabon ke bare men bhi unaki ray loonga par ghadi ki sueeyan teji se aage bad rahin thin. 1.30 baj rahe the aur mujhe vapasi ki train pakadani thi isaliye kanchan aur viju se vida lekar main avadhesh ke sath vapas station ki or chal pada.

ab dekhiye is mauke par li gaee kuchh tasaviren aur han kanchan ji ki shikayat hai ki mere kaimare ne unhen 20% extra dark dikhaya hai. mainne unaki shikayat soni company tak pahuncha di hai par filahal to main yahin kah sakata hoon ki aap log chitr dekhate samay is hisab se aavashyak filtareshan kar hi unaki koee chhavi man men banaeey :)






ये हम तीनों के व्यक्तित्व का कमाल था कि कंचन चित्र लेते समय अंदर से बाहर तक हिल गईं:p


Click Here to post your comment.

Tuesday, March 11, 2008

Asantosh Ke Din by Dr. Rahi Masoom Raza

Click Here to Read this post in Hindi (Devnagari) script.

'Rahi Masoom Raza' ki likhi ghazalon , filmi patakathaon se to mera poorv parichay tha, par ek upanyasakar ke roop men mainne unhen pahale nahin pada tha. unake nidhan par chitthajagat men unake sahityik jivan ki jhanki jaroor padane ko mili thi aur ye bhi pata chala tha ki 'aadha ganv' unaki ek prasiddh rachana hai. isaliye apane pustakalay men mote-mote granthon ke bich dabi sahami jab yah pustak apana asantosh jahir karati dikhi to ise padane ki utsukata huee.

rahi ka ye upanyas assi ke dashak men munbaee men huye bhishan dango ki prshthabhoomi men likha gaya hai. dangon ki bhayavahata aur usake pichhe ki chhichhali razaniti se vyathit 'rahi' bina kisi lag lapet ke dharadar bhasha men apani bat kahate hain jo aaj bhi utani hi prasangik hai. maharashtr men aaj jis tarah ki razaniti ho rahi hai usake beej assi ke dashak men vibhinn kshetriy dal pahale hi bo chuke the. jin prashnon ko rahi masoom raza sahab ne apani is kitab men uthaya tha, usaka uttar pane ke liye ham sabhi aaj bhi joojh rahe hain. misal ke taur par rahi ke in savalon par gaur karen..

"...shri bal thakare "aamachi mumbai kahate hain. parantu 'aamachi' ki paribhasha kya hai? usaki simayen kya hain! aur yadi bambaee aamachi' hai to hindustan kisaka hai?

bambaee shri bal thakare ki hai. tamilanadu DMK ya AIDMK ka hai . aandhr NTR ka hai.....panjab bhindaravale ka hai. banaras bhagavan shankar ka hai. ajamer khvaja mueenauddin chishti ka hai! UP eta ke dakuon ka hai aur razasthan chanbal ke dakuon ka.....par mujhe koee sare jahan se achchha jo hindustan hai usaki postal edres nahin batata. yah nahin batata ki hidustan ka dakhil kharij kisake nam hai?
ai lavaris mulk tu mera hai. ......."

dangon ke itihas men police ki karyapranali par hamesha prashnachinh uthate aaye hain. dangon men police ke vyavahara, usaki manasikata ko khule shabdon men vyakt karate huye vo kahate hain

"...tum marathe itana tachi kyoon hote ho?" abbas ne poochha. "are bhaiya UP men bhi police musalamanon ko marati hai. yahan police men marathe jyada hai. jo karnatak maharashtr ki sima par karnatak ke brahmanon aur marathon ke bich ladaee hogi to vah karnatak ke brahmanon ko bhi maregi. uttar pradesh ki PAC men kanyakubj brahman jyada hain to vah thakuron, harijanon aur musalamanon ko marati hai. police men hamin tum hote hain na. ham apane muhallon, apane gavon,apane kasbon ke sare dara, vahan ki sari nafaraten, sare tanav lekar police kvatars men jate hain. police men musalaman jyada honge to police hinduon ko maregi........"

yek sau gyarah panne ki is kitab men rahi dvara rachit charitr utane mahattvapoorn nahin hai. mahattvapoorn hai to in charitron ka samajik parivesh aur unake ird gird panapati samasyayen. upanyas ke patron ka prayog rahi munbaee ya ek tarah se kahen to poore desh ke samajik dhanche men faili garibi, ashiksha, jativada, sanpradayikata aur ochhi razaniti ke chakravyooh ka pardafash karane men karate hain. ab yahin dekhiye mumbai ki slum mein rahate aur panapate parivaron ki dasha disha ka kitana jivant chitran kiya hai raza sahab ne

".....khate pite garib vah hai jo vastav men garib nahin hain. jab bambaee aaye to vo avashy garib the. kothari bhi n le sake to kahin sarakari jamin par ilake ke dada ki ijajat se jhopadi dal ke rahane lage.
yah jhopadi premachand ki kahaniyon si jhopadi nahin hoti. ise jhopadi isaliye kahate hain ki isaka namakaran nahin kiya ja saka hai. yah tin char fit oonchi ek chij hoti hai jisaki divaren sade gale paiking ke bakse ki hoti hain. oopar fati huee tirapal ya plastik ka tukada, n daravaja, na khidaki. log unase rengakar andar jate hain aur rengakar bahar jate hain...yah eemanadar kamagaron ki jhopadiyan hain fir inhin jhopadiyon men hari lal jhandiyan laga kar dulhan le jayi jati hai. fir inhin jhopadiyon men bachche hote hain...fir un bachchon men koee jebakatara ho jata hai. koee kachchi daru ke dhandhe men lag jata hai...koee kisi dada ke sath lagakar kisi taskari ya MP, MLA ki chhatr chhaya men chala jata hai. fir ghar men thoda paisa aane lagata hai. jhopadi ka jara kad nikal aata hai. daravaja lag jata hai. khidakiyan ban jati hain. tin ki chhat pad jati hai. fir idhar udhar ki jamin jud jati hai. kabhi kabhi ek manjil or chad jati hai aur chhat tail ki ho jati hai...."


rahi ka man akhand bharata, anekata men ekata, dharmanirapekshata jaise jumalon ko jamini hakikat se bahut door manata hai. unake dil ki narazagi is kadar hai ki vo bade bade razanetaon ko bhi nahin bakhshate..

"...log kahate hain pandit motilal ki musalaman patni thi..han bhaee to patni thi na !aur priyadarshani ne jo firoj gandhi se shadi ki...firoj gandhi parasi the jo vah musalaman hote to gandhiji yah shadi kabhi na hone dete....."

kitab sirf razanetaon par tanj nahin kasati.. sath hi ali saradar jafari aur majarooh sulatanapoori jaise pragatishil aur dimagi shayar raza sahab ki lekhani ki chapet men aa jate hain.

par jab vo kahate hain ki is desh men

"....dharmanirapekshata ki jamin bahut kamajor hai. kudal favade ki jaroorat nahin hai, nakhoon se jara sa khurachen to dharmanirapekshata kagaj ki tarah fat jati hai aur koee shahi imam,, koee devaras, koee bhindaravale, koee bal thakare nikal aata hai. sanpradayikata ka pret hamare andar dilon ki kisi gali men chhup kar baitha hai aur jab kisi tarah se roshani aane lagati hai to ye pret uthakar dil ke daravaje khidakiyan band kar deta hai. ...."

to mera dil bhi unake jajbaton ki gavahi deta hai. jaisa ki kitab ke aaranbh men prakashak ke not men kaha gaya hai ki

"is krti ki mang hai ki in savalon se joojha aur takaraya jaye. isi samay isake uttar talash kiye jayen anyatha manushy ke astitv ki koee garanti nahin rahegi."

pustak ke bare men
naam : Asantosh ke din
lekhak: Late Dr.. Rahi Masoom Raza
prakashak: raajkamal prakashan
pratham sanskaran: 1986

Click Here to post your opinion.

इस चिट्ठे पर आप इन पुस्तकों के बारे में भी पढ़ सकते हैं
गुनाहों का देवता, कसप, गोरा, महाभोज, क्याप, एक इंच मुस्कान, लीला चिरंतन, क्षमा करना जीजी, मर्डरर की माँ, दो खिड़कियाँ, हमारा हिस्सा, मधुशाला

Saturday, March 08, 2008

Varshik Geetmala 2007 : Sartaaz Geet Up- Yoon Toh Main Dikhlata Nahin, Teri Paravah Karta Hoon Main Maan...

Click Here to read this post in Hindi (Devnagari) script.


pratiksha ke pal samapt huye. waqt aa pahuncha hai varshik sangeetamala ke sarataji bigul ke bajane ka..

Baat pichhale November ki hai. main apni is sangeetamala ke liye pasandida geeton ki ferahist taiyar karane mein juta tha. par 15-16 geeton ki soochi taiyar karne ke baad bhi apani pratham do sthanon ke layak mujhe koyee geet lag hi nahin raha tha. par tab tak mainne 'tare zameen par' ke geeton ko nahin suna tha. TV par bhi shuruaat men sirf shirshak geet ki kuchh panktiyan dikhaee ja rahi thin. December ka antim saptah aane vala tha aur pahali panyadan ki jagah abhi tak khali thi. aur tabhi ek din kisi ef em chainal se is geet ki pahali do panktiyan udati udati sunaee din....

main kabhi batalata nahin par andhere se darata hoon main maan
yoon to main dikhalata nahin, teri paravah karata hoon main maan...

hrday jaise tham sa gaya. turant internet par jakar ye geet suna aur geet ki bhavanayen is kadar dil ko chhu gaeen ki aankhen nam huye bina nahin rah sakin.

kuchh geet jhoomane par vivash karate hain...
kuchh ki melodi man ko baha le jati hai...
vahin kuchh ke shabd hrday ko math dalate hain, sochane par vivash karate hain.

'Ek Shaam Mere Naam' ki varshik sangeetamalao.n men mainne aise hi teesari koti ke geeton ko hamesha se sal ke 'Sarataj Geet' ka tamaga pahanaya hai aur shayad isaliye aap men se bahuton ne meri pasand ke sarataj geet ki sahi pahachan ki hai.

zindagi mein apane nate rishtedaron ke sneh ko baraha ham 'Taken for Granted' le lete hain. ham bhi unase utana hi prem karate hain par vyakt karane men pichhe rah jate hain. aise rishton men hi sabase pramukh hota hai maan ka rishta ...

ye geet mujhe yad dilata hai ...
man ke hath se khaye un kauron ke svad ka.....
bukhar men tapate sharir men sab kam chhod chintit chehare ke us mamatamayi sparsh ka...
apani paravah na karate huye bhi apane bachchon ki khushiyon ko tarajih dene vali us nisvarth bhavana ka....

Prasoon ka geet to maan ke bina apane aap ko manasik roop se asurakshit mahasoos karate bachche ki kahani kahata hai, par sunne vala bachche ka dard mahasoos karte karte apane bachapan mein laut jata hai aur isi wajah se geet se apane aap ko itana jyada juda mahasoos karata hai.

Varshik Sangeetamala 2006 ke sarataj geet agale janam mohe bitiya na kije ko likhane vale Javed Akhtar sahab is geet ke bare mein kahte hain

"........yoon to tare zameen par ke sare geet stareey hain par vo geet jo mujhe hriday ki tah ko chhoota hai vo maan...hi hai. aalam aaara ke bad saikadon geet maan ko yad karate huye likhe gaye hain par fir bhi
ye geet apani saadi sahaj bhavanaon se hriday ke taron ko jhankrt sa karata chala jata hai. geet ke shabda, isaki dhun aur behatarin gayiki is geet ko itana prabhavashali banane men madad karati hai. bas itana hi kah sakata hoon ki geet ki antim panktiyon ko sunate sunate meri aankhen sookhi nahin rah gaeen thin....."

shankar ehasan loy ki sabase badi kabilayit is bat mein hai ki vo bakhoobi samajhate hain ki geet ke sath sangeet ka put utana hi hona chahiye jis se usaki prabhavotpadakata kam na ho. baten bahut ho gaeen ab svayam mahasoos kijiye is geet ko



Get this widget Track details eSnips Social DNA





main kabhi batalata nahin par andhere se darata hoon main maan
yoon to main dikhalata nahin, teri paravah karata hoon main maan
tujhe sab hai pata, hai na man......meri maan

bhid men yoon na chhodo mujhe, ghar laut ke bhi aa na paoon maan
bhej na itana door mujhako too, yad bhi tujhako aa na paoon maan
kya itana bura hoon main maan, kya itana bura.............meri maan

jab bhi kabhi papa mujhe jor jor se jhoola jhulate hain maan
meri najar dhoondhe tujhe, sochoon yahi tu aake thamegi maan
tumase main ye kahata nahin, par main saham jata hoon maan
chehare pe aane deta nahin, dil hi dil men ghabarata hoon maan
tujhe sab hai pata, hai na maan......meri maan

main kabhi batalata nahin, par andhere se darata hoon main man
yoon to main dikhalata nahin, teri paravah karata hoon main man
tujhe sab hai pata, hai na maan......meri maan


isi geet ka ek tukada geet ke thodi der bad aata hai, (jo samanyatah internet par nahin dikhaee deta) bachche ki sanvedanahin trasad sthiti tak pahunchane ki katha kahta hai

aankhen bhi ab to gumasum hueen
khamosh ho gaee hai ye juban
dard bhi ab to hota nahin
yehasas koee baki hain kahan
tujhe sab hai pata, hai na maan


mere liye ye apaar harsh ki baat hai ki ye geet is sal ke filmafair aur RMIM puraskaron ke liye bhi sarvashreshth geet ke roop men chuna gaya hai.

Doston do mahine se chalati aa rahi is varshik sangeetamala ke safar par aap sab mere sath rahe isaka main shukragujar hoon. Ye samay karyalay ke lagatar aate kamon ki wajah se mere liye ativyastata vala raha isaliye ye shrrnkhala Feb men khatm hone ke bajaye March tak khinch gaee. aasha hai geetamala men pesh kiye gaye geeton men se jyadatar aapake bhi pasandida rahe honge. To ye silsila khatma karne ke pehle ek nazar phir se pher lee jaye is sangeetmala ke pratham 20 ggeton ki or.


इस संगीतमाला के सारे गीत




If you also like the song & this countdown. Click Here to post your opinion about it.

Tuesday, March 04, 2008

Varshik Geetmala : Runners Up- Kho Na Jayein Ye..Tare Zameen Par..

Click Here to read this post in Hindi (Devnagari) script.

Varshik sangeetamala 2007 ke runners ap yani upavijeta ka khitab geetakar Prasoon Joshi sangeetakar Shankar-Ehasan-Loy aur gayak Shankar Mahadevan ke sammilit prayason se falibhoot 'tare zameen par' ke shirshak geet ko jata hai.

bachchon ki duniya kitani unamukta, kitani saral kitani mohak hoti hai ye ham sabhi janate hain. fir bhi hamara sara pyar apane karibiyon tak hi seemit rah jata hai. apani-apani jindagiyon men fanse ham usase jyada door tak dekh hi nahin pate. par bina kisi poorvagrah ke jab aap kisi bhi bachche ke hansate khelati jindagi men jhankate hain to man pulakit huye bina nahin rah pata.

par sare bachche itane bhagyashali nahin hote. jivan ki paristhitiyan waqt ke pahale unse unaka bachapan chhin leti hain. kya ham bevakt apani zindagiyon se joojhate in bachchon se apana koyee sarokar dhoondh pate hain. nahin...kyoonki bahut kuchh dekhate huye bhi hamane apane aap ko bhavashoony bana liya hai. vo is liye bhi ki is bhagati daudati zindagi ke tanavon ke sath sath agar jab ye sab sochane lagein to hamari kheejh badh jati hai. khud se aur is samaj se bhi. par man hi man ham bhi janate hain ki hamara ye tnazariya sahi nahin. ye geet hamein ek samajik sanvedanashil prani ki haisiyat se apani zimmedariyon ka ahasas dilata hai.


Prasoon Joshi ne is geet men jo kamal kiya hai usake bare men javed akhtar sahab ne apani hal hi mein ek angreji web site par ki gayee sangeet samiksha men likha hai...

".....kho n jayen ye..tare zameen par.. ek behad bhavanatmak aur prabhavashali geet hai. is geet ki eemanadari aur sahajata ko jis tarike se Shankar Mahadevan ne apani gayiki men utara hai vo aapako iske har shabd par vishvas karane par majaboor karata hai. Prasoon ne apni srjanatmak pratibha ka parichay dete huye bemisal roopakon ka prayog kiya hai. geet ke bol aapako har roopak ki alag-alag vivechana karane ko nahin kahate par ve aapake ird-gird ek aisa mahaul taiyar karate hain jisse aap pyar, komalata aur daya ki indradhanushi bhavanaon mein bahe chale jate hain. ye geet ek dhamake ki tarah khatm nahin hota ..bas parshv men dheere dheere doobata huaa vileen ho jata hai..kuchh is tarah ki aap ise sun to nahin rahe hote par isaki goonj dilo dimag men kanpan karati rahati hai....."


Prasoon Joshi ke geet ko apane sangeet se dil tak pahunchaya hai shankar-ehasan-loy ki tikadi ne. ye kahne men mujhe koee sandeh nahin ki mere liye is saal ka sarvashreshth sangeetkaar, yahi tikadi rahi hai. geet ke mood ko samajhate huye usi tarike ka sangeet dena unaki khasiyat hai. to chaliye sunate hain ye pyara sa nagma...

dekho inhen ye hain
oos ki boondein
patton ki god mein ye
aasman se koodein
angadaee len fir
karavat badal kar
nazuk se moti
hans de fisal kar
kho n jayen ye..tare zameen par..

yah to hain sardi men
dhoop ki kiranen
utaren jo aangan ko
sunahara sa karane
maॅn ke andheron ko
raushan sa kar den
thithurati hatheli ki
rangat badal den
kho n jayen ye..tare zameen par..

jaise aankhon ki dibiya men nindiya
aur nindiya men mitha sa sapana
aur sapane men mil jaye farishta sa koee
jaise rangon bhari pichakari
jaise titaliyan foolon ki kyari
jaise bina matalab ka pyara rishta ho koee
yah to aasha ki lahar hai
yah to ummid ki sahar hai
khushiyon ki nahar hai

kho n jayen ye..tare zameen par..

dekho raton ke sine pe ye to
jhilamil kisi lau se uge hain
yah to ambiya ki khushabu hain bagon se bah chale
jaise kanch men choodi ke tukade
jaise khile khile foolon ke mukhade
jaise bansi koee bajaye pedon ke tale
yah to jhonke hain pavan ke
hain ye ghungharu jivan ke
yah to sur hain chaman ke

kho n jayen ye..tare zameen par..


mohalle ki raunak
galiyan hain jaise
khilane ki jid par
kaliyan hain jaise
mutthi men mausam ki
jaise havayen
yah hain bujurgon ke dil ki duaayen..

kho n jayen ye..tare jamin par..

kabhi baten jaise dadi nani
kabhi chikhen jaise mammam pani
kabhi ban jayen bhole savalon ki jhadi
sannate men hansi ke jaise
soone hothon pe khushi ke jaise
yah to noor hain barase gar teri kismat ho badi
jaise jhil men laharaye chanda
jaise bhid men apane ka kandha
jaise man mauji nadiya jhag udaye kuchh kahin
jaise baithe baithe mithi se jhapaki
jaise pyar ki dhimi si thapaki
jaise kanon men saragam haradam bajati hi rahe..

kho n jayen ye..tare zameen par..

Get this widget | Track details | eSnips Social DNA


Do you also like this song? Click Here to give your opinion.

Saturday, March 01, 2008

Varshik Geetmala : Song no. 3 - Heere Moti Main Na Chahoon...

Click Here to read this post in Hindi (Devnagari) script.

Varshik sangeetamala ki teesari seedhi surakshit hai ek aisi aavaj ke liye jo apane aap mein divy hai. Ek aisa kalakar jo jab apani poori lay men dooba hota hai to aisa lagata hai ki param pita parameshvar tak usake gayan ki goonj pahunch rahi hogi. Ji han main Kailash Kher ki bat kar raha hoon. Merrut ki galiyon se Delhi aur fir Andheri ke platform se kali honda city ki savari karane vale Kailash ke sangeetik safar ki dastan to main pahale yahan suna hi chuka hoon.

Kailash ki gayiki men unake bachapan ke gramin parivesh aur pita ke adhyatm prem ka seedha asar hai. Kailash kaha karate hain, ki bachapan se unake ghar men santon, fakiron ka aana jana laga rahata tha. Ekatare par gate huye jab kailash unhen dekhate to unaki baton ka poorn arth na samajhate huye use gane lagate. Lok dhunon ke prati kailash ka jhukav bhi isi parivesh ki upaj raha hai. Kailash ka manana hai jo geet jeevan aur prakrti ke satyon ko udghatit kare vo hi man ko sabase jyada sukoon deta hai aur vo isi bat ko man men rakhakar apane geeton ka tana bana bunate hain.

Is shrrnkhala ka ye ekmatr gair filmi geet hai. Teesari payadan ka ye geet kailash ke is saal release huye album jhoomo re se liya gaya hai. Yoon to Salam-e-ishq men kailash kher ka geet ya rabba..... bhi mujhe behad pasand hai par main use isaliye is geetamala men shamil nahin kar saka ki Guru ki tarah Salaam- e-Ishq ka sangeet bhi pichhale sal hi release ho gaya tha aur durbhagyavash mai use us waqt sun nahin paya tha.

Kailash Kher ke likhe is geet ki dhun banane men sahayog diya hai unake band ke sadasy Prakash Kamath aur Naresh Kamath ne. In tinon ne milkar is geet ke liye adbhut sangeet racha hai. Mujhe sabase jyada aakarshit karata hai antare ke bich taali aur setar ka prayoga. Setaar, Iran ka vo vadyayantra hai jisase bharatiya sitar viksit huaa. Is geet men setar bajane ke liye kailash ne iran ke setar vadak Tahamurej ko bulaya tha.

to aaiye padhein prem mein poori tarah apane aap ko samarpit karane vali preyasi ka apane saiyan ke liye ye pranay nivedana...

heere moti main na chahoon
main to chahoon sangam tera
main to teri saiyan.. tu hai mera
saiyan saiyan....

tu jo chhu le pyar se, aaram se, mar jaoon
aa ja chanda bahon mein, tujh mein hi gum ho jaoon main
tere nam mein kho jaoon
saiyan saiyan.......

mere din khushi se jhoomein gayein ratein
pal pal mujhe dubayen ratein jagate
tujhe jeet jeet haroon, ye pran pran varoon
haye aise main niharoon, teri aarati utaroon
tere nam se jude hain sare nate
saiyan saiyan.......

banake mala prem ki tere tan pe jhar jhar jaoon
main hoon naiya preet kee sansar se har jaoon main
tere pyar se tar jaoon
saiyan saiyan.......

ye naram naram nasha hai badhata jaye
koyee pyar se ghoonghatiya deta uthaye
ab bavara huaa mana, jag ho gaya hai raushan
ye nayee nayee suhagan, ho gayee hai teri jogan
koee prem ki pujaran mandir sajaye
saiyan saiyan.......

hire moti main na chahoon
main to chahoon sangam tera
main na janoon tu hi jane
main to teri, tu hai mera ...


Get this widget | Track details | eSnips Social DNA




(चित्र साभार हिंदुस्तान टाइम्स)

Do you like this song. Click here to post your opinion about it.