रविवार, फ़रवरी 24, 2008

Varshik Geetmala : Song no. 4 - Kyoon apne aap se khafa khafa zara zara sa naraz hai dil ?

Click Here to read this post in Hindi (Devnagari) script.

Varshik sangeetamala ki chauthi kadi samarpit hai geetakar, gayak aur samvad lekhak, rangmanch karmi Swanand Kirkire ko jinhonne 'Parinita 'aur 'Hazaron Khwahishein Aisi' ke geeton se mere dil men pichhale teen salon se ek vishesh jagah bana li thi. Khoya Khoya Chand ke is geet ko jab mainne udate udate suna to main aavak rah gaya ki inhonne to Majaaj Lakhnavi ki nazm 'Aawara' ki panktiyan mar li hain. Us waqt ye dhyan nahin raha ki geet ki agali pankti mein bakayada Swanand ne 'Majaj' ki prerana ko chinhit kiya tha. Waise to mujhe poora geet hi bhata hai par isaka ye hissa mere liye behad khas hai ,lagata hai apani hi bhavanaon ko shabd mil gaye hain

dil ko samajhana kah do kya aasan hai,
dil to fitarat se sun lo na beeeman hai
ye khush nahi hai jo mila, bas mangata hi hai chala
janata hai har lagi ka, dard hi hai bas ik sila.
jab kabhi ye dil laga, dard hi hamen mila,
dil ki har lagi ka sun lo dard hi hai ik sila !
kyoon naye naye se dard ki firak men, talash men, udas hai dila,
kyoon apane aap se khafa-khafa jara jara sa naraj hai dil

Aur jab koyee lekhak ya geetakar bar-bar ye ehasas dilate rahe ki vo aapaki bat kar raha hai to dil mein usaki jagah vishisht ho jati hai. chahe vo raat hamari to chand ki saheli hai ..... ya fir bawra man dekhane chala ek sapana.... Swanand ne hamesha meri anubhootiyon ko chhuaa hai. aakhir Swanand mein ye khasiyat kahan se aaee? Chaliye doondhate hain is javab ka hal unhi ke kathyon dvara.. ..

Kya aapako pata hai ki Swanand vanijya (commerce) ke snatak hain aur unake mata pita khud Kumar Gandharv ke shishy rahe hain? Par Swanand ka kahana hai ki unhonne kabhi sangeet ke kshetr men jane ka sapana nahin dekha tha. yuvavastha men vo yahi socha karate ki mata pita to sangeet se jude hain hi, main kuchh naya kyoon na karoon ? Unki ye soch unhen le gaee National School of drama mein. Aaj jis bahumukhi pratibha ka jauhar vo dikha rahe hain vo bahut kuchh rangamanch se jude unake dinon ki den hain. Woh khud kahate hai ki natak men to hamen sab karana hota tha. Dharavahik ki kahaniyon se lekar sanvad lekhan taka, nirdeshan se geetakar tak ka ye safar svanand ke liye apane virasat me mile sanskaron ki taraf badana bhar hai.

Haal hi men svanand ne apane ek sakshatkar men kaha

"Main abhi bhi bolachal ki bhasha aur dainik jeevan men dikhane vale bimbon ka prayog karata hoon. naye jamane ke geetakar ki haisiyat se main sirf titaliyon aur nadi jaise rupakon ka istemal baraha nahin kar sakata. Ek lekhak moolatah apne liye likhata hai par vyavasayik bandishon ki wajah se aisa hamesha nahin ho pata. Aap bhale hi khana achchha banate hon par ek khanasame ki haisiyat se ye bhi jaroori he ki agar aap 5 vyanjan apane grahakon ko khilayen to sat apani or se bhi parosein."


Gulzar ki tarah unaka manana hai ki geet aise na hon jinamen sab spasht ho, kuchh aisa bhi hona chahiye jo sunane vale ko sochane ko majaboor kare use bar bar us geet ko sunane ke liye vivash kare. Swanand geetakar ka kiradar kisi bhi halat men sangeetakar se kam nahin manate. Woh kahate hain ki main khud ek geetakar bana kyoonki gane sunate waqt mera dhyan sabase jyada geet ke bolon par rahata tha. Aakhir sahi to kahate hen vo, jyadatar geet jo hamen yad rah jate hain vo unake bolon ki vajah se.
Aaiye nazar dalein ki kya keh rahe hain Swanand is geet mein

aaj shab jo chand ne hai roothane ki than li,
gardishon men hai sitare bat hamane man li!
andheri syah jindagi ko soojhati nahi gali,
ki aaj hath tham lo ik hath ki kami khali
kyoon khoye khoye chand ki firak men, talash men, udas hai dila,
kyoon apane aap se khafa-khafa jara jara sa naraj hai dil
ye manjilen bhi khud hi tay kare,
ye fasale bhi khud hi tay kare
kyoon to raston pe fir saham saham samhal samhal ke chalata hai ye dil
kyoon khoye khoye chand ki firak men, talash men, udas hai dila,

jindagi savalon ke javab dhoondane chali,
javab men savalon ki ik lanbi si ladi mili.
saval hi saval hain soojhati nahi gali,
ki aaj hath tham lo ik hath ki kami khali!

ji men aata hai, murda sitare noch loon
idhar bhi noch loon, udhar bhi noch loon !
yek do ka jikr kya main sare noch loon !
idhar bhi noch loon, udhar bhi noch loon !
sitare noch loon main sare noch loon

kyoon tu aaj itana vahashi hai, mijaj men majaj hai ai gam e dil
kyoon apane aap se khafa-khafa jara jara sa naraj hai dil
ye manjilen bhi khud hi tay kare,
ye fasale bhi khud hi tay kare
kyoon to raston pe fir saham saham samhal samhal ke chalata hai ye dil
kyoon khoye khoye chand ki firak men, talash men, udas hai dila,

dil ko samajhana kah do kya aasan hai,
dil to fitarat se sun lo na beeeman hai
ye khush nahi hai jo mila, bas mangata hi hai chala
janata hai har lagi ka, dard hi hai bas ik sila.
jab kabhi ye dil laga, dard hi hamen mila,
dil ki har lagi ka sun lo dard hi hai ik sila !
kyoon naye naye se dard ki firak men, talash men, udas hai dila,
kyoon apane aap se khafa-khafa zara zara sa naraj hai dil

ye manjilen bhi khud hi tay kare,
ye fasale bhi khud hi tay kare
kyoon to raston pe fir saham saham samhal samhal ke chalata hai ye dil
kyoon khoye khoye chand ki firak men, talash men, udas hai dila,
kayoon apane aap se khafa-khafa jara jara sa naraj hai dil
ye manjilen bhi khud hi tay kare,
ye fasale bhi khud hi tay kare
kyoon to raston pe fir saham saham samhal samhal ke chalata hai ye dil
kyoon khoye khoye chand ki firak men, talash men, udas hai dila
,

Khoya Khoya Chand ke is geet ki dhun banaee Shantanu Moitra ne aur Swanand ke sath sahayogi svar hai unke purane jodidar Ajay Jhingaran ka

शुक्रवार, फ़रवरी 22, 2008

Sudarshan Faakir is no more... My tributes to a poet par excellence

Kal Sudarshan Faakir ke na rahane ki khabar padh kar kaleja dhak se rah gaya. Sudarshan un shayaron men se the jisane mere jaise aam sangit premi ko ghazal se joda. Urdu ki jyada janakari na rakhane valon ko bhi ghazalon ki or mukhatib karane men unaka yogadan koee bhula nahin sakata. Pichhale ek saal se un par aadharit ek shrrnkhala shuru karane ki meri mansha thi par ye pata na tha ki main apani ye ichchha poori karoon usase pahale hi ye mahan shayar duniya se rukhasat ho jayega.

Sudarshan sahab ne apane jivan ka ek aham hissa Punjab ke shahar Jalandhar men bitaya. jalandhar ke DAV College se raajaniti shastra aur Angreji men parasnatak ki digree prapt karane vale faakir 73 saal ki umr mein ek lambi bimari ke bad gat somavar ko apana shahar chhod gaye. Yuvavastha se Faakir ko rangamanch aur shayari ka shauk tha. College ke zamane men Mohan Rakesh ka likha natak 'Aashad ka Ek Din' ka unhonne nirdeshan kiya aur vo janata dvara kafi saraha bhi gaya. Kuchh dinon tak unhonne redio Jalandhar men kam kiya aur fir Mumbai chale aaye.

Assi ke dashak men Jagjit-Chitra ki jodi ko jo safalata mili usamen Sudarshan Faakir ki likhi nayab ghazalon ka ek aham hissa tha
Sudarshan sahab ki jo nazmein aur ghazalein mere dil ke behad kareeb rahin hain unaka ek chhota sa guladasta main apani is pravishti ke madhyam se shrrddhanjali svaroop unhen arpit karana chahata hoon....

baat 1994 ki hai jab inaki ye ghazal suni thi aur isaka nasha varshon dil men chhaya rahata tha . Aaj bhi jab inaki ye ghazal gunagunata hoon to vahi masti man men sama jati hai.



charaaG-o-aaftaab Gum, ba.Dii hasiin raat thii
shabaab kii naqaab Gum, ba.Dii hasiin raat thii

mujhe pilaa rahe the vo ki Khud hii shammaa bujh gayii
gilaas Gum sharaab Gum, ba.Dii hasiin raat thii

likhaa huaa thaa jis kitaab me.n, ki ishq to haraam hai
huii vahii kitaab Gum, ba.Dii hasiin raat thii

labo.n se lab jo mil gaye, labo.n se lab jo sil gaye
savaal Gum javaab Gum, ba.Dii hasiin raat thii


Get this widget | Track details | eSnips Social DNA



Faakir ne kuchh filmon ke liye geet bhi likhe. film Yalagar ke sanvad lekhan bhi unhonne kiya. NCCcampus mein gaya jane vala samooh gan unhin ka racha huaa hai. par asali shoharat unhen apani ghazalon se hi mili. sidhe sahaj shabdon se gahari baat kahne ka hunar unake paas tha. Ab inhin sheron par gaur karen mari mari si zindagi ko dhone ki majaboori par kya tanj kase hain unhonne bina kisi kathin shabd ka sahara liye huye



kisii ra.njish ko hawaa do ki mai.n zi.ndaa huu.N abhii
mujh ko ehasaas dilaa do ki mai.n zi.ndaa huu.N abhii

mere rukane se merii saa.Nse bhii ruk jaaye.ngii
faasale aur ba.Daa do ki mai.n zi.ndaa huu.N abhii

zahar piine kii to aadat thii zamaanevaalo
ab koii aur davaa do ki mai.n zi.ndaa huu.N abhii

chalatii raaho.n me.n yuu.N hii aa.Nkh lagii hai 'Faakir'
bhii.D logo.n kii haTaa do ki mai.n zi.ndaa huu.N abhii


aaiye sunein yahi ghazal Chitra Singh ki aawaaz mein...
Get this widget | Track details | eSnips Social DNA


Sudarshan Faakir ne na keval apani ghazalon se kamal paida kiya balki kaee khoobasoorat nazmein bhi likhin. Unki ye nazm mujhe sarhad par ke ek mitr se karib das varshon pahale padane ko mili aur ye tabhi se meri priy najmon mein ek hai



ye shiishe ye sapne ye rishte ye dhaage
kise kyaa Khabar hai kahaa.N TuuT jaaye.N
muhabbat ke dariyaa me.n tinake vafaa ke
na jaane ye kis mo.D par Duub jaaye.N

ajab dil kii bastii ajab dil kii vaadii
har ek mo.D mausam na_ii Khvaahisho.n kaa
lagaaye hai.n ham ne bhii sapano.n ke paudhe
magar kyaa bharosaa yahaa.N baarisho.n kaa

muraado.n kii manzil ke sapano.n me.n khoye
muhabbat kii raaho.n pe ham chal pa.De the
zaraa duur chal ke jab aa.Nkhe.n khulii to
ka.Dii dhuup me.n ham akele kha.De the

jinhe.n dil se chaahaa jinhe.n dil se puujaa
nazar aa rahe hai.n vahii ajanabii se
ravaayat hai shaayad ye sadiyo.n puraanii
shikaayat nahii.n hai ko_ii zindagii se


Faakir ki ek aur khoobsoorat ghazal hai shayad main zindagi ki sahar jise gunagunana mujhe behad priya hai





shaayad mai.n zindagii kii sahar leke aa gayaa
qaatil ko aaj apane hii ghar leke aa gayaa

taa-umr Dhuu.NDhataa rahaa ma.nzil mai.n ishq kii
a.njaam ye ki gard-e-safar leke aa gayaa

nashtar hai mere haath me.n, kaa.ndho.n pe maiqadaa
lo mai.n ilaaj-e-dard-e-jigar leke aa gayaa

'faakir' sanamakade me.n na aataa mai.n lauTakar
ik zaKhm bhar gayaa thaa idhar leke aa gayaa


Get this widget | Track details | eSnips Social DNA



Faakir ke bare men unake mitr kahte hain ki vo apane aatmasamman par kabhi aanch nahin aane dete the. Chhoti chhoti baton par ve kabhi samajhauta nahin karate the.Faakir ne apani shayari men zindagi aur samaj ke anek pahaluon ko chhuaa chahe vo bachapan ki yaden ho, yuvavastha ke svapnil dina, samaj ki asanvedanashilata ho ya badati sanpradayikata. misal ke taur par unaki ye ghazal dekhen..

aaj ke daur me.n ai dost ye ma.nzar kyuu.N hai
zaKhm har sar pe har ik haath me.n patthar kyuu.N hai

jab haqiiqat hai ke har zarre me.n tuu rahataa hai
phir zamii.n par kahii.n masjid kahii.n ma.ndir kyuu.N hai

apanaa a.njaam to maaluum hai sab ko phir bhii
apanii nazaro.n me.n har insaan sika.ndar kyuu.N hai

zindagii jiine ke qaabil hii nahii.n ab "Faakir"
varnaa har aa.Nkh me.n ashko.n kaa sama.ndar kyuu.N hai


Faakir aaj hamare beech nahin hain par unaki bhashaee klishtata se mukt seedhe dil tak pahunchane vali shayari hamesha hamare sath rahegi.

गुरुवार, फ़रवरी 21, 2008

Varshik Geetmala : Song no. 5 - Tere bin, san soniya by Rabbi

Haan to doston karib dedh mahine ki sangeetamay yatra ko poora kar main aa pahuncha hoon is sangeetamala ki 5 vin sidi par. ab is geet ke bare men likhane ke liye mujhe kuchh jyada nahin karana kyonki pichhale september mein is ke bare men main vistar se likh chuka hoon. ji han panchavi payadan ke hiro hain Rabbi Shergill jinake is geet ko film Delhi Heights mein shamil kiya gaya tha. To aaiye ek bar fir se bat karen is geet ke bare men....

Pashchimi rock , lok sangeet aur soofiyana bol ka mishran sunane men aapako kuchh atapata sa nahin lagata. Zahir hai jarur laga hoga. mujhe bhi laga tha jab mainne is naujavan ko nahin suna tha. par 2005 mein jab mainne 'bulla ki jana main kaun' suna to Rabbi Shergill ki gayiki ka main kayal ho gaya. aaja, Bulle shah ke soofi lafjon ko guitar ke sath itane behatarin dhang se sanyojit kar prasiddhi pane vale Rabbi Shergil kisi parichay ke muhataj nahin hain. aaj ki tarikh men unake pas prashansakon ki achchhi khasi jamat hai. par rabbi ko ye shoharat aasani se nahin mili.

September mein Bruce Springstein ke common sangeet ko apana pesha chunane ki khvahish rakhane vale rabbi satrah saal bad apana khud ka album nikalane ka sapana poora kar paye. Khair bulla ..ke bazaaar men pahunchane ki dastan to apane aap ek post ki hakadar hai, Aaaj charcha karenge rabbi ke gaye is geet ki jise ek bar sun kar hi man premi ke shabdon ki masoomiyat men bahata chala jata hai. ab dekhiye na, punjabi meri juban nahin fir bhi is geet ke bola, panjab ki mitti ki khushabu mere ird gird faila hi jate hain.

ab bhala ek achchhe vyaktitv ke svami, guitar ke is maharathi ko punjabi men gane ki kaun si jarurat aan padi? rabbi is prashn ka javab kuchh yoon dete hain....

"...ham jat sikh logon ko apani bhasha par garv hai. vo mere jehan se nahin nikal sakati. doosari bhasha men sochane ka matalab usaki shreshthata ko svikar kar lena hoga. vaise bhi angreji men gakar mujhe doosare darje ka rank singer nahin banana. main kabhi bhool nahin sakata ki main kaun hoon. ....."

kash hamare hindi filmon ke kalakar bhi apani bhasha ke bare men ye soch rakhate!

khair rabbi ki aawaaj, unake khud ke likhe bola, antare ke bichon-bich men guitar ki madhur bandish is geet men khone ke liye kafi hain. to lijiye is geet ka aanand uthaeeye.

kya kaha panjabi nahin aati !

geet ka dard to aap isaki bhasha jane bina bhi mahasoos kar sakenge par aapaki suvidha ke liye is geet ka hindi anuvad bhi isake bol ke sath sath dene ki koshish ki hai.


Get this widget Track details eSnips Social DNA


tere bina, san soniya
koyee hor nahin..o labhana
jo deve, ruh noon sakoon
chukke jo nakhara mera


tumhare siva is duniya men moojhe koee aur pasand nahin. tumhare aalava kaun hai jo mere nakhare sahe aur jis ka sath dil ko sukoon de sake?

ve main sare ghoom ke vekhiya, amarika, roos, maleshiya
na kite vi koee fark si, har kise di koee shart si
koee mangada mera si sama, koee hoonda soorat te fida
koee mangada meri si vafa, na koee mangada meriyan bala
tere bina, hor na kise, mangani meriyan bala
tere bina, hor na kise, karani dhoop vich chhan
tere bina, san soniya...


mainne kahan kahan ghoom kar nahin dekha, amarika ho ya roosa, ya fir maleshiya. kahin koee fark nahin hai, sare matalabi hain. sabaki koee na koee shart hai. koee mera samay chahata hai to koee mere roop par mohit hai. kisi ko vafadari ka vada chahiye.
par meri kamiyan... vo to koee nahin lena chahata....sivay tere. isiliye to main kahata hoon ki tum mere liye jindagi ki is kadi dhoop men ek thandi chhanh ki tarah ho.

jivain rukiya, si tun jara, nahin bhoolana main sari umar
jiven akhiyan si akkhan chura, rovenga sanu yad kar
hansiya si main hansa ajiba, tu nahin si hansiya
dil vich tera jo raj si, mainnu tu kyoon nahin dasiya
tere bina, sanu eh raja, kise hor nahinऽo dasana
tere bina, pid da ilaja, kis vaid kolon labhana
tere bina, san soniya...

main jivan bhar bhool nahin sakata vo dina..jis tarah tum haule se ruki thi aur mujhase aankhe churate huye kaha tha ki meri yad tumhen rulayegi. ik ajib si hansi hansa tha main par tum to nahin hansi thi. tumane kyoon nahin kaha ki tumhare dil me vo pyara sa raj najaraband hai. bhala batao to tumhare aalava ye raj mujhe kaun bata sakata hai? tumhare bina vo kaun sa vaidy hai jo mere dil ka ilaj kar sakata hai?

miliaan si ajj mainu tera ik patran
likhiaa si jis tai, tun sher vare shah da
pad ke si osnoon, hanjanu ik duliya
aankhanch band si, seh raj ajj khuliya
ki tere bina, eh mere hanjanoo, kise hor nahinऽo chumana
ki tere bina, eh mere hanjanu mitti vich rundana


mujhe aaj hi tera likha vo khat mila jisamen toone varis shah ka vo sher likha tha. use padakar anayas hi aansu ka ek katara niche dhalak pada vo raj kholata huaa jo meri aankhon me arse se band tha.. ab mere in aansuon ko tumhare siva koee aur nahin choomega. sach to ye hai ki tumhare bina mere liye in aansuon ko mitti ki gard fankana hi behatar hai.

tere bin, san soniya
koyee hor nahin..o labhana
jo deve, ruh noon sakoon
chukke jo nakhara mera

Is geet ko Delhi Heights men Jimi sheragil aur Neha Dhuiya par filmaya gaya hai. sath-sath rabbi to hain hi..



मंगलवार, फ़रवरी 19, 2008

Varshik Geetmala : Song no. 6 - Tere Sawalon ke Woh Jawaab jo Main De na De na Sakuun...

Click Here to Read this post in Hindi (Devnagari) script.

Bollywood mein aksar aisa hota raha hai ki jab koee film viraat star par pradarshit nahin hoti ya fir jyada din nahin chalati to usake geet logon tak pahunch hi nahin pate aur geetakar sangeetakar ki sari mehanat pani men chali jati hai. Ab mujhe poora yakin hai ki aap mein se bahuton ne 'Manorma six feet under' ke bare men jyada charcha nahin suni hogi. Samikshakon dvara achchha karare jane par bhi ye film sinemagharon ki shobha jyada dinon tak nahin bada payee.

Isi film ka ek geet jo isake promo ko sunate samay man mein atak gaya tha aaj aapake samane prastut kar raha hoon. Is geet ko gaya Roop kumar Rathod aur Mahalakshmi Aiyar ne aur isake bol likhe Manoj Tapadiya ne. Is geet ki dhun banaee Jayesh Gandhi ne jo bataur gayak to kayee filmon men apana svar de chuke hain par sangeetakar ki haisiyat se shayad unaki ye pahali film hai.

Aatif Aslam, Mustafa Zahid sarikhe Pakistani gayakon ke oonche suron ko poore kaushal se laga sakane ki maharat ko jo lokapriyata bharat men mili hai usase prabhavit hokar sangeetakar yahan ke gayakon ko bhi vaise geet de rahe hain. Zubin Garg hon , Krishna hon ya fir Mithun Sharma in sabne is genre ke geeton men kamaal kiya hai. Isaliye jab Roop Kumar Rathod ko oonche suron men mainne gate suna
aankhon ke, aalon men, chahat ki lau jalane do...

to vismay ke sath-sath man mugdh ho gaya.

Shabdon ki bat karen to Manoj Tapadiya ke bol premiyon ki aapasi kashamakash ko vyakt karate dikhayi dete hain. Zindagi men apane karibi se kayee bar aap kuchh nahin kah kar bhi bahut kuchh kah jate hain. rishton ke ulajhe dhagon men se kayee saval bahar nikal kar aise aate hain jinake javab aankhen , hothon se jyada behatar tariken se de pati hain...Kuch aisi hi baat keh rahe hain yahan Manoj


tere sawalon ke woh jawaab jo main de na de na sakuun...
pighle se armaan hain, do pal ke mehmaan hai
aankhon ke aalon mein, chaahat ki lo jalne do
tere sawaalon ke woh jawaab jo main de na de na sakuun


keh rahi hai jo nazar tujhe hai khabar ke nahi
keh rahi hai teri nazar tu bekhar toh nahi

tere bina jindagi hai adhuri, tere bina kya hai jeena
pighle se armaan hain, do pal ke mehmaan hai
aankhon ke aalon mein, chaahat ki lo jalne do

tum kaho toh main rok luun, jo tum kaho toh nahi
sine mein hai kaisi khalish, teri kashish toh nahi
tere bina jindagi hai adhuri, tere bina kya hai jeena
pighle se armaan hain, do pal ke mehmaan hai
aankhon ke aalon mein, chaahat ki lo jalne do
tere sawaalon ke woh jawaab jo main de na de na sakuun
tere bina jindagi hai adhuri, tere bina kya hai jeena

to aaiye sunate hain chhathi payadan ke is geet ko



Get this widget | Track details | eSnips Social DNA
>


Do you like this song. Click Here to post your opinion about the song.

रविवार, फ़रवरी 17, 2008

Varshik Geetmala : Song no. 7 - Main Jahan Rahoon,Main Kahin Bhi Hoon, Teri Yaad Saath Hai


Varshik geetamala ki saatvein payadan par geet vo jisamen pahali bar geetakar Javed Akhtar ne kam kiya hai sangeet nirdeshak Himesh Reshamiya ke sath . Mainne is chitthe par kayee bar kaha hai ki mujhe Himesh ki gayan shaili kabhi pasand nahin rahi, par bataur sangeet nirdeshak mujhe kayee filmon men unaka kaam pasand aaya hai.

Ab isi geet ko lein, Namaste London ke is geet men Javed sahab ke khoobasoorat bolon par kamal ki dhun banaee hai Himesh Reshamiya ne. Jaise hi geet ki madhur dhun ke sath Rahat ka svar geet ke mukhade men aata hai, aapako lag jata hai ki is geet men kuchh khas bat hai. is geet se meri pahli mulakat kolakata men taxi yatra ke dauran vyast traffic ke beech bagal ki gadi men bajate FM channel se huee aur tabhi se ye mera chaheta ban gaya.

Rahat Fateh Ali Khan ki gayiki ka andaj mujhe hamesha hi bhata raha hai. chahe 'paap' mein gaya unaka geet lagan lagi tujhase man ki lagan.... ho ya 'Kalayug ' ke liye gaya geet jiya dhadak dhadak jaye... ya pichhle sal 'Onkara ' men gaya unaka geet naina das lenge......, vo har sal ek na ek geet aisa avashy dete hain jo dil ke aar par ho jata hai. Isamen koyee shak nahin ki vo apani gayiki se apane chacha Nusrat Fateh Ali Khan ka naam roshan kar rahe hain. is geet men unaka sath diya hai Krishna ne jo oonche suron ko bade kaushal se nibha jate hain.

Par agar shabdon mein jor nahin rahata to ye gayak bhi kya kar pate. javed sahab ne apane sahaj bolon se ham sabhi ke man ko chhuaa hai.

Ab aap hi batayen bhala yaden kis manushy ka pichha nahin karatin ? Tanahaee ka kaun shikar nahin hota?
vo sher yad hai na aapako Nida Fazli sahab ka

har taraf har jagah beshumar aadami
fir bhi tanahaeeyon ka shikar aadami

jindagi ka mukaddar safar dar safar
aakhiri sans tak bekarar aadami


to janab ye bekarari aur tanahaee aap ke dil mein ek nasoor ki tarah chubh rahi hai to ye geet aapake liye hi hai..shayad aapako dil ki aavaj pratidhvanit hokar sunane ko mile

main jahan rahoon,main kahin bhi hoon
teri yaad saaath hai
kisi se kahoon
ke nahi kahoon
yeh jo dil ki baat hai
kehne ko saath apane ek duniya chalti hai
per chhupke is dil mein tanhaayi palti hai
bas yaad saath hai
teri yaad saaath hai....

main jahaan rahoon
main kahin bhi hoon
teri yaad saaath hai
kahin to dil mein yaadon ki
ek suli gad jaati hai
kahin har ek tasveer bhahut hi dhondhali pad jati hai
koi nayi duniya ke naye rango mein khush rehta hai
koi sab kuch paake bhi yeh mann hi mann kehta hai
kehne ko saath apane ek duniya chalti hai
per chhupke is dil mein tanhaayi palti hai
bas yaad saath hai
teri yaad saaath hai....

kahin to beete kal ki jadein
dil mein hi utar jaati hai
kahin jo dhage tute to malaayen bhikar jaati
koi dil mein jagah nayi, baaton ke liye rakhta hai
koi apni palko par yaadon ke diye rakhta hai
kehne ko saath apane ek duniya chalti hai
per chhupke is dil mein tanhaayi palti hai
bas yaad saath hai
teri yaad saaath hai.....

गुरुवार, फ़रवरी 14, 2008

Varshik Geetmala : Song no. 8 - Valentine Day Special ..Jab Se tere Naina

Aaj Valentine Day hai. Pehali bar jab Valentine Day ke charche sune the to man hi man ek muskurahat jaroor daud gayee thi ki chalo bhayee, hamari na sahi, ab aaj ki peedhi ko izhaar-e-mohabbat karne ke liye koyee to din mila.
Varna ek zamana vo bhi tha ki log bag apani un tak pahunchane ke liye ghar, college aur coaching tak rikshe ka pichha karate the. Mamala ghar ke bagal ka huaa to prem patr patthar se chhat par fenka jata tha, ya sirf khidakiyon se hath hilane se hi raat ki ninde haram ho jaya karati thin. Aur agar dil ki andaruni halat kabu ke bahar ho jaye to vo anayas hi unke samane ja kar I love you bol dene ki himmat bhi kuchh vir bankude dikha hi jate the. Jo kuchh jyada dooradarshi hota vo fail safe logic ka prayog kar jeb mein ek dori bhi rakhta ki mamala kuchh ulata pada to unake thappad ke pahale apani bhool ka ahasas karane vale bhayee ka hath aage hoga.:)

To na ham oopar ki kisi qavayad ka hissa ban paye na hi Valentine Day se apane aap ko jod sake. Par ye spasht karana chahoonga ki prem ko mahimamandit karte huee koee parv manane men meri poori aastha hai . Bhale hi hum, "Hai preet jahan ki reet vahan..... jaise geet gate rahen phir bhi is bat ko najarandaj nahin kar sakate ki ye desh vaise logon ka bhi hai jo bhasha, dharma, jati ke aadhar par nafrat ke badal sada phailate aaye hain aur rahenge. Prem mein vo shakti hai jo in vyarth ki deewaron ko todane ke liye hamen prerit karti hai.

Aur ham sal dar sal isi baat ko ek parv ke madhyam se nayee peedhi ke samane rakhen to isamen buraee kya hai? Haan ye jaroor hai ki agar ye parva, vasantotsav ya apani sanskrti se jude kisi any roop men manaya jaye to samaj ka har varg ise apane se jod kar dekh sakata hai.

Ye sukhad sanyog hai ki is geetamala ki aathavin payadan ka geet prem ke ras se poori tarah sarabor hai. Ise gaya Shaan ne, bol likhe Samir ne aur is geet ki dhun banayee Monty Sharma ne. Monty Sharma sangeetakar Pyarelal ke bhatije aur apane dada pandit Ram Prasad Sharma ke shishy hain. Monty khud ek kibordapleyar hain aur isase pahale unhonne film blaik ka baikagraund skor diya tha. is geet ki khoobasoorati hai isaki madhur lay aur sangeet men, jise Shaan ne apani aavaj ke jadu se aur ubhara hai

Mere mitron aur 'Ek Shaam Mere Naam' ke pathakon ko is din ki hardik badhaee. Meri manokamana hai ki aap sab prem ke abhootapoorv anubhav se apni zindagi mein zuroor gujaren.

To aaiye prem ka ye parv manayen Sanwariya se likhe is pyare se geet ke satha....
jab se tere naina..., mere nainon se, lage re
tabase divana huaa, sabase begana huaa
rab bhi divana lage re..........





Get this widget | Track details | eSnips Social DNA



बुधवार, फ़रवरी 13, 2008

Varshik Geetmala : Song no. 9 - Kyun Duniya ka Nara Jame Raho ?

Click Here to Read this post in Hindi (Devnagari) script.

Navien paaydaan (9th position) par hai vo geet jise gaya vishal-shekhar ki jodi vale Vishal Dadalani ne. ye ek aisa geet hai jo aapako ye sochane par vivash kar deta hai ki kyoon sab janate samajhate bhi ham apane bachchon ko galakat pratispardha ke is daur men apani aankakshaon ke bojh tale daba dalate hain ? jyadatar bachche samaj aur mata pita ki ichchha anusar is sistam men apane aap ko dal lete hain.

Par kya sare bachche aisa kar pate hain?

Agar aisa ho pata to avasada, alagav aur yahan tak ki apane jivan ko samapt karane ki nirantar hoti ghatanaon ko apane samane ghatate huye ham nahin dekh rahe hote.

Geet ke pahale hisse men jahan layak kahalane vale bachchon ki jivanashaili ka chitran hai to doosare men thik isase palat vaise bachchon ka jo apani hi duniya men jine ki tamanna rakhate hain par ye shiksha pranali aur oopar uthane ki ye daud unhen vaisa karane nahin deti. Shankar-Ehasan-Loy ne apane sangeet ko geet ke mood ke hisab se badalate rakha hai.

Ye geet mujhe agar itana pasand hai to vo is vajah se ki bachchon ke is dard ko itani sahajata se oopar late huye ye dil par seedhi chot karata hai. Ye ahasas dilata hai ki samaj ke ek hisse ke roop men chahe mata-pita ya adhyapak ki haisiyat se, is tantr ko falane foolane men hamara bhi kuchh dosh banata hai.
to pahale paden Prasoon Joshi ke uthaye gaye in masoom se savalon ko..

kas ke joota kas ke belt
khons ke andar apani shirt
manjil ko chali savari
kandhon pe jimmedari

hath men filel man mein dam
milon meel chalenge ham
har mushkil se takarayenge
tas se mas na honge ham

duniya ka nara jame raho
manjil ka ishara jame raho
duniya ka nara jame raho
manjil ka ishara jame raho

ye sote bhi hain attention
aage rahane ki hain tension
mehanat inako pyari hai
ekadam aagyakari hain

ye omlet par hi jite hain
ye tonic sare pite hain
vakt pe sote vakt pe khate
tan ke sina badhte jate

duniya ka nara jame raho
manjil ka ishara jame raho...

***********************************************************
yahan alag andaj hai
jaise chhidata koee saj hai
har kaam ko taala karate hain
ye sapne pala karate hain

ye haradam socha karate hain
ye khud se poochha karate hain
kyoon duniya ka nara jame raho ?
kyoon manjil ka ishara jame raho ?

ye vakt ke kabhi gulam nahin
inhen kisi bat ka dhyan nahin
titali se milane jate hain
ye pedon se batiyate hain

ye hava batora karate hain
barish ki boonde padate hain
aur aasaman ke canvas pe
ye kalakariyan karate hain

kyoon duniya ka nara jame raho ?
kyoon manjil ka ishara jame raho ?


Shayad aapake paas in prashnon ka koyee seedha sada hal na ho par ye gahan chintan ka vishay hai is bat se aap inakar nahin kar sakenge.
Get this widget Track details eSnips Social DNA


Aur haan ek baat aur kya ye drishya aapke ghar ki subah ki bhagambhag se milte julte nahin hain. Humare ghar ka to yahi haal hai :)

मंगलवार, फ़रवरी 12, 2008

Varshik Geetmala : Song no. 10 - Ami Je Tomar, Mere Dholna..

Click Here to Read this post in Hindi (Devnagari) script.

To deviyon aur sajjanon hafte bhar ki gairamaujoodagi ke bad fir upasthit hoon apani geetamala ke pratham das geeton men se 10 vin payadan ke geet ke satha. Ye geet laya hai apane sath shastriy sangeet ki madhurata. Sur aur tal ka adbhut sangam hai ye geet. Ise gaya hai kokil kanthi Shreya Ghoshal ne aur aalap men unaka sath diya hai M.G.Sheekumar ne. Bhoolbhulaiya film ke is geet ke bol likhe Samir ne aur isaki dhun banaee Pritam ne.

Shreya Ghoshal ki madhur aavaj mujhe 'Jism' aur 'Devdas' ke samay se achchhi lagati rahi hai. is geet mein bhi unaki gayiki kamal ki hai.
Pritam ne bhi is geet ke madhyam se ye siddh kiya hai ki sirf fusion hi nahin balki vishuddh bharatiy sangeet par aadharit sundar dhunen bhi, vo bana sakate hain.

Shreekumar Kerala ke varishth gayakon men ek hain. Shastriy sangeet ki gayan pratibha shrikumar ko apane pita Gopalan Nayar se virasat men mili hai. Ab tak malayalama, tamil , telagu aur hindi filmon men 3000 se jyada geet gane vale Shreekumar ka sapana hai ki aane vali peedhi unhein aise gayak ke roop men yaad rakhe jisane shastriya sangeet ko apane gayan se samrddh kiya. 1990 mein ve sangeet ke liye rashtriy puraskar se sammanit kiye gaye.


Is geet ke bolon ki typing ek dusadhy kam tha par mujhe laga ki bina shastriy aalapon ke ye geet adhoora-adhoora sa lagata. So jahan tak ho saka mainne bolon men unaka samavesh kiya hai.

mere dholana sun, mere pyar ki dhun
mere dholana sun
meri chahaten to fiza men bahengi
zinda rahengi ho ke fana
tana na na tum...tana na na tum..tana na na tum..tana na na tum
ta na dhi re, ta na dhi re, dhi re na
mere dholana sun..

sathi re sathi re mar ke bhi tujhako chahega dil
tujhe hi bechainiyon men payega dil
mere gesuon ke saye men, teri rahaton ki khushbu hai
tere bagair kya jina, mere rom rom men tu hai
meri choodiyon ki khan khan se, teri sadayen aati hain
ye dooriyan hamesha hi najadik kahan bulati hain
o piya.....

sa ni dha, ni dh ma
ma g s ni dh ni s g ma
ma g s ni dh ni s g
ma g s ni dh ni s g
ma g ma g
sa ni dh g p dh ni
sa ni dh g p dh ni
sa ni dh ni
dh ni sa, dh ni sa, dh ni sa, dh ni sa
m dh ni, m dh ni, m dh ni, m dh ni,
dh ni sa, dh ni sa, dh ni sa
m dh ni, m dh ni, m dh ni
m dh ni sa, m dh ni sa, m dh ni sa, m dh ni sa,
sa ni dh ma, sa ni dh ma, sa ni dh ma, sa ni dh ma

ma ma g g sa sa ni ni
sa sa ni ni dha dha ni ni
sa sa ni ni dha dha ma ma
sa sa ni ni dha dha g g
ni ni sa sa sa
ni dha sa sa sa
m g sa sa sa
mere dholana sun..

sanson men sanson men, teri saragamen hain, ab rat din
jindagi meri to kuchh na, ab tere bin
teri dhadakanon ki saragoshi, meri dhadakanon men bajati hai
meri jagati nigahon men, khvahish teri hi sajati hai
mere khayal mein har pal tere khayal shamil hain
lamahe judaeeyon vale, mushkil bade hi mushkil hain
o piya...

ni sa, ni sa, ni sa, ni sa
dh ni, dh ni, dh ni, dh ni
p dha, p dha, p dha, p dha,
g m p dha, ni re s
g m p dha. ni re s
pa ni ni sa, pa ni ni sa, pa ni ni sa, pa ni ni s

ga m p dha, ni dh p dha, ni dh p dha, ni sa
ga m p dha, ni dh p dha, p m g ma, g re sa ni. dh ni sa ga, ma ga sa ga, ma pa dha pa, dha ni sa
ni sa, ni sa, ni sa, ni sa, ni sa
dh ni, dh ni, dh ni, dh ni, dh ni......................


(isake aage badi koshish ke bad bhi likh nahin paya )
to aayen is geet ke bolon ko padate huye is geet ka aanand uthayen..
Get this widget | Track details | eSnips Social DNA


Hal hi mein STAR PLUS ke Chote Ustaadkaryakram ki ek pratibhagi Anvesha Dutta ne bhi is geet ko bakhoobi gaya. Unki ye koshish aap yahan dekh sakte hain.




Do you like this song. Click Here to post your opinion about the song.

Varshik Geetmala : Song no. 11 - Bol Na Halke Halke

Click Here to Read this post in Hindi (Devnagari) script.

Gyarahavin payadan ke is geet ko gaya hai Rahat Fateh Ali Khan aur Mahalakshmi Ayyar ne. In donon surile gayakon ki is 2007 ki geetamala mein gaya huaa ye pahala geet hai. Par ye gayak pratham das geeton men aapako aage bhi najar aayenge.

Agar ye geet mujhe itana pasand hai to isaka sabase jyada shrey jata hai Shankar Ahsaan Loy ke adbhut sangeet ko. Jaise hi ghade ki thap se geet ka mukhada shuru hota hai aap is geet se bandh jate hain. Bharatiy vady yantron ka pashchimi vady yantron ke sath ye tikadi jitani khoobasoorati se sammishran karati hai, usaki jitani tarif ki jaye kam hai. Bansuri ke sath guitar ki bandish ho ya beech mein Rahat ka sammohit kar dene vala aalaap.. Poore sangeet sanyojan ko dad dene ko ji chahata hai.

Aur fir Gulzar to hain hi apani chiraparichit shaili mein. Par ye bata doon ki mere priya geetakar Gulzar ka is sangeetamala mein aane vala ye aakhiri geet hai. Ye pahali bar huaa hai ki Gulzar ka likha koyee bhi geet mere pratham das men nahin hai. Meri samajh se is sal Gulzar ki sabase behatarin rachana Dus kahaniyon ke liye likhi unaki najmein thin jinhen film men shamil nahin kiya gaya. Khair ummid hai ki Gulzar is sal Onkara ya Sathiya ke apane behatarin geeton jaisa kuchh dil ko chhu jane vala likhenge .

dhage tod lao chandani se noor ke
ghoonghat hi bana lo roshani se noor ke
sham aa gayee to, aagosh men lo
ho sanson men ulajhi rahe meri sansein

bol na halke halke... bol na halke halke...
hoth se halke halke..bol na halke halke

aa nind ka sauda karen, ik khvab den, ik khvab len
ik khvab to aankhon mein hai, ik chand ke takiye tale
kitne dinon se ye aasaman bhi
soya nahin hai isako sula dein
bol na halke halke...
bol na halke halke...
ma pa ni dha ga ma re sa ga ma re pa ni s dh g ma g p

umr lagi kahate huye do lafj the ik baat thi
vo ik din sau sal ka, sau sal ki vo raat thi
kaisa lage jo, chupachap donon..
ho pal pal men poori sadiyan bita dein


bol na halke halke... bol na halke halke...
hoth se halke halke..bol na halke halke

to aaiye sunen Jhoom Barabar Jhoom se liye gaye is geet ko
Get this widget | Track details | eSnips Social DNA


रविवार, फ़रवरी 03, 2008

Varshik Geetmala : Song no. 12 - Hum to Aise Hain Bhaiya

Click Here to Read this post in Hindi (Devnagari) script.

Benaras shahar se mera koyee khas parichay nahin, alabatta ye juroor hai ki ek bar yahan ki galiyon men bhatakate bhatakate rasta bhool baitha hoon. apane tarah ka shahar hai ye banaras... Mujhe yaad hai isaki ek chhavi Pankaj Mishra ne bhi utari thi apani kitab The Romantics mein....

Shahar ke badalate svaroop ke bare mein Pankaj apani kitab ki shuruaat men kahate hain..
naye madhyamavarg ki kuleenata banaras men bhi dikhane lagi hai. sadiyon se hinduon ka ye pavitr tirth sthal jahan log punarjanm ke chakr se mukti pane aate the, ab ek chhota bhid bhara vyavasayik shahar ban chuka hai. isiliye pankaj aage kahate hain

".....This is as it should be: one can't feel too sad about such, changes.
Benares -destroyed & rebuilt so many times during centuries of Muslim &
British rule - is, the Hindus say the abode of Shiva, the god of perpetual
creation & destruction.The world constantly renews itself and when you look
at it that way, regret & nostalgia seem equally futile. ...."


sach hi to hai vakt ke pahiye ko kaun rok paya hai.

Pankaj ne to banaras ki prshthabhoomi men apani katha ko aage badaya tha par us kitab aur is geet men samy bas itana hai ki yahan bhi usi prshthabhoomi men 'Laga Chunari Mein Daag' film ki katha vikasit hoti hai. subah ki bela .. mandir se bajati ghantiyan aur door kisi sadhak ka svara, maveshiyon aur logon se pati aisi hi chand aavazon ke sath banaras ki galiyon ka ye sangeetamay safar shuru hota hai do bahanon ki aapasi batachit se.

Swanand Kirkire ne kuchh minato.n ke geet mein banaras ke kayee roopo.n ko chhoone ki koshish ki hai . Shahar ke bare men kahate-kahate vo ek nimn madhyamavargiy parivar ki samasyaon ko bhi badi khoobasoorati se bolon men bandh jate hain. Swanand nishchit roop se apane is prayas ke liye badhayee ke patr hain. is geetamala men Swanand aage bhi hajiri denge tab unake bare men vistar se charcha hogi.

Bolo.n ke aalava Sunidhi Chauhan aur Shreya Ghoshal ki behatarin yugal gayiki ko sun kar man se vah vah nikalati hai. isamen koee shak nahin ki 12 vin payadan ka ye geet is sal ka sarvashreshth yugal geet hai. Samavyask bahanon ke beech jo apanapan hota hai vo in donon gayikaon ne kya khoob ubhara hai. Sunidhi ka paan khaye huye vyakti ki tarah gana to mujhe bilakul kamal laga.

Pahale Swanand kirkire ke bolon ka aanand lein..

jeb men hamari du hi roopaiya
duniya ko rakhe.n thenge pe bhaiya
sukh dukh ko khoonti pe tange
aur paap punya choti se bandhe.n
nache hain hum tata thaiya
ham to aise hain bhaiya
ye apana faishan hai bhaiya
ham to aise hain bhaiya


ek gali mein bam bam bhole
dooji gali mein alla-miyan
ek gali men goonjen ajanen
dooji gali men bansi bajaiya

sabaki ragon men lahu bahe hai
apani ragon men ganga maiya
sooraj aur chanda bhi dhalata
apane isharon pe chalata
duniya ka gol gol pahiya
ham to aise hain bhaiya ....

aaja banaras ka ras chakh le aa
ganga men jake tu dubaki laga
rabadi ke sang sang chaba lena ungali
mathe pe bhang ka rang chadha
choona lagaee le, panava khilaee de
usape tu jarde ka tadaka lagaee de
patna se aeebe, paris se aeeibe
ganga ji mein har koyee nanga nahaibe
jite ji jo koyee kashi na aaye
char char kandhon pe vo chadhake aaye

Hum to aise hain bhaeeya..ham to aise hain bhaeeya..
ye apani nagari hai bhaeeya..are ham to aise hain bhaeeya..

didi agar tujhako hoti jo moonchh
main tujhako bhaiya bulati tu soch
are chhutki agar tujhako hoti jo poonchh
to main tujhako gaiya bulati tu soch

didi ne na jane kyoon chhodi padhaee
ghar baithe amman sang karati hai ladaee
amman bechari pisane hai aaee
rat din sukh dukh ki chakki chalaee
ghar baithe baithe babooji hamare
lottery mein dhoondhate hain kismat ke tare
3...2....1272
manjhadhar men hamari naiya
fir bhi dekho mast hain ham bhaiya
ham to aise hain bhaiya

dil men aata hai yahan se
pankchhi banake ud jaoon
sham dhale fir dana lekar
laut ke apane ghar aaoon
ham to aise hain bhaiya , are ham to aise hain bhaiya ...

To lijiye suniye Shantanu Moitra dvara sangeetabaddh is geet ko



Get this widget | Track details | eSnips Social DNA


Do you like this song. Click Here to post your opinion about the song.

Varshik Geetmala : Song no. 13 -Na Hai Yeh Pana.. Na Khona Hi Hai

Click Here to Read this post in Hindi (Devnagari) script.

Toh doston geeton ke is safar par aa pahunche hain ham is sangeetamala ke thik madhy mein aur meri terahavin payadan ke hero hain is geet ke gayak Mohit Chauhan ! kya kamal kiya hai unhonne Irshad Kamil ke likhe aur Pritam dvara sangeetabaddh is pyare se nagme mein , ye aap geet sunakar hi mahasoos kar sakate hai.

Aap mein se bahuton ne Mohit Chauhan ko shayad hi pahale suna ho. Mainne pahali bar inhein film 'Main, Meri Patni aur Vo' men 'gunacha koyee tere nam kar diya...' gate suna tha aur vastav men us geet ko sunakar main mohit se mohit huye bina nahin rah paya tha . us geet ko mainne is chitthe par yahan pesh kiya tha

Mohit ki sangeet yatra shuru huee 1997 mein. Unhein safalata ka svad usi sal tab mila jab mohit ki aguvaee men bane band Silk Route ke pahale album Boondein ke geet dooba dooba... ko 'Channel V' ne apane show mein saal ke gair filmi album mein sabase badiya geet ke roop men chuna. Silk route pratham do varshon ki charcha ke bad dhire dhire apani lokapriyata khota gaya. Pichhale char panch varshon men Mohit ko filmon men gine chune mauke mile hain. par chahe vo 'main, meri patni aur vo' ya fir 'Rang de vasanti' ya fir is sal ki 'Jab we met' , unhonne har mile mauke se apani pratibha ko sabit kiya hai.

Mohit Chauhan, himachal se aate hain. vo kaha karate hain ki shuruaati dinon mein apane gayan men vo goonj ya 'throw' paida karane ke liye vyas nadi ke kinare chale jate the. Himachal ki jyadatar sangeet biradari ke sath unhonne kam kiya huaa hai aur vahan ke lok sangeet se bhi vo jude rahe hain. 8 saal ki umr se hi Mohit sangeet mein dilachaspi lene lage. Gane ke sath acoustic guitar men bhi vo utane hi pravin hain. unaki gayiki ki khasiyat ye hai ki vo geet ki sanpoorn bhavanayen aatmasat kar apani adayegi men jhonk dete hain.

Is geet ke bolon ko likha hai Punjab ke Irshad Kamil ne jo tatkalin kavita men Docterate ki upadhi se vibhooshit hai. Script lekhan se apana filmi career shuru karane vale Irshad ab 'jab we met' men geetakar ki haisiyat se utare hain aur aap to janate hi hain ki is film ke geet kitane lokapriy ho rahe hain.

Kya khoobasoorat mukhada diya hai unhonne.... na hai ye pana, na khona hi hai, tera na hona jane ,kyoon hona hi hai ?....aur is lay ke sath jab mohit ki aavaj bahane lagati hai to is geet se vashibhoot huye bina koee chara nahin bachata...

Na Hai Yeh Pana
Na Khona Hi Hai
Tera Na Hona Jane
Kyun Hona Hi Hai

Tum Se Hi Din Hota Hai
Surmaiye Shaam Aati hai
Tumse Hi Tumse Hi

Har Ghadi Saans Aati Hai
Zindagi Kehlati Hai
Tumse Hi Tumse Hi

Na Hai Yeh Pana
Na Khona Hi Hai
Tera Na Hona Jane
Kyun Hona Hi Hai

Aankhon Mein Ankhne Teri
Bahoon Mein Baahein Teri
Mera Na Mujhe Mein Kuch Raha Hua Kya
Baaton Mein Baatein Teri
Raatein Saugatein Teri
Kyun Tera Sab Yeh Ho Gaya
Hua Kya
Mein Kahin Bhi Jata Hoon
Tumse Hi Mil Jata Hoon
Tumse Hi Tumse Hi

Shor Mein Khamoshi Hai
Thodi Se Behoshi Hai
Tum Se Hi Tum Se Hi

Aadha Sa Wada Kabhi
Aadhe Se Jayada Kabhi
Jee Chahe Karlu Is Trah, Wafa Ka
Chhode Na Choote Kabhi
Tode Na Tute Kabhi
Jo Dhaga Tumse Jud Gaya Wafa Ka

Mein Tera Sharmaya Hoon
Jo bhi Mein Ban Paya Hoon
Tumse Hi Tumse Hi
Raste Mil jate Hain
Manzile Mil jati Hain
Tumse Hi Tumse Hi

Na Hai Yeh Pana
Na Khona Hi Hai
Tera Na Hona Jane
Kyun Hona Hi Hai



Get this widget | Track details | eSnips Social DNA




Varshik Geetmala : Song no. 14 -Chanda Re...Chanda Re.. Dheere se Muska

Click Here to Read this post in Hindi (Devnagari) script.

Toh sajjanon jaaz sangeet se bahar nikalate hain aur chalate hain vishuddh melody kee duniya mein ! aur yahann shaan se khada hai 14 veen payadan ka ye geet jo us geet-sangeetakar jodee ka hai jisakee ek rachana Ratiya anndhiyaree ratiya.n..2004 men meree varshik geetamala ka sarataj geet banee thee. Ise gaya hai ek nayee gayika ne, jo pahalee bar is geetamala men dakhil ho rahee hain. Par unakee bat thode der men...

Chanda yani channd ko sanbodhit is chhote se geet ke mukhy sitare hain isake sangeetakar Shantanu Moitra . jaise hee aap is geet ke mukhade ko sunate hain, man azeeb see shanti se tar jata hai aur isakee sureelee panktiyon ko gunagunane ke lobh se apane aapako main alag naheen rakh pata. 'parinnita' ke us sarataj geet aur is geet men ek samanata to jaroor hai. aur vo hai parshv men rah-rah kar bajate ghungharuon kee jhanajhanahat. gaur karane kee bat hai ki peechhe se halke halke bajata sangeet aapaka dhyan geet ke bolon par jamae rakhata hai. beech-beech men aatee bannsuree aur tabale kee sangat bhee man ko aanandit karatee chalatee hai. to aaie is geet ke bolon se pahale roobaroo ho len

chanda re, chanda re dheere se muska
haule se haule se
palakon men chhup ja
haule se haule se... chhan chhan chhan chhan chhan chhan chhana
badal ke jhoole pe...khan khan khan khan khan khan khan khana
haule se haule se,badal ke jhoole pe
musaka
chanda re, chanda .......chhup ja

are lukka chhipee khele chanda taron ke sang
kaun thame doree, too hai kisakee patang
chanda o re chanda tera kaisa guroor
hanns de jara sa barasa de too noor

chanda re, chanda re dheere se musaka
haule se haule se
palakon men chhup ja

Is geet ke bol likhe hain Swanand Kirkire ne jo meri geetamala mein har saal oopar kee payadanon men apana dakhal avashy rakhate hain. svanand kee baat is geetamala men aage bhee hogee par agar aapane geet sunana shuru kar diya hai to aapaka dhyan hava ke jhonke see tazee is naee aavaz par avashy gaya hoga.

Ise gaya hai punne men janmee 35 varsheey Hamsika Aiyar ne jo goregannv, munbaee nivasee hain aur 1995 men sa re ga ma... pe hissa bhee le chukee hain. Hamsika ke pita sangeetagy hain aur bansuree bajate hain. Is geet ko sunane ke kayee ghante baad bhee unakee spasht gayikee dilo dimag men goonjatee rahatee hai. aasha hai hamsika aage bhee apane gayan se sangeetapremiyon ka dil jeetatee rahengee. to aaie sunen ekalavy di royal gard jo is sal bharat kee or se aaskar puraskaron ke lie aadhikarik taur par namankit film hai, ke is geet ko



Get this widget | Track details | eSnips Social DNA



Do you like this song. Click Here to post your opinion about the song.