Thursday, May 17, 2007

Raat Aadhee Kheench Kar Meri Hathelee by Harivansh Rai 'Bachchan'

हिंदी में इस पोस्ट को पढ़ने के लिए यहां क्लिक करें।

kavita ya ghazal kee adaayagee, usame kahee huee bhaavanao ko shrota ke dil tak pahunchaane me ek utprerak ka kaam karatee hai . Pitaajee bataate hai ki unake jamaane me Allahabad Univ. me Harivansh Rai Bachchan manch se jab apanee madhushaala ka kaavy paaTh karate, to sab ke sab mantramugdh ho kar sunate rahate . 'Bachchan' ko to sunane ka saubhaagy muze sirf aaDiyo kaiseT me hee hua hai. par high school mein jab pahalee baar dooradarshan par 'Neeraj' ko poore bhaavaavesh ke saath kavita paDhata dekha to man romaanchit ho gaya tha .

vaise veer ras ke kaviyo ke liye to ye adaegee, unakee rojee roTee ka savaal hai . pata nahee aap logo ne kabhee aisa mahasoos kiya ki nahee par jahaa tak mera anubhav hai, jab bhee is koTi ke kavi manch par aate hai to poora sammelan kaksh unakee aavaaj se gunjaayamaan ho jaata hai aur agar taaliyo ke atirek ne unaka utsaah baDha diya to aage kee darshak deergha ke shrotao ke lie kaan ke pardo ke faTane ka bhee khatara manDaraata rahata hai .:)

vaise ye kaabiliyat kitanee aham hai isaka andaaja aap is puraanee ghaTana se laga sakate hai. ye us vakt kee baat hai jab indeevar ke geet filmo me kaafee mashahoor ho rahe the.ek baar kaafee paise dekar Indeevar ko ek kavi sammelan me aamantrit kiya gaya aur jaisa ki amooman hota hai unhe sabase ant me kaavy paaTh karane ko bulaaya gaya . unhonne apane ek behad mashahoor geet se shuruaat karee par unakee adaayagee itanee lachar thee ki janata geet ke beech se hee uTh kar apane ghar ko palaayan kar gee aur aayojak apane turup ke patte ka aisa hashr hote dekh sar dhunate rah ge .

par baat shuru kee thee mainne Harivansh Rai Bachchan se aur aaj unhee kee ek kavita aapake saamane unake suputr amitaabh bachchan ke svar me pesh kar raha hoo. ye kavita prem aur virah kee bhaavanao se labarej hai . itanee khoobasooratee se 'Bachchan jee' ne ek premee ke dard ko ubhaara hai ki kya kaha jae ! aur jab aap ise Amitaabh kee gaharee aavaaj me sunate hai to usaka asar is kadar hota hai ki man kavi kee panktiyo ko apane dil me aatmasaat sa paata hai .


<bgsound src="raataadhi.mp3">

Raat aadhee kheench kar meri hathelee
Ek ungli se likha tha pyar, tumne.

phaasla tha kuchh humare bistaron me
Aur charon or duniya so rahi thi.
Tarikayein hi gagan ki janti hain
Jo dasha dil ki tumhare ho rahi thi.
Main tumhare paas hokar door tumse
Adhjaga sa aur adhsoya hua sa.
Raat aadhi kheench kar meri hatheli
Ek ungli se likha tha pyar, tumne.

Ek bijli chhu gayi, sahsa jaga main
Krishnapakshi chaand nikla tha gagan me.
Is tarah karwat padi thi tum ki aansoo
Bah rahe the is nayan se us nayan me.
Main laga doon aag us sansaar me
Hai pyar jisme is tarah asamarth-kaatar.
Jaanti ho us samay kya kar guzarne ke liye
Tha kar diya taiyyaar tumne!
Raat aadhi kheench kar meri hatheli
Ek ungli se likha tha pyar, tumne.

Praath he ki oar ko hai raat chalthi
Auh ujaale mein andhera doob jaata.
Manch he poora badaltha kaun aise
kkoobiyon ke saath parde ko uttatha.
ek chehra sa laga thumne liya tha
aur meine tha utharaa ek chehra.
vo nisha ka swapn mera tha ke apne
par gazab ka tha kiya adhikaar thumne.
Raat aadhi kheench kar meri hatheli
Ek ungli se likha tha pyar, tumne.

Aur utne faasle par aaj tak
Sau yatna kar ke bhi na aye fir kabhi hum.
Fir na aya waqt waisa, fir na mauka us tarah ka
Fir na lauta chaand nirmam.
Aur apni wedna main kya bataun!
Kya nahi ye panktiyan khud bolti hain?
Bujh nahi paya abhi tak us samay jo
Rakh diya tha haath par angaar tumne.
Raat aadhi kheench kar meri hatheli,
Ek ungli se likha tha pyar, tumne.
(Roman transliteration with the help of bhomiyo.com)

Friday, May 11, 2007

Rabindranath Tagore ki Pustak 'Gora'


Baat Feb kee hai . Kanapur se Neelaanchal Express se lauT raha tha . Muri mein train itanee vilambit huee ki Ranchi kee or jaane vaalee saaree train chhooT gayeen .Aglee Train do ghanTe baad aane vaalee thee . samay kaaTana bhaaree paD raha tha ki saamane patra patrikaon se sajee ThelaagaaDee par najar paDee aur dekha jeevan ke asalee satya ka darshan karaatee satya, madhur aur manohar katha-kahaaniyo ke beech se Taiore chintit se jhaank rahe hain.
-
Isase pahale mainne Geetaanjali kee kuchh kavitaon ko chhoDakar Tagore ko kabhee nahee paDha tha . Par Gora ke baare me suna tha ki achchhee kitaab hai , isaliye jab pustak vikreta ne 300 pages kee is kitaab ka moolya matra 80 rupaye bataaya to turant mainne ise khareedane ka man bana liya .

Katha kee parshThabhoomi us samay kee hai jab Raja Ram Mohan Roy dvaara sthaapit Brahma Samaaj tejee se hindu samaaj me apana paanv pasaar raha tha . Jahaan jaatigat bhedabhaav ne samaaj ke nimn tabako me ek asantosh paida kar rakha tha, vaheen doosaree or reeti rivaaj aur vyarth ke dhaarmik anushThaano aur aaDambaro se hinduon ka paDha likha naya tabaka ek ghuTan see mahasoos kar raha tha .

Par kya is baare me upanyaas ka mukhy kiradaar Gora bhee aisa hee sochata tha ?
Ye janne ke liye padhein Hindi mein is pustak ki vristat charcha.

Saturday, May 05, 2007

New Officer's Hostel, Patna : Wo 'Ghar' Yaad Aata Hai !

New Officer’s Hostel yaani Patna ke Bailey Road aur Boring Road ke milan bindu ke paas banee bahumanjila imaarat Jise baahar ke log 'Kabootarkhaana' ke naam se bhee jaanate the, par hamaare liye to vah tha hamaara pyaara aashiyaana . 1977 me main yahaa aaya aur kareeb 1994 me yahaa se rukhasat huaa. Yoon kahe yahee mai paDh likh kar baDa hua !

Aaj bhee jab is imaarat ke bagal se gujarata hoon, isamein bitaaye hue pal yaad aate hai . Aaj kee is pravishTi me apane usee pyaare ghar se juDee kuchh khaTTee-meeThee yaadein aap ke samaksh rakhoonga jo aaj bhee mere smarti paTal par ankit hain .

7-8 saal ka raha hoonga jab apane isee ghar se jaatiyo me vibhaajit apane raajy kee pahalee tasaveer dekhee . Waqt 1979-80 ke aas paas ka hogaa. Roj school se ghar aane ke baad jindaabaad murdaabaad ke naare sunayee dete the . Patna ka tabka haDataalee chauk ghar ke paas hee hua karata tha . So saare juloos ghar ke nikaT hee rok liye jaate the. Forward-bakward se tab matalab aage peechhe hee samajh aata tha . Jab Karpooree Thakur ke khilaaf naare lagate to usaka matalab ye hota ki ye aage vaalo kee tolee hai aur jab mukhyamantree kee maseehayee ke charche hote to anumaan laga leta ki aaj ka kunaba peechhe vaalon ka hai . Roj-roj ke is tamaashe ko dekhakar apanee utsukata daba paana jab mushkil ho jaata to aakhir maa se poochh hee baiThate ki maa ham kis taraf hai? Par maan idhar-udhar kee baaton mein aise javaab ko ghumaatee ki prashn anuttarit hee rah jaata tha .

Aise hee ek din baDhate tanaav se maamale ne itana tool pakaDa ki bhaaree patharaav ke javaab me jama huee bheeD par pahale aansoo gas ke gole chhoDe gaye . LaDake bagal kee ek imaarat 'Raajeev Kamal' kee chhat par ja chaDhe. Par police vaale vahaan bhee ja pahunche to vahaan se kood kar saare hamaare isee Officer’s Hostel kee or bhaage . Jo pakaDe ge buree tarah DanDon se piTe . Bhaagate dauDate panaah ke liye pahale talle par kuchh ne sharaN lee. kuchh to kuchh polices ke bhay se seedhe oopar chaDhate hue us jalatee dupaharee me cement kee banee paanee kee Tankee par leT gaye . Aaj bhee vo Tankee baal man se dekhe ge us bhavaayah drishya kee yaad dilaatee hai .

Waqt beetata gaya..... . Officer’s Hostel ke teesare talle ka vo do kamaro ka ghar priy se priyatar hota chala gaya . Hamaara hostel teen blocks me vibhaajit tha . Pratyek talle me 12 ghar aur ek block me 60 . Yaani us chhoTe se parisar me 180 parivaaro ka aashiyaana tha .

1982 kee baat hai . Delhi se Asiad ka seedha prasaaraN aana shuru hua aur usee vakt Patna mein rangeen TV aaya . Hamaare ghar mein nahee aaya to kya hua ham saare bachche subah 9 baje TV dekhane bagal ke parichit ke block me jaate aur seedhe jaakar kaaleen par apana apana aasan jama lete . Aise hee cricket match dekha jaata . Vipakshee Teem ke khilaaDee out nahee hote to log apanee-apanee seats badalate . Vipakshee gendabaaj bahut tang kar raha hota to koee uThake usako apana moja sungha kar aataa. aisee hee bheeD guruvaar, ravivaar kee filmo ke liye juTatee. saamoohik Dhang se TV. dekhane ka vo aanand hee alag tha .

School kee chhuTTee hotee to do seeDhiyo ke beech kee vargaakaar jagah par kabhee carromboard, kabhee vyaapaar to kabhee shataranj kee bisaat bichhatee. Flat kee un seeDhiyo par 1983 me vishva cup final me 180 ke kareeb out hone par dukhee hokar ekatrit hue the ki aage ab kya dekhana ! Aur phir unhee seeDhiyo par apane trnsistor par radio pakistan se aatee commentary ko saathiyo ke beech sunate hue Rothman’s Cup me Pak ko shikast diye jaane par jabaradast ho halla machaaya tha .

Holee aatee to purush, mahilao, laDake laDakiyo kee alag alag Toliyaan ban jaatee . Durga pooja me hafte bhar alag jashn ka maahaul hota . Aur deepaavalee kee sharaaratein to poochhein mat . Ek dafe laDako ne beeDee bam ka lachchha banaakar ek sundar kanya ke ghar kee taraf uchhaala . Ab bam ka guchchha to doosare talle tak pahunchane se pahale hee phaTa par kanya ne usake javaab me jo aaloo bam laDako ke neeche khaDe jhunD ke beecho beech giraaya usake phaTane se jo bhagadaD machee vo ghaTana yaad aate hee ham sab ko hansee ke daure paD jaate the .

Phir ek din vo aaya jab apane is Officer’s Hostel mein kala filmon kee mashahoor taarika Deepti Naval bahoo ban kar aayeen . Us vakt unake pati Prakaash Jha saahab hua karate the aur unaka parivaar 'C Block' mein raha karata thaa. Ab jahaan se bhee unake ghar kee baalakonee dikh sakatee thee log har us jagah me bhar gaye . Kareeb aadhe paun ghanTe ke baad Deepti Naval ne apanee baalakonee se sabaka abhivaadan sveekaara aur unakee ek jhalak dekh ke ham hosTel vaasee tar ge.

Kishoraavastha me ghar ke baahar kee baDee se ye bolakonee hamaare bahut kaam aayee . Vahee vo aitihaasik sthal tha jahaa par 16 saal kee umr me ek shaam ham jab nepathya mein taak rahe the to saamane se hame kisee ne vo kya kahate hai angrejee me vev (wave) kiya . Mai to ekadam se chakaraaya ki ye mere liye to nahee ho sakata , Pahale to apanee baalakonee ke neeche dekha aur phir oopar. Koee nahee tha aur mere is kritya par saamane se muskuraahaT ka daur jaaree tha . Dil kee baDee ikchchha thee ki ham bhee haath hila hee de par haath to jaise sau kilo ke bhaar se jaD ho gaya . Apanee akarmaNyata se upajee kheej ko chhupaane ke lie tab bhee apane isee pyaare ghar kee sharaN lee thee.

Par Officer’s Hostel se juDee sabase romaanchak ghaTana ghaTit huee 1988 me . Us din, din bhar bijalee nahee thee so paanee bhee nahee aaya tha . Der raat jab nagar nigam ka Tanker aaya to paanee bharane ke lie bheeD lag gayee aur jaisa ki aise haalaat me bhaarat ke har kasbe shahar me hota hai mohalle ke baashindo me pahale main.. pahale main... ko lekar aapas me garmaagarmee bhee kaafee huee . Nateejan der raat tak 12 baje sab sone gaye . Raat ke antim pahar kareeb saaDhe teen aur chaar ke aasapaas paanchave talle se saare bartano ke girane kee aavaaje aane lagee . Dharatee se so-so kee dhvani see nikal rahee thee . Mera ghar teesare talle par tha jab meree aankh khulee to mainne palang ko pooree tarah hilata paaya . Pooree taakat se mai chillaaya bhookamp . Ab sabke jagate jagaate to bhookamp ka veg khatm ho gaya tha par phir bhaagate dauDate jab neeche pahunche to apane mohallevaalo kee kaarastaanee ke dilachasp namoone saamane aaye

paDos ka Mehta parivaar bhookamp kee tejee me bhee chaabee ke guchchhe talaashata rah gaya.

Verma jee do talle se waqt rahate hee bachcho sahit neeche utar to aaye par haDabaDaahaT me beevee ko ghar ke andar hee band kar aaye.

aur kuchh logon ko to neeche aane par khyaal aaya ki ve jin vastro me neeche aa ge hai vo saarvajanik sthal hetu bilakul varjit hai . :)

Engineering me jaane ke saath hee Officer’s Hostel se mera juDaav khatm hota gaya par us ghar me bitayein varsho se sanchit yaadein man me hamesha kar liye ghar kar gayeen.

Ab to pitaajee ne to ek makaan Patna me bana liyaa. Par jab bhee koee apane ghar kee baat karata hai aaj bhee Officer’s Hostel kee vo galiyaa jehan me ekadam se ubharatee hain . Waqt ke saath jindagee me kee chhaviyaa kabhee dhoomil nahee hotee......bahut kuchh chhoTee see baat film ke is geet kee tarah.

CHHOTI SI BAAT - N...

Roman transliteration thru Bhomiyo.com

Tuesday, May 01, 2007

Humse Wo Door Door Rehte Hain : Munni Begum

Ghazal gaayikaon mein Munni Begum kee gaayan shailee kuchh haTakar rahee hai . mursheedaabaad me janmee, baangalaadesh me palee baDhee aur sattar ke dashak me karanchee se sangeet ka kairiyar shuru karane vaalee munnee begam ne shaastreey sangeet kee shiksha baangalaadesh ke gulaam mustafa vaarasee se paee thee .

To kya alag tha Munni Begum ke lahaje me...shabdo ke chunaavo kee saadagee aur bina ghuma fira kar use gaane ka tareeka . Iseelie begam ko janata ne to sar aankho par biThaaya par vahee gajal panDito ne unakee gaayikee ke taur tareeke par savaaliya nishaan lagae . Par Munni Begum ne apanee shailee nahee badalee . Vo us jamaane kee pahalee aisee gaayika thee jo apanee mahafil me haaramoniyam le kar khud baiThatee thee .
Munni Begum khud bataatee hai ki us vakt log sirf ye dekhane pahunchate the ki ye dubalee patalee see laDakee haaramoniyam bajaate hue ga kaise letee hai . Apanee gaayakee ke saath Munni Begum ko apanee gajalo kee dhune khud banaana aur sTej par apane shrotao se sanvaad sthaapit karana behad pasand hai . .

Waise to Munni Begum kee saikaDo gajale hai par aaj unakee ek halkee fulkee see gajal pesh kar raha hoo jo shaayad hee aapane pahale sunee hogee . aap dhyaan de ki is gajal ka lagabhag har sher aisa hai jo ek rikshevaale se lekar ek gajal premee ke dil ko gudagudaega .

To hujoor der kis baat kee apane speekar kee aavaaj tej keejie aur saath- saath maja leejie is pyaaree see gajal ka !


<bgsound src="Humsewohdurdurrehatehein.WMA">

hamase vo door door rahate hai
dil me lekin juroor rahate hai

isalie dekhabhaal karatee hoo
aeene me hujoor rahate hai

log itane kusoor kar ke bhee
is tarah bekasoor rahate hai

mai jamee par taalaash karatee hoo
aap taaro se door rahate hai

meree tishan-e -mijaajiyo me 'adam'
mahakade pe jaroor rahate hai .

tishanagee - ;pyaas, pipaasa

Special thanks to DON jiske radio blog par pehli dafe maine ye ghazal suni.